ಎಪ್ಸ್ಟೀನ್ ಪ್ರಕರಣದಿಂದ ಗಮನ ತಿರುಗಿಸಲು ಇರಾನ್ ಮೇಲೆ ದಾಳಿ? ; ಟ್ರಂಪ್ ಕುರಿತು ಮತದಾರರ ಸಮೀಕ್ಷೆ ಹೇಳುವುದೇನು?

ನವದೆಹಲಿ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್ ವಿರುದ್ಧ ಮಿಲಿಟರಿ ದಾಳಿ ಮಾಡಲು ತೆಗೆದುಕೊಂಡ ನಿರ್ಧಾರವು ಜೆಫ್ರಿ ಎಪ್ಸ್ಟೀನ್ ಫೈಲ್ ಗಳ ಸುತ್ತಲಿನ ವಿವಾದದಿಂದ ಸಾರ್ವಜನಿಕರ ಗಮನವನ್ನು ಬೇರೆಡೆಗೆ ಸೆಳೆಯುವ ಉದ್ದೇಶದಿಂದ ಇರಬಹುದು ಎಂದು ಅನೇಕ ಮತದಾರರು ಅಭಿಪ್ರಾಯಪಟ್ಟಿದ್ದಾರೆ ಎಂದು ಹೊಸ ಸಮೀಕ್ಷೆಯೊಂದು ಸೂಚಿಸಿದೆ.

ಅಮೆರಿಕದ ಹಣಕಾಸುದಾರ ಜೆಫ್ರಿ ಎಪ್ಸ್ಟೀನ್, ಲೈಂಗಿಕ ಕಳ್ಳಸಾಗಣೆ ಆರೋಪದ ಪ್ರಕರಣದಲ್ಲಿ ವಿಚಾರಣೆಗೆ ಕಾಯುತ್ತಿದ್ದಾಗ 2019ರಲ್ಲಿ ನ್ಯೂಯಾರ್ಕ್ ಜೈಲಿನಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದ. ಈ ವರ್ಷದ ಆರಂಭದಲ್ಲಿ ಅಮೆರಿಕದ ನ್ಯಾಯಾಂಗ ಇಲಾಖೆ 'ಎಪ್ಸ್ಟೀನ್ ಫೈಲ್ಸ್ ಟ್ರಾನ್ಸ್ ಪರೆನ್ಸಿ ಆಕ್ಟ್' ಅಡಿಯಲ್ಲಿ ಎಪ್ಸ್ಟೀನ್ ಗೆ ಸಂಬಂಧಿಸಿದ 3 ಮಿಲಿಯನ್ ಪುಟಗಳಿಗಿಂತ ಹೆಚ್ಚಿನ ದಾಖಲೆಗಳನ್ನು ಬಿಡುಗಡೆ ಮಾಡಿತು. ಈ ಕಾಯ್ದೆಗೆ ಕಳೆದ ನವೆಂಬರ್ನಲ್ಲಿ ಟ್ರಂಪ್ ಸಹಿ ಹಾಕಿದ್ದರು.

ಬಿಡುಗಡೆಯಾದ ದಾಖಲೆಗಳಲ್ಲಿ ಸುಮಾರು 2,000 ವೀಡಿಯೊಗಳು ಹಾಗೂ 1.8 ಲಕ್ಷ ಚಿತ್ರಗಳು ಸೇರಿದ್ದು, ಒಟ್ಟು ಬಿಡುಗಡೆಯಾದ ಮಾಹಿತಿಯ ಪ್ರಮಾಣವು ಸುಮಾರು 3.5 ಮಿಲಿಯನ್ ಪುಟಗಳಿಗೆ ತಲುಪಿದೆ.

ಮಾರ್ಚ್ 6ರಿಂದ ಮಾರ್ಚ್ 8ರವರೆಗೆ 1,272 ಸಂಭಾವ್ಯ ಮತದಾರರನ್ನು ಒಳಗೊಂಡು ನಡೆಸಿದ ಸಮೀಕ್ಷೆಯಲ್ಲಿ, 52% ಜನರು ಟ್ರಂಪ್ ಅವರು "ಜೆಫ್ರಿ ಎಪ್ಸ್ಟೀನ್ ಹಗರಣದಿಂದ ಗಮನವನ್ನು ಬೇರೆಡೆಗೆ ಸೆಳೆಯಲು ಇರಾನ್ ವಿರುದ್ಧ ಮಿಲಿಟರಿ ಕ್ರಮ ಕೈಗೊಳ್ಳಲು ಪ್ರೇರೇಪಿತರಾಗಿರಬಹುದು" ಎಂದು ಅಭಿಪ್ರಾಯಪಟ್ಟಿದ್ದಾರೆ. 40% ಜನರು ಎಪ್ಸ್ಟೀನ್ ಫೈಲ್ ಗಳು ಈ ನಿರ್ಧಾರದಲ್ಲಿ ಯಾವುದೇ ಪಾತ್ರವಿಲ್ಲ ಎಂದು ಹೇಳಿದರೆ, 8% ಜನರು ಖಚಿತವಾಗಿಲ್ಲ ಎಂದು ತಿಳಿಸಿದ್ದಾರೆ.

ಪ್ರತಿಕ್ರಿಯೆಗಳು ರಾಜಕೀಯ ಸಂಬಂಧದ ಆಧಾರದ ಮೇಲೆ ಬದಲಾಗಿವೆ. ಡೆಮೋಕ್ರಾಟ್ ಮತದಾರರಲ್ಲಿ 81% ಜನರು ಎಪ್ಸ್ಟೀನ್ ಫೈಲ್ ಗಳು ಕಾರಣವಾಗಿರಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ. ಸ್ವತಂತ್ರ ಮತದಾರರಲ್ಲಿ 52% ಜನರು ಇದೇ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಇತ್ತ ರಿಪಬ್ಲಿಕನ್ ಮತದಾರರಲ್ಲಿ 26% ಜನರು ಮಾತ್ರ ಈ ಅಭಿಪ್ರಾಯವನ್ನು ಒಪ್ಪಿಕೊಂಡಿದ್ದು, 64% ಜನರು ಈ ವಾದವನ್ನು ತಿರಸ್ಕರಿಸಿದ್ದಾರೆ.

ಈ ಸಮೀಕ್ಷೆಯನ್ನು 'ಡೇಟಾ ಫಾರ್ ಪ್ರೋಗ್ರೆಸ್' ಸಂಸ್ಥೆ ನಡೆಸಿದ್ದು, 'ಡ್ರಾಪ್ ಸೈಟ್ ನ್ಯೂಸ್' ಮತ್ತು 'ಜೆಟಿಯೊ' ಸಂಸ್ಥೆಗಳ ಹಣಕಾಸು ಸಹಕಾರದಿಂದ ಇದು ನಡೆದಿರುವುದಾಗಿ ತಿಳಿಸಲಾಗಿದೆ.

ಇದಕ್ಕೂ ಮೊದಲು ಫೆಬ್ರವರಿ 28ರಂದು ಟ್ರಂಪ್ 'ಆಪರೇಷನ್ ಎಪಿಕ್ ಫ್ಯೂರಿ' ಕಾರ್ಯಾಚರಣೆಗೆ ಆದೇಶ ನೀಡಿದ್ದರು. ಇದರ ನಂತರ ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ವಾಯುದಾಳಿಗಳಲ್ಲಿ 1,400 ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ ಎಂದು ಇರಾನ್ ಅಧಿಕಾರಿಗಳು ತಿಳಿಸಿದ್ದಾರೆ. ಮೃತಪಟ್ಟವರಲ್ಲಿ ಇರಾನ್ ನ ಸುಪ್ರೀಂ ಲೀಡರ್ ಆಯತೊಲ್ಲಾ ಅಲಿ ಖಾಮಿನೈ ಕೂಡ ಸೇರಿದ್ದಾರೆ ಎಂದು ಅವರು ಹೇಳಿದ್ದರು.

ಈ ಸಂಘರ್ಷದ ಅವಧಿಯಲ್ಲಿ ಸುಮಾರು 140 ಅಮೆರಿಕದ ಸೈನಿಕರು ಗಾಯಗೊಂಡಿದ್ದಾರೆ ಎಂದು ಪೆಂಟಗನ್ ಮಂಗಳವಾರ ತಿಳಿಸಿದೆ. ಇದುವರೆಗೆ ಕನಿಷ್ಠ ಏಳು ಅಮೆರಿಕದ ಸೈನಿಕರು ಸಾವನ್ನಪ್ಪಿದ್ದಾರೆ ಎಂದು ವರದಿಯಾಗಿದೆ.