ರಾಷ್ಟ್ರಪತಿಗಳ ಔತಣ ಕೂಟಕ್ಕೆ ಭರದ ಸಿದ್ದತೆಯಲ್ಲಿ ಕುಮಾರಕಂ ಹೋಟೆಲ್ ತಾಜ್: ಕೇರಳ ಪಾಕಪದ್ಧತಿಯಲ್ಲಿ ಭೋಜನಕೂಟ

ಕೊಟ್ಟಾಯಂ: ರಾಷ್ಟ್ರಪತಿಗಳನ್ನು ಸ್ವಾಗತಿಸಲು ಕುಮಾರಕಂ ಸಜ್ಜಾಗಿದೆ. ಪಾಲಾದಲ್ಲಿ ನಡೆಯುವ ಸಮಾರಂಭದ ನಂತರ ರಾಷ್ಟ್ರಪತಿಗಳು ಇಂದು ರಾತ್ರಿ ಕುಮಾರಕಂಗೆ ಆಗಮಿಸಲಿದ್ದಾರೆ.

ರಾಷ್ಟ್ರಪತಿಗಳ ಭೇಟಿಯೊಂದಿಗೆ ಕುಮಾರಕಂನ ಹೆಸರು ರಾಷ್ಟ್ರೀಯ ಮಾಧ್ಯಮಗಳಲ್ಲಿ ಮತ್ತೆ ಸುದ್ದಿಯಾಗಲಿದೆ ಎಂದು ಕುಮಾರಕಂನ ಪ್ರವಾಸೋದ್ಯಮ ವಲಯವು ಪುಳಕಿತವಾಗಿದೆ.  ರಾಷ್ಟ್ರಪತಿಗಳ ಭೇಟಿಗೆ ಸಂಬಂಧಿಸಿದಂತೆ ಕುಮಾರಕಂನಲ್ಲಿ ಸುಂದರೀಕರಣ ಅಭಿಯಾನವನ್ನು ಕೈಗೊಳ್ಳಲಾಯಿತು. 

ರಾಷ್ಟ್ರಪತಿ ದ್ರೌಪದಿ ಮುರ್ಮು ಕುಮಾರಕಂನ ತಾಜ್ ಹೋಟೆಲ್‍ನಲ್ಲಿ ತಂಗಿದ್ದಾರೆ. ಮಾಜಿ ರಾಷ್ಟ್ರಪತಿ ಪ್ರತಿಭಾ ಪಾಟೀಲ್ ಕುಮಾರಕಂಗೆ ಭೇಟಿ ನೀಡಿದ ಸಮಯದಲ್ಲಿ ಅವರು ತಂಗಿದ್ದ ಅದೇ ಕಾಟೇಜ್‍ನಲ್ಲಿ ದ್ರೌಪದಿ ಮುರ್ಮು ವಾಸ್ತವ್ಯ ಹೂಡಲಿದ್ದಾರೆ. 

ಇದು ತಾಜ್ ಹೋಟೆಲ್‍ನ 24 ನೇ ಸಂಖ್ಯೆಯ ಕಾಟೇಜ್ ಆಗಿದ್ದು, ಇಲ್ಲಿ ವೆಂಬನಾಡ್ ಸರೋವರದ ಸೌಂದರ್ಯವನ್ನು ಸಂಪೂರ್ಣವಾಗಿ ಆನಂದಿಸಬಹುದು. ಮಾಜಿ ರಾಷ್ಟ್ರಪತಿ ಪ್ರತಿಭಾ ಪಾಟೀಲ್ ಅವರು 2012 ರಲ್ಲಿ ಕುಮಾರಕಂಗೆ ಭೇಟಿ ನೀಡಿದಾಗ ಇದೇ ಕಾಟೇಜ್‍ನಲ್ಲಿ ತಂಗಿದ್ದರು.

ಸಂಜೆ, ರಾಷ್ಟ್ರಪತಿಗಾಗಿ ಹೋಟೆಲ್ ನಲ್ಲಿ ಕೇರಳ ಕಲಾ ಪ್ರಕಾರಗಳನ್ನು ಪ್ರಸ್ತುತಪಡಿಸಲಾಗುತ್ತದೆ. ಭೋಜನಕೂಟದಲ್ಲಿ ಸುಮಾರು ಐವತ್ತು ಜನರಿಗೆ ಆಹಾರ ವಿತರಿಸಲು ಆದೇಶ ನೀಡಲಾಗಿದೆ. ಮೆನುವಿನಲ್ಲಿ ಸಂಪೂರ್ಣವಾಗಿ ಕೇರಳ ಶೈಲಿಯ ಮೀನು ಮತ್ತು ಮಾಂಸ ಭಕ್ಷ್ಯಗಳ ದೀರ್ಘ ಪಟ್ಟಿ ಇದೆ. ತಾಜ್ ಗ್ರೂಪ್‍ನ ಮುಖ್ಯ ಅಡುಗೆಯವರು ಆಹಾರವನ್ನು ತಯಾರಿಸುತ್ತಾರೆ.

ಉಪಾಹಾರಕ್ಕಾಗಿ ಅಪ್ಪ, ದೋಸೆ, ಇಡಿಯಪ್ಪ, ಉಪ್ಪಿಟ್ಟು(ಉಪ್ಪುಮಾವು), ಹಣ್ಣುಗಳ ಸಹಿತ ಹತ್ತಕ್ಕೂ ಹೆಚ್ಚು ಖಾದ್ಯಗಳನ್ನು ತಯಾರಿಸಲಾಗುತ್ತಿದೆ. ರಾಷ್ಟ್ರಪತಿಗಳು ಸರೋವರಕ್ಕೆ ಪ್ರವಾಸ ಕೈಗೊಳ್ಳುತ್ತಾರೆಯೇ ಎಂದು ಎಲ್ಲರೂ ಕಾತುರದಿಂದ ಕಾಯುತ್ತಿದ್ದಾರೆ.