ವೈದ್ಯಕೀಯ ವಿದ್ಯಾರ್ಥಿ ಆತ್ಮಹತ್ಯೆ ಘಟನೆ: ವ್ಯಾಪಕ ಹರತಾಳ: ವಾಹನಗಳಿಗೆ ತಡೆ

ತಿರುವನಂತಪುರಂ: ಕಣ್ಣೂರು ಅಂಚರಕಂಡಿ ದಂತ ವೈದ್ಯಕೀಯ ಕಾಲೇಜು ವಿದ್ಯಾರ್ಥಿ ನಿತಿನ್ ರಾಜ್ ಅವರ ಸಾವಿನ ಹಿನ್ನೆಲೆಯಲ್ಲಿ ಕ್ರಿಯಾ ಸಮಿತಿ ಇಂದು  ಕರೆ ನೀಡಿದ್ದ  ಹರತಾಳದಲ್ಲಿ ವ್ಯಾಪಕ ಪ್ರತಿಭಟನೆಗಳು ನಡೆದವು. ವಿವಿಧ ಸ್ಥಳಗಳಲ್ಲಿ ಹರತಾಳ ಬೆಂಬಲಿಗರು ಕೆಎಸ್‍ಆರ್‍ಟಿಸಿ ಬಸ್‍ಗಳು ಮತ್ತು ಖಾಸಗಿ ವಾಹನಗಳನ್ನು ತಡೆದರು. ಅಂಗಡಿಗಳನ್ನು ಮುಚ್ಚುವಂತೆಯೂ ಅವರು ಕರೆ ನೀಡಿದರು. 

ತಿರುವನಂತಪುರದ ತಂಬಾನೂರಿನಲ್ಲಿ ಪ್ರತಿಭಟನಾಕಾರರು ಮತ್ತು ಅವರು ತಡೆದ ಬಸ್‍ನ ಪ್ರಯಾಣಿಕರ ನಡುವೆ ಗಲಾಟೆ ನಡೆಯಿತು. ತಿರುವನಂತಪುರಂ, ಕಾಸರಗೋಡು, ಕಣ್ಣೂರು, ಕೋಝಿಕ್ಕೋಡ್, ಇಡುಕ್ಕಿ ಮತ್ತು ಪಾಲಕ್ಕಾಡ್ ಜಿಲ್ಲೆಗಳಲ್ಲಿ ಹರತಾಳ ಬೆಂಬಲಿಗರು ವಾಹನಗಳಿಗೆ ತಡೆ ಒಡ್ಡಿದರು. ಪೋಲೀಸರು ಹಲವು ಸ್ಥಳಗಳಲ್ಲಿ ಮಧ್ಯಪ್ರವೇಶಿಸಿ ವಾಹನಗಳನ್ನು ಸಂಚರಿಸಲು ಅವಕಾಶ ಮಾಡಿಕೊಟ್ಟರು.

ಕೆಲವು ಸ್ಥಳಗಳಲ್ಲಿ ಪೋಲೀಸರು ಹರತಾಳ ಬೆಂಬಲಿಗರನ್ನು ಬಂಧಿಸಿ ಸ್ಥಳಾಂತರಿಸಿದರು. ಈ ಮಧ್ಯೆ, ಸರ್ಕಾರ ಹರತಾಳ ನಶಿಸಲು ಪ್ರಯತ್ನಿಸುತ್ತಿದೆ ಎಂದು ಆರೋಪಿಸಿ ಪ್ರತಿಭಟನಾಕಾರರು ಹಲವಾರು ಸ್ಥಳಗಳಲ್ಲಿ ಕೆಎಸ್‍ಆರ್‍ಟಿಸಿ ಬಸ್‍ಗಳನ್ನು ತಡೆದರು.

ಕೊಟ್ಟಾಯಂನಲ್ಲಿ, ಹರತಾಳ ಬೆಂಬಲಿಗರು ಪಟ್ಟಣದಲ್ಲಿ ಕೆಎಸ್‍ಆರ್‍ಟಿಸಿ ಬಸ್‍ಗಳು ಮತ್ತು ಇತರ ಖಾಸಗಿ ವಾಹನಗಳನ್ನು ತಡೆದು ಸ್ವಲ್ಪ ಸಮಯದ ನಂತರ ಬಿಡುಗಡೆ ಮಾಡಿದರು. ವ್ಯಾಪಾರ ಸಂಸ್ಥೆಗಳು ಸಂಪೂರ್ಣವಾಗಿ ಮುಚ್ಚಲ್ಪಟ್ಟಿದ್ದವು. ಖಾಸಗಿ ಬಸ್‍ಗಳು ಮತ್ತು ಆಟೋರಿಕ್ಷಾಗಳು ಸಂಚರಿಸಿಲ್ಲ.

ಕೊಟ್ಟಾಯಂ ನಗರದ ಮುತ್ತೂಟ್ ಫೈನಾನ್ಸ್ ಅನ್ನು ಹರತಾಳ ಬೆಂಬಲಿಗರು ಮುಚ್ಚಿಸಿದರು. ಕೊಟ್ಟಾಯಂ-ಕುಮಿಲಿ ರಸ್ತೆಯ ಪೆÇಂಕುನ್ನದಲ್ಲಿ ಹರತಾಳ ಬೆಂಬಲಿಗರು ವಾಹನಗಳನ್ನು ತಡೆದರು. ಅವರು ಅವುಗಳನ್ನು ಕೆಲವು ನಿಮಿಷಗಳ ಕಾಲ ನಿಲ್ಲಿಸಿ ನಂತರ ಬಿಡುಗಡೆ ಮಾಡಿದರು. ಖಾಸಗಿ ಬಸ್‍ಗಳು ಸಂಚರಿಸಿರಲಿಲ್ಲ. ಎರ್ನಾಕುಳಂ ಮತ್ತು ಕೋಝಿಕ್ಕೋಡ್‍ಗೆ ಕೆಎಸ್‍ಆರ್‍ಟಿಸಿ ಬಸ್‍ಗಳು ಸಂಚರಿಸಿವೆ. ಸಾಮಾನ್ಯ ಸೇವೆಗಳು ಸೀಮಿತ ಪ್ರಮಾಣದಲ್ಲಿ ಸಂಚರಿಸಿದವು. 

ಪಾಲಕ್ಕಾಡ್ ಕ್ರೀಡಾಂಗಣ ಬಸ್ ನಿಲ್ದಾಣದ ಮುಂದೆಯೂ ದೊಡ್ಡ ಪ್ರತಿಭಟನೆ ನಡೆಯಿತು. ವಾಹನಗಳನ್ನು ತಡೆಯಲಾಯಿತು. ಆದರೆ ಪೋಲೀಸರ ಆದೇಶದ ಬಳಿಕ ಅವುಗಳನ್ನು ಬಿಡುಗಡೆ ಮಾಡಲಾಯಿತು. ಇಡುಕ್ಕಿ ಮತ್ತು ಇತರ ಹಲವಾರು ಸ್ಥಳಗಳಲ್ಲಿ ವಾಹನಗಳನ್ನು ತಡೆದರು. ಪೇರಂಬ್ರಾ, ಕೋಝಿಕ್ಕೋಡ್‍ನಲ್ಲಿ ಹರತಾಳ ಬೆಂಬಲಿಗರು ತಡೆದ ವಾಹನಗಳನ್ನು ಪೋಲೀಸರು ಬಿಡುಗಡೆ ಮಾಡಿದ್ದಾರೆ.

ಕಣ್ಣೂರು ಪಜ್ಯಂಗಡಿಯಲ್ಲಿಯೂ ಹರತಾಳ ಬೆಂಬಲಿಗರು ವಾಹನಗಳನ್ನು ತಡೆದಿದ್ದಾರೆ. ಕಾಸರಗೋಡು ಪರಪ್ಪ ಚುಳ್ಳಿಕ್ಕರ ಮತ್ತು ಕೊಲ್ಲಂ ಕುಂಡರ ಮುಳವನ್‍ನಲ್ಲಿ ಹರತಾಳ ಬೆಂಬಲಿಗರು ವಾಹನಗಳನ್ನು ತಡೆದಿದ್ದಾರೆ.

ವಿವಿಧ ದಲಿತ ಸಂಘಟನೆಗಳು ಮತ್ತು ನಿತಿನ್ ರಾಜ್ ಕ್ರಿಯಾ ಮಂಡಳಿ ಕರೆ ನೀಡಿರುವ ಈ ಹರತಾಳವು ಬೆಳಿಗ್ಗೆ 6 ರಿಂದ ಸಂಜೆ 6 ರವರೆಗೆ ನಡೆಯಿತು. ನಿತಿನ್ ರಾಜ್ ಸಾವಿನ ನಿಗೂಢತೆಯನ್ನು ಭೇದಿಸುವುದು ಮತ್ತು ಕಾರಣರಾದವರ ವಿರುದ್ಧ ಕೊಲೆ ಪ್ರಕರಣ ದಾಖಲಿಸುವುದು ಮುಂತಾದ ಬೇಡಿಕೆಗಳೊಂದಿಗೆ ಕರೆ ನೀಡಲಾಗಿದ್ದ ಹರತಾಳದಿಂದ ಅಗತ್ಯ ಸೇವೆಗಳು ಮತ್ತು ತ್ರಿಶೂರ್ ಪಟಾಕಿ ಅಪಘಾತ ನಡೆದ ಪ್ರದೇಶವನ್ನು ಹೊರಗಿಡಲಾಗಿತ್ತು.

ಕುಟುಂಬಕ್ಕೆ ಪರಿಹಾರವಾಗಿ 10 ಕೋಟಿ ರೂ., ಕಾಲೇಜಿನ ಮಾನ್ಯತೆ ರದ್ದುಪಡಿಸುವುದು, ಶಾಲೆಗಳಲ್ಲಿ ಜಾತಿ ತಾರತಮ್ಯವನ್ನು ಕೊನೆಗೊಳಿಸಲು ಕಾನೂನು ಜಾರಿಗೆ ತರುವುದು ಮತ್ತು ಕಣ್ಣೂರು ಎಸ್‍ಪಿಯನ್ನು ವಜಾಗೊಳಿಸುವುದು ಸೇರಿದಂತೆ ಹಲವು ಬೇಡಿಕೆಗಳನ್ನು ಕ್ರಿಯಾ ಸಮಿತಿ ಮುಂದಿಟ್ಟಿದೆ.