ರಾಜ್ಯದಲ್ಲಿ ತೀವ್ರಗೊಂಡ ದಾದಿಯರ ಪ್ರತಿಭಟನೆ: ಕೋಝಿಕ್ಕೋಡ್ ಆಡಳಿತ ದೌರ್ಜನ್ಯದ ವಿರುದ್ಧ ದೂರು

ತಿರುವನಂತಪುರಂ: ಯುನೈಟೆಡ್ ನರ್ಸಸ್ ಅಸೋಸಿಯೇಷನ್ (ಯುಎನ್‍ಎ) ನೇತೃತ್ವದಲ್ಲಿ ರಾಜ್ಯದ ಖಾಸಗಿ ಆಸ್ಪತ್ರೆಗಳಲ್ಲಿ ದಾದಿಯರ ಮುಷ್ಕರ ತೀವ್ರಗೊಳ್ಳುತ್ತಿದ್ದು, ವೇತನ ಪರಿಷ್ಕರಣೆ ಸೇರಿದಂತೆ ಬೇಡಿಕೆಗಳನ್ನು ಮುಂದಿಟ್ಟು ಮುಷ್ಕರ ನಡೆಸಲಾಗುತ್ತಿದೆ. ಸುಮಾರು 490 ಖಾಸಗಿ ಆಸ್ಪತ್ರೆಗಳ ದಾದಿಯರು ಮುಷ್ಕರದಲ್ಲಿ ಭಾಗವಹಿಸುತ್ತಿದ್ದಾರೆ. 

ಪ್ರತಿಭಟನೆಯು ತುರ್ತು ವಿಭಾಗಗಳ ಮೇಲೆ ಪರಿಣಾಮ ಬೀರದಿದ್ದರೂ, ವಾರ್ಡ್ ಕರ್ತವ್ಯಗಳಿಗೆ ದಾದಿಯರ ಗೈರುಹಾಜರಿ ಆಸ್ಪತ್ರೆಗಳ ಕಾರ್ಯನಿರ್ವಹಣೆಯ ಮೇಲೆ ಗಂಭೀರವಾಗಿ ಪರಿಣಾಮ ಬೀರಿದೆ. ಮೂಲ ವೇತನವನ್ನು 40,000 ರೂ.ಗಳಿಗೆ ಹೆಚ್ಚಿಸುವುದು, ಡಾ. ಬಲರಾಮ್ ಸಮಿತಿ ಮತ್ತು ಜಗದೀಶ್ ಪ್ರಸಾದ್ ಸಮಿತಿಯ ವರದಿಗಳನ್ನು ಜಾರಿಗೊಳಿಸುವುದು ಮತ್ತು ಒಪ್ಪಂದದ ನೇಮಕಾತಿಗಳನ್ನು ಕೊನೆಗೊಳಿಸುವುದು ಸೇರಿದಂತೆ 13 ಬೇಡಿಕೆಗಳನ್ನು ದಾದಿಯರು ಮುಂದಿಡುತ್ತಿದ್ದಾರೆ.

ಕೋಝಿಕ್ಕೋಡ್ ಜಿಲ್ಲೆಯ ಸುಮಾರು ಹತ್ತು ಖಾಸಗಿ ಆಸ್ಪತ್ರೆಗಳಲ್ಲಿ ಸೋಮವಾರ ಸಂಪೂರ್ಣ ಮುಷ್ಕರ ಘೋಷಿಸಲಾಗಿದೆ. ಈ ಮಧ್ಯೆ, ಬೇಬಿ ಮೆಮೋರಿಯಲ್ ಆಸ್ಪತ್ರೆಯಲ್ಲಿ ಮುಷ್ಕರ ನಡೆಸುತ್ತಿರುವ ದಾದಿಯರನ್ನು ನಿರ್ವಹಣಾ ಕೊಠಡಿಯಲ್ಲಿ ಬಂಧಿಸಲಾಗಿದೆ ಎಂದು ದೂರು ದಾಖಲಾಗಿದೆ. ಹೊಸದಾಗಿ ನೇಮಕಗೊಂಡ ಸುಮಾರು 25 ದಾದಿಯರನ್ನು ತರಗತಿ ನಡೆಸುವ ನೆಪದಲ್ಲಿ ಕರೆಸಿ ಬಲವಂತವಾಗಿ ಕೆಲಸ ಮಾಡಲು ಬೆದರಿಸಲಾಗಿದೆ ಎಂದು ದೂರು ನೀಡಲಾಗಿದೆ.

ಬೇಬಿ ಮೆಮೋರಿಯಲ್ ಆಡಳಿತ ಮಂಡಳಿಯು ಮುಷ್ಕರ ನಡೆಸುತ್ತಿರುವ ದಾದಿಯರಿಗೆ ಮಂಗಳವಾರ ಬೆಳಿಗ್ಗೆ 8 ಗಂಟೆಯೊಳಗೆ ಹಾಸ್ಟೆಲ್ ಖಾಲಿ ಮಾಡುವಂತೆ ನೋಟಿಸ್ ನೀಡಿದೆ. ಆಡಳಿತ ಮಂಡಳಿಯು ಮೆಸ್ ಸೌಲಭ್ಯವನ್ನು ಮುಚ್ಚುವುದಾಗಿ ಬೆದರಿಕೆ ಹಾಕಿದೆ ಎಂದು ದಾದಿಯರು ಆರೋಪಿಸಿದ್ದಾರೆ. ಇದನ್ನು ವಿರೋಧಿಸಿ, ದಾದಿಯರು ಕಲೆಕ್ಟರೇಟ್ ಮತ್ತು ಆಸ್ಪತ್ರೆಯ ಮುಂದೆ ಧರಣಿ ನಡೆಸಿದರು.

ಎರ್ನಾಕುಳಂ ಜಿಲ್ಲೆಯಲ್ಲಿ ದಾದಿಯರ ಮುಷ್ಕರವು ವೈದ್ಯಕೀಯ ಸೌಲಭ್ಯಗಳ ಮೇಲೂ ತೀವ್ರ ಪರಿಣಾಮ ಬೀರಿದೆ. ಜಿಲ್ಲೆಯ ಪ್ರಮುಖ ಆಸ್ಪತ್ರೆಗಳಾದ ಲೇಕ್‍ಶೋರ್ ಆಸ್ಪತ್ರೆ ಮತ್ತು ಆಸ್ಟರ್ ಮೆಡಿಸಿಟಿಯಲ್ಲಿ ಮುಷ್ಕರದಿಂದಾಗಿ ರೋಗಿಗಳು ತೀವ್ರ ತೊಂದರೆಗಳನ್ನು ಎದುರಿಸುತ್ತಿದ್ದಾರೆ.

ಏತನ್ಮಧ್ಯೆ, ಯುಎನ್‍ಎ ತ್ರಿಶೂರ್ ಜಿಲ್ಲೆಯ ಐದು ಆಸ್ಪತ್ರೆ ಆಡಳಿತ ಮಂಡಳಿಗಳೊಂದಿಗೆ (ಸನ್, ಅಮಲಾ, ಮದರ್, ದಯಾ ಮತ್ತು ವೆಸ್ಟ್ ಫೆÇೀರ್ಟ್) ಒಪ್ಪಂದಕ್ಕೆ ಬಂದಿದೆ. ಈ ಒಪ್ಪಂದದ ಪ್ರಕಾರ, 300 ಕ್ಕಿಂತ ಕಡಿಮೆ ಹಾಸಿಗೆಗಳನ್ನು ಹೊಂದಿರುವ ಆಸ್ಪತ್ರೆಗಳಲ್ಲಿ ದಾದಿಯರು 8,000 ರೂ. ಮತ್ತು ದೊಡ್ಡ ಆಸ್ಪತ್ರೆಗಳಲ್ಲಿ 12,000 ರೂ. ವೇತನ ಹೆಚ್ಚಳವನ್ನು ಪಡೆಯುತ್ತಾರೆ. ಆದಾಗ್ಯೂ, ಜಿಲ್ಲೆಯ ಇತರ ಆಸ್ಪತ್ರೆಗಳಲ್ಲಿ ಮುಷ್ಕರ ಮುಂದುವರೆದಿದೆ.

ತಿರುವನಂತಪುರಂ ಜಿಲ್ಲೆಯಲ್ಲಿ, ವಿವಿಧ ಆಡಳಿತ ಮಂಡಳಿಗಳಿಂದ ಕನಿಷ್ಠ ವೇತನ ಸೇರಿದಂತೆ ವಿವಿಧ ಬೇಡಿಕೆಗಳನ್ನು ಆಡಳಿತ ಮಂಡಳಿ ಒಪ್ಪಿಕೊಂಡ ನಂತರ ಮುಷ್ಕರವನ್ನು ಹಿಂತೆಗೆದುಕೊಳ್ಳಲಾಗಿತ್ತು. ಆದಾಗ್ಯೂ, ಆಲಪ್ಪುಳ ಜಿಲ್ಲೆಯಲ್ಲಿ, ರಾಷ್ಟ್ರೀಯ ಆರೋಗ್ಯ ಮಿಷನ್ (ಓಊಒ) ಅಡಿಯಲ್ಲಿ ದಾದಿಯರು ವೇತನ ತಾರತಮ್ಯದ ವಿರುದ್ಧ ಪ್ರತಿಭಟಿಸುತ್ತಿದ್ದಾರೆ.

ಖಾಸಗಿ ವಲಯದಲ್ಲಿ ವೇತನ ಹೆಚ್ಚಳದ ನಂತರವೂ ಓಊಒ ದಾದಿಯರ ಮೂಲ ವೇತನ 20,500 ರೂ.ಗಳಲ್ಲಿಯೇ ಉಳಿದಿರುವುದರಿಂದ ಇಲ್ಲಿ ಪ್ರತಿಭಟನೆ ನಡೆಯುತ್ತಿದೆ. ಸುಪ್ರೀಂ ಕೋರ್ಟ್ ಆದೇಶದ ಪ್ರಕಾರ 'ಸಮಾನ ಕೆಲಸಕ್ಕೆ ಸಮಾನ ವೇತನ' ಜಾರಿಗೆ ತರುವ ಬೇಡಿಕೆಯಲ್ಲಿ ಅವರು ದೃಢವಾಗಿದ್ದಾರೆ. ಬೇಡಿಕೆಗಳನ್ನು ಸಂಪೂರ್ಣವಾಗಿ ಅಂಗೀಕರಿಸುವವರೆಗೆ ರಾಜ್ಯಾದ್ಯಂತ ಮುಷ್ಕರ ಮುಂದುವರಿಸಲು ಯುನೈಟೆಡ್ ನರ್ಸಸ್ ಅಸೋಸಿಯೇಷನ್ ??ನಿರ್ಧರಿಸಿದೆ.