ನಾಗರಿಕರ ಪಾಲಿಗೆ ಭಯಾನಕವಾಗುತ್ತಿರುವ ಮಧ್ಯಪ್ರಾಚ್ಯದ ಯುದ್ಧ: ವಿಶ್ವಸಂಸ್ಥೆ ಕಳವಳ

ನ್ಯೂಯಾರ್ಕ್: ಮಧ್ಯಪ್ರಾಚ್ಯದಲ್ಲಿ ಮುಂದುವರಿದಿರುವ ಯುದ್ಧ ಪರಿಸ್ಥಿತಿ ಸುಮಾರು ಒಂದು ಡಝನ್ ದೇಶಗಳ ನಾಗರಿಕರಿಗೆ 'ಹೆಚ್ಚಾಗಿ ಭಯಾನಕ'ವಾಗಿ ಪರಿಣಮಿಸಿದೆ ಎಂದು ವಿಶ್ವಸಂಸ್ಥೆಯ ಮಾನವೀಯ ವ್ಯವಹಾರಗಳ ಮುಖ್ಯಸ್ಥ ಟಾಮ್ ಫ್ಲೆಚರ್ ಕಳವಳ ವ್ಯಕ್ತಪಡಿಸಿದ್ದಾರೆ.

"ಮಧ್ಯಪ್ರಾಚ್ಯದಲ್ಲಿ ಸಾಮಾನ್ಯ ಜನರು ನಿರಂತರ ದಾಳಿಗಳ ಹೊಡೆತಕ್ಕೆ ಒಳಗಾಗುತ್ತಿದ್ದಾರೆ. ನಾಗರಿಕರನ್ನು ರಕ್ಷಿಸುವುದು ಎಲ್ಲ ಪಕ್ಷಗಳ ಕಡ್ಡಾಯ ಜವಾಬ್ದಾರಿ. ಆದರೆ ವಾಸ್ತವದಲ್ಲಿ ಮನೆಗಳು, ಆಸ್ಪತ್ರೆಗಳು ಮತ್ತು ಶಾಲೆಗಳಂತಹ ನಾಗರಿಕ ಬಳಕೆಯ ಕಟ್ಟಡಗಳೇ ಗುರಿಯಾಗುತ್ತಿವೆ. ಇದರಿಂದ ನಿರಪರಾಧಿಗಳು ಜೀವಹಾನಿ ಮತ್ತು ಆಸ್ತಿನಷ್ಟ ಅನುಭವಿಸುತ್ತಿದ್ದಾರೆ," ಎಂದು ಫ್ಲೆಚರ್ ತಿಳಿಸಿದ್ದಾರೆ.

ಇರಾನ್, ಲೆಬನಾನ್, ಸಿರಿಯಾ, ಆಕ್ರಮಿತ ಫೆಲೆಸ್ತೀನಿನ ಪ್ರದೇಶಗಳು, ಇಸ್ರೇಲ್, ಯುನೈಟೆಡ್ ಅರಬ್ ಎಮಿರೇಟ್ಸ್, ಬಹ್ರೇನ್, ಖತರ್, ಕುವೈತ್, ಸೌದಿ ಅರೇಬಿಯಾ ಸೇರಿದಂತೆ ಅದರಾಚೆಗಿನ ಪ್ರದೇಶಗಳಲ್ಲಿಯೂ ನಾಗರಿಕರು ಮತ್ತು ನಾಗರಿಕ ಮೂಲಸೌಕರ್ಯಗಳ ಮೇಲೆ ದಾಳಿಗಳು ನಡೆದಿವೆ ಎಂದು ಫ್ಲೆಚರ್ ತಿಳಿಸಿದ್ದಾರೆ. ಈ ಬೆಳವಣಿಗೆಗಳು ಮಾನವೀಯ ಪರಿಸ್ಥಿತಿಯನ್ನು ಮತ್ತಷ್ಟು ಸಂಕೀರ್ಣಗೊಳಿಸುತ್ತಿವೆ.

ಇರಾನ್ ಹಾಗೂ ಹತ್ತಿರದ ಇತರ ದೇಶಗಳಲ್ಲಿ ತುರ್ತು ಯೋಜನೆಗಳನ್ನು ಸಕ್ರಿಯಗೊಳಿಸಲಾಗಿದೆ. ಆದರೆ ಇರಾನ್‌ನಲ್ಲಿ ಈಗಾಗಲೇ ಸೀಮಿತ ಮಟ್ಟದಲ್ಲಿ ಮಾತ್ರ ಅಂತರರಾಷ್ಟ್ರೀಯ ಸಂಸ್ಥೆಗಳ ಉಪಸ್ಥಿತಿ ಇರುವುದರಿಂದ ನೆರವು ಕಾರ್ಯಕರ್ತರ ಮುಂದಿರುವ ಸವಾಲುಗಳು ಹೆಚ್ಚಿವೆ ಎಂದು ಅವರು ಹೇಳಿದ್ದಾರೆ.

ಮಧ್ಯಪ್ರಾಚ್ಯದಲ್ಲಿ ಹೆಚ್ಚುತ್ತಿರುವ ಅಸ್ಥಿರತೆ ಮತ್ತು ಭದ್ರತಾ ಅಪಾಯಗಳ ನಡುವೆಯೂ ನಾಗರಿಕರ ರಕ್ಷಣೆ ಅತ್ಯಂತ ಆದ್ಯತೆಯಾಗಿರಬೇಕು. ಮಾನವೀಯ ನೆರವು ನಿರ್ಬಂಧವಿಲ್ಲದೆ ತಲುಪಲು ಎಲ್ಲಾ ಪಕ್ಷಗಳು ಅಂತರರಾಷ್ಟ್ರೀಯ ಮಾನವೀಯ ಕಾನೂನುಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು ಎಂದು ವಿಶ್ವಸಂಸ್ಥೆ ಕರೆ ನೀಡಿದೆ.