ಸ್ಥಳೀಯಾಡಳಿತ ಫಲಿತಾಂಶ-ಹಲವೆಡೆ ಅತಂತ್ರ

ಬದಿಯಡ್ಕ ಗ್ರಾಮ ಪಂಚಾಯತಿಯಲ್ಲಿ ಸಮಬಲದಲ್ಲಿ ಬಿಜೆಪಿ-ಯುಡಿಎಫ್: ಆಡಳಿತ ಚುಕ್ಕಾಣಿ ಕುತೂಹಲ   

ಬದಿಯಡ್ಕ: ಸ್ಥಳೀಯಾಡಳಿತ ಚುನಾವಣೆಯ ಫಲಿತಾಂಶ ಶನಿವಾರ ಪ್ರಕಟಗೊಂಡಿದ್ದು ಬದಿಯಡ್ಕ ಗ್ರಾಮ ಪಂಚಾಯತಿಯಲ್ಲಿ ಬಿಜೆಪಿ ಹಾಗೂ ಯುಡಿಎಫ್ ಸಮಬಲದೊಂದಿಗೆ ಆಡಳಿತ ಚುಕ್ಕಾಣಿಯನ್ನು ಅತಂತ್ರಗೊಳಿಸಿದೆ. ಒಟ್ಟು 21 ಸ್ಥಾನಗಳ ಪೈಕಿ ಬಿಜೆಪಿ 10, ಯುಡಿಎಫ್ 10 ಹಾಗೂ ಎಲ್.ಡಿ.ಎಫ್ ಒಂದು ಸ್ಥಾನ ಪಡೆದುಕೊಂಡಿದೆ.

ಪಂಚಾಯತಿಯ 1 ಮಜೀರ್ಪಳ್ಳ(1), ಕಿಳಿಂಗಾರ್(2), ನೀರ್ಚಾಲು(3), ಕಾಡಮನೆ(6), ಮೆಡಿಕಲ್ ಕಾಲೇಜು(8), ಚಾಲಕ್ಕೋಡಿ(9), ವಿದ್ಯಾಗಿರಿ(10), ಪೆರಡಾಲ(13), ಪುದುಕೋಳಿ(18), ತಲ್ಪನಾಜೆ(19)ಎಂಬಂತೆ ವಾರ್ಡ್ ಗಳಲ್ಲಿ ಬಿಜೆಪಿ ಜಯಗಳಿಸಿದೆ.

ಮೂಕಂಪಾರೆ(5), ಪಳ್ಳತ್ತಡ್ಕ(7), ಬಾರಡ್ಕ(11), ಬದಿಯಡ್ಕ(12), ಕನ್ನೆಪ್ಪಾಡಿ(14), ಚೇಡೇಕಲ್(15), ಚರ್ಲಡ್ಕ(16), ಮಾನ್ಯ(17), ಬೇಳ(20), ಸೀತಾಂಗೋಳಿ(21) ಎಂಬ ವಾರ್ಡ್‍ಗಳಲಲಿ ಯುಡಿಎಫ್ ಅಭ್ಯರ್ಥಿಗಳು ಜಯಗಳಿಸಿದ್ದಾರೆ. ವಾರ್ಡ್ ಸಂಖ್ಯೆ 4ರ ದೇವರಮೆಟ್ಟಲ್ಲಿ ಎಲ್.ಡಿ.ಎಫ್ ಅಭ್ಯರ್ಥಿ ಜಯಗಳಿಸಿದ್ದಾರೆ.

ಪಂಚಾಯತಿಯ 21 ಸದಸ್ಯ ಸ್ಥಾನಗಳ ಪೈಕಿ ಬಿಜೆಪಿ ಹಾಗೂ ಯುಡಿಎಫ್ ತಲಾ 10 ಸ್ಥಾನಗಳನ್ನು ಪಡೆದಿದ್ದು, ಆಡಳಿತ ಚುಕ್ಕಾಣಿ ಹಿಡಿಯಲು ಕನಿಷ್ಠ 11 ಸ್ಥಾನಗಳ ಅಗತ್ಯವಿದೆ. ಈ ಹಿನ್ನೆಲೆಯಲ್ಲಿ ಆಡಳಿತ ಯಾರ ಕೈಸೇರಲಿದೆ ಎಂಬುದು ಕುತೂಹಲ ಮೂಡಿಸಿದೆ. ಪಕ್ಷಗಳು ಚರ್ಚೆಯಲ್ಲಿ ತೊಡಗಿಕೊಂಡಿದೆ. 

ಕುಂಬ್ಡಾಜೆ ಗ್ರಾಮ ಪಂಚಾಯತಿಯಲ್ಲಿ ಯುಡಿಎಫ್ ನ್ನು ಪರಾಭವಗೊಳಿಸಿ ಬಿಜೆರಪಿ ಅಧಿಕಾರದ ಗದ್ದುಗೆ ವಶಪಡಿಸಿದೆ. ಇಲ್ಲಿ ಬಿಜೆಪಿ 7, ಯುಡಿಎಫ್ 6 ಹಾಗೂ ಸಿಪಿಎಂ 1 ಅಭ್ಯರ್ಥಿ ಜಯಗಳಿಸಿದ್ದಾರೆ.

ಕುಂಬಳೆ ಗ್ರಾ.ಪಂ.ಯಲ್ಲಿ ಯುಡಿಎಫ್ ಅಧಿಕಾರ ಉಳಿಸಿಕೊಂಡಿದೆ. ಯುಡಿಎಫ್ 15, ಲೀಗ್ ಸ್ವತಂತ್ರ 1, ಬಿಜೆಪಿ 5, ಸಿಪಿಐಎಂ 3 ಸ್ಥಾನಗಳನ್ನು ಪಡೆದಿದೆ.

ಪುತ್ತಿಗೆ ಗ್ರಾಮ ಪಂಚಾಯತಿ ಆಡಳಿತ ನಡೆಸುತ್ತಿದ್ದ ಎಲ್.ಡಿ.ಎಫ್. ಹೀನಾಯವಾಗಿ ಸೋಲುಕಂಡಿದೆ. ಇಲ್ಲಿ ಯುಡಿಎಫ್ 7, ಸಿಪಿಎಂ 6, ಬಿಜೆಪಿ 2 ಹಾಗೂ 1 ಬಿಜೆಪಿ ಬಂಡಾಯ ಅಭ್ಯರ್ಥಿ ವಿಜಯಗಳಿಸಿದ್ದಾರೆ.

ಬೆಳ್ಳೂರು ಗ್ರಾಮ ಪಂಚಾಯತಿಯಲ್ಲಿ 6 ಬಿಜೆಪಿ, 4 ಸ್ವತಂತ್ರ, ಯುಡಿಎಫ್ 2, ಎಲ್.ಡಿ.ಎಫ್. 2 ಎಂಬಂತೆ ಗೆಲುವು ಸಾಧಿಸಿದ್ದಾರೆ. 

ಎಣ್ಮಕಜೆ ಗ್ರಾಮ ಪಂಚಾಯತಿಯಲ್ಲಿ ಯುಡಿಎಫ್ 8, ಬಿಜೆಪಿ 6, ಎಲ್.ಡಿ.ಎಫ್ 4 ಎಂಬಂತೆ ಜಯಗಳಿಸಿದ್ದಾರೆ. ಎಣ್ಮಕಜೆ ಗ್ರಾಮ ಪಂಚಾಯತಿ ಅಧ್ಯಕ್ಷರಾಗಿರುವ ಸೋಮಶೇಖರ ಜೆಎಸ್ ಅವರು ಜಿಲ್ಲಾ ಪಂಚಾಯತಿಗೆ ಯುಡಿಎಫ್ ನಿಂದ ಸ್ಪರ್ಧಿಸಿ ಜಯಗಳಿಸಿದ್ದಾರೆ. ಜೊತೆಗೆ ಬ್ಲಾಕ್ ಪಂಚಾಯತಿಗೆ ಸ್ಪರ್ಧಿಸಿದ್ದ ಬಿಜೆಪಿ ಅಭ್ಯರ್ಥಿ ವಿದ್ಯಾಕುಮಾರಿ ಪುರುಷೋತ್ತಮ 1400 ಬಹುಮತದಿಂದ ಜಯಗಳಿಸಿದ್ದಾರೆ.

ಮೀಂಜ ಗ್ರಾಮ ಪಂಚಾಯತಿಯಲ್ಲಿ 9 ಯು.ಡಿ.ಎಫ್, 7 ಬಿಜೆಪಿ ಹಾಗೂ 1 ಎಲ್.ಡಿ.ಎಫ್. ಸ್ಥಾನಾರ್ಥಿಗಳು ಜಯ ಗಳಿಸಿದ್ದಾರೆ. 

ವರ್ಕಾಡಿ ಗ್ರಾಮ ಪಂಚಾಯತಿಯಲ್ಲಿ ಯುಡಿಎಫ್ 10, ಎಲ್.ಡಿ.ಎಫ್.6, ಬಿಜೆಪಿ 2 ಸ್ಥಾನಗಳನ್ನು ಗಳಿಸಿದೆ.