34 ಎಕರೆ ಭೂಮಿ ಇದ್ದರೂ ಕುಂಬಳೆ ರೈಲು ನಿಲ್ದಾಣದಲ್ಲಿ ಎಲ್ಲಾ ರೈಲುಗಳಿಗಿಲ್ಲ ನಿಲುಗಡೆ: ಬೆನ್ನು ತಿರುಗಿಸುವ ಅಧಿಕೃತರು: ಅಭಿವೃದ್ಧಿಯಲ್ಲಿ ನಿರ್ಲಕ್ಷ್ಯ

ಕುಂಬಳೆ: ಕುಂಬಳೆ ರೈಲು ನಿಲ್ದಾಣ ಸುಮಾರು 34 ಎಕರೆಗಳಷ್ಟು ವಿಶಾಲವಾದ ಭೂಪ್ರದೇಶವನ್ನು ಹೊಂದಿದೆ. ಕಣ್ಣೂರು-ಕಾಸರಗೋಡು-ಮಂಗಳೂರು ನಿಲ್ದಾಣಗಳ ನಡುವೆ ಇಷ್ಟು ದೊಡ್ಡ ಭೂಪ್ರದೇಶವನ್ನು ಹೊಂದಿರುವ ಬೇರೆ ಯಾವುದೇ ರೈಲ್ವೆ ನಿಲ್ದಾಣವಿಲ್ಲ. ಅದಕ್ಕಾಗಿಯೇ ಸ್ಥಳೀಯರು ಎರಡು ದಶಕಗಳಿಂದ ಅಭಿವೃದ್ಧಿಗಾಗಿ ಒತ್ತಾಯಿಸುತ್ತಿದ್ದಾರೆ.

ಅಪೂರ್ಣ ಅಭಿವೃದ್ಧಿ ಯೋಜನೆಗಳು:

ಕುಂಬಳೆ ರೈಲು ನಿಲ್ದಾಣ ಅಭಿವೃದ್ಧಿ ಯೋಜನೆಗಳನ್ನು ಹಂತ ಹಂತವಾಗಿ ಜಾರಿಗೆ ತರಲಾಗುವುದು ಎಂದು ರೈಲ್ವೆ ಅಧಿಕಾರಿಗಳು ಹೇಳುತ್ತಾರೆ. ಇದರ ಭಾಗವಾಗಿ, ಪ್ಲಾಟ್‍ಫಾರ್ಮ್ ಅನ್ನು ಸುಂದರಗೊಳಿಸಲಾಗಿದೆ, ಸಾಕಷ್ಟು ಆಸನಗಳು ಮತ್ತು ಪ್ರಯಾಣಿಕರಿಗೆ ಶೌಚಾಲಯ ಸೇರಿದಂತೆ ವಿಶಾಲವಾದ ವಿಶ್ರಾಂತಿ ಪ್ರದೇಶವನ್ನು ಒದಗಿಸಲಾಗಿದೆ. ಮೂರನೇ ಹಂತದ ಅಭಿವೃದ್ಧಿಯ ಭಾಗವಾಗಿ, ಲಿಫ್ಟ್ ನಿರ್ಮಾಣವೂ ನಡೆಯುತ್ತಿದೆ. ಆದರೆ ರೈಲ್ವೆ ಅಧಿಕಾರಿಗಳು ಇನ್ನೂ ಪ್ರಯಾಣಿಕರ ಪ್ರಮುಖ ಅಗತ್ಯಗಳಿಗೆ ಕಣ್ಣು ಮುಚ್ಚಿದ್ದಾರೆ.

ಕುಂಬಳೆ ರೈಲ್ವೆ ನಿಲ್ದಾಣದಲ್ಲಿರುವ ಅರಣ್ಯ ಭೂಮಿಯನ್ನು ಬಳಸಿಕೊಳ್ಳಬೇಕು ಮತ್ತು 'ಸೆಟಲೈಟ್' ನಿಲ್ದಾಣ ಅಥವಾ 'ಟರ್ಮಿನಲ್' ನಿಲ್ದಾಣವಾಗಿ ಮೇಲ್ದರ್ಜೆಗೇರಿಸಬೇಕು ಎಂದು ಸ್ಥಳೀಯರು ಮತ್ತು ಪ್ರಯಾಣಿಕರು ಒತ್ತಾಯಿಸುತ್ತಿದ್ದಾರೆ. ಇದು ಜಾರಿಗೆ ಬಂದರೆ, ಮಂಗಳೂರು ಮತ್ತು ಕಣ್ಣೂರಿನಲ್ಲಿ ತಮ್ಮ ಪ್ರಯಾಣವನ್ನು ಕೊನೆಗೊಳಿಸುವ ಎಲ್ಲಾ ರೈಲುಗಳಿಗೆ ಕುಂಬಳೆ ನಿಲ್ದಾಣದಲ್ಲಿ ನಿಲುಗಡೆಗೊಳ್ಳಲು ಸ್ಥಳ ಧಾರಾಳವಾಗಿ ಲಭಿಸುತ್ತದೆ. ರೈಲ್ವೆ ಪ್ರಯಾಣಿಕರ ಸಂಘ ಸೇರಿದಂತೆ ಸಂಸ್ಥೆಗಳು ಕಳೆದ ಎರಡು ದಶಕಗಳಿಂದ ರೈಲ್ವೆ ಸಚಿವಾಲಯಕ್ಕೆ ಪ್ರಾತಿನಿಧ್ಯಗಳನ್ನು ಸಲ್ಲಿಸಿ, ಈ ಬೇಡಿಕೆಯನ್ನು ಎತ್ತುತ್ತಿವೆ.

ನಿಲ್ದಾಣಗಳಿಗಾಗಿ ಪ್ರತಿಭಟನೆ:

ಕುಂಬಳೆ ಮತ್ತು ಹತ್ತಿರದ ಏಳು ಪಂಚಾಯತಿಗಳ ಜನರು ಅವಲಂಬಿಸಿರುವ ಪ್ರಮುಖ ನಿಲ್ದಾಣ ಇದು. ಮಂಗಳೂರಿನ ಕಾಲೇಜುಗಳು ಮತ್ತು ಆಸ್ಪತ್ರೆಗಳಿಗೆ ಹೋಗುವ ವಿದ್ಯಾರ್ಥಿಗಳು, ರೋಗಿಗಳು ಮತ್ತು ವ್ಯಾಪಾರಿಗಳು ಪ್ರತಿದಿನ ಈ ನಿಲ್ದಾಣವನ್ನು ಅವಲಂಬಿಸಿದ್ದಾರೆ.

ಜಿಲ್ಲೆಯಲ್ಲಿ ಹೆಚ್ಚು ಆದಾಯ ಗಳಿಸುವ ನಿಲ್ದಾಣಗಳಲ್ಲಿ ಒಂದಾಗಿದ್ದರೂ, ದೂರದ ರೈಲುಗಳಿಗೆ ನಿಲುಗಡೆಗೆ ಅವಕಾಶವಿಲ್ಲದಿರುವುದು ಪ್ರಮುಖ ಪ್ರತಿಭಟನೆಗಳಿಗೆ ಕಾರಣವಾಗಿದೆ. ಪರಶುರಾಮ್ ಎಕ್ಸ್‍ಪ್ರೆಸ್ (16649/50) ಮತ್ತು ಮಾವೇಲಿ ಎಕ್ಸ್‍ಪ್ರೆಸ್ (16603/04) ಕುಂಬಳೆಯಲ್ಲಿ ನಿಲುಗಡೆ ನೀಡಲು ಸಾಕಷ್ಟು ಕಾಲಗಳಿಂದ ಬೇಡಿಕೆಯ ಕೂಗು ಇದೆ. 

ಬರುತ್ತಿದೆ ಟರ್ಫ್ ಮೈದಾನ: ಆದರೂ ಇಲ್ಲ ಸಂತಸ!: 

ರೈಲ್ವೆ ಭೂಮಿ ಕಾಡು-ಪೊದೆಗಳಿಂದ ಆವೃತವಾಗಿರುವ ಪರಿಸ್ಥಿತಿಯಲ್ಲಿ, ದಕ್ಷಿಣ ರೈಲ್ವೆ ಆದಾಯವನ್ನು ಹೆಚ್ಚಿಸಲು ಖಾಸಗಿ ಏಜೆನ್ಸಿಗಳಿಗೆ 'ಟರ್ಫ್' ಮೈದಾನಗಳನ್ನು ನಿರ್ಮಿಸಲು ಅನುಮತಿ ನೀಡಿದೆ. ಕಾಸರಗೋಡು ಜಿಲ್ಲೆಯ ಐದು ನಿಲ್ದಾಣಗಳಲ್ಲಿ ಕುಂಬಳೆಯೂ ಸೇರಿದೆ. ಆದಾಗ್ಯೂ, ರೈಲು ನಿಲ್ದಾಣಗಳಂತಹ ಮೂಲಭೂತ ಅಭಿವೃದ್ಧಿಗಳನ್ನು ಅನುಷ್ಠಾನಗೊಳಿಸದೆ ರೈಲ್ವೆ ಇಂತಹ ಕ್ರಮವನ್ನು ತೆಗೆದುಕೊಳ್ಳುತ್ತಿರುವುದಕ್ಕೆ ಸ್ಥಳೀಯರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.