UAEಯಲ್ಲಿನ ಅಮೆರಿಕ ಅಡಗುತಾಣಗಳು ನಮ್ಮ ಮುಂದಿನ ಗುರಿಗಳು: IRGC

ಟೆಹ್ರಾನ್: ಇರಾನ್ ನ ಖಾರ್ಗ್ ದ್ವೀಪದ ಮೇಲೆ ಅಮೆರಿಕ ನಡೆಸಿದ ದಾಳಿಯ ಬೆನ್ನಲ್ಲೇ ಪಶ್ಚಿಮ ಏಷ್ಯಾದ ಉದ್ವಿಗ್ನತೆ ಮತ್ತಷ್ಟು ಗಂಭೀರಗೊಂಡಿದೆ. ಯುನೈಟೆಡ್ ಅರಬ್ ಎಮಿರೇಟ್ಸ್ (UAE)ನಲ್ಲಿರುವ ಅಮೆರಿಕದ ಸೈನಿಕ ಅಡಗುತಾಣಗಳು ಈಗ ನಮ್ಮ ಮುಂದಿನ ಗುರಿಗಳು ಎಂದು ಇರಾನ್ ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಎಚ್ಚರಿಸಿದೆ ಎಂದು ವರದಿಯಾಗಿದೆ.

ಇರಾನ್ ನ ಅರೆ ಸರಕಾರಿ ಸುದ್ದಿ ಸಂಸ್ಥೆ ತಸ್ನಿಮ್ ಪ್ರಕಟಿಸಿದ ಹೇಳಿಕೆಯಲ್ಲಿ, ಯುಎಇಯ ಕೆಲ ನಗರಗಳಲ್ಲಿ ಇರುವ ಅಮೆರಿಕದ ಮಿಲಿಟರಿ ಅಡಗುತಾಣಗಳು, ಬಂದರುಗಳು ಮತ್ತು ಹಡಗುಕಟ್ಟೆಗಳು ಗುರಿಗಳಾಗಿವೆ ಎಂದು IRGC ತಿಳಿಸಿದೆ. ಇವುಗಳಿಂದ ನಡೆಯುವ ಕ್ಷಿಪಣಿ ದಾಳಿಗಳಿಗೆ ಪ್ರತಿಯಾಗಿ ಕ್ರಮ ಕೈಗೊಳ್ಳುವುದು ತನ್ನ ಹಕ್ಕು ಎಂದೂ ಅದು ಹೇಳಿದೆ.

ಖಾರ್ಗ್ ದ್ವೀಪದ ಮೇಲಿನ ದಾಳಿಯನ್ನು ತೀವ್ರವಾಗಿ ಖಂಡಿಸಿರುವ IRGC, ಅಮೆರಿಕದ ಈ ಕ್ರಮವನ್ನು ಪ್ರಾದೇಶಿಕ ಸ್ಥಿರತೆಗೆ ಧಕ್ಕೆಯಾದ ಬೆಳವಣಿಗೆ ಎಂದು ಹೇಳಿದೆ. ಅಮೆರಿಕದ ಕ್ರಮಗಳಿಗೆ ತಕ್ಕ ಪ್ರತಿಕ್ರಿಯೆ ನೀಡುವ ಹಕ್ಕು ಇರಾನ್ ಗೆ ಇದೆ ಎಂಬುದನ್ನೂ ಅದು ಸ್ಪಷ್ಟಪಡಿಸಿದೆ.

ಇದೇ ವೇಳೆ, ಯಾವುದೇ ರೀತಿಯ ಹಾನಿ ಸಂಭವಿಸದಂತೆ ಮುನ್ನೆಚ್ಚರಿಕೆ ಕ್ರಮವಾಗಿ ಯುಎಇ ನಿವಾಸಿಗಳು ಹಾಗೂ ಜನಸಾಂದ್ರತೆ ಇರುವ ಪ್ರದೇಶಗಳನ್ನು ಬಂದರುಗಳು, ಹಡಗುಕಟ್ಟೆಗಳು ಮತ್ತು ಅಮೆರಿಕದ ಸೈನಿಕ ಪ್ರದೇಶಗಳಿಂದ ದೂರ ಇರಿಸಿಕೊಳ್ಳುವಂತೆ ಇರಾನ್ ಮನವಿ ಮಾಡಿದೆ.

ಈ ಬೆಳವಣಿಗೆಗಳಿಂದ ಗಲ್ಫ್ ಪ್ರದೇಶದಲ್ಲಿ ಆತಂಕ ಹೆಚ್ಚಿದ್ದು, ಪರಿಸ್ಥಿತಿ ಮತ್ತಷ್ಟು ಉದ್ವಿಗ್ನಗೊಳ್ಳುವ ಸಾಧ್ಯತೆ ಇದೆ ಎಂದು ವಿಶ್ಲೇಷಕರು ತಿಳಿಸಿದ್ದಾರೆ.