ಕಾಸರಗೋಡಿನಲ್ಲಿ 100 ಮೆಗಾವ್ಯಾಟ್ ಸೌರ ಪಾರ್ಕ್‍ಗಾಗಿ 220 ಕೆವಿ ಪೋತಮ್‍ಕಂಡಂ ವಿದ್ಯುತ್ ಮಾರ್ಗದ ನಿರ್ಮಾಣಕ್ಕಾಗಿ ಸಮೀಕ್ಷೆ ಪ್ರಾರಂಭ

ಕಾಸರಗೋಡು: ಕಯ್ಯೂರು-ಚೀಮೇನಿ ಪಂಚಾಯತಿಯ ಪೋತಮ್‍ಕಂಡಂನಲ್ಲಿ ಸ್ಥಾಪಿಸಲಾಗುವ 100 ಮೆಗಾವ್ಯಾಟ್ ಸೌರ ಪಾರ್ಕ್‍ನ 220 ಕೆವಿ ವಿದ್ಯುತ್ ಮಾರ್ಗದ ನಿರ್ಮಾಣಕ್ಕೆ ಪ್ರಾಥಮಿಕ ಹಂತಗಳು ಪ್ರಾರಂಭವಾಗಿವೆ. ಯೋಜನೆಯ ಸಮೀಕ್ಷೆ ಪ್ರಕ್ರಿಯೆಯನ್ನು ಸೋಮವಾರ ಮೊದಲ್ಗೊಂಡು  ಚುರುಕುಗೊಳಿಸಲಾಗಿದೆ. 

ಹೊಸ ಪ್ರಸರಣ ಮಾರ್ಗ:

ಸೌರ ಉದ್ಯಾನವನಕ್ಕಾಗಿ ನಿರ್ಮಿಸಲಾಗುತ್ತಿರುವ 220 ಕೆವಿ ಸಬ್‍ಸ್ಟೇಷನ್ ನ್ನು ಅಸ್ತಿತ್ವದಲ್ಲಿರುವ 220 ಕೆವಿ ಕಾಂಜಿರೋಡ್-ಅಂಬಲತ್ತರ ಪ್ರಸರಣ ಮಾರ್ಗದೊಂದಿಗೆ ಸಂಪರ್ಕಿಸಲು ಹೊಸ 220 ಕೆವಿ ಪ್ರಸರಣ ಮಾರ್ಗವನ್ನು ಸ್ಥಾಪಿಸುವ ಯೋಜನೆ ಇದೆ. ಇದರ ಭಾಗವಾಗಿ, ಕೇರಳ ರಾಜ್ಯ ವಿದ್ಯುತ್ ಮಂಡಳಿ ಲಿಮಿಟೆಡ್ (ಕೆಎಸ್‍ಇಬಿಎಲ್) ಪ್ರಸ್ತಾವಿತ ಮಾರ್ಗದಲ್ಲಿ ಸಮೀಕ್ಷೆ ಕಾರ್ಯವನ್ನು ಕೈಗೊಳ್ಳಲಾಗುವುದು ಎಂದು ತಿಳಿಸಿದೆ.

ಅಧಿಕಾರಿಗಳಿಗೆ ಪ್ರವೇಶಿಸಲು ಅನುಮತಿ:

ಸಮೀಕ್ಷಾ ಕಾರ್ಯಕ್ಕಾಗಿ, ಕೆಎಸ್‍ಇಬಿಎಲ್ ಅಧಿಕಾರಿಗಳು ಅಥವಾ ಅವರಿಂದ ನಿಯೋಜಿಸಲಾದ ಇತರ ಅಧಿಕಾರಿಗಳು, ಗುತ್ತಿಗೆ ನೌಕರರು ತಮ್ಮ ಕರ್ತವ್ಯಗಳ ಕಾನೂನುಬದ್ಧ ನಿರ್ವಹಣೆಗಾಗಿ ಯಾವುದೇ ಸಮಯದಲ್ಲಿ ಕಾಸರಗೋಡು ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಚೀಮೇನಿ ಗ್ರಾಮದಲ್ಲಿ ಸೇರಿಸಲಾದ ಪ್ರದೇಶಗಳನ್ನು ಪ್ರವೇಶಿಸಬಹುದು ಎಂದು ಗೆಜೆಟ್ ಅಧಿಸೂಚನೆಯಲ್ಲಿ ತಿಳಿಸಲಾಗಿದೆ. ಈ ಅಧಿಸೂಚನೆಯನ್ನು ಕೇರಳ ಗೆಜೆಟ್‍ನಲ್ಲಿ ವಿದ್ಯುತ್ ಕಾಯ್ದೆ 2003 ರ ಸೆಕ್ಷನ್ 164 ರ ಅಡಿಯಲ್ಲಿ ಪ್ರಕಟಿಸಲಾಗಿದೆ.

ಕೆಎಸ್‍ಇಬಿಎಲ್ ಸಹಕಾರ ಕೋರಿಕೆ: 

ಶೋರ್ನೂರಿನ ಕೆಎಸ್‍ಇಬಿಎಲ್ ಟ್ರಾನ್ಸ್‍ಗ್ರಿಡ್ ಉತ್ತರ ವಿಭಾಗದ ಉಪ ಮುಖ್ಯ ಎಂಜಿನಿಯರ್, ಸಮೀಕ್ಷೆ ಚಟುವಟಿಕೆಗಳನ್ನು ಸುಗಮವಾಗಿ ಪೂರ್ಣಗೊಳಿಸಲು ಸಂಬಂಧಪಟ್ಟ ಪ್ರದೇಶಗಳಲ್ಲಿನ ಭೂಮಾಲೀಕರು ಮತ್ತು ಸಾರ್ವಜನಿಕರು ಅಗತ್ಯ ಸಹಕಾರವನ್ನು ನೀಡಬೇಕು ಮತ್ತು ಈ ಗೆಜೆಟ್ ಅಧಿಸೂಚನೆಯನ್ನು ಅವರ ಗಮನಕ್ಕೆ ತರಬೇಕು ಎಂದು ತಿಳಿಸಿದ್ದಾರೆ.

ಪೋತಮ್‍ಕಂಡಂ ಸೋಲಾರ್ ಪಾರ್ಕ್ ಯೋಜನೆಯ ಅನುಷ್ಠಾನದೊಂದಿಗೆ, ರಾಜ್ಯದ ನವೀಕರಿಸಬಹುದಾದ ಇಂಧನ ಉತ್ಪಾದನಾ ಸಾಮಥ್ರ್ಯ ಹೆಚ್ಚಾಗುತ್ತದೆ, ಕಾಸರಗೋಡು ಸೇರಿದಂತೆ ಉತ್ತರದ ಜಿಲ್ಲೆಗಳಲ್ಲಿ ವಿದ್ಯುತ್ ವಿತರಣಾ ಜಾಲವು ಮತ್ತಷ್ಟು ಬಲಗೊಳ್ಳುತ್ತದೆ ಮತ್ತು ವಿದ್ಯುತ್ ಕೊರತೆಯನ್ನು ಕಡಿಮೆ ಮಾಡಲು ಇದು ಸಹಾಯಕವಾಗುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಹೈಲೈಟ್ಸ್:

- ಹೊಸ ಸಬ್‍ಸ್ಟೇಷನ್ ಕಾಂಜಿರೋಡ್-ಅಂಬಲತ್ತರ ಪ್ರಸರಣ ಮಾರ್ಗಕ್ಕೆ ಸಂಪರ್ಕಿಸಲಾಗುವುದು

- ಕೆಎಸ್‍ಇಬಿಎಲ್ ಸರ್ವೆ ಪ್ರಕ್ರಿಯೆಯನ್ನು ಮುನ್ನಡೆಸುತ್ತಿದೆ

- ಹೊಸದುರ್ಗ ತಾಲ್ಲೂಕಿನ ಚೀಮೇನಿ ಗ್ರಾಮದಲ್ಲಿ ಸಮೀಕ್ಷೆ ನಡೆಸಲಾಗುತ್ತಿದೆ

- ಯೋಜನೆ ಪೂರ್ಣಗೊಂಡ ನಂತರ, ಉತ್ತರ ಕೇರಳದಲ್ಲಿ ವಿದ್ಯುತ್ ಕೊರತೆ ಬಗೆಹರಿಯಲಿದೆ