13 ವರ್ಷದೊಳಗಿನ ಮಕ್ಕಳಿಗೂ ಇನ್ನು `ವಾಟ್ಸಪ್' ಲಭ್ಯ: ಪೋಷಕರ ಕಣ್ಗಾವಲಿನಲ್ಲಿ ಬಳಕೆಗೆ ಅವಕಾಶ !

ನವದೆಹಲಿ: ವಿಶ್ವದ ಜನಪ್ರಿಯ ಮೆಸೇಜಿಂಗ್ ಆಪ್ ವಾಟ್ಸಪ್ (WhatsApp) ಶೀಘ್ರದಲ್ಲೇ ದೊಡ್ಡ ಬದಲಾವಣೆಗೆ ಸಜ್ಜಾಗಿದೆ. ಇದುವರೆಗೆ 13 ವರ್ಷಕ್ಕಿಂತ ಮೇಲ್ಪಟ್ಟವರಿಗೆ ಮಾತ್ರ ಸೀಮಿತವಾಗಿದ್ದ ವಾಟ್ಸಪ್, ಈಗ ಸಣ್ಣ ಮಕ್ಕಳಿಗಾಗಿಯೇ ವಿಶೇಷವಾದ 'ಪೇರೆಂಟ್-ಮ್ಯಾನೇಜ್ಡ್ ಅಕೌಂಟ್ಸ್' (Parent-Managed Accounts) ವೈಶಿಷ್ಟ್ಯವನ್ನು ಪರಿಚಯಿಸಲು ಮುಂದಾಗಿದೆ.

ಈ ಹೊಸ ಫೀಚರ್ ಮೂಲಕ 13 ವರ್ಷದೊಳಗಿನ ಮಕ್ಕಳು ಕೂಡ ವಾಟ್ಸಪ್ ಬಳಸಬಹುದು. ಆದರೆ, ಅವರ ಸಂಪೂರ್ಣ ನಿಯಂತ್ರಣ ಪೋಷಕರ ಕೈಯಲ್ಲ ಇರಲಿದೆ.

ಮಕ್ಕಳ ಖಾತೆ ಹೇಗೆ ಕೆಲಸ ಮಾಡುತ್ತದೆ?

ಮಕ್ಕಳಿಗಾಗಿ ವಿನ್ಯಾಸಗೊಳಿಸಲಾದ ಈ ವಿಶೇಷ ಖಾತೆಗಳಲ್ಲಿ ಪೋಷಕರಿಗೆ ಹೆಚ್ಚಿನ ಅಧಿಕಾರ ನೀಡಲಾಗಿದೆ:

ಸಂಪರ್ಕಗಳ ನಿಯಂತ್ರಣ: ಮಕ್ಕಳನ್ನು ಯಾರು ಸಂಪರ್ಕಿಸಬಹುದು ಮತ್ತು ಅವರನ್ನು ಯಾವ ಗ್ರೂಪ್‌ಗಳಿಗೆ ಸೇರಿಸಬಹುದು ಎಂಬುದನ್ನು ಪೋಷಕರೇ ನಿರ್ಧರಿಸುತ್ತಾರೆ.

ಗೌಪ್ಯತೆ ಸೆಟ್ಟಿಂಗ್: ಪ್ರೈವೆಸಿ ಸೆಟ್ಟಿಂಗ್‌ಗಳನ್ನು ಮ್ಯಾನೇಜ್ ಮಾಡುವ ಹಕ್ಕು ಪೋಷಕರಿಗಿರುತ್ತದೆ.

ಎಂಡ್-ಟು-ಎಂಡ್ ಎನ್‌ಕ್ರಿಪ್ಶನ್: ಪೋಷಕರ ನಿಯಂತ್ರಣವಿದ್ದರೂ ಸಹ, ಸಾಮಾನ್ಯ ಖಾತೆಗಳಂತೆ ಮಕ್ಕಳ ಚಾಟ್‌ಗಳು ಕೂಡ ಎಂಡ್-ಟು-ಎಂಡ್ ಎನ್‌ಕ್ರಿಪ್ಶನ್ ಮೂಲಕ ಸುರಕ್ಷಿತವಾಗಿರಲಿವೆ.

ನಿರ್ಬಂಧಿತ ಫೀಚರ್‌ಗಳು: ಮಕ್ಕಳ ಸುರಕ್ಷತೆಗಾಗಿ ಈ ಖಾತೆಗಳಲ್ಲಿ ಮೆಟಾ ಎಐ (Meta AI), ಚಾನೆಲ್ಸ್, ಸ್ಟೇಟಸ್ ಮತ್ತು 'ವೀವ್ ಒನ್ಸ್' (View Once) ನಂತಹ ಫೀಚರ್‌ಗಳು ಲಭ್ಯವಿರುವುದಿಲ್ಲ.

ಖಾತೆ ಲಿಂಕ್ ಮಾಡುವುದು ಹೇಗೆ?

ವರದಿಗಳ ಪ್ರಕಾರ, ಮಕ್ಕಳ ಅಕೌಂಟ್ ಸೆಟಪ್ ಮಾಡಲು ಪೋಷಕರು ತಮ್ಮ ಮತ್ತು ಮಕ್ಕಳ ಸಾಧನವನ್ನು ಹತ್ತಿರವಿಟ್ಟುಕೊಳ್ಳಬೇಕು. QR ಕೋಡ್ ಸ್ಕ್ಯಾನ್ ಮಾಡುವ ಮೂಲಕ ಎರಡೂ ಅಕೌಂಟ್‌ಗಳನ್ನು ಲಿಂಕ್ ಮಾಡಬಹುದು. ಒಮ್ಮೆ ಲಿಂಕ್ ಆದ ನಂತರ, ಅಪರಿಚಿತರಿಂದ ಬರುವ ಮೆಸೇಜ್ ರಿಕ್ವೆಸ್ಟ್‌ಗಳನ್ನು ಪೋಷಕರು ಪರಿಶೀಲಿಸಿ ಅನುಮತಿಸಬಹುದು.

ಬರಲಿದೆ 'ವಾಟ್ಸಪ್ ಪ್ಲಸ್' (WhatsApp Plus) ಪೇಯ್ಡ್ ಸಬ್‌ಸ್ಕ್ರಿಪ್ಷನ್!

ವಾಟ್ಸಪ್ ಕೇವಲ ಮಕ್ಕಳಿಗಾಗಿ ಮಾತ್ರವಲ್ಲದೆ, ಪ್ರೀಮಿಯಂ ಬಳಕೆದಾರರಿಗಾಗಿಯೂ ಹೊಸ ಯೋಜನೆಯನ್ನು ತರುತ್ತಿದೆ. ಶೀಘ್ರದಲ್ಲೇ 'WhatsApp Plus' ಎಂಬ ಪೇಯ್ಡ್ ಸಬ್‌ಸ್ಕ್ರಿಪ್ಷನ್ ಆರಂಭವಾಗಲಿದೆ.

ಏನಿರಲಿದೆ ಹೊಸತು?: ಇದರಲ್ಲಿ ಎಕ್ಸ್‌ಕ್ಲೂಸಿವ್ ಸ್ಟಿಕ್ಕರ್‌ಗಳು, ಹೊಸ ಥೀಮ್‌ಗಳು, ಕಸ್ಟಮೈಸ್ಡ್ ಆಪ್ ಐಕಾನ್ ಮತ್ತು ಹೊಸ ಚಾಟ್ ಇಂಟರ್‌ಫೇಸ್ ಸಿಗಲಿದೆ.

ಯಾರಿಗೆ ಲಭ್ಯ?: ಪ್ರಸ್ತುತ ಆಂಡ್ರಾಯ್ಡ್ ಮತ್ತು ಐಫೋನ್ ಬಳಕೆದಾರರಿಗಾಗಿ ಇದರ ಪರೀಕ್ಷೆ ನಡೆಯುತ್ತಿದೆ.

ಗಮನಿಸಿ: ಹಣ ಪಾವತಿಸುವ ಚಂದಾದಾರಿಕೆ ಬಂದರೂ ಸಹ, ಈಗಿರುವ ಕರೆ (Calling), ಮೆಸೇಜಿಂಗ್ ಮತ್ತು ಫೈಲ್ ಶೇರಿಂಗ್ ಫೀಚರ್‌ಗಳು ಎಂದಿನಂತೆ ಉಚಿತವಾಗಿರಲಿವೆ. ಮುಂದಿನ ಕೆಲವು ತಿಂಗಳುಗಳಲ್ಲಿ ಈ ಎಲ್ಲಾ ಬದಲಾವಣೆಗಳು ಬಳಕೆದಾರರಿಗೆ ಲಭ್ಯವಾಗುವ ಸಾಧ್ಯತೆಯಿದೆ.