ಮಲಬಾರ್‍ನಲ್ಲೂ ಅರಳ ತೊಡಗಿದ ಕಮಲ: ಎಂ.ವಿ. ಶ್ರೇಯಾಂಸ್ ಕುಮಾರ್ ಅವರ ವಾರ್ಡ್‍ನ್ನು ವಶಪಡಿಸಿದ ಬಿಜೆಪಿ: ಕೂತುಪರಂಬ ಮತ್ತು ನಿಲಂಬೂರಿನಲ್ಲಿ ಬಿಜೆಪಿಗೆ ಗೆಲುವು

ವಯನಾಡ್: ಕಲ್ಪೆಟ್ಟ ನಗರಸಭೆಯಲ್ಲೂ ಬಿಜೆಪಿ ತನ್ನ ಖಾತೆ ತೆರೆದಿದೆ. ಪುಲಿಯಾರ್ಮಲ ಮತ್ತು ಕೈನಟ್ಟಿಯ ಎರಡನೇ ವಾರ್ಡ್‍ನಲ್ಲಿ ಬಿಜೆಪಿ ಗೆದ್ದಿದೆ.

ಪುಲಿಯಾರ್ಮಲ ಎಲ್‍ಡಿಎಫ್ ನಾಯಕ ಎಂ.ವಿ. ಶ್ರೇಯಾಂಸ್ ಕುಮಾರ್ ಅವರ ವಾರ್ಡ್ ಆಗಿದೆ. ಶ್ರೇಯಾಂಸ್ ಕುಮಾರ್ ಅವರ ವಾರ್ಡ್‍ನಲ್ಲಿಯೇ ಕಮಲ ಅರಳಿರುವುದು ಗೆಲುವಿನ ಮಾಧುರ್ಯವನ್ನು ದ್ವಿಗುಣಗೊಳಿಸಿದೆ. ಪುಲಿಯಾರ್ಮಲ ವಾರ್ಡ್‍ನಲ್ಲಿ, ಬಿಜೆಪಿಯ ರಂಜಿತ್ ಆರ್‍ಜೆಡಿಯ ಸನುಷ್‍ಕುಮಾರ್ ಅವರನ್ನು ಪರಾಭವಗೊಳಿಸಿದರು.  

ಕಲ್ಪೆಟ್ಟದಲ್ಲಿ ಗೆದ್ದ ಎರಡನೇ ಬಿಜೆಪಿ ಅಭ್ಯರ್ಥಿ ವಿಎ ಜಿತೇಶ್. ವಯನಾಡಿನಲ್ಲಿ ಬಿಜೆಪಿಯ ಸ್ಥಾನಗಳ ಹೆಚ್ಚಳವು ಎಡ ಮತ್ತು ಬಲ ರಂಗಗಳೆರಡನ್ನೂ ಅಸ್ತವ್ಯಸ್ತಗೊಳಿಸುವುದು ಖಚಿತ.

ಇತಿಹಾಸದಲ್ಲಿ ಮೊದಲ ಬಾರಿಗೆ, ವಯನಾಡಿನ ತಿರುನೆಲ್ಲಿ ಪಂಚಾಯತ್‍ನಲ್ಲಿಯೂ ಬಿಜೆಪಿ ತನ್ನ ಖಾತೆಯನ್ನು ತೆರೆದಿದೆ. ಮೊದಲ ವಾರ್ಡ್‍ನಲ್ಲಿ ಬಿಜೆಪಿ ಭರ್ಜರಿ ಜಯ ಸಾಧಿಸಿದೆ. ಕಳೆದ ಬಾರಿ ಎಲ್‍ಡಿಎಫ್ 100 ಪ್ರತಿಶತ ಗೆದ್ದ ಪಂಚಾಯತ್ ಇದು.

ಮಲಬಾರ್ ಪ್ರದೇಶದಲ್ಲಿ ಬಿಜೆಪಿ ಪ್ರಬಲ ಪ್ರಗತಿ ಸಾಧಿಸುತ್ತಿದೆ. ನಿಲಂಬೂರ್ ನಗರಸಭೆಯಲ್ಲೂ ಬಿಜೆಪಿ ಗೆಲುವು ಸಾಧಿಸಿದೆ. ನಿಲಂಬೂರ್ ನಗರಸಭೆಯ ಮೊದಲ ವಿಭಾಗದಲ್ಲಿ ಬಿಜೆಪಿ ಅಭ್ಯರ್ಥಿ ಎಂಕೆ. ವಿಜಯ ನಾರಾಯಣನ್ 19 ಮತಗಳಿಂದ ಜಯಗಳಿಸಿದರು.

ಕಣ್ಣೂರಿನ ಕೆಂಪುಕೋಟೆ ಕೂತುಪರಂಬಿನಲ್ಲೂ ಬಿಜೆಪಿ ತನ್ನ ಖಾತೆಯನ್ನು ತೆರೆಯಿತು. ನಗರಸಭೆಯ ಪಾಲಪರಂಬ ವಾರ್ಡ್‍ನಲ್ಲಿ ಬಿಜೆಪಿ ಅಭ್ಯರ್ಥಿ ರಮಿತಾ (615) ಸಿಪಿಎಂ ಅಭ್ಯರ್ಥಿ ಪಿ. ಶೈಜಾ (271) ಅವರನ್ನು ಪರಾಭವಗೊಳಿಸಿದರು.