ವಕ್ಫ್ ಆಸ್ತಿಗಳ ಕಾನೂನುಬದ್ಧ ಸ್ಥಾನಮಾನಕ್ಕೆ ಜೂ. 30 ಅಂತಿಮ ಗಡುವು

ನವದೆಹಲಿ: ವಕ್ಫ್ ತಿದ್ದುಪಡಿ ಕಾಯ್ದೆ-2025 ಜಾರಿಗೆ ಬರುವ ಮುನ್ನ ಅಸ್ತಿತ್ವದಲ್ಲಿದ್ದ ವಕ್ಫ್ ಆಸ್ತಿಗಳಿಗೆ ಕಾನೂನುಬದ್ಧ ಸ್ಥಾನಮಾನ ಪಡೆಯಲು ನಿಗದಿಪಡಿಸಿರುವ ಜೂ. 30ರ ಗಡುವು ಸಮೀಪಿಸುತ್ತಿದ್ದು, ದೇಶದಾದ್ಯಂತ ವಕ್ಫ್ ಆಸ್ತಿಗಳ ನೋಂದಣಿ ಮತ್ತು ಪರಿಶೀಲನಾ ಪ್ರಕ್ರಿಯೆ ಅಂತಿಮ ಹಂತ ತಲುಪಿದೆ.

ಈಗಾಗಲೇ ಕೇಂದ್ರೀಯ ವಕ್ಫ್ ಪೋರ್ಟಲ್‌ನಲ್ಲಿ ಅಪ್‌ಲೋಡ್ ಮಾಡಲಾಗಿರುವ ಆಸ್ತಿಗಳ ಮಾಹಿತಿಗೆ ಸಂಬಂಧಿಸಿದ ತಿದ್ದುಪಡಿಗಳನ್ನು ಸಲ್ಲಿಸಲು ಜೂ. 30 ಕೊನೆಯ ದಿನವಾಗಿದೆ. ಇದೇ ವೇಳೆ, ಇದುವರೆಗೆ ಆಸ್ತಿಗಳ ವಿವರಗಳನ್ನು ಅಪ್‌ಲೋಡ್ ಮಾಡದ ವಕ್ಫ್ ಸಂಸ್ಥೆಗಳಿಗೆ ವಿವಿಧ ನ್ಯಾಯಮಂಡಳಿಗಳು ನೀಡಿದ್ದ ಆರು ತಿಂಗಳ ವಿಸ್ತರಣಾ ಅವಧಿಯೂ ಇದೇ ದಿನ ಅಂತ್ಯಗೊಳ್ಳಲಿದೆ. ಈ ಗಡುವಿನೊಳಗೆ ಮಾಹಿತಿ ಸಲ್ಲಿಸದಿದ್ದರೆ, ಮತ್ತಷ್ಟು ಅವಧಿ ವಿಸ್ತರಣೆ ನೀಡಲಾಗುವುದಿಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಕೇಂದ್ರ ಸರ್ಕಾರವು ಕಳೆದ ವರ್ಷದ ಜೂನ್ 6ರಂದು ಆರಂಭಿಸಿದ್ದ ಕೇಂದ್ರೀಯ ವಕ್ಫ್ ಪೋರ್ಟಲ್ 'ಉಮೀದ್‌'ನಲ್ಲಿ ದೇಶದಾದ್ಯಂತ ದಾಖಲಾಗಿರುವ 7.95 ಲಕ್ಷ ವಕ್ಫ್ ಆಸ್ತಿಗಳ ಪೈಕಿ ಇದುವರೆಗೆ 5.87 ಲಕ್ಷ ಆಸ್ತಿಗಳ ವಿವರಗಳನ್ನು ಪರಿಶೀಲನೆ ಮತ್ತು ಅನುಮೋದನೆಗಾಗಿ ಅಪ್‌ಲೋಡ್ ಮಾಡಲಾಗಿದೆ. ಪೋರ್ಟಲ್‌ ನಲ್ಲಿ ನೈಜ ಸಮಯದ ಆಧಾರದ ಮೇಲೆ ಅಂಕಿ-ಅಂಶಗಳು ಬದಲಾಗುತ್ತಿದ್ದು, ಶನಿವಾರದವರೆಗಿನ ಮಾಹಿತಿಯಂತೆ ಈ ವಿವರಗಳು ಲಭ್ಯವಾಗಿವೆ.

ಮೂಲಗಳ ಪ್ರಕಾರ, ಸುಮಾರು 1.2 ಲಕ್ಷ ವಕ್ಫ್ ಆಸ್ತಿಗಳು ವಿವಿಧ ಹಂತದ ಪರಿಶೀಲನಾ ಪ್ರಕ್ರಿಯೆಯಲ್ಲಿವೆ. ಈ ಪೈಕಿ ಕೆಲವು ಆಸ್ತಿಗಳ ದಾಖಲೆಗಳ ಪರಿಶೀಲನೆ ನಡೆಯುತ್ತಿದ್ದು, ಇನ್ನೂ ಕೆಲವು ಪ್ರಕರಣಗಳಲ್ಲಿ ತಿದ್ದುಪಡಿ ಹಾಗೂ ಮರುದೃಢೀಕರಣ ಪ್ರಕ್ರಿಯೆಗಳು ಮುಂದುವರಿದಿವೆ.

ಇದಲ್ಲದೆ, ಸುಮಾರು 88,634 ಆಸ್ತಿಗಳ ವಿವರಗಳನ್ನು ಪರಿಶೀಲಕರು ಅಥವಾ ಅನುಮೋದಕರು ತಿರಸ್ಕೃತ ವರ್ಗಕ್ಕೆ ಸೇರಿಸಿದ್ದಾರೆ. ಒಂದೇ ಆಸ್ತಿಯ ವಿವರಗಳನ್ನು ಒಂದಕ್ಕಿಂತ ಹೆಚ್ಚು ಬಾರಿ ಸಲ್ಲಿಸಿರುವ ಪ್ರಕರಣಗಳನ್ನು ತೆಗೆದುಹಾಕಲಾಗಿದೆ ಎಂದು ಅಲ್ಪಸಂಖ್ಯಾತ ವ್ಯವಹಾರಗಳ ಸಚಿವಾಲಯದ ಮೂಲಗಳು ತಿಳಿಸಿವೆ.

ಜತೆಗೆ, ಕೆಲವು ಪ್ರಕರಣಗಳನ್ನು ಮರುದೃಢೀಕರಣ ಮತ್ತು ತಿದ್ದುಪಡಿಗಾಗಿ ಸಂಬಂಧಿತ ಸಂಸ್ಥೆಗಳಿಗೆ ಹಿಂದಿರುಗಿಸಲಾಗಿದೆ. ಅಗತ್ಯ ದಾಖಲೆಗಳ ಕೊರತೆ, ಮಾಹಿತಿ ಅಸಂಗತತೆ ಮತ್ತು ತಾಂತ್ರಿಕ ದೋಷಗಳು ಇದಕ್ಕೆ ಪ್ರಮುಖ ಕಾರಣಗಳಾಗಿವೆ ಎಂದು ಮೂಲಗಳು ತಿಳಿಸಿವೆ.