ಕ್ಯಾನ್ಸರ್ ರೋಗಿಗಳಿಗೆ ವರದಾನ: ಭಾರತದಲ್ಲಿ 7 ನಿಮಿಷದ 'ಮ್ಯಾಜಿಕ್' ಇಂಜೆಕ್ಷನ್ ಲಾಂಚ್!

ನವದೆಹಲಿ: ಕಳೆದ ಡಿಸೆಂಬರ್‌ನಲ್ಲಿ ಗುರುಗ್ರಾಮದ ಮೆದಾಂತ ಆಸ್ಪತ್ರೆಯ ಕ್ಯಾನ್ಸರ್ ವಿಭಾಗಕ್ಕೆ 57 ವರ್ಷದ ಜೈ ಸಿಂಗ್ (ಹೆಸರು ಬದಲಾಯಿಸಲಾಗಿದೆ) ಎಂಬುವವರು ಬಂದಿದ್ದರು. ಅತಿಯಾದ ಧೂಮಪಾನ ಮಾಡುತ್ತಿದ್ದ ಅವರಿಗೆ ಶ್ವಾಸಕೋಶದ ಕ್ಯಾನ್ಸರ್ ಇರುವುದು ಪತ್ತೆಯಾಗಿತ್ತು. ಅಷ್ಟರಲ್ಲಾಗಲೇ ಕ್ಯಾನ್ಸರ್ ಅವರ ಮೆದುಳು, ಯಕೃತ್ತು (liver) ಮತ್ತು ಮೂಳೆಗಳಿಗೆ ಹರಡಿತ್ತು..

ಅವರು ರೇಡಿಯೊಥೆರಪಿ ಚಿಕಿತ್ಸೆ ಪಡೆಯಲು ಆರಂಭಿಸಿದ್ದರೂ, ಕಿಮೋಥೆರಪಿಯ ಅಡ್ಡಪರಿಣಾಮಗಳಿಗೆ ಹೆದರಿದ್ದರು. ಆ ಸಮಯದಲ್ಲಿ ವೈದ್ಯರು ಅವರಿಗೆ 'ಇಮ್ಯುನೊಥೆರಪಿ' ಚಿಕಿತ್ಸೆಯನ್ನು ಸೂಚಿಸಿದರು. ಈಗ ಈ ಚಿಕಿತ್ಸೆಯು ಇಂಜೆಕ್ಷನ್ ಮೂಲಕ ಅತಿ ಸುಲಭವಾಗಿ ಲಭ್ಯವಿದೆ.

​"ಕಿಮೋಥೆರಪಿಯ ಅಡ್ಡಪರಿಣಾಮಗಳ ಬಗ್ಗೆ ಜೈ ಸಿಂಗ್ ಅವರು ಕೇಳಿ ಹೆದರಿದ್ದರು. ಅದೃಷ್ಟವಶಾತ್, ಅವರ PD-L1 ಮಟ್ಟವು ಶೇ. 75 ರಷ್ಟಿತ್ತು. ಅಂದರೆ, ಅವರ ದೇಹದ ಮುಕ್ಕಾಲು ಭಾಗದಷ್ಟು ಕ್ಯಾನ್ಸರ್ ಜೀವಕೋಶಗಳು ರೋಗನಿರೋಧಕ ಶಕ್ತಿಯಿಂದ ತಪ್ಪಿಸಿಕೊಳ್ಳಲು ಈ ಪ್ರೋಟೀನ್ ಅನ್ನು ಕವಚದಂತೆ ಬಳಸುತ್ತಿದ್ದವು. ಇದು ಅವರಿಗೆ ಇಮ್ಯುನೊಥೆರಪಿ ಸೂಕ್ತ ಎಂಬುದನ್ನು ಖಚಿತಪಡಿಸಿತು. ಸಾಮಾನ್ಯವಾಗಿ ಇದನ್ನು ಡ್ರಿಪ್ಸ್ (infusion) ಮೂಲಕ ನೀಡಲಾಗುತ್ತಿತ್ತು, ಆದರೆ ನಾವು ಹೊಸದಾಗಿ ಬಿಡುಗಡೆಯಾದ ಅಟೆಜೋಲಿಜುಮಾಬ್ (Atezolizumab) ಎಂಬ ಚರ್ಮದ ಅಡಿಯಲ್ಲಿ ನೀಡುವ ಇಂಜೆಕ್ಷನ್ ಅನ್ನು ಅವರಿಗೆ ಶಿಫಾರಸು ಮಾಡಿದೆವು," ಎಂದು ಆಸ್ಪತ್ರೆಯ ಮೆಡಿಕಲ್ ಆಂಕೊಲಾಜಿ ವಿಭಾಗದ ಮುಖ್ಯಸ್ಥ ಡಾ. ಸಜ್ಜನ್ ರಾಜಪುರೋಹಿತ್ ತಿಳಿಸಿದ್ದಾರೆ.

​ಔಷಧೀಯ ದೈತ್ಯ ಸಂಸ್ಥೆ 'ರೋಚೆ' (Roche) ತನ್ನ ಇಮ್ಯುನೊಥೆರಪಿ ಔಷಧ ಅಟೆಜೋಲಿಜುಮಾಬ್ ಅನ್ನು 'ಟೆಸೆಂಟ್ರಿಕ್' (Tecentriq) ಎಂಬ ಬ್ರಾಂಡ್ ಹೆಸರಿನಲ್ಲಿ ಭಾರತೀಯ ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. ಇಂಜೆಕ್ಷನ್ ಮೂಲಕ ಚಿಕಿತ್ಸೆ ನೀಡುವುದರಿಂದ ರೋಗಿಗಳು ಆಸ್ಪತ್ರೆಯಲ್ಲಿ ಕಳೆಯುವ ಸಮಯ ಉಳಿಯುತ್ತದೆ ಮತ್ತು ಅಡ್ಡಪರಿಣಾಮಗಳು ಕಡಿಮೆಯಿರುತ್ತವೆ ಎಂದು ಡಾ. ರಾಜಪುರೋಹಿತ್ ಹೇಳಿದ್ದಾರೆ.

​ಈ ಇಮ್ಯುನೊಥೆರಪಿ ಚುಚ್ಚುಮದ್ದು ಯಾರಿಗೆ?
​ಭಾರತದಲ್ಲಿ ಪ್ರತಿ ವರ್ಷ ಪತ್ತೆಯಾಗುವ ಸುಮಾರು 81,000 ಶ್ವಾಸಕೋಶದ ಕ್ಯಾನ್ಸರ್ ಪ್ರಕರಣಗಳಲ್ಲಿ ಹೆಚ್ಚಿನವು 'ನಾನ್-ಸ್ಮಾಲ್ ಸೆಲ್ ಲಂಗ್ ಕ್ಯಾನ್ಸರ್' (NSCLC) ಮಾದರಿಯವು. ಈ ಇಂಜೆಕ್ಷನ್ ಅಂತಹ ರೋಗಿಗಳಿಗೆ ಉದ್ದೇಶಿಸಲಾಗಿದೆ. ಆದರೆ, ಇದು ಎಲ್ಲರಿಗೂ ಅನ್ವಯಿಸುವುದಿಲ್ಲ. ಯಾರ ಜೀವಕೋಶಗಳಲ್ಲಿ PD-L1 ರಿಸೆಪ್ಟರ್‌ಗಳು ಹೆಚ್ಚಿರುತ್ತವೆಯೋ ಅವರಿಗೆ ಮಾತ್ರ ಇದು ಪರಿಣಾಮಕಾರಿ. ಸುಮಾರು ಅರ್ಧದಷ್ಟು ಶ್ವಾಸಕೋಶದ ಕ್ಯಾನ್ಸರ್ ರೋಗಿಗಳು ಈ ಚಿಕಿತ್ಸೆಗೆ ಅರ್ಹರಾಗಿರುತ್ತಾರೆ.

​ರೋಗಿಗಳಿಗೆ ಇದರಿಂದ ಏನು ಪ್ರಯೋಜನ?
​ಈ ಔಷಧವು ರೋಗಿಗಳ ಜೀವಿತಾವಧಿಯನ್ನು ಹೆಚ್ಚಿಸಲು ಮತ್ತು ಕ್ಯಾನ್ಸರ್ ಹರಡುವಿಕೆಯನ್ನು ತಡೆಯಲು ಸಹಾಯ ಮಾಡುತ್ತದೆ ಎಂದು ಅಧ್ಯಯನಗಳು ಸಾಬೀತುಪಡಿಸಿವೆ. ಈ ಇಂಜೆಕ್ಷನ್ ಅನ್ನು ತರಬೇತಿ ಪಡೆದ ದಾದಿಯರು ಕೇವಲ ಏಳು ನಿಮಿಷಗಳಲ್ಲಿ ತೊಡೆಯ ಭಾಗಕ್ಕೆ ನೀಡಬಹುದು. ಇದರಿಂದ ಆಸ್ಪತ್ರೆಗಳಿಗೂ ಲಾಭವಾಗಲಿದ್ದು, ಒಬ್ಬರಿಗೆ ಡ್ರಿಪ್ಸ್ ನೀಡುವ ಸಮಯದಲ್ಲಿ ಐವರು ರೋಗಿಗಳಿಗೆ ಇಂಜೆಕ್ಷನ್ ನೀಡಬಹುದು.

​ಇದರ ವೆಚ್ಚ ಎಷ್ಟು?
​ಈ ಔಷಧಿಯ ವೆಚ್ಚ ಸಾಕಷ್ಟು ಹೆಚ್ಚಿದೆ. ಒಂದು ಡೋಸ್‌ಗೆ ಸುಮಾರು 3.7 ಲಕ್ಷ ರೂಪಾಯಿ ತಗಲುತ್ತದೆ ಮತ್ತು ಹೆಚ್ಚಿನ ರೋಗಿಗಳಿಗೆ ಸುಮಾರು ಆರು ಡೋಸ್‌ಗಳ ಅಗತ್ಯವಿರುತ್ತದೆ. ಆದ್ದರಿಂದ ಕಂಪನಿಯು 'ಬ್ಲೂ ಟ್ರೀ' ಎಂಬ ಕಾರ್ಯಕ್ರಮದ ಮೂಲಕ ರೋಗಿಗಳಿಗೆ ರಿಯಾಯಿತಿ ದರದಲ್ಲಿ ಚಿಕಿತ್ಸೆ ನೀಡಲು ಮುಂದಾಗಿದೆ. ಅಲ್ಲದೆ, ಇದನ್ನು ಕೇಂದ್ರ ಸರ್ಕಾರದ ಆರೋಗ್ಯ ಯೋಜನೆಯಡಿ (CGHS) ಸೇರಿಸಲಾಗಿದೆ. ಇಂಜೆಕ್ಷನ್ ರೂಪದ ಔಷಧಿಯ ಬೆಲೆ ಡ್ರಿಪ್ಸ್‌ಗಿಂತ ಸುಮಾರು 25,000 ದಿಂದ 30,000 ರೂಪಾಯಿ ಹೆಚ್ಚಿದ್ದರೂ, ಆಸ್ಪತ್ರೆಯ ದಾಖಲಾತಿ ವೆಚ್ಚ ಉಳಿಯುವುದರಿಂದ ಒಟ್ಟಾರೆ ಖರ್ಚು ಸರಿಸುಮಾರು ಒಂದೇ ಆಗಿರುತ್ತದೆ.