ಚುನಾವಣೋತ್ತರ ಸಮೀಕ್ಷೆ | 'Today's Chanakya'ದ ಪ್ರಕಾರ ಪಶ್ಚಿಮ ಬಂಗಾಳದಲ್ಲಿ ಬಿಜೆಪಿಗೆ 192ಕ್ಕೂ ಅಧಿಕ ಸ್ಥಾನಗಳಲ್ಲಿ ಗೆಲುವು

ಕೋಲ್ಕತ್ತ: ಗುರುವಾರ ಪ್ರಕಟವಾದ 'ಟುಡೇಸ್ ಚಾಣಕ್ಯ' ಸಮೀಕ್ಷೆಯ ಪ್ರಕಾರ, ಭಾರತೀಯ ಜನತಾ ಪಕ್ಷ (ಬಿಜೆಪಿ) ಪಶ್ಚಿಮ ಬಂಗಾಳ ವಿಧಾನಸಭೆ ಚುನಾವಣೆಯಲ್ಲಿ 192 ಕ್ಕೂ ಹೆಚ್ಚು ಸ್ಥಾನಗಳನ್ನು ಪಡೆದು ಸ್ಪಷ್ಟ ಬಹುಮತ ಸಾಧಿಸಲಿದೆ ಎಂದು ಅಂದಾಜಿಸಲಾಗಿದೆ. 

ತೃಣಮೂಲ ಕಾಂಗ್ರೆಸ್‌ (ಟಿಎಂಸಿ) 100 ಕ್ಕೂ ಹೆಚ್ಚು ಸ್ಥಾನಗಳನ್ನು ಪಡೆಯುವ ಸಾಧ್ಯತೆಯಿದೆ.

ಇತರ ಪಕ್ಷಗಳು 2 ಸ್ಥಾನಗಳಿಗೆ ಸೀಮಿತವಾಗುವ ಸಾಧ್ಯತೆ ಇದೆ. 294 ಸದಸ್ಯರ ವಿಧಾನಸಭೆಯಲ್ಲಿ ಬಹುಮತಕ್ಕೆ 147 ಸ್ಥಾನಗಳು ಅಗತ್ಯವಾಗಿದೆ.

ಈ ಅಂದಾಜುಗಳು ನಿಜವಾದರೆ, ಕಳೆದ 15 ವರ್ಷಗಳಿಂದ ರಾಜ್ಯದಲ್ಲಿರುವ ಟಿಎಂಸಿ ಆಡಳಿತವು ಅಂತ್ಯವಾಗುವ ಸಾಧ್ಯತೆ ಇದೆ. ಮತದಾರರ ಮನೋಭಾವದಲ್ಲಿ ಬದಲಾವಣೆ ಕಂಡುಬಂದಿದೆ ಎಂದು ರಾಜಕೀಯ ವಲಯವು ವಿಶ್ಲೇಷಿಸಿದೆ.

ಇದು ಬಿಜೆಪಿಗೆ ಗೆಲುವು ಎಂದು ಸೂಚಿಸುವ ಐದನೇ ಚುನಾವಣೋತ್ತರ ಸಮೀಕ್ಷೆ. ಆದರೆ 2021ರ ಚುನಾವಣೆಯಲ್ಲಿ ಚುನಾವಣೋತ್ತರ ಸಮೀಕ್ಷೆಗಳು ಸಮೀಪದ ಪೈಪೋಟಿ ಎಂದು ಹೇಳಿದ್ದರೂ, ಅಂತಿಮವಾಗಿ ಟಿಎಂಸಿ 215 ಸ್ಥಾನಗಳನ್ನು ಗೆದ್ದಿತ್ತು; ಬಿಜೆಪಿ 77 ಸ್ಥಾನಗಳಿಗೆ ಸೀಮಿತಗೊಂಡಿತ್ತು.

ರಾಜ್ಯದಲ್ಲಿ ಎಪ್ರಿಲ್ 23 ಮತ್ತು 29ರಂದು ಎರಡು ಹಂತಗಳಲ್ಲಿ ಮತದಾನ ನಡೆದಿದ್ದು, ಶೇ. 90 ಕ್ಕೂ ಹೆಚ್ಚು ಮತದಾನ ದಾಖಲಾಗಿದೆ. ಹೆಚ್ಚಿನ ಮತದಾನವನ್ನು ಬದಲಾವಣೆಯ ಸೂಚಕವಾಗಿ ಕೆಲವರು ನೋಡುತ್ತಿದ್ದಾರೆ.

ಇತರೆ ಸಮೀಕ್ಷೆಗಳೂ ಮಿಶ್ರ ಚಿತ್ರಣ ನೀಡಿವೆ. ಮ್ಯಾಟ್ರಿಝ್ ಸಮೀಕ್ಷೆ ಬಿಜೆಪಿಗೆ 146-161 ಮತ್ತು ಟಿಎಂಸಿಗೆ 125-140 ಸ್ಥಾನಗಳನ್ನು ಅಂದಾಜಿಸಿದೆ. ಪಿ-ಮಾರ್ಕ್ ಸಮೀಕ್ಷೆ ಬಿಜೆಪಿಗೆ 150-175, ಟಿಎಂಸಿಗೆ 118-138 ಸ್ಥಾನಗಳನ್ನು ಸೂಚಿಸಿದೆ.

ಚಾಣಕ್ಯ ಸ್ಟ್ರಾಟಜೀಸ್ ಸಮೀಕ್ಷೆ ಬಿಜೆಪಿಗೆ 150-160 ಹಾಗೂ ಟಿಎಂಸಿಗೆ 130-140 ಸ್ಥಾನಗಳನ್ನು ಅಂದಾಜಿಸಿದೆ. ಪೋಲ್ ಡೈರಿ ಸಮೀಕ್ಷೆ ಬಿಜೆಪಿಗೆ 142-171 ಮತ್ತು ಟಿಎಂಸಿಗೆ 99-127 ಸ್ಥಾನಗಳು ಬರಲಿದೆ ಎಂದು ಹೇಳಿದೆ.

ಆದರೆ ಕೆಲವು ಸಮೀಕ್ಷೆಗಳು ಟಿಎಂಸಿಗೆ ಮುನ್ನಡೆ ನೀಡಿವೆ. ಪೀಪಲ್ಸ್ ಪಲ್ಸ್ ಸಮೀಕ್ಷೆ ಟಿಎಂಸಿ 177-187 ಸ್ಥಾನಗಳನ್ನು ಗೆಲ್ಲಲಿದೆ ಎಂದು ಹೇಳಿದರೆ, ಜನ್ಮತ್ ಪೋಲ್ಸ್ 195-205 ಸ್ಥಾನಗಳನ್ನು ಆಡಳಿತ ಪಕ್ಷಕ್ಕೆ ನೀಡಿದೆ. ಜೆವಿಸಿ ಸಮೀಕ್ಷೆ ಬಿಜೆಪಿ 138-159 ಮತ್ತು ಟಿಎಂಸಿ 131-152 ಸ್ಥಾನಗಳೊಂದಿಗೆ ಸಮೀಪದ ಪೈಪೋಟಿ ಸೂಚಿಸಿದೆ.