ಪ್ಲೂಟೋಗೆ ಮತ್ತೆ 'ಗ್ರಹ' ಪಟ್ಟ ನೀಡಿ: ನಾಸಾಗೆ 10 ವರ್ಷದ ಬಾಲಕಿಯ ಭಾವುಕ ಪತ್ರ; ಸಖತ್‌ ರಿಪ್ಲೈ ಕೊಟ್ಟ ಬಾಹ್ಯಾಕಾಶ ಸಂಸ್ಥೆ!

ಹತ್ತು ವರ್ಷದ ಕಾಯ್ಲಾ ಎಂಬ ಬಾಲಕಿ, ಪ್ಲೂಟೋವನ್ನು ಮತ್ತೆ ಗ್ರಹವೆಂದು ಪರಿಗಣಿಸುವಂತೆ ನಾಸಾಗೆ ಕೈಬರಹದಲ್ಲಿ ಪತ್ರ ಬರೆದಿದ್ದಾಳೆ. ತನ್ನ ವಾದಕ್ಕೆ ವೈಜ್ಞಾನಿಕ ಕಾರಣಗಳನ್ನು ನೀಡಿ, ಈ ಪತ್ರವು ವೈರಲ್ ಆಗಿದ್ದು, ನಾಸಾ ಕೂಡ ಇದಕ್ಕೆ ಪ್ರತಿಕ್ರಿಯಿಸಿದೆ.

ಹತ್ತು ವರ್ಷದ ಕಾಯ್ಲಾ (Kaela) ಎಂಬ ಬಾಲಕಿ ಪ್ಲೂಟೋವನ್ನು ಮತ್ತೆ ಗ್ರಹ ಎಂದು ಘೋಷಿಸುವಂತೆ ಕೋರಿ ನಾಸಾಗೆ (NASA) ಕೈಬರಹದಲ್ಲಿ ಪತ್ರವೊಂದನ್ನು ಬರೆದಿದ್ದಾಳೆ.

ಈ ಪತ್ರವು ಸೋಶಿಯಲ್‌ ಮೀಡಿಯಾದಲ್ಲಿ ಭಾರಿ ವೈರಲ್ ಆಗಿದ್ದು, ಬಾಲಕಿಯ ಮುಗ್ಧತೆ, ಕುತೂಹಲ ಮತ್ತು ಅವಳು ನೀಡಿರುವ ಕಾರಣಗಳು ನೆಟ್ಟಿಗರ ಮನ ಗೆದ್ದಿವೆ.

ತನ್ನ ಪತ್ರದಲ್ಲಿ ಕಾಯ್ಲಾ, "ಪ್ಲೂಟೋ ನಮ್ಮ ಸೌರಮಂಡಲದ ಒಂದು ಭಾಗ ಮತ್ತು ಇದನ್ನು ಹಿಂದೆ ಗ್ರಹವೆಂದೇ ಪರಿಗಣಿಸಲಾಗುತ್ತಿತ್ತು. ಈಗ ಇದನ್ನು 'ಕುಬ್ಜ ಗ್ರಹ' (Dwarf Planet) ಎಂದು ಕರೆಯಲಾಗುತ್ತಿದ್ದರೂ, ಇದನ್ನು ನೈಜ ಗ್ರಹವೆಂದೇ ಗುರುತಿಸಬೇಕು. ಒಂದು ವೇಳೆ ಪ್ಲೂಟೋಗೆ ಮತ್ತೆ ಗ್ರಹದ ಪಟ್ಟ ನೀಡಿದರೆ ನಾನು ಮತ್ತು ನನ್ನ ಗೆಳೆಯರು ಸೇರಿದಂತೆ ಬಹಳಷ್ಟು ಜನರಿಗೆ ಸಂತೋಷವಾಗುತ್ತದೆ" ಎಂದು ಮನವಿ ಮಾಡಿದ್ದಾಳೆ.

ಕೇವಲ ಭಾವುಕವಾಗಿ ಪತ್ರ ಬರೆಯುವುದಷ್ಟೇ ಅಲ್ಲದೆ, ತನ್ನ ವಾದಕ್ಕೆ ಪೂರಕವಾಗಿ ಕಾಯ್ಲಾ ಹಲವು ವೈಜ್ಞಾನಿಕ ವಿಚಾರಗಳನ್ನು ಪ್ರಸ್ತಾಪಿಸಿದ್ದಾಳೆ. "ಪ್ಲೂಟೋ ಕೈಪರ್ ಬೆಲ್ಟ್‌ನಲ್ಲಿ (Kuiper Belt) ನೆಲೆಸಿದೆ. ಇದನ್ನು 1930 ರಲ್ಲಿ ಕ್ಲೈಡ್ ಟಾಂಬಾಗ್ ಎಂಬುವವರು ಕಂಡುಹಿಡಿದರು. ಇದು ಭೂಮಿಯ ಚಂದ್ರನಿಗಿಂತ ಚಿಕ್ಕದಾಗಿದ್ದರೂ, ಇದಕ್ಕೆ ಐದು ಉಪಗ್ರಹಗಳಿವೆ" ಎಂಬ ಮಾಹಿತಿಯನ್ನು ಪತ್ರದಲ್ಲಿ ಉಲ್ಲೇಖಿಸಿದ್ದಾಳೆ.

ಪತ್ರದ ಕೊನೆಯಲ್ಲಿ ಕಾಯ್ಲಾ ತೋರಿಸಿದ ಪ್ರಾಮಾಣಿಕತೆ ಎಲ್ಲರ ಗಮನ ಸೆಳೆದಿದೆ. ತನ್ನ ಪತ್ರದಲ್ಲಿ ಏನಾದರೂ ಕೈಬರಹದ ತಪ್ಪುಗಳು ಅಥವಾ ಕಾಗುಣಿತದ (Spelling mistakes) ತಪ್ಪುಗಳಿದ್ದರೆ ದಯವಿಟ್ಟು ಕ್ಷಮಿಸಿ ಎಂದು ಅವಳು ಕೇಳಿಕೊಂಡಿದ್ದಾಳೆ. ಇದು ಪತ್ರಕ್ಕೆ ಹೆಚ್ಚು ವೈಯಕ್ತಿಕ ಮತ್ತು ಭಾವುಕ ಸ್ಪರ್ಶ ನೀಡಿದ್ದು, ಓದುಗರ ಮೆಚ್ಚುಗೆಗೆ ಪಾತ್ರವಾಗಿದೆ.

ಈ ಪುಟ್ಟ ಬಾಲಕಿಯ ಪತ್ರವು ನಾಸಾದ ಗಮನಕ್ಕೆ ಬಂದಾಗ ಒಂದು ವಿಶೇಷ ಘಟನೆ ನಡೆಯಿತು. ಸ್ವತಃ ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ಈ ಪತ್ರಕ್ಕೆ ಪ್ರತಿಕ್ರಿಯೆ ನೀಡಿದ್ದು, "ಕಾಯ್ಲಾ - ನಾವು ಈ ಬಗ್ಗೆ ಪರಿಶೀಲಿಸುತ್ತಿದ್ದೇವೆ" (Kaela - We are looking into this) ಎಂದು ಬರೆದಿದೆ. ನಾಸಾದ ಈ ಸರಳ ಮತ್ತು ಪ್ರೋತ್ಸಾಹದಾಯಕ ಮರುಉತ್ತರ ಬಾಲಕಿಯ ಸಾಹಸಕ್ಕೆ ದೊಡ್ಡ ಗೌರವ ಸಿಕ್ಕಂತಾಗಿದೆ. 2006 ರಲ್ಲಿ ಪ್ಲುಟೊವನ್ನು ಕುಬ್ಜ ಗ್ರಹ ಎಂದು ಮರು ವರ್ಗೀಕರಿಸಲಾಯಿತು, ಈ ನಿರ್ಧಾರವು ವಿಜ್ಞಾನಿಗಳು ಮತ್ತು ಸಾರ್ವಜನಿಕರಲ್ಲಿ ಚರ್ಚೆಯನ್ನು ಹುಟ್ಟುಹಾಕುತ್ತಲೇ ಇದೆ.