ಸಾಮಾಜಿಕ ಮಾಧ್ಯಮಗಳಲ್ಲಿ 'ದಿ ವೈರ್' ಪೋಸ್ಟ್ ಮಾಡಿದ ಪ್ರಧಾನಿ ಕುರಿತ ವಿಡಂಬನಾ ಅನಿಮೇಷನ್‌ಗೆ ನಿರ್ಬಂಧ

ನವದೆಹಲಿ: ಸುದ್ದಿ ಸಂಸ್ಥೆ ''ದಿ ವೈರ್'' ಪೋಸ್ಟ್ ಮಾಡಿದ ಪ್ರಧಾನಿ ನರೇಂದ್ರ ಮೋದಿ ಅವರ ವಿಡಂಬನೆಯ ಅನಿಮೇಷನ್ ಅನ್ನು ಸಾಮಾಜಿಕ ಮಾಧ್ಯಮ ವೇದಿಕೆಗಳಾದ ಇನ್‌ಸ್ಟಾಗ್ರಾಮ್, ಫೇಸ್‌ಬುಕ್ ಹಾಗೂ ಎಕ್ಸ್ ತಡೆ ಹಿಡಿದಿದೆ.

ಸೋಮವಾರ ಸಂಜೆ ''ದಿ ವೈರ್''ನ ಇನ್‌ಸ್ಟಾಗ್ರಾಂ ಖಾತೆ ಸುಮಾರು ಎರಡು ಗಂಟೆಗಳ ಕಾಲ ಭಾರತದಲ್ಲಿ ಲಭ್ಯವಿರಲಿಲ್ಲ ಎಂದು ವರದಿಯಾಗಿದೆ.

ಇನ್‌ಸ್ಟಾಗ್ರಾಂ ಪುಟಕ್ಕೆ ಭೇಟಿ ನೀಡಿದವರು, ''ಈ ವಿಷಯವನ್ನು ನಿರ್ಬಂಧಿಸುವ ಕಾನೂನಾತ್ಮಕ ವಿನಂತಿಯನ್ನು ವೇದಿಕೆ ಪಾಲಿಸುತ್ತಿರುವುದರಿಂದ, ಈ ಪುಟ ಭಾರತದಲ್ಲಿ ಲಭ್ಯವಿಲ್ಲ'' ಎಂಬ ಸಂದೇಶವನ್ನು ನೋಡಿದ್ದಾರೆ. ವಿದೇಶಗಳ ಅಥವಾ ವಿಪಿಎನ್ ಬಳಕೆದಾರರಿಗೆ ಮಾತ್ರ ಈ ಖಾತೆ ಲಭ್ಯವಾಗಿದೆ ಎಂದು ''ದಿ ವೈರ್'' ವರದಿ ಮಾಡಿದೆ.

ಇನ್‌ಸ್ಟಾಗ್ರಾಮ್, ಪೇಸ್‌ಬುಕ್ ಹಾಗೂ ಎಕ್ಸ್‌ನಲ್ಲಿ ಶನಿವಾರ ಸಂಜೆ ಸುಮಾರು 6.30ಕ್ಕೆ ಅಪ್‌ಲೋಡ್ ಮಾಡಲಾದ 52 ಸೆಕೆಂಡ್‌ಗಳ ಈ ವೀಡಿಯೋವನ್ನು ಬ್ಲಾಕ್ ಮಾಡಲಾಗಿದೆ. ಮಂಗಳವಾರ ಸಂಜೆ 3 ಗಂಟೆಗೆ ''ದಿ ವೈರ್''ನ ಇನ್‌ಸ್ಟಾಗ್ರಾಂ ಖಾತೆಯನ್ನು ಮರು ಸ್ಥಾಪಿಸಲಾಗಿದೆ. ಆದರೆ ಮೂರು ವೇದಿಕೆಗಳಲ್ಲಿ ಈ ವಿಡಂಬನೆಯ ಅನಿಮೇಷನ್ ಲಭ್ಯವಿರಲಿಲ್ಲ.

ಭಾರತದ ಸೇನೆಯ ಮಾಜಿ ಮುಖ್ಯಸ್ಥ ಎಂ.ಎಂ. ನರವಣೆ ಅವರ ಅಪ್ರಕಟಿತ ಆತ್ಮಚರಿತ್ರೆಯ ಬಗ್ಗೆ ಸಂಸತ್ತಿನಲ್ಲಿ ಪ್ರಶ್ನೆಗಳಿಂದ ನುಣುಚಿಕೊಂಡಿರುವುದಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಅನಿಮೇಷನ್ ವಿಡಂಬನೆ ಮಾಡಿದೆ.