7 ಲಕ್ಷ ರೂ. ಬಾಕಿ: ಬಸ್ ಸೇವೆ ನಿಲ್ಲಿಸಿದ ಕೆ.ಎಸ್.ಆರ್.ಟಿಸಿ ಕುಂಬಳೆ ಗ್ರಾಮಬಂಡಿ

ಕುಂಬಳೆ: ಕುಂಬಳೆ ಗ್ರಾಮ ಪಂಚಾಯತಿ ಸಹಯೋಗದೊಂದಿಗೆ ಪ್ರಾರಂಭಿಸಲಾದ ಕೆ.ಎಸ್.ಆರ್.ಟಿ.ಸಿ. ಗ್ರಾಮಬಂಡಿ ಬಸ್ 7 ಲಕ್ಷ ರೂ. ಸಾಲ ಬಾಕಿಯ ಹಿನ್ನೆಲೆಯಲ್ಲಿ ಸೇವೆಗಳನ್ನು ಮೊಟಕುಗೊಳಿಸಿದೆ. ಇದರೊಂದಿಗೆ, ಈ ಬಸ್ ಅನ್ನು ಅವಲಂಬಿಸಿರುವ ಗ್ರಾಮೀಣ ಪ್ರದೇಶದ ಪ್ರಯಾಣಿಕರು ಸಂಕಷ್ಟಕ್ಕೆ ಸಿಲುಕಿದರು. ಕಳೆದ ತಿಂಗಳಿನಿಂದ ಬಸ್ ಸೇವೆಯನ್ನು ನಿಲ್ಲಿಸಲಾಗಿತ್ತು. ಗ್ರಾಮೀಣ ಪ್ರದೇಶದ ಜನರಿಗೆ ತುಂಬಾ ಉಪಯುಕ್ತವಾಗಿದ್ದ ಗ್ರಾಮಬಂಡಿ ಸೇವೆಯನ್ನು 6 ತಿಂಗಳ ಬಾಕಿ ಬಾಕಿ ನಂತರ ಕೆಎಸ್‍ಆರ್‍ಟಿಸಿ ನಿಲ್ಲಿಸಿತು.

ಕುಂಬಳೆ ಗ್ರಾಮ ಪಂಚಾಯತಿ ಬೇಡಿಕೆ ಅನುಸರಿಸಿ, ಗ್ರಾಮೀಣ ಪ್ರದೇಶದ ಪ್ರಯಾಣ ಸಮಸ್ಯೆಯನ್ನು ಪರಿಹರಿಸಲು 2023 ರಲ್ಲಿ ಬಸ್ ಸೇವೆಯನ್ನು ಪ್ರಾರಂಭಿಸಲಾಗಿತ್ತು. ಡೀಸೆಲ್ ಮತ್ತು ಇತರ ವೆಚ್ಚಗಳಿಗೆ ಕುಂಬಳೆ ಗ್ರಾಮ ಪಂಚಾಯತಿ ಪ್ರತಿ ತಿಂಗಳು 1.25 ಲಕ್ಷ ರೂ.ಗಳನ್ನು ಕೆಎಸ್‍ಆರ್‍ಟಿಸಿಗೆ ಪಾವತಿಸಬೇಕು ಎಂಬ ಷರತ್ತು ವಿಧಿಸಲಾಗಿತ್ತು.  ಪ್ರಸ್ತುತ ಅವಧಿ ಈ ತಿಂಗಳ 31 ರವರೆಗೆ ಇತ್ತು. ಆದರೆ, ಕಳೆದ ನವೆಂಬರ್‍ನಿಂದ ಏಪ್ರಿಲ್ ವರೆಗೆ ಬಾಕಿ ಇರುವ ಮೊತ್ತವನ್ನು ಇನ್ನೂ ಪಾವತಿಸದ ಕಾರಣ ಸೇವೆಯನ್ನು ನಿಲ್ಲಿಸಲಾಯಿತು.

ಗ್ರಾಮಬಂಡಿ ಸೇವೆಯಿಂದಾಗಿ ಪಂಚಾಯತ್‍ಗೆ ವರ್ಷಕ್ಕೆ ಸುಮಾರು 14 ಲಕ್ಷ ರೂಪಾಯಿಗಳ ಹೆಚ್ಚುವರಿ ಹೊಣೆಗಾರಿಕೆ ಇದೆ ಎಂದು ಅಧಿಕೃತರು ತಿಳಿಸಿದ್ದಾರೆ. 6 ತಿಂಗಳ ಬಾಕಿ ಪಾವತಿಸಬೇಕಾಗಿದೆ. ಜಿಲ್ಲಾ ಯೋಜನಾ ಸಮಿತಿಯು ಅನುಮೋದನೆ ನೀಡಿದರೆ ಮೊತ್ತವನ್ನು ಪಾವತಿಸಬಹುದು ಎಂದು ಕುಂಬಳೆ ಪಂಚಾಯತ್ ಅಧ್ಯಕ್ಷ ವಿ.ಪಿ. ಅಬ್ದುಲ್ ಖಾದರ್ ಹೇಳಿದರು. ಮೊತ್ತವನ್ನು ತಕ್ಷಣವೇ ಪಾವತಿಸಲು ಅಗತ್ಯ ಕ್ರಮಗಳನ್ನು ತೆಗೆದುಕೊಳ್ಳಲಾಗುತ್ತಿದೆ ಎಂದು ಅಧ್ಯಕ್ಷರು ಸ್ಪಷ್ಟಪಡಿಸಿದರು.

ಬಾಕಿ ಪಾವತಿಸಿದರೆ ಸೇವೆಯನ್ನು ಪುನರಾರಂಭಿಸಬಹುದು ಎಂದು ಕೆಎಸ್‍ಆರ್‍ಟಿಸಿ ಅಧಿಕಾರಿಗಳು ತಿಳಿಸಿದ್ದಾರೆ. ಈ ವಿಷಯದ ಬಗ್ಗೆ ಪಂಚಾಯತ್ ಅಧ್ಯಕ್ಷರು ಮತ್ತು ಕಾರ್ಯದರ್ಶಿಗೆ ಹಲವಾರು ಬಾರಿ ಪತ್ರಗಳನ್ನು ಕಳುಹಿಸಿದರೂ ಯಾವುದೇ ಉತ್ತರ ಬಂದಿಲ್ಲ ಎಂದು ಸಂಬಂಧಪಟ್ಟವರು ಮಾಹಿತಿ ನೀಡಿದರು. ಈ ಮೂಲಕ ಕಾರ್ಯನಿರ್ವಹಿಸುತ್ತಿದ್ದ ಬಸ್ ಈಗ ಕಾಸರಗೋಡು-ಕಾಞಂಗಾಡ್ ಮಾರ್ಗದಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಕುಂಬಳೆಯಲ್ಲಿ ಗ್ರಾಮವಂಡಿ ಸೇವೆಯು ಕುಂಬಳೆ, ಪೇರಾಲ್, ಬಂಬ್ರಾಣ, ಕೊಡ್ಯಮೆ ಮತ್ತು ಕಳತ್ತೂರು ಮಾರ್ಗಗಳಲ್ಲಿ ಕಾರ್ಯನಿರ್ವಹಿಸುತ್ತಿತ್ತು.

ಅಭಿಮತ:

-ಗ್ರಾಮಬಂಡಿ ಬಸ್ ಸೇವೆಗೆ ಗ್ರಾ.ಪಂ.ನೇರವಾಗಿ ನಿರ್ವಹಣಾ ನಿಧಿ ನೀಡುವಂತಿಲ್ಲ. ತಿಂಗಳಿಗೆ 1.25 ಲಕ್ಷ ರೂ.ಗಳನ್ನು ಜಿಲ್ಲಾ ಯೋಜನಾ ಸಮಿತಿ ಅನುಮೋದಿಸಿದರೆ ಮಾತ್ರ ನೀಡಲು ಸಾಧ್ಯ. ಆದರೆ ಕಳೆದ 6 ತಿಂಗಳಿಂದ ಈ ಮೊತ್ತ ಪಾವತಿಸಲು ಯೋಜನಾ ಸಮಿತಿ ಅನುಮತಿ ನಿರಾಕರಿಸಿದ ಕಾರಣ ಹಣ ನೀಡಲಾಗಿಲ್ಲ. ಈ ಬಗ್ಗೆ ಹಲವು ಬಾರಿ ಮನವಿ ನೀಡಿದ್ದರೂ ಅನುಮತಿಸಿಲ್ಲ. ಜಿಲ್ಲಾ ಯೋಜನಾ ಸಮಿತಿ ನಿಧಿ ಕೂಡಲೇ ಅನುಮತಿಸಲು ಈಗಲೂ ಮನವಿ ಮಾಡುತ್ತಿದ್ದೇವೆ.

-ವಿ.ಪಿ.ಅಬ್ದುಲ್ ಖಾದರ್

ಅಧ್ಯಕ್ಷ.ಕುಂಬಳೆ ಗ್ರಾ.ಪಂ.