ಬಾಂಗ್ಲಾದೇಶದಲ್ಲಿ ಜನರನ್ನು ಸೆಳೆಯುತ್ತಿರುವ 'ಟ್ರಂಪ್', 'ನೆತನ್ಯಾಹು' ಹೆಸರಿನ ಎಮ್ಮೆಗಳು!

 ಢಾಕಾ: ಬಾಂಗ್ಲಾದೇಶದಲ್ಲಿ 'ಟ್ರಂಪ್' ಮತ್ತು 'ನೆತನ್ಯಾಹು' ಹೆಸರಿನ ಎಮ್ಮೆಗಳು ಈದುಲ್ ಅಝ್‌ಹಾ ಹಬ್ಬದ ಹಿನ್ನೆಲೆ ವೈರಲ್‌ ಆಗಿ ಸಂಚಲನವನ್ನು ಸೃಷ್ಟಿಸಿದೆ.

ಢಾಕಾ ಬಳಿಯ ನಾರಾಯಣಗಂಜ್‌ನಲ್ಲಿರುವ ಫಾರ್ಮ್‌ವೊಂದರಲ್ಲಿ 700 ಕೆಜಿ ತೂಕದ ಎಮ್ಮೆಗೆ ಡೊನಾಲ್ಡ್‌ ಟ್ರಂಪ್‌ ಎಂದು ಹೆಸರಿಡಲಾಗಿದೆ.

ಇದು ಅಮೆರಿಕದ ಅಧ್ಯಕ್ಷರನ್ನು ಹೋಲುತ್ತದೆ ಎಂಬ ಕಾರಣಕ್ಕೆ ಈ ಹೆಸರನ್ನು ಇಡಲಾಗಿದೆ. ಎಮ್ಮೆಯು ಗುಲಾಬಿ ಬಣ್ಣದ ಚರ್ಮ ಮತ್ತು ಟ್ರಂಪ್ ಅವರ ಕೂದಲನ್ನು ಹೋಲುವ ಬಂಗಾರದ ಬಣ್ಣದ ರೋಮಗಳನ್ನು ಹೊಂದಿದೆ.

"ಫೇಸ್‌ಬುಕ್‌ನಲ್ಲಿ ಅದರ ಚಿತ್ರಗಳನ್ನು ನೋಡಿದಾಗ ಅದು ಡೊನಾಲ್ಡ್ ಟ್ರಂಪ್ ಅವರಂತೆಯೇ ಕಾಣಿಸಿತು. ಅದರ ಮುಖದ ವಿನ್ಯಾಸ ಮತ್ತು ಕೂದಲಿನ ಶೈಲಿಯೂ ಟ್ರಂಪ್ ಅವರನ್ನು ಹೋಲುತ್ತವೆ" ಎಂದು ಪ್ರೋಥೋಮ್ ಅಲೋ ಎಂಬವರು ಹೇಳಿದ್ದಾರೆ.

"ಎಮ್ಮೆ ತುಂಬಾ ಶಾಂತ ಮತ್ತು ಸಭ್ಯ ಸ್ವಭಾವವನ್ನು ಹೊಂದಿದೆ. ಇದು ಖಂಡಿತವಾಗಿಯೂ ಡೊನಾಲ್ಡ್ ಟ್ರಂಪ್‌ಗೆ ಹೊಂದಿಕೆಯಾಗುವುದಿಲ್ಲ" ಎಂದು ಅವರು ವ್ಯಂಗ್ಯವಾಡಿದರು.

ಸುಮಾರು 10 ತಿಂಗಳ ಹಿಂದೆ ಎಮ್ಮೆಯನ್ನು ಜಾನುವಾರು ಮಾರುಕಟ್ಟೆಯಿಂದ ಖರೀದಿಸಲಾಗಿತ್ತು. ಎಮ್ಮೆಯನ್ನು ನೋಡಲು ಮತ್ತು ಫೋಟೊ ತೆಗೆದುಕೊಳ್ಳಲು ಪ್ರತಿದಿನ ಹಲವು ಸಂದರ್ಶಕರು ತಮ್ಮ ಜಮೀನಿಗೆ ಬರುತ್ತಿದ್ದರು ಎಂದು ಮಾಲಕ ಝಿಯಾವುದ್ದೀನ್ ಮೃಧಾ ಹೇಳಿದರು.

"ನನ್ನ ತಮ್ಮ ಎಮ್ಮೆಯ ತಲೆಯ ಮೇಲಿನ ಕೂದಲನ್ನು ನೋಡಿ ತಮಾಷೆಯಾಗಿ ಅದಕ್ಕೆ ಡೊನಾಲ್ಡ್ ಟ್ರಂಪ್ ಎಂದು ಹೆಸರಿಟ್ಟಿದ್ದರು. ಇದು ತುಂಬಾ ಶಾಂತ ಸ್ವಭಾವವನ್ನು ಹೊಂದಿದೆ. ಅಲ್ಬಿನೋ ಎಮ್ಮೆಗಳು ಸಾಮಾನ್ಯವಾಗಿ ಶಾಂತಿಯುತವಾಗಿರುತ್ತವೆ ಮತ್ತು ಕೆರಳಿಸದ ಹೊರತು ಆಕ್ರಮಣಕಾರಿಯಾಗುವುದಿಲ್ಲ" ಎಂದು ಅವರು ಹೇಳಿದರು.

ಎಮ್ಮೆಯನ್ನು ಮಾರಾಟ ಮಾಡಲಾಗಿದೆ ಮತ್ತು ಈದ್ ಹಬ್ಬಕ್ಕೆ ಮೊದಲು ಹೊಸ ಮಾಲಕರಿಗೆ ತಲುಪಿಸಲಾಗುತ್ತದೆ ಎಂದು ಹೇಳಿದರು.

ನಾರಾಯಣಗಂಜ್‌ನಲ್ಲಿ ಇಸ್ರೇಲ್‌ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಹೆಸರಿನ ಆಕ್ರಮಣಕಾರಿ ಆಲ್ಬಿನೋ ಎಮ್ಮೆ ಕೂಡ ಇದೆ, ಅದು ಜನಸಂದಣಿಯನ್ನು ಸೆಳೆಯುತ್ತಿದೆ.

(Photo credit: Independent Television/YouTube)

750 ಕೆಜಿಗಿಂತ ಹೆಚ್ಚು ತೂಕವಿರುವ ಈ ಎಮ್ಮೆ ಆಕ್ರಮಣಕಾರಿಯಾಗಿದೆ. ಇದರ ಕೂದಲು ಮತ್ತು ಕಣ್ಣುಗಳು ನೆತನ್ಯಾಹು ಅವರನ್ನು ಹೋಲುತ್ತದೆ ಎಂದು ವರದಿಯಾಗಿದೆ.

ಈ ಎಮ್ಮೆಯ ಬಗ್ಗೆ ತಿಳಿದ ನಂತರ ನಾನು ಇಲ್ಲಿಗೆ ಬಂದೆ ಎಂದು ಹೆಸರು ಬಹಿರಂಗಪಡಿಸದ ಸಂದರ್ಶಕರೊಬ್ಬರು ಸ್ಥಳೀಯ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.