ಶಬರಿಮಲೆ ಮಹಿಳೆಯರ ಪ್ರವೇಶ: ಪ್ರಕರಣದಲ್ಲಿ ಶಬರಿಮಲೆಯ ವಾದ ಮಂಡಿಸಲಿರುವ ಮಾಜಿ ಮೇಲ್ಶಾಂತಿ

ಕೊಲ್ಲಂ: ಶಬರಿಮಲೆಗೆ ಮಹಿಳೆಯರ ಪ್ರವೇಶದ ಕುರಿತು ಸುಪ್ರೀಂ ಕೋರ್ಟ್‍ನಲ್ಲಿ ವಿಚಾರಣೆ ನಡೆಯುತ್ತಿರುವ ಪ್ರಕರಣದಲ್ಲಿ ವಾದ ಮಂಡಿಸಲು ಶಬರಿಮಲೆಯ ಮಾಜಿ ಮೇಲ್ಶಾಂತಿ ಎನ್. ಬಾಲಮುರಳಿ ಅರ್ಜಿ ಸಲ್ಲಿಸಿದ್ದಾರೆ. ಬಾಲಮುರಳಿ 2011-12ರ ಅವಧಿಯಲ್ಲಿ ಶಬರಿಮಲೆಯ ಮೇಲ್ಶಾಂತಿಯಾಗಿದ್ದರು. 2010-2011ರ ಅವಧಿಯಲ್ಲಿ ಅವರು ಅಟ್ಟುಕಲ್ ದೇವಸ್ಥಾನದ ಮೇಲ್ಶಾಂತಿಯಾಗಿಯೂ ಸೇವೆ ಸಲ್ಲಿಸಿದ್ದರು. ಪ್ರಸ್ತುತ ಅವರು ಕೊಲ್ಲಂನ ಪುತಿಯಕಾವು ಭಗವತಿ ದೇವಸ್ಥಾನದ ಮೇಲ್ಶಾಂತಿಯಾಗಿದ್ದಾರೆ. 

ಆಲುವಾ ತಂತ್ರ ವಿದ್ಯಾಪೀಠದ ಮಾಜಿ ಕಾರ್ಯದರ್ಶಿಯಾಗಿ ಕೆಲಸ ಮಾಡಿರುವ ಬಾಲಮುರಳಿ 20 ಕ್ಕೂ ಹೆಚ್ಚು ದೇವಾಲಯಗಳ ತಂತ್ರಿಯಾಗಿದ್ದಾರೆ. ಬಾಲಮುರಳಿ ಅವರನ್ನು ಖ್ಯಾತ ಸಾಂವಿಧಾನಿಕ ತಜ್ಞ ಅಡ್ವೊಕೇಟ್ ರಾಕೇಶ್ ದ್ವಿವೇದಿ, ವಕೀಲರಾದ ಅದಿತಿ ತ್ರಿಪಾಠಿ, ಪ್ರಣೀತ್ ಪ್ರಣವ್ ಮತ್ತು ಹೃಷಿಕೇಶ್ ಹರಿದಾಸ್ ಪ್ರತಿನಿಧಿಸುತ್ತಾರೆ.