ರಾಜ್ಯಸಭೆಯಲ್ಲಿ ಬಿಜೆಪಿ ಬಲ ಹೆಚ್ಚಳ: 7 ವರ್ಷಗಳಲ್ಲಿ 25 ವಿರೋಧ ಪಕ್ಷದ ಸಂಸದರು ಸೇರ್ಪಡೆ

 ನವದೆಹಲಿ: ರಾಜ್ಯಸಭೆಯಲ್ಲಿ ಸಂಖ್ಯಾಬಲ ಹೆಚ್ಚಿಸಿಕೊಳ್ಳುವ ಬಿಜೆಪಿಯ ಪ್ರಯತ್ನದ ಭಾಗವಾಗಿ, 2019ರ ಜೂನ್‌ ನಿಂದ ಇದುವರೆಗೆ ವಿವಿಧ ವಿರೋಧ ಪಕ್ಷಗಳ 25 ರಾಜ್ಯಸಭಾ ಸದಸ್ಯರು ಬಿಜೆಪಿ ಅಥವಾ ಎನ್‌ಡಿಎ ಮೈತ್ರಿಕೂಟದ ಪಕ್ಷಗಳಿಗೆ ಸೇರ್ಪಡೆಯಾಗಿದ್ದಾರೆ. ಅವರಲ್ಲಿ 24 ಮಂದಿ ಬಿಜೆಪಿ ಸೇರಿದ್ದರೆ, ಒಬ್ಬರು ತೆಲುಗು ದೇಶಂ ಪಕ್ಷ (ಟಿಡಿಪಿ) ಸೇರಿದ್ದಾರೆ. 

ಇತ್ತೀಚಿಗೆ ಸೇರ್ಪಡೆಯಾದವರಲ್ಲಿ ತೃಣಮೂಲ ಕಾಂಗ್ರೆಸ್‌ ನ ಸುಖೇಂದು ಶೇಖರ್ ರಾಯ್, ಸುಶ್ಮಿತಾ ದೇವ್ ಹಾಗೂ ಪ್ರಕಾಶ್ ಬರೈಕ್ ಸೇರಿದ್ದಾರೆ. ಪಶ್ಚಿಮ ಬಂಗಾಳ ಚುನಾವಣೆಯ ಸೋಲಿನ ಬಳಿಕ ಪಕ್ಷದ ಮುಖ್ಯಸ್ಥೆ ಮಮತಾ ಬ್ಯಾನರ್ಜಿ ವಿರುದ್ಧ ಬಂಡಾಯ ಎದ್ದ ಅವರು ಬಿಜೆಪಿ ಸೇರಿದ್ದಾರೆ.

ಬಿಜೆಪಿ ಅಥವಾ ಎನ್‌ಡಿಎಗೆ ಸೇರ್ಪಡೆಯಾದ 25 ರಾಜ್ಯಸಭಾ ಸದಸ್ಯರಲ್ಲಿ 24 ಮಂದಿ ಬಿಜೆಪಿ ಅಭ್ಯರ್ಥಿಗಳಾಗಿ ಮರು ಆಯ್ಕೆಯಾಗಿದ್ದಾರೆ. ಒಬ್ಬರು ಟಿಡಿಪಿ ಸೇರಿದ್ದಾರೆ. ಇದೇ ವೇಳೆ, ವೈಎಸ್‌ಆರ್ ಕಾಂಗ್ರೆಸ್ ತೊರೆದು ಟಿಡಿಪಿ ಸೇರಿದ ಮತ್ತೊಬ್ಬ ರಾಜ್ಯಸಭಾ ಸದಸ್ಯರಿಗೆ ಉಪಚುನಾವಣೆಯಲ್ಲಿ ಸ್ಪರ್ಧಿಸಲು ಟಿಡಿಪಿ ಟಿಕೆಟ್ ನೀಡಿಲ್ಲ.

ಜುಲೈ 24ರಂದು ಪಶ್ಚಿಮ ಬಂಗಾಳದ ಮೂರು ರಾಜ್ಯಸಭಾ ಸ್ಥಾನಗಳಿಗೆ ನಡೆಯಲಿರುವ ಉಪಚುನಾವಣೆಯ ಬಳಿಕ ಎನ್‌ಡಿಎಯ ಬಲ 154ಕ್ಕೆ ಏರಲಿದೆ. ಆದರೂ ರಾಜ್ಯಸಭೆಯಲ್ಲಿ ಮೂರನೇ ಎರಡರಷ್ಟು ಬಹುಮತ ಪಡೆಯಲು ಅಗತ್ಯವಿರುವ ಸಂಖ್ಯಾಬಲಕ್ಕೆ ಎನ್‌ಡಿಎಗೆ ಇನ್ನೂ ಒಂಭತ್ತು ಸದಸ್ಯರ ಕೊರತೆ ಇರುತ್ತದೆ.

ಕಾಂಗ್ರೆಸ್, ತೃಣಮೂಲ ಕಾಂಗ್ರೆಸ್, ಆಪ್‌, ವೈಎಸ್‌ಆರ್ ಕಾಂಗ್ರೆಸ್, ಬಿಜು ಜನತಾ ದಳ (ಬಿಜೆಡಿ), ಸಮಾಜವಾದಿ ಪಕ್ಷ, ಬೋಡೋ ಪೀಪಲ್ಸ್ ಫ್ರಂಟ್ (ಬಿಪಿಎಫ್) ಹಾಗೂ ಟಿಡಿಪಿಯಿಂದ ಕಳೆದ ಏಳು ವರ್ಷಗಳಲ್ಲಿ ಒಟ್ಟು 25 ಸಂಸದರು ಬಿಜೆಪಿ ಅಥವಾ ಎನ್‌ಡಿಎಗೆ ಸೇರ್ಪಡೆಯಾಗಿದ್ದಾರೆ. ಅವರಲ್ಲಿ ಈಗ ಕೇವಲ 12 ಮಂದಿ ಮಾತ್ರ ರಾಜ್ಯಸಭೆಯಲ್ಲಿ ಮುಂದುವರಿದಿದ್ದಾರೆ.

ಬಿಜೆಪಿಗೆ ಸೇರ್ಪಡೆಯಾದ ಕಾಂಗ್ರೆಸ್ ನಾಯಕರಲ್ಲಿ ಅಶೋಕ್ ಚವಾಣ್, ಜ್ಯೋತಿರಾದಿತ್ಯ ಸಿಂಧಿಯಾ, ರವನೀತ್ ಬಿಟ್ಟು ಹಾಗೂ ಆರ್‌.ಪಿ.ಎನ್. ಸಿಂಗ್ ಪ್ರಮುಖರು.

ಒಂದು ವಿಶ್ಲೇಷಣೆಯ ಪ್ರಕಾರ, ಹೆಚ್ಚಿನ ಪಕ್ಷಾಂತರಗಳು ಲೋಕಸಭೆ ಅಥವಾ ವಿಧಾನಸಭೆ ಚುನಾವಣೆಯಲ್ಲಿ ಮೂಲ ಪಕ್ಷಗಳು ಹಿನ್ನಡೆ ಅನುಭವಿಸಿದ ಬಳಿಕ ನಡೆದಿವೆ. ಕೆಲವು ಸಂದರ್ಭಗಳಲ್ಲಿ ಪಕ್ಷದೊಳಗಿನ ಭಿನ್ನಾಭಿಪ್ರಾಯಗಳೂ ಪಕ್ಷಾಂತರಕ್ಕೆ ಕಾರಣವಾಗಿವೆ. ಆದರೆ ಬಿಜೆಪಿಗೆ ಸೇರಿದ ಹೆಚ್ಚಿನವರಿಗೆ ಮೊದಲ ಅವಧಿ ಪೂರ್ಣಗೊಂಡ ಬಳಿಕ ಮತ್ತೊಮ್ಮೆ ರಾಜ್ಯಸಭೆಗೆ ಅವಕಾಶ ದೊರೆತಿಲ್ಲ.

ಈ ಬೆಳವಣಿಗೆಗೆ 2019ರ ಜೂನ್‌ನಲ್ಲಿ ಚಾಲನೆ ದೊರೆಯಿತು. ಆಂಧ್ರಪ್ರದೇಶದಲ್ಲಿ ಟಿಡಿಪಿ ಅಧಿಕಾರ ಕಳೆದುಕೊಂಡ ಬಳಿಕ ರಾಜ್ಯಸಭೆಯಲ್ಲಿದ್ದ ಆ ಪಕ್ಷದ ಆರು ಸದಸ್ಯರಲ್ಲಿ ನಾಲ್ವರು ಬಿಜೆಪಿಗೆ ವಿಲೀನಗೊಂಡರು. ಆಗ ಟಿಡಿಪಿ ಎನ್‌ಡಿಎ ಮೈತ್ರಿಕೂಟದಲ್ಲಿರಲಿಲ್ಲ.

ಆ ನಾಲ್ವರಲ್ಲಿ ಸಿ.ಎಂ. ರಮೇಶ್ ಹೊರತುಪಡಿಸಿ ವೈ.ಎಸ್. ಚೌಧರಿ, ಟಿ.ಜಿ. ವೆಂಕಟೇಶ್ ಹಾಗೂ ಜಿ. ಮೋಹನ್ ರಾವ್ ಅವರಿಗೆ ಅವಧಿ ಪೂರ್ಣಗೊಂಡ ಬಳಿಕ ಮರುನಾಮನಿರ್ದೇಶನ ದೊರೆಯಲಿಲ್ಲ.

ರಾಘವ್ ಚಡ್ಡಾ ನೇತೃತ್ವದ ಎಎಪಿಯ 10 ರಾಜ್ಯಸಭಾ ಸದಸ್ಯರಲ್ಲಿ ಏಳು ಮಂದಿ ಈ ವರ್ಷದ ಎಪ್ರಿಲ್‌ನಲ್ಲಿ ಬಿಜೆಪಿಗೆ ವಿಲೀನಗೊಂಡಿದ್ದಾರೆ. ಈ ವಿಲೀನದ ವಿರುದ್ಧ ಕಾನೂನು ಹೋರಾಟ ಮುಂದುವರಿದಿದೆ.

2024ರ ಲೋಕಸಭೆ ಹಾಗೂ ಒಡಿಶಾ ವಿಧಾನಸಭೆ ಚುನಾವಣೆಯಲ್ಲಿ ಬಿಜೆಡಿಗೆ ಎದುರಾದ ಸೋಲಿನ ಬಳಿಕ ಸುಜೀತ್ ಕುಮಾರ್, ಮಮತಾ ಮೊಹಂತ ಹಾಗೂ ದೇಬಾಶಿಶ್ ಸಮಂತ್ರೇ ಬಿಜೆಪಿ ಸೇರಿದರು. ಸುಜೀತ್ ಕುಮಾರ್ ಮತ್ತೆ ಪೂರ್ಣಾವಧಿಗೆ ಮರು ಆಯ್ಕೆಯಾಗಿದ್ದರೆ, ಮಮತಾ ಮೊಹಂತ ಅವರಿಗೆ ಅವಕಾಶ ದೊರೆಯಲಿಲ್ಲ. ದೇಬಾಶಿಶ್ ಸಮಂತ್ರೇ ಕಳೆದ ತಿಂಗಳು ಬಿಜೆಪಿ ಅಭ್ಯರ್ಥಿಯಾಗಿ ರಾಜ್ಯಸಭೆಗೆ ಮರು ಆಯ್ಕೆಯಾದರು.

ಸಮಾಜವಾದಿ ಪಕ್ಷದ ನೀರಜ್ ಶೇಖರ್, ಸುರೇಂದ್ರ ಸಿಂಗ್ ನಗರ ಹಾಗೂ ಸಂಜಯ್ ಸೇಠ್ ಬಿಜೆಪಿಗೆ ಸೇರಿ ಪೂರ್ಣಾವಧಿಗೆ ರಾಜ್ಯಸಭೆಗೆ ಮರಳಿದ್ದಾರೆ.

ಕಾಂಗ್ರೆಸ್‌ನ ಭುವನೇಶ್ವರ್ ಕಲಿತಾ ಹಾಗೂ ಕೆ.ಸಿ. ರಾಮಮೂರ್ತಿ ಬಿಜೆಪಿಗೆ ಸೇರಿದರೂ ಮರುನಾಮನಿರ್ದೇಶನ ಪಡೆಯಲಿಲ್ಲ. ಆದರೆ ಜಮ್ಮು-ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನ ನೀಡಿದ್ದ ಸಂವಿಧಾನದ 370ನೇ ವಿಧಿಯನ್ನು ರದ್ದುಗೊಳಿಸಿದ ದಿನ ಕಾಂಗ್ರೆಸ್ ಮುಖ್ಯ ಸಚೇತಕ ಹುದ್ದೆಗೆ ರಾಜೀನಾಮೆ ನೀಡಿದ್ದ ಭುವನೇಶ್ವರ್ ಕಲಿತಾ ಬಳಿಕ ಪೂರ್ಣಾವಧಿಗೆ ರಾಜ್ಯಸಭೆಗೆ ಆಯ್ಕೆಯಾದರು.

ವೈಎಸ್‌ಆರ್ ಕಾಂಗ್ರೆಸ್‌ನ ಆರ್. ಕೃಷ್ಣಯ್ಯ ಬಿಜೆಪಿ ಸೇರಿದರು. ಬೀಡಾ ಮಸ್ತಾನ್ ರಾವ್ ಯಾದವ್ ಟಿಡಿಪಿ ಸೇರಿ ರಾಜ್ಯಸಭೆಗೆ ಮರಳಿದರೆ, ಎಂ. ವೆಂಕಟರಮಣ ಟಿಡಿಪಿಗೆ ಸೇರ್ಪಡೆಯಾದರೂ ಮರು ಆಯ್ಕೆಯಾಗಲಿಲ್ಲ. ಅವರ ಸ್ಥಾನಕ್ಕೆ ಎನ್‌ಡಿಎ ಬೆಂಬಲಿತ ಅಭ್ಯರ್ಥಿ ಆಯ್ಕೆಯಾದರು.

ಬೋಡೋ ಪೀಪಲ್ಸ್ ಫ್ರಂಟ್‌ನ ಬಿಸ್ವಜಿತ್ ಡೈಮರಿ ಮೂರನೇ ಅವಧಿಗೆ ಆಯ್ಕೆಯಾದ ಏಳು ತಿಂಗಳಲ್ಲೇ ರಾಜೀನಾಮೆ ನೀಡಿ ಬಿಜೆಪಿ ಸೇರಿದರು. ಬಳಿಕ ಬಿಜೆಪಿ ಅಭ್ಯರ್ಥಿಯಾಗಿ ಉಳಿದ ಅವಧಿಗೆ ರಾಜ್ಯಸಭೆಗೆ ಮರಳಿದ ಅವರು, 2026ರ ಎಪ್ರಿಲ್‌ ನಲ್ಲಿ ಮರುನಾಮನಿರ್ದೇಶನ ಪಡೆಯಲಿಲ್ಲ.