AI ಜೊತೆ ಫೀಲಿಂಗ್ಸ್ ಶೇರ್ ಮಾಡ್ಕೋತೀರಾ? ಹಾಗಾದ್ರೆ ಹುಷಾರ್, ಹುಷಾರ್! ಯಾಕೆ ಗೊತ್ತಾ?

 ಇಂದಿನ ಡಿಜಿಟಲ್ (digital) ಯುಗದಲ್ಲಿ, ಯಾವುದಾದರೂ ಅನುಮಾನ ಅಥವಾ ಪ್ರಶ್ನೆ ಬಂದ್ರೆ ಸಾಕು, ಸೀದಾ ನಮ್ಮ ಫೋನ್‌ ತೆಗೆದುಕೊಂಡು ಗೂಗಲ್‌ (Google), ಚಾಟ್‌ಜಿಪಿಟಿ (ChatGPT) ಇಲ್ಲಾ ಇತರೆ ಬೇರೆ ಎಐ (AI) ಸಾಧನಗಳತ್ತ ಮುಖ ಮಾಡುವ ಅಭ್ಯಾಸ ಹೆಚ್ಚಾಗಿದೆ. ಮಾಹಿತಿ ಕ್ಷಣಾರ್ಧದಲ್ಲಿ ಸಿಗುವ ಈ ಸೌಲಭ್ಯ ಜನರ ದಿನನಿತ್ಯದ ಜೀವನವನ್ನು ಸುಲಭಗೊಳಸುವುದರ ಜೊತೆ, ತಂತ್ರಜ್ಞಾನದ ಮೇಲಿನ ಅವಲಂಬನೆಯನ್ನು ಕೂಡ ಹೆಚ್ಚಿಸಿದೆ.

ಜಾಬ್‌, ಹೋಟೆಲ್‌, ಸಲಹೆ, ಸಹಾಯ, ಸೌಂದರ್ಯ, ಆರೋಗ್ಯ ಹೀಗೆ ಹತ್ತಾರು ವಿಷಯಗಳ ಬಗ್ಗೆ ಉತ್ತರ ಹುಡುಕಾಟ ಹೆಚ್ಚಾಗಿ ಈಗ ಫೋನ್‌ನಲ್ಲಿಯೇ ಆಗ್ತಿದೆ. ಅದ್ರಲ್ಲೂ ಚಾಟ್‌ಜಿಪಿಟಿ ಬಂದ್ಮೇಲೆ ಒಂದು ಸೆಕಂಡ್‌ ಕೂಡ ನಾವು ತಲೆ ಉಪಯೋಗಿಸದೇ, ನೇರವಾಗಿ ನಮ್ಮ ಪ್ರಶ್ನೆಯನ್ನು ಚಾಟ್‌ಜಿಪಿಟಿಗೆ ಹಾಕಿ ಉತ್ತರ ಕಂಡುಕೊಳ್ಳುತ್ತೇವೆ.

ಈ ಸಾಧನಗಳು ಈಗ ಈಗ ಕೇವಲ ಮಾಹಿತಿ ಪಡೆಯುವ ಉಪಕರಣಗಳಲ್ಲ ಬದಲಾಗಿ ಭಾವನಾತ್ಮಕ ಬೆಂಬಲಕ್ಕಾಗಿ ಬಳಸಲಾಗುತ್ತಿರುವ ಹೊಸ ಮಾರ್ಗಗಳಾಗಿಬಿಟ್ಟಿವೆ. ಇಂದಿನ ವೇಗದ ಜೀವನಶೈಲಿ ಮತ್ತು ಒತ್ತಡಭರಿತ ಪರಿಸ್ಥಿತಿಗಳ ನಡುವೆ, ಜನರು ಭಾವನಾತ್ಮಕ ಬೆಂಬಲಕ್ಕಾಗಿ ಹೊಸ ಮಾರ್ಗಗಳನ್ನು ಹುಡುಕುತ್ತಿದ್ದಾರೆ.

ಸ್ನೇಹಿತನಂತಾದ ಎಐ!

ಈ ಹಿನ್ನೆಲೆಯಲ್ಲಿ, ChatGPT ಮುಂತಾದ ಕೃತಕ ಬುದ್ಧಿಮತ್ತೆ ಸಾಧನಗಳು ಕೇವಲ ಮಾಹಿತಿಗಾಗಿ ಮಾತ್ರವಲ್ಲ, ಮನಸ್ಸಿಗೆ ಧೈರ್ಯ ನೀಡುವ ಸಹಾಯಕಗಳಾಗಿ ಹೊರಹೊಮ್ಮುತ್ತಿವೆ. ಸ್ನೇಹಿತನಂತೆ ಮಾತನಾಡುವ, ತಕ್ಷಣ ಪ್ರತಿಕ್ರಿಯಿಸುವ ಈ ತಂತ್ರಜ್ಞಾನವು ಇದೀಗ ಭಾವನಾತ್ಮಕ ಬೆಂಬಲದ ಹೊಸ ಪ್ರವೃತ್ತಿಯಾಗಿ ಬೆಳೆಯುತ್ತಿದೆ.

ಇದನ್ನೂ ಓದಿ: Kodak: ನಿಮಗೆ ಕೊಡಾಕ್ ಕ್ಯಾಮೆರಾ, ರೀಲ್ಸ್ ನೆನಪಿದೆಯಾ? ನಮ್ಮ ಬಾಲ್ಯದ ಸಂಗಾತಿ ಈಗೆಲ್ಲಿ ಮರೆಯಾಯ್ತು?

ಇತ್ತೀಚಿನ ಅಧ್ಯಯನಗಳು, ವಿಶೇಷವಾಗಿ ಹಾರ್ವರ್ಡ್ ಬಿಸಿನೆಸ್ ರಿವ್ಯೂ ವರದಿ, ಜನರು AI ಬಳಕೆಯ ರೀತಿಯಲ್ಲಿ ದೊಡ್ಡ ಬದಲಾವಣೆ ಕಂಡುಬಂದಿದೆ ಎಂದು ಸೂಚಿಸುತ್ತವೆ. ಮೊದಲು ಐಡಿಯಾ ಉತ್ಪಾದನೆ ಅಥವಾ ಉತ್ಪಾದಕತೆಗಾಗಿ ಬಳಸಲಾಗುತ್ತಿದ್ದ AI, ಈಗ ಭಾವನಾತ್ಮಕ ಬೆಂಬಲ, ಆತ್ಮಪರಿಶೀಲನೆ ಮತ್ತು ಹೆಚ್ಚಾಗಿ ಥೆರಪಿಯಾಗಿ ಬಳಕೆಯಾಗ್ತಿದೆ.

ಆರ್ಥಿಕ ಒತ್ತಡ, ಏಕಾಂತ ಮತ್ತು ಅನಿಶ್ಚಿತತೆಯ ನಡುವೆ, ಜನರು ತಮ್ಮ ಸಮಸ್ಯೆಗಳನ್ನು ನಿರ್ಭಯವಾಗಿ ಹಂಚಿಕೊಳ್ಳಲು AI ಅನ್ನು ಸುರಕ್ಷಿತ ಸ್ಥಳವಾಗಿ ಕಾಣುತ್ತಿದ್ದಾರೆ. ಕೆಲವರಿಗೆ, ಮನಸ್ಸು ಸರಿ ಇಲ್ಲದಿದ್ದಾಗ ಮೊದಲು ನೆನಪಾಗೋದೆ AI ಆಗಿಬಿಟ್ಟಿದೆ.

ತಾತ್ಕಾಲಿಕ ನೆಮ್ಮದಿ: ಆದರೆ ದೀರ್ಘಾವಧಿ ಪರಿಣಾಮವೇನು?

AI ಬಳಕೆದಾರರಿಗೆ ತಮ್ಮ ಭಾವನೆಗಳನ್ನು ಗುರುತಿಸಲು, ಸರಳ ಪರಿಹಾರ ಮಾರ್ಗಗಳನ್ನು ಸೂಚಿಸಲು ಮತ್ತು ತಾತ್ಕಾಲಿಕವಾಗಿ ನೆಮ್ಮದಿ ನೀಡಲು ಸಹಾಯ ಮಾಡುತ್ತದೆ. ಕೆಲ ಸಂದರ್ಭಗಳಲ್ಲಿ, ಇದು ಸಂಕಷ್ಟದ ಸಮಯದಲ್ಲಿ ಭಾವನಾತ್ಮಕ ಸ್ಥಿರತೆ ನೀಡುವ ಸಾಧನವಾಗುತ್ತದೆ.

ಆದರೆ ಮನೋಚಿಕಿತ್ಸಕಿ ಆಶಾ ಮೆಹರಾ ಅವರ ಪ್ರಕಾರ, AI ಬಳಸುವ ವಿಧಾನವು ಕೆಲವೊಮ್ಮೆ ಬಳಕೆದಾರರ ನಂಬಿಕೆಗಳನ್ನು ಪ್ರಶ್ನಿಸುವ ಬದಲು ಅವುಗಳನ್ನು ಮತ್ತಷ್ಟು ಬಲಪಡಿಸುತ್ತದೆ. ಇದು ಕ್ಷಣಿಕವಾಗಿ ಸಹಾಯಕರವಾಗಿದ್ದರೂ, ಆಳವಾದ ಆತ್ಮಪರಿಶೀಲನೆಗೆ ಅಡ್ಡಿಯಾಗಬಹುದು ಎಂದಿದ್ದಾರೆ.

ಮನೋ ವೈದ್ಯರನ್ನು ಬದಲಾಯಿಸುತ್ತಾ AI?

ಮಾನವ ಚಿಕಿತ್ಸೆಯು ಕೇವಲ ಸಮಾಧಾನ ನೀಡುವುದಲ್ಲ, ಅದು ಸವಾಲು, ಅಸ್ವಸ್ಥತೆ ಮತ್ತು ಬೆಳವಣಿಗೆಯ ಪ್ರಕ್ರಿಯೆಯಾಗಿದೆ. ತರಬೇತಿ ಪಡೆದ ಚಿಕಿತ್ಸಕರು ವ್ಯಕ್ತಿಯ ಮಾತು ಮಾತ್ರವಲ್ಲದೆ, ಅವರ ಭಾವನೆಗಳು, ನಡೆ-ನುಡಿಗಳ ಮಾದರಿಗಳನ್ನು ಗುರುತಿಸಿ ಸೂಕ್ತ ಮಾರ್ಗದರ್ಶನ ನೀಡುತ್ತಾರೆ.

ಇದಕ್ಕೆ ವಿರುದ್ಧವಾಗಿ, AI ಬಹುಮಟ್ಟಿಗೆ ಬಳಕೆದಾರರ ಮಾತುಗಳಿಗೆ ಅನುಗುಣವಾಗಿ ಪ್ರತಿಕ್ರಿಯಿಸುತ್ತದೆ. ಇದು ತಾತ್ಕಾಲಿಕವಾಗಿ ಧೈರ್ಯ ನೀಡಿದರೂ, ನಿಜವಾದ ಸಮಸ್ಯೆಗಳ ಮೂಲವನ್ನು ಎದುರಿಸಲು ಸಹಾಯ ಮಾಡುವುದಿಲ್ಲ ಅನ್ನೋದು ತಜ್ಞರ ಅಭಿಪ್ರಾಯ.

ಅಪಾಯಗಳೂ ಇದೆ ಹುಷಾರ್!

ಎಲ್ಲದಕ್ಕೂ AI ಬಳಿಯೇ ಉತ್ತರ ಕೇಳುತ್ತಾ, ಇದರ ಮೇಲೆ ಅತಿಯಾಗಿ ಅವಲಂಬಿತರಾದರೆ ಇದು ಹೊಸ ಸಮಸ್ಯೆಗಳನ್ನುಂಟು ಮಾಡಬಹುದು. ನಿರಂತರವಾಗಿ ಭರವಸೆ ಪಡೆಯುವ ಅಗತ್ಯ, ಹೊರಗಿನ ದೃಢೀಕರಣದ ಮೇಲಿನ ಅವಲಂಬನೆ ಮತ್ತು ಸ್ವತಃ ಭಾವನೆಗಳನ್ನು ನಿರ್ವಹಿಸುವ ಸಾಮರ್ಥ್ಯ ಕಡಿಮೆಯಾಗುವ ಅಪಾಯಗಳಿವೆ.

ಇದರಿಂದ, ಆತಂಕ ಕಡಿಮೆಯಾಗುವ ಬದಲು ಹೆಚ್ಚಾಗಬಹುದು. ಕೆಲವು ಅಧ್ಯಯನಗಳು, ಚಾಟ್‌ಬಾಟ್‌ಗಳ ಹೆಚ್ಚಿದ ಬಳಕೆ ಮತ್ತು ಖಿನ್ನತೆಯ ಲಕ್ಷಣಗಳ ನಡುವೆ ಸಂಬಂಧವಿರಬಹುದು ಎಂದು ಸೂಚಿಸುತ್ತವೆ.

AI ಯಾವಾಗಲೂ ನಿಖರವಾದ ಮಾಹಿತಿ ನೀಡುತ್ತದೆ ಎಂಬುದಿಲ್ಲ. ವಿಶೇಷವಾಗಿ ಮಾನಸಿಕ ಆರೋಗ್ಯದಂತಹ ಸೂಕ್ಷ್ಮ ವಿಷಯಗಳಲ್ಲಿ, ತಪ್ಪಾದ ಅಥವಾ ಅಪೂರ್ಣ ಸಲಹೆಗಳು ಸಮಸ್ಯೆಯನ್ನು ಮತ್ತಷ್ಟು ಗಂಭೀರಗೊಳಿಸಬಹುದು.

ಪರವಾನಗಿ ಪಡೆದ ವೃತ್ತಿಪರರಂತೆ AI ಗೆ ನೈತಿಕ ನಿಯಮಗಳು ಅಥವಾ ತುರ್ತು ಪರಿಸ್ಥಿತಿಯಲ್ಲಿ ಮಧ್ಯಪ್ರವೇಶಿಸುವ ಸಾಮರ್ಥ್ಯ ಇಲ್ಲ. ಆದ್ದರಿಂದ, ಗಂಭೀರ ಸಮಸ್ಯೆಗಳ ಸಂದರ್ಭದಲ್ಲಿ AI ಅನ್ನು ನಂಬುವುದು ಅಪಾಯಕಾರಿಯಾಗಬಹುದು.

ತಜ್ಞರ ಪ್ರಕಾರ, AI ಅನ್ನು ಪೂರಕ ಸಾಧನವಾಗಿ ಬಳಸುವುದು ಸೂಕ್ತ. ಇದು ಸಾಮಾನ್ಯ ಮಾರ್ಗದರ್ಶನ, ಭಾವನೆಗಳನ್ನು ಅರ್ಥಮಾಡಿಕೊಳ್ಳಲು ಸಹಾಯ ಮತ್ತು ಮೂಲಭೂತ ನಿಭಾಯಿಸುವ ವಿಧಾನಗಳನ್ನು ನೀಡಬಹುದು. ಆದರೆ ಇದು ಸಂಪೂರ್ಣ ಚಿಕಿತ್ಸೆಯನ್ನು ಬದಲಿಸಬಾರದು. AI ಬಳಕೆ ನಂತರ ನಿಮ್ಮ ಭಾವನೆಗಳನ್ನು ಗಮನಿಸಬೇಕು. ಅದು ಆತಂಕ ಹೆಚ್ಚಿಸಿದರೆ ಅಥವಾ ಅವಲಂಬನೆ ಹೆಚ್ಚಾದರೆ, ಅದರ ಬಳಕೆಯನ್ನು ನಿಯಂತ್ರಿಸುವುದು ಅಗತ್ಯ.

ಒಟ್ಟಿನಲ್ಲಿ, AI ನಮ್ಮ ಭಾವನಾತ್ಮಕ ಪ್ರಯಾಣದಲ್ಲಿ ಸಹಾಯಕ ಸಾಧನವಾಗಬಹುದು, ಆದರೆ ಅದನ್ನು ನಮ್ಮ ಜೀವನದ ಮಾರ್ಗದರ್ಶಕವಾಗಿ ನೋಡಬಾರದು. ನಿಜವಾದ ಬೆಳವಣಿಗೆ ಮಾನವ ಸಂವಹನ, ಆತ್ಮಪರಿಶೀಲನೆ ಮತ್ತು ತಜ್ಞರ ಮಾರ್ಗದರ್ಶನದಿಂದಲೇ ಸಾಧ್ಯ.