ಸಾವರ್ಕರ್ ಗೆ ಸಂಸತ್ತಿನಲ್ಲಿ ಗೌರವ ಸಲ್ಲಿಸುವುದನ್ನು ನೆಹರು ತಡೆದರು ಎಂದ ಬಿಜೆಪಿ ನಾಯಕ ಬಿ.ಎಲ್. ಸಂತೋಷ್!

 ನವದೆಹಲಿ: ಸಾವರ್ಕರ್ ಗೆ ಸಂಸತ್ತಿನಲ್ಲಿ ಗೌರವ ಸಲ್ಲಿಸುವ ವಿಚಾರಕ್ಕೆ ಸಂಬಂಧಿಸಿದಂತೆ ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಬಿ.ಎಲ್. ಸಂತೋಷ್ ಅವರು ಮಾಡಿರುವ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ. ಪತ್ರಕರ್ತರು, ರಾಜಕೀಯ ಮುಖಂಡರು ಹಾಗೂ ನೆಟ್ಟಿಗರು ಅವರ ಹೇಳಿಕೆಯನ್ನು ಉಲ್ಲೇಖಿಸಿ ಟೀಕೆ ಹಾಗೂ ವ್ಯಂಗ್ಯ ವ್ಯಕ್ತಪಡಿಸಿದ್ದಾರೆ. 

ಪತ್ರಕರ್ತ ಮುಹಮ್ಮದ್ ಝುಬೈರ್ ಅವರು ಎಕ್ಸ್ ನಲ್ಲಿ ಪ್ರತಿಕ್ರಿಯಿಸಿ, "ಬಿ.ಎಲ್. ಸಂತೋಷ್ ಅವರ ಪ್ರಕಾರ, 1964ರಲ್ಲಿ ನಿಧನರಾದ ಜವಾಹರಲಾಲ್ ನೆಹರು ಅವರು 1966ರಲ್ಲಿ ಸಾವರ್ಕರ್ ನಿಧನರಾದಾಗ ಸಂಸತ್ತು ಅವರಿಗೆ ಗೌರವ ಸಲ್ಲಿಸುವುದನ್ನು ತಡೆದರು. ಪ್ರಧಾನಿ ನರೇಂದ್ರ ಮೋದಿ ನಿಧನರಾಗಿ 60 ವರ್ಷಗಳಾದ ನಂತರವೂ ನೆಹರು ಇನ್ನೂ ಕಾರ್ಯನಿರ್ವಹಿಸುತ್ತಿರುವಂತೆ ತೋರುತ್ತದೆ" ಎಂದು ವ್ಯಂಗ್ಯವಾಡಿದ್ದಾರೆ.

ಕಾಂಗ್ರೆಸ್ ನಾಯಕ ಬಿ.ಕೆ. ಹರಿಪ್ರಸಾದ್ ಅವರು, "ಆರೆಸ್ಸೆಸ್ ವಿದೂಷಕ ಬಿ.ಎಲ್. ಸಂತೋಷ್ ಅವರ ನೆಹರು ಮೇಲಿನ ದ್ವೇಷ ಈಗ ಹಾಸ್ಯಾಸ್ಪದ ಮಟ್ಟಕ್ಕೆ ತಲುಪಿದೆ. ಜವಾಹರಲಾಲ್ ನೆಹರು ಅವರು ಸಾವರ್ಕರ್ ಗೆ ಗೌರವ ಸಲ್ಲಿಸುವುದನ್ನು ಸಂಸತ್ತು ತಡೆದಿದೆ ಎಂದು ಅವರು ಹೇಳುತ್ತಿದ್ದಾರೆ. ಆದರೆ ಒಂದೇ ಒಂದು ಸಣ್ಣ ಸಮಸ್ಯೆಯಿದೆ. ನೆಹರು 1964ರಲ್ಲಿ ನಿಧನರಾದರೆ, ಸಾವರ್ಕರ್ 1966ರಲ್ಲಿ ನಿಧನರಾದರು. ಸಮಾಧಿಯ ಆಚೆಯಿಂದ ಏನನ್ನಾದರೂ ತಡೆಯುವುದು ಕಷ್ಟ. ಇತಿಹಾಸವನ್ನು ಪುನಃ ಬರೆಯುವ ಮೊದಲು ಕನಿಷ್ಠ ದಿನಾಂಕಗಳನ್ನಾದರೂ ಸರಿಯಾಗಿ ತಿಳಿದುಕೊಳ್ಳಬೇಕು" ಎಂದು ಟೀಕಿಸಿದ್ದಾರೆ.

"ಇತಿಹಾಸವನ್ನು ಪುನಃ ಬರೆಯಲು ಕಡಿಮೆ ಸಮಯ ಮೀಸಲಿಟ್ಟು, ಅದನ್ನು ಓದಲು ಹೆಚ್ಚು ಸಮಯ ಮೀಸಲಿಡಬೇಕು" ಎಂದೂ ಅವರು ಹೇಳಿದ್ದಾರೆ.

'ಕಾಕ್ರೋಚ್ ಜನತಾ ಪಾರ್ಟಿ' ಹೆಸರಿನ ಎಕ್ಸ್ ಖಾತೆ, "ಮುಸ್ಲಿಮರಲ್ಲಿನ ಕೋಮುವಾದಿ ಬಣವು ಪಾಕಿಸ್ತಾನವನ್ನು ಸೃಷ್ಟಿಸುವಲ್ಲಿ ಯಶಸ್ವಿಯಾದರೂ, ಹಿಂದೂಗಳಲ್ಲಿನ ಕೋಮುವಾದಿ ಬಣವು ಬಿಜೆಪಿಯ ರೂಪದಲ್ಲಿ ಭಾರತದಲ್ಲಿ ಉಳಿಯಿತು. ಈಗ ಅವರು ಭಾರತವನ್ನು 'ಹಿಂದೂ ರಾಷ್ಟ್ರ'ವನ್ನಾಗಿ ಪರಿವರ್ತಿಸಲು ಪ್ರಯತ್ನಿಸುತ್ತಿದ್ದಾರೆ. ಅಂದರೆ ಭಾರತವನ್ನು ಮತ್ತೊಮ್ಮೆ ಒಡೆಯಲು ಬಯಸುತ್ತಿದ್ದಾರೆ. ಅದಕ್ಕಾಗಿಯೇ ನೆಹರು ವಿರುದ್ಧ ನಿರಂತರವಾಗಿ ಸುಳ್ಳು ಆರೋಪಗಳನ್ನು ಮಾಡುತ್ತಿದ್ದಾರೆ. ಭಾರತದ ಜನರು ಆಗ ಸಾವರ್ಕರ್ ಅವರನ್ನು ಸ್ವೀಕರಿಸಲಿಲ್ಲ, ಈಗಲೂ ಸ್ವೀಕರಿಸುವುದಿಲ್ಲ" ಎಂದು ಪ್ರತಿಕ್ರಿಯಿಸಿದೆ.

ಶರ್ಮಾ_ಡಿವಿ ಎಂಬ ಬಳಕೆದಾರರು, "ಸಂಸತ್ತಿನ ಕಟ್ಟಡವನ್ನು ಸ್ಥಳಾಂತರಿಸಿದ ಬಳಿಕವೂ ನೆಹರು ಅವರ ಭೂತ ಇನ್ನೂ ಆರೆಸ್ಸೆಸ್ ಅನ್ನು ಬೆನ್ನಟ್ಟುತ್ತಿದೆ ಎಂಬುದು ಕುತೂಹಲಕಾರಿಯಾಗಿದೆ" ಎಂದು ವ್ಯಂಗ್ಯವಾಡಿದ್ದಾರೆ.

ಇನ್ನೊಂದು ಖಾತೆ, "ತಮ್ಮ ಪ್ರೇಕ್ಷಕರು ಯಾರು ಎಂಬುದು ಅವರಿಗೆ ಚೆನ್ನಾಗಿ ತಿಳಿದಿದೆ. ಅವರು ಅದಕ್ಕೆ ತಕ್ಕಂತೆ ಮಾತನಾಡುತ್ತಾರೆ. ಅವರು ಗುರಿಯಾಗಿಸಿಕೊಂಡಿರುವ ಪ್ರೇಕ್ಷಕರು ತಮ್ಮ ಅಭಿಪ್ರಾಯಗಳನ್ನು ಪ್ರಶ್ನಿಸುವ ವಾಸ್ತವಾಂಶಗಳಲ್ಲಿ ಆಸಕ್ತಿ ಹೊಂದಿಲ್ಲ" ಎಂದು ಅಭಿಪ್ರಾಯಪಟ್ಟಿದೆ.

ಬ್ರತಿಶಂಕರ್ ಘೋಷ್ ಅವರು, "ಈ ಜನರು ಎಷ್ಟರ ಮಟ್ಟಿಗೆ ಸುಳ್ಳುಗಳನ್ನು ಹೇಳಬಲ್ಲರು ಎಂಬುದನ್ನು ನೋಡುವುದೇ ಆಶ್ಚರ್ಯಕರ. ಯಾವುದೇ ಹಿಂಜರಿಕೆಯಿಲ್ಲದೆ, ನಿರ್ಲಜ್ಜವಾಗಿ ಸುಳ್ಳುಗಳನ್ನು ಹೇಳುತ್ತಿದ್ದಾರೆ. ಸುಳ್ಳು ಹೇಳುವುದನ್ನೇ ದೇಶದ ಧ್ಯೇಯವನ್ನಾಗಿ ಮಾಡಿಕೊಂಡಿದ್ದಾರೆ" ಎಂದು ಟೀಕಿಸಿದ್ದಾರೆ.

ಪ್ರೊ. ಚಂದ್ರ ಮೋಹನ್ ಉಪಾಧ್ಯಾಯ ಅವರು ವ್ಯಂಗ್ಯವಾಗಿ, "ಬಿ.ಎಲ್. ಸಂತೋಷ್ ಬಿಜೆಪಿಯ ಶ್ರೇಷ್ಠ ಚಿಂತಕ. ಅವರು ತಪ್ಪು ಮಾಡಲು ಸಾಧ್ಯವೇ ಇಲ್ಲ. ನೆಹರು ಅವರು ವಾಸ್ತವವಾಗಿ 2026ರಲ್ಲಿ ನಿಧನರಾದರು" ಎಂದು ಕಟಕಿಯಾಡಿದ್ದಾರೆ.