ಕಾರ್ಮಿಕರ ಮೇಲೆ ಗುಂಡು ಹಾರಿಸಿದ ದೆಹಲಿ ಪೊಲೀಸ್ ಅಧಿಕಾರಿ; ಓರ್ವ ಮೃತ್ಯು

ನವದೆಹಲಿ: ಪೋಲಿಸ್ ಅಧಿಕಾರಿಯೋರ್ವ ಕಾರ್ಮಿಕರ ಗುಂಪಿನೊಂದಿಗೆ ವಾಗ್ವಾದದ ಬಳಿಕ ಅವರತ್ತ ಗುಂಡು ಹಾರಿಸಿದ ಘಟನೆ ಇಲ್ಲಿಯ ದ್ವಾರಕಾದಲ್ಲಿ ನಡೆದಿದೆ. ಘಟನೆಯಲ್ಲಿ ಓರ್ವ ಕಾರ್ಮಿಕ ಮೃತಪಟ್ಟಿದ್ದು, ಇನ್ನೋರ್ವ ಗಾಯಗೊಂಡಿದ್ದಾನೆ ಎಂದು ಪೋಲಿಸ್ ಮೂಲಗಳು ಭಾನುವಾರ ತಿಳಿಸಿದವು.

ಜಾಫರ್ಪುರ ಕಲಾನ್ ಗ್ರಾಮದಲ್ಲಿ ನಿನ್ನೆ ಬೆಳಗಿನ ಜಾವ ಎರಡು ಗಂಟೆಯ ಸುಮಾರಿಗೆ ಈ ಘಟನೆ ನಡೆದಿದೆ. ಸಮೀಪದ ಕಾಲನಿಯೊಂದರಲ್ಲಿ ವಾಸವಿರುವ ಕೆಲವು ಕಾರ್ಮಿಕರು ಪಾರ್ಟಿಯಲ್ಲಿ ತೊಡಗಿದ್ದು, ಗದ್ದಲವೆಬ್ಬಿಸಿದ್ದರು ಎನ್ನಲಾಗಿದೆ. ಸಮೀಪದಲ್ಲಿ ವಾಸವಾಗಿರುವ ಪೋಲಿಸ್ ಅಧಿಕಾರಿ ಇದನ್ನು ವಿರೋಧಿಸಿ ಕಾರ್ಮಿಕರೊಂದಿಗೆ ಜಗಳವಾಡಿದ್ದು,ಈ ವೇಳೆ ಅವರತ್ತ ಗುಂಡು ಹಾರಿಸಿದ್ದ ಎಂದ ಮೂಲಗಳು ತಿಳಿಸಿವೆ.

ಘಟನೆಯ ಬಳಿಕ ಆರೋಪಿ ಸ್ಥಳದಿಂದ ಪರಾರಿಯಾಗಿದ್ದು, ಆತನ ಬಂಧನಕ್ಕಾಗಿ ಹಲವು ತಂಡಗಳನ್ನು ರಚಿಸಲಾಗಿದೆ ಎಂದೂ ಮೂಲಗಳು ಹೇಳಿವೆ.