20 ಪಿಎಫ್‍ಐ ಕೇಂದ್ರಗಳ ಮೇಲೆ ಎನ್‍ಐಎ ದಾಳಿ; ಕಂಪ್ಯೂಟರ್ ಹಾರ್ಡ್ ಡಿಸ್ಕ್ ಮತ್ತು ಮೊಬೈಲ್ ಪೋನ್ ವಶ

ತ್ರಿಶೂರ್: ರಾಜ್ಯದಾದ್ಯಂತ ಪಿಎಫ್‍ಐ ಕೇಂದ್ರಗಳ ಮೇಲೆ ಎನ್.ಐ.ಎ ದಾಳಿ ನಡೆಸಿದೆ. 20 ಕೇಂದ್ರಗಳಲ್ಲಿ ದಾಳಿ ನಡೆಸಲಾಗಿದೆ. ಕೊಚ್ಚಿ, ತ್ರಿಶೂರ್ ಮತ್ತು ಪಾಲಕ್ಕಾಡ್ ಸೇರಿದಂತೆ ಜಿಲ್ಲೆಗಳಲ್ಲಿ ದಾಳಿ ಮುಂದುವರೆದಿದೆ. ಕೊಚ್ಚಿಯ ಎಂಟು ಕೇಂದ್ರಗಳಲ್ಲಿ ದಾಳಿ ನಡೆಸಲಾಗಿದೆ. ಈ ದಾಳಿ ಪಿಎಫ್‍ಐ ಭಯೋತ್ಪಾದನಾ ಪ್ರಕರಣಕ್ಕೆ ಸಂಬಂಧಿಸಿದೆ ಎಂದು ವರದಿಯಾಗಿದೆ. ತನಿಖಾ ಅಧಿಕಾರಿಗಳಿಗೆ ನಿರ್ಣಾಯಕ ಪುರಾವೆಗಳು ದೊರೆತಿವೆ ಎಂದು ಸೂಚಿಸಿದ್ದಾರೆ.  

ಚಾವಕ್ಕಾಡ್‍ನ ಪಲಯೂರ್‍ನಲ್ಲಿರುವ ಎಸ್‍ಡಿಪಿಐ ನಾಯಕ ಫಾಮಿಸ್ ಅಬುಬಕರ್ ಅವರ ಮನೆಯ ಮೇಲೂ ಎನ್.ಐ.ಎ ದಾಳಿ ನಡೆಸಿದೆ. ಮೂರು ಗಂಟೆಗಳ ಕಾಲ ನಡೆಸಿದ ಶೋಧದ ಸಮಯದಲ್ಲಿ ಫಾಮಿಸ್ ನ ಮೊಬೈಲ್ ಪೋನ್ ಮತ್ತು ಕಂಪ್ಯೂಟರ್ ಹಾರ್ಡ್ ಡಿಸ್ಕ್ ಅನ್ನು ತಂಡ ವಶಪಡಿಸಿಕೊಂಡಿದೆ ಎಂದು ವರದಿಯಾಗಿದೆ. ಬುಧವಾರ ಬೆಳಿಗ್ಗೆ, ಎನ್‍ಐಎ ಕೊಚ್ಚಿ ಘಟಕದ ಏಳು ಸದಸ್ಯರ ತಂಡವು ಎರಡು ಕಾರುಗಳಲ್ಲಿ ಫಾಮಿಸ್ ವಾಸಿಸುವ ಪಲಯೂರ್‍ನಲ್ಲಿರುವ ಬಾಡಿಗೆ ಮನೆಗೆ ಆಗಮಿಸಿತು. ಆ ಸಮಯದಲ್ಲಿ ಫಾಮಿಸ್ ಮನೆಯಲ್ಲಿದ್ದ.

ಪಾಲಕ್ಕಾಡ್‍ನಲ್ಲಿ ನಡೆದ ಆರ್‍ಎಸ್‍ಎಸ್ ಕಾರ್ಯಕರ್ತನ ಹತ್ಯೆಗೆ ಸಂಬಂಧಿಸಿದಂತೆ ಉಳಿದ ಮೂವರು ಶಂಕಿತರ ತನಿಖೆಯ ಭಾಗವಾಗಿ ಎನ್‍ಐಎ ತಪಾಸಣೆ ನಡೆಸಲಾಗುತ್ತಿದೆ ಎಂದು ವರದಿಯಾಗಿದೆ. ಎನ್‍ಐಎ ತಂಡವು ಬೆಳಿಗ್ಗೆ 5 ಗಂಟೆಯ ಹೊತ್ತಿಗೆ ಮಫ್ತಿಯಲ್ಲಿ  ಫಾಮಿಸ್ ನ ಮನೆ ಮತ್ತು ಸುತ್ತಮುತ್ತಲಿನ ಪ್ರದೇಶಗಳನ್ನು ಕಣ್ಗಾವಲಿನಲ್ಲಿ ಇರಿಸಿತ್ತು. ಬಳಿಕ ಎನ್‍ಐಎ ತಂಡ ಚಾವಕ್ಕಾಡ್ ಪೋಲೀಸರ ಸಹಾಯವನ್ನು ಕೋರಿತು. ನಂತರ, ಮೂರು ಜೀಪುಗಳಲ್ಲಿ ಚಾವಕ್ಕಾಡ್ ಪೋಲೀಸರು ತಪಾಸಣೆ ನಡೆಸುತ್ತಿದ್ದ ಮನೆಯ ಮುಂದೆ ಕಾವಲು ಕಾಯುತ್ತಿದ್ದರು.

ಬೆಳಿಗ್ಗೆ 6.50 ಕ್ಕೆ ಪ್ರಾರಂಭವಾದ ತಪಾಸಣೆಯನ್ನು ಎನ್‍ಐಎ ಪೂರ್ಣಗೊಳಿಸಿ ಬೆಳಿಗ್ಗೆ 9.45 ಕ್ಕೆ ಹಿಂತಿರುಗಿತು. ಚಾವಕ್ಕಾಡ್ ಪಟ್ಟಣದಲ್ಲಿ ಬಟ್ಟೆ ವ್ಯಾಪಾರ ನಡೆಸುತ್ತಿರುವ ಫಾಮಿಸ್ ಅಬುಬಕರ್ ಇತ್ತೀಚಿನವರೆಗೂ ಎಸ್.ಡಿ.ಪಿ.ಐ ಚಾವಕ್ಕಾಡ್ ನಗರಸಭೆಯ ಅಧ್ಯಕ್ಷನಾಗಿದ್ದ.