ಇತಿಹಾಸ ನಿರ್ಮಿಸಿದ ಫಾತಿಮಾ ತಹ್ಲಿಯಾ: ಮುಸ್ಲಿಂ ಲೀಗ್‍ನ ಮೊದಲ ಮಹಿಳಾ ಶಾಸಕಿ, ಪೆರಂಬ್ರಾದಲ್ಲಿ ಗೆಲುವು

ಕೋಝಿಕೋಡ್: ಫಾತಿಮಾ ತಹ್ಲಿಯಾ ಕೇರಳ ರಾಜಕೀಯ ಮತ್ತು ಮುಸ್ಲಿಂ ಲೀಗ್‍ನ ಇತಿಹಾಸದಲ್ಲಿ ಹೊಸ ಅಧ್ಯಾಯವನ್ನು ಬರೆದಿದ್ದಾರೆ. ಮುಸ್ಲಿಂ ಲೀಗ್‍ನ ಇತಿಹಾಸದಲ್ಲಿ ಮೊದಲ ಮಹಿಳಾ ಶಾಸಕಿ ಎಂಬ ದಾಖಲೆಯೊಂದಿಗೆ ತಹ್ಲಿಯಾ ವಿಧಾನಸಭೆಗೆ ಪ್ರವೇಶಿಸುತ್ತಿದ್ದಾರೆ. 

ಸಿಪಿಎಂನ ಕಬ್ಬಿಣದ ಕೋಟೆಯಾದ ಪೆರಂಬ್ರಾದಲ್ಲಿ ಎಲ್‍ಡಿಎಫ್ ಸಂಚಾಲಕ ಟಿ.ಪಿ. ರಾಮಕೃಷ್ಣನ್ ಅವರನ್ನು ಪರಾಭವಗೊಳಿಸುವ ಮೂಲಕ ತಹ್ಲಿಯಾ 'ಜೈಂಟ್ ಕಿಲ್ಲರ್' ಎಂಬ ಅಡ್ಡಹೆಸರನ್ನು ಸಹ ಗಳಿಸಿದ್ದಾರೆ.

ಸಿಪಿಎಂ 1980 ರಿಂದ ನಿರಂತರವಾಗಿ ಗೆಲ್ಲುತ್ತಿರುವ ಪೆರಂಬ್ರಾ ಕ್ಷೇತ್ರವನ್ನು ವಶಪಡಿಸಿಕೊಂಡ ತಹ್ಲಿಯಾ ಅವರ ಗೆಲುವು ಯುಡಿಎಫ್‍ಗೆ ದುಪ್ಪಟ್ಟು ಸಿಹಿಯಾಗಿತ್ತು. ವಕೀಲೆ ಮತ್ತು ಕೋಝಿಕೋಡ್ ಕಾಪೆರ್Çರೇಷನ್ ಕೌನ್ಸಿಲರ್ ತಹ್ಲಿಯಾ ತಮ್ಮ ಜನಾದೇಶದ ಮೂಲಕ ರಾಜಕೀಯದಲ್ಲಿ ತಮ್ಮ ಹೋರಾಟದ ಮನೋಭಾವವನ್ನು ಸಾಬೀತುಪಡಿಸಿದ್ದಾರೆ.

ಮುಸ್ಲಿಂ ಲೀಗ್‍ನಲ್ಲಿ ಮಹಿಳಾ ಪ್ರಾತಿನಿಧ್ಯ ಮತ್ತು ಲಿಂಗ ನ್ಯಾಯಕ್ಕಾಗಿ ಧ್ವನಿ ಎತ್ತುವ ಮೂಲಕ ಫಾತಿಮಾ ತಹ್ಲಿಯಾ ರಾಜಕೀಯದಲ್ಲಿ ಗಮನಾರ್ಹರು.

ಮುಸ್ಲಿಂ ವಿದ್ಯಾರ್ಥಿ ಒಕ್ಕೂಟದ ಬಾಲಕಿಯರ ವಿಭಾಗವಾದ 'ಹರಿತ'ದ ಮೊದಲ ರಾಜ್ಯ ಅಧ್ಯಕ್ಷೆಯಾಗಿದ್ದರು. ಕ್ಯಾಂಪಸ್‍ಗಳಲ್ಲಿ ಲೀಗ್‍ನ ಪ್ರಭಾವ ಹೆಚ್ಚಿಸುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದರು.

ಹರಿತ ಪದಾಧಿಕಾರಿಗಳು ಎಂಎಸ್‍ಎಫ್ ನಾಯಕರ ವಿರುದ್ಧ ಎತ್ತಿದ್ದ ಸ್ತ್ರೀದ್ವೇಷದ ದೂರುಗಳ ವಿರುದ್ಧ ದೃಢವಾಗಿ ನಿಂತ ತಹ್ಲಿಯಾ, ಎಂಎಸ್‍ಎಫ್ ರಾಷ್ಟ್ರೀಯ ಉಪಾಧ್ಯಕ್ಷೆ ಹುದ್ದೆಯನ್ನು ಕಳೆದುಕೊಂಡರು. ಆದರೆ ಅವರು ಗೌರವಾನ್ವಿತ ರಾಜಕೀಯ ಸ್ಥಾನಕ್ಕಾಗಿ ಪಕ್ಷದ ಒಳಗೆ ಮತ್ತು ಹೊರಗೆ ಹೋರಾಡುತ್ತಲೇ ಇದ್ದರು. ತಹ್ಲಿಯಾ ಪ್ರಸ್ತುತ ಮುಸ್ಲಿಂ ಯೂತ್ ಲೀಗ್‍ನ ರಾಜ್ಯ ಕಾರ್ಯದರ್ಶಿಯಾಗಿದ್ದಾರೆ.