ಕುಂಬಳೆ ರೈಲು ನಿಲ್ದಾಣದ ಅಭಿವೃದ್ಧಿ 'ಟರ್ಫ್'ಗೆ ಮಾತ್ರ ಸೀಮಿತವಾಗುವುದೇ? ಸ್ಥಳೀಯರು ಮತ್ತು ಪ್ರಯಾಣಿಕರಿಗೆ ಕಳವಳ

0 samarasasudhi ಡಿಸೆಂಬರ್ 09, 2025

ಕುಂಬಳೆ: ಸುಮಾರು 37 ಎಕರೆ ವಿಸ್ತೀರ್ಣ ಹೊಂದಿರುವ ಕುಂಬಳೆ ರೈಲು ನಿಲ್ದಾಣದ ಅಭಿವೃದ್ಧಿಯ ಬೇಡಿಕೆ ದಶಕಗಳಿಂದ ಕೇಳಿಬರುತ್ತಿದೆ. ಸ್ಥಳೀಯರು ಮತ್ತು ಪ್ರಯಾಣಿಕರು ಮುಂದಿಡುವ ಪ್ರಮುಖ ಬೇಡಿಕೆಗಳಲ್ಲಿ ರೈಲ್ವೆ ನಿಲ್ದಾಣ ಪರಿಸರದ ಪೊದೆಗಳಿಂದಾವೃತವಾದ ಭೂಮಿಯನ್ನು ವಿವಿಧ ಯೋಜನೆಗಳಿಗೆ ಬಳಸುವುದು ಮತ್ತು ಕುಂಬಳೆ ರೈಲು ನಿಲ್ದಾಣವನ್ನು 'ಟರ್ಮಿನಲ್' ನಿಲ್ದಾಣವಾಗಿ ಮೇಲ್ದರ್ಜೆಗೇರಿಸುವುದು ಪ್ರಮುಖವಾದವುಗಳಾಗಿವೆ.

ಮಂಗಳೂರು ಮತ್ತು ಕಣ್ಣೂರು ನಡುವೆ ಇಷ್ಟು ದೊಡ್ಡ ಭೂಪ್ರದೇಶವನ್ನು ಹೊಂದಿರುವ ಯಾವುದೇ ರೈಲು ನಿಲ್ದಾಣವಿಲ್ಲ. ಇದೇ ಕಾರಣಕ್ಕಾಗಿ ಸ್ಥಳೀಯರು ಕುಂಬಳೆ ಟರ್ಮಿನಲ್ ನಿಲ್ದಾಣಕ್ಕಾಗಿ ಒತ್ತಾಯಿಸುತ್ತಿದ್ದಾರೆ. ಇದು ಸಾಕಾರಗೊಂಡರೆ, ಕಣ್ಣೂರಿನಲ್ಲಿ ಕೊನೆಗೊಳ್ಳುವ ರೈಲುಗಳು ಮತ್ತು ಮಂಗಳೂರಿನಲ್ಲಿ ಕೊನೆಗೊಳ್ಳುವ ರೈಲುಗಳು ಕುಂಬಳೆಯಲ್ಲಿ ವಿಶಾಲವಾದ ಸೌಲಭ್ಯಗಳೊಂದಿಗೆ ಟರ್ಮಿನಲ್ ನಿಲ್ದಾಣವನ್ನು ತಲುಪಲು ಸಾಧ್ಯವಾಗುತ್ತದೆ ಎಂದು ಸೂಚಿಸಲಾಗಿದೆ.

ಈ ನಿಟ್ಟಿನಲ್ಲಿ, ರೈಲ್ವೆ ಪ್ರಯಾಣಿಕರ ಸಂಘ, ಸ್ಥಳೀಯ ಸಂಘಟನೆಗಳು, ವ್ಯಾಪಾರ ಸಂಸ್ಥೆಗಳು ಮತ್ತು ಸ್ಥಳೀಯರು ನಿರಂತರವಾಗಿ ಸಚಿವರು, ರೈಲ್ವೆ ಅಧಿಕಾರಿಗಳು ಮತ್ತು ಸಾರ್ವಜನಿಕ ಪ್ರತಿನಿಧಿಗಳನ್ನು ಭೇಟಿ ಮಾಡಿ ಮನವಿ ಸಲ್ಲಿಸುತ್ತಿದ್ದಾರೆ.

ಕುಂಬಳೆ ಮತ್ತು ಹತ್ತಿರದ ಏಳು ಪಂಚಾಯತಿಗಳ ಜನರು ತಮ್ಮ ರೈಲು ಪ್ರಯಾಣಕ್ಕಾಗಿ ಕುಂಬಳೆ ರೈಲು ನಿಲ್ದಾಣವನ್ನು ಅವಲಂಬಿಸಿದ್ದಾರೆ. ಮಂಗಳೂರಿನ ಕಾಲೇಜುಗಳನ್ನು ಅವಲಂಬಿಸಿರುವ ವಿದ್ಯಾರ್ಥಿಗಳು, ಆಸ್ಪತ್ರೆಗಳಿಗೆ ಹೋಗುವ ರೋಗಿಗಳು ಮತ್ತು ವ್ಯಾಪಾರ ಉದ್ದೇಶಗಳಿಗಾಗಿ ಹೋಗುವ ವ್ಯಾಪಾರಿಗಳು ಪ್ರತಿದಿನ ಕುಂಬಳೆ ರೈಲು ನಿಲ್ದಾಣಕ್ಕೆ ಬರುವ ರೈಲುಗಳನ್ನು ಅವಲಂಬಿಸಿದ್ದಾರೆ.

ಜಿಲ್ಲೆಯಲ್ಲಿ ಆದಾಯ ಗಳಿಸುವ ಕುಂಬಳೆ ರೈಲು ನಿಲ್ದಾಣದಲ್ಲಿ ದೂರದ ರೈಲುಗಳನ್ನು ನಿಲ್ಲಿಸಲು ಅವಕಾಶವಿಲ್ಲ ಎಂಬುದು ಈಗಾಗಲೇ ದೊಡ್ಡ ಪ್ರತಿಭಟನೆಗಳಿಗೆ ಕಾರಣವಾಗಿದೆ. ಈ ನಿಟ್ಟಿನಲ್ಲಿ ವಿವಿಧ ಸಂಘಸಂಸ್ಥೆಗಳು ಆಂದೋಲನ ಕಾರ್ಯಕ್ರಮಗಳನ್ನು ಸಹ ಆಯೋಜಿಸಿದ್ದವು. ಪ್ಲಾಟ್‍ಫಾರ್ಮ್ ಮೇಲೆ ಛಾವಣಿ ಇಲ್ಲದಿರುವುದು ಪ್ರಯಾಣಿಕರಿಗೆ ತೊಂದರೆ ಉಂಟುಮಾಡುತ್ತಿದೆ. ಪ್ರಯಾಣಿಕರು ಬಿಸಿಲು ಮತ್ತು ಮಳೆಯಲ್ಲಿ ರೈಲಿಗಾಗಿ ಕಾಯಬೇಕಾಗಿದೆ.

ಸ್ಥಳೀಯರ ದೀರ್ಘಕಾಲದ ಬೇಡಿಕೆಯ ನಂತರ ಪ್ಲಾಟ್‍ಫಾರ್ಮ್ ಪ್ರವೇಶಿಸಲು ಲಿಫ್ಟ್ ವ್ಯವಸ್ಥೆಯನ್ನು ಈಗ ಸಿದ್ಧಪಡಿಸಲಾಗುತ್ತಿದೆ. ಶೌಚಾಲಯ ಮತ್ತು ವಿಶ್ರಾಂತಿ ಪ್ರದೇಶವನ್ನು ಈಗಾಗಲೇ ತೆರೆಯಲಾಗಿದೆ.

ದಕ್ಷಿಣ ರೈಲ್ವೆ ಇತ್ತೀಚೆಗೆ ಘೋಷಿಸಿದ ಯೋಜನೆಗಳಲ್ಲಿ ಒಂದು ಕುಂಬಳೆ ರೈಲು ನಿಲ್ದಾಣದ ಸ್ಥಳದಲ್ಲಿ 'ಟರ್ಫ್' ಮೈದಾನವನ್ನು ನಿರ್ಮಿಸುವುದು. ರೈಲ್ವೆಗೆ ಆದಾಯ ಗಳಿಸುವ ಆಶಯದೊಂದಿಗೆ, ದಕ್ಷಿಣ ರೈಲ್ವೆಯು ಕಾಸರಗೋಡು ಜಿಲ್ಲೆಯ 5 ರೈಲು ನಿಲ್ದಾಣಗಳನ್ನು ಖಾಸಗಿ ಏಜೆನ್ಸಿಗಳು ಟರ್ಫ್ ಮೈದಾನಗಳನ್ನು ನಿರ್ಮಿಸಲು ಪರಿಗಣಿಸಿದೆ.

ಫುಟ್‍ಬಾಲ್ ಪ್ರೇಮಿಗಳು ಹೆಚ್ಚಿರುವ ಕುಂಬಳೆಯಲ್ಗಿ ಟರ್ಫ್ ಮೈದಾನದ ಆಗಮನವನ್ನು ಎಲ್ಲರೂ ಸಂಭ್ರಮದಿಂದ ಸ್ವಾಗತಿಸಿದ್ದಾರೆ. ಆದಾಗ್ಯೂ, ಸ್ಥಳೀಯರು ಮತ್ತು ಪ್ರಯಾಣಿಕರು ಬೇಡಿಕೆಯಿಡುವ ಇತರ ಅಭಿವೃದ್ಧಿ ಯೋಜನೆಗಳನ್ನು ಈಗ ಪರಿಗಣಿಸುವ ಅವಶ್ಯಕತೆಯಿದೆ.