ಪತ್ನಿಗೆ ಅಧ್ಯಕ್ಷ ಸ್ಥಾನ ಲಭಿಸದ ಕೋಪ: ಶಾಸಕ ಎಲ್ದೋಸ್ ಕುನ್ನಪ್ಪಳ್ಳಿ ಕಚೇರಿಯನ್ನು ಮುಚ್ಚಿಸಿದ ಮಾಲೀಕರು

ಕೊಚ್ಚಿ: ಪೆರುಂಬಾವೂರು ನಗರಸಭೆಯ ಅಧ್ಯಕ್ಷರ ಚುನಾವಣೆಯ ನಂತರ ನಾಟಕೀಯ ಘಟನೆಗಳು ನಡೆದಿವೆ. ತಾನು ಸೂಚಿಸಿದ ವ್ಯಕ್ತಿಗೆ ಅಧ್ಯಕ್ಷ ಸ್ಥಾನ ಲಭಿಸದ್ದನ್ನು ವಿರೋಧಿಸಿ ಕೌನ್ಸಿಲರ್ ಅವರ ಪತಿ ಶಾಸಕ ಎಲ್ದೋಸ್ ಕುನ್ನಪ್ಪಳ್ಳಿ ಅವರ ಕಚೇರಿಯನ್ನು ಖಾಲಿ ಮಾಡಿಸಿದ್ದಾರೆ. 

ಶಾಸಕರ ಕಚೇರಿ ಪೆರುಂಬವೂರು ಕೆಎಸ್‍ಆರ್‍ಟಿಸಿ ನಿಲ್ದಾಣದ ಬಳಿಯ ಮಹಿಳಾ ಕೌನ್ಸಿಲರ್ ಕುಟುಂಬದ ಒಡೆತನದ ಕಟ್ಟಡದಲ್ಲಿ ಕಾರ್ಯನಿರ್ವಹಿಸುತ್ತಿತ್ತು.

ಒಂದು ತಿಂಗಳ ಹಿಂದೆಯೇ ಕಾರ್ಯನಿರ್ವಹಿಸಲು ಪ್ರಾರಂಭಿಸಿದ್ದ ಕಚೇರಿಯನ್ನು ರಾಜಕೀಯ ವಿವಾದದಿಂದಾಗಿ ತುರ್ತಾಗಿ ಸ್ಥಳಾಂತರಿಸಬೇಕಾಯಿತು. ನಗರಸಭೆಯ ಅಧ್ಯಕ್ಷರ ಚುನಾವಣೆ ಮುಗಿದ ನಂತರ, ಕಟ್ಟಡದ ಮಾಲೀಕರಾಗಿರುವ ಕೌನ್ಸಿಲರ್ ಪತಿ ಕಚೇರಿಯನ್ನು ಖಾಲಿ ಮಾಡುವಂತೆ ಒತ್ತಾಯಿಸಿದರು. ಕಚೇರಿಯ ಫಲಕಗಳನ್ನು ತೆರುವುಗೊಳಿಸಿ ವಿದ್ಯುತ್ ಪ್ಯೂಸ್ ಅನ್ನು ತೆಗೆಯಲಾಯಿತು ಎಂದು ವರದಿಯಾಗಿದೆ. ಇದರೊಂದಿಗೆ, ಕಚೇರಿಯನ್ನು ತಕ್ಷಣವೇ ಬೇರೆ ಕಟ್ಟಡಕ್ಕೆ ಸ್ಥಳಾಂತರಿಸಬೇಕಾಯಿತು ಎಂದು ಶಾಸಕರ ನೌಕರರು ತಿಳಿಸಿದರು.

ಮೂವರು ಮಹಿಳಾ ಕೌನ್ಸಿಲರ್‍ಗಳು ಅಧ್ಯಕ್ಷ ಸ್ಥಾನಕ್ಕೆ ತಮ್ಮ ಹಕ್ಕು ಚಲಾಯಿಸಿದ್ದರು. ಅಂತಿಮವಾಗಿ, ಡಿಸಿಸಿ ನಾಯಕತ್ವ ನಡೆಸಿದ ಮತದಾನದ ನಂತರ, ಸಂಗೀತಾ ಕೆ.ಎಸ್. ಅವರನ್ನು ಅಧ್ಯಕ್ಷೆಯಾಗಿ ಆಯ್ಕೆ ಮಾಡಲಾಯಿತು. ಸಂಗೀತಾ 16 ಮತಗಳನ್ನು ಪಡೆಯುವ ಮೂಲಕ ಗೆದ್ದರು. ಒಪ್ಪಂದದ ಪ್ರಕಾರ, ಸಂಗೀತಾ ಕೆ.ಎಸ್. ಮೊದಲ ಎರಡೂವರೆ ವರ್ಷಗಳ ಕಾಲ ಅಧ್ಯಕ್ಷೆ ಹುದ್ದೆಯನ್ನು ಅಲಂಕರಿಸಲಿದ್ದಾರೆ ಮತ್ತು ಉಳಿದ ಅವಧಿಗೆ ಆನಿ ಮ್ಯಾಥ್ಯೂ ಆ ಹುದ್ದೆಯನ್ನು ಅಲಂಕರಿಸಲಿದ್ದಾರೆ.