ವೀಸಾ: ಅಮೆರಿಕಕ್ಕೆ ಸಡ್ಡು ಹೊಡೆಯುತ್ತಿರುವ ಚೀನಾ

ಹಾಂಗ್‌ಕಾಂಗ್‌: ಉದ್ಯೋಗ ವಲಯದಲ್ಲಿ ಅಮೆರಿಕಕ್ಕೆ ಸಡ್ಡು ಹೊಡೆಯುವ ಉದ್ದೇಶದಿಂದ ಚೀನಾವು ಜಾರಿಗೆ ತಂದಿರುವ 'ಕೆ-ವೀಸಾ' ವಿದೇಶಗಳಲ್ಲಿನ ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದ ಪ್ರತಿಭೆಗಳನ್ನು ಸೆಳೆಯಲು ಪ್ರಯತ್ನಿಸುತ್ತಿದೆ. 

ಹೊಸ ವೀಸಾ ವ್ಯವಸ್ಥೆಯನ್ನು ಚೀನಾ ಕಳೆದ ತಿಂಗಳು ಜಾರಿಗೊಳಿಸಿದ್ದು, ಈ ಮೂಲಕ ವಿದೇಶಿ ಪ್ರತಿಭೆ ಮತ್ತು ತಂತ್ರಜ್ಞಾನಗಳ ನಾಗಲೋಟದಲ್ಲಿ ಅಮೆರಿಕವನ್ನು ಹಿಂದಿಕ್ಕುವ ಯೋಜನೆಯನ್ನು ರೂಪಿಸಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್ ಅವರು ವಲಸೆ ನೀತಿಗಳನ್ನು ಬಿಗಿಗೊಳಿಸಿರುವುದರಿಂದ 'ಎಚ್‌-1ಬಿ' ವೀಸಾಕ್ಕೆ ಸಂಬಂಧಿಸಿ ಅಸ್ಥಿರತೆ ಉಂಟಾಗಿರುವ ಸಂದರ್ಭದಲ್ಲಿ ಚೀನಾವು ಹೊಸ ವೀಸಾದ ದಾಳ ಉರುಳಿಸಿರುವುದು ಮಹತ್ವ ಪಡೆದುಕೊಂಡಿದೆ.

'ಕೆ-ವೀಸಾವು‌ ಅಮೆರಿಕದ ಎಚ್‌-1ಬಿ ವೀಸಾಗೆ ಸಮಾನವಾಗಿದೆ' ಎಂದು ಭಾರತ ಮತ್ತು ಅಮೆರಿಕದಲ್ಲಿ ಕೆಲಸ ಮಾಡಿರುವ ತಜ್ಞ ಐಟಿ ಉದ್ಯೋಗಿ ವೈಷ್ಣವಿ ಶ್ರೀನಿವಾಸಗೋಪಾಲನ್‌ ಅವರು ಅಭಿಪ್ರಾಯಪಟ್ಟಿದ್ದಾರೆ. ಅವರು ಚೀನಾದಲ್ಲಿ ಕೆಲಸ ಮಾಡಲು ಉತ್ಸುಕರಾಗಿದ್ದಾರೆ.

ವಿದೇಶಿಗರಿಗೆ ನೀಡಲಾಗುತ್ತಿರುವ ಆರ್‌-ವೀಸಾ ಸೇರಿದಂತೆ ಚೀನಾದಲ್ಲಿ ಪ್ರಸ್ತುತ ಇರುವ ವೀಸಾ ವ್ಯವಸ್ಥೆಗಳಿಗೆ ಜೊತೆಗೆ ಕೆ-ವೀಸಾ ಜಾರಿಗೆ ತರಲಾಗಿದೆ. ಆದರೆ ಅರ್ಜಿ ಸಲ್ಲಿಸುವ ಮೊದಲೇ ಉದ್ಯೋಗ ಪಡೆದಿರಬೇಕು ಎಂಬ ನಿಯಮ ಸೇರಿದಂತೆ ಹಲವು ನಿಯಮಗ‌ಳಿಗೆ ಹೊಸ ವೀಸಾ ವ್ಯವಸ್ಥೆಯಲ್ಲಿ ವಿನಾಯಿತಿ ನೀಡಲಾಗಿದೆ‌.