ರಾಮ ಮಂದಿರದಲ್ಲಿ ಕಾಣಿಕೆ ಕಳ್ಳತನ: ಮೋದಿ ಮತ್ತು ಬಿಜೆಪಿ ಹೊಣೆಗಾರಿಕೆಯಿಂದ ತಪ್ಪಿಸಿಕೊಳ್ಳಲು ಸಾಧ್ಯವೇ?

 ಅಯೋಧ್ಯೆಯ ರಾಮ ಮಂದಿರದಲ್ಲಿ ನಡೆದ ಕಾಣಿಕೆ ಕಳ್ಳತನದ ಹಗರಣವು ದೇಶದ ರಾಜಕೀಯ ವಲಯದಲ್ಲಿ ಭಾರೀ ರಾಜಕೀಯ ಬಿರುಗಾಳಿ ಸೃಷ್ಟಿಸಿದೆ. ಪ್ರಸ್ತುತ ಉತ್ತರ ಪ್ರದೇಶ ಸರ್ಕಾರ ರಚಿಸಿರುವ ವಿಶೇಷ ತನಿಖಾ ತಂಡ ಮತ್ತು ರಾಜ್ಯ ಪೊಲೀಸರು ಈ ಬಗ್ಗೆ ತನಿಖೆ ನಡೆಸುತ್ತಿದ್ದಾರೆ. ಈ ಹಗರಣದಿಂದ ದೂರ ಉಳಿಯಲು ಪ್ರಧಾನಿ ನರೇಂದ್ರ ಮೋದಿ ಮತ್ತು ಬಿಜೆಪಿಗೆ ತೀವ್ರ ಕಷ್ಟವಾಗುತ್ತಿದೆ.

ಇತ್ತೀಚೆಗೆ 'ಸಿ ವೋಟರ್' ಸಂಸ್ಥೆ ನಡೆಸಿದ ಸಮೀಕ್ಷೆಯೊಂದರ ಪ್ರಕಾರ, ಎನ್‌ಡಿಎ ಮೈತ್ರಿಕೂಟಕ್ಕೆ ಮತ ಹಾಕಿದ ಶೇಕಡಾ 53.7 ರಷ್ಟು ಮತದಾರರು, ಈ ಕಳ್ಳತನದಿಂದಾಗಿ ತಾವು ಇಟ್ಟಿದ್ದ ನಂಬಿಕೆಗೆ ದ್ರೋಹವಾಗಿದೆ ಎಂದು ಭಾವಿಸಿದ್ದಾರೆ. ಭಕ್ತರು ಈ ಕಾಣಿಕೆ ಕಳ್ಳತನವನ್ನು ಕೇವಲ ಒಂದು ಆರ್ಥಿಕ ಅಪರಾಧ ಎಂದು ನೋಡುತ್ತಿಲ್ಲ; ಬದಲಿಗೆ, ಇದೊಂದು ದೊಡ್ಡ ಧಾರ್ಮಿಕ ನಂಬಿಕೆಗೆ ದ್ರೋಹ ಎಂದು ಪರಿಗಣಿಸುತ್ತಿದ್ದಾರೆ. ಇದು ನೇರವಾಗಿ ಬಿಜೆಪಿಯ ಅತ್ಯಂತ ನಿಷ್ಠಾವಂತ ಮತದಾರರ ವಲಯಕ್ಕೆ ಆತಂಕ ತಂದೊಡ್ಡಿದೆ.

ಬಿಜೆಪಿಯು ಮಂದಿರದ ನಿರ್ಮಾಣ ಮತ್ತು ಅದರ ಧಾರ್ಮಿಕ ಸಂಕೇತಗಳನ್ನು ತನ್ನ ಪಕ್ಷದ ವರ್ಚಸ್ಸಿನೊಂದಿಗೆ ಉದ್ದೇಶಪೂರ್ವಕವಾಗಿಯೇ ಬೆರೆಸಿತ್ತು. ಅಷ್ಟೇ ಅಲ್ಲದೆ, ಪ್ರಧಾನಿ ಮೋದಿಯವರೇ ಈ ಇಡೀ ಧಾರ್ಮಿಕ ಯೋಜನೆಯ ಸಂಪೂರ್ಣ ಯಶಸ್ಸಿನ ಕ್ರೆಡಿಟ್ ಪಡೆದುಕೊಂಡಿದ್ದರು. ಹಾಗಾಗಿ, ಅವರೇ ಸ್ವತಃ ಆರಿಸಿದ ಜನರ ಉಸ್ತುವಾರಿಯಲ್ಲಿ ದೇವಸ್ಥಾನದೊಳಗೆ ಇಂತಹ ಘಟನೆ ನಡೆದಾಗ, ಅದರಿಂದ ಉಂಟಾಗುವ ಹೊಣೆಗಾರಿಕೆಯನ್ನು ಅವರೇ ಹೊರಬೇಕಾಗುತ್ತದೆ ಮತ್ತು ಅದಕ್ಕೆ ಅವರೇ ಹೊಣೆಯಾಗಬೇಕಾಗುತ್ತದೆ.

ರಾಮ ಮಂದಿರದ ಕಳ್ಳತನದ ಹಗರಣದಿಂದ ಮೋದಿ ಮತ್ತು ಬಿಜೆಪಿ ಸುಲಭವಾಗಿ ಹೊರಬರಲು ಸಾಧ್ಯವಾಗುವುದಿಲ್ಲ ಎನ್ನುವುದಕ್ಕೆ ಇರುವ ಆರು ಪ್ರಮುಖ ಕಾರಣಗಳನ್ನು ಣheತಿiಡಿe.iಟಿ ಪಟ್ಟಿ ಮಾಡಿದೆ. ಅದು ಹೀಗಿದೆ.

1. ಮಂದಿರವು ಬಿಜೆಪಿಯ ರಾಜಕೀಯ ಆಸ್ತಿಯೇ ಹೊರತು ಧಾರ್ಮಿಕ ಯೋಜನೆಯಲ್ಲ

ರಾಮ ಮಂದಿರ ನಿರ್ಮಾಣವು ಕೇವಲ ಒಂದು ಧಾರ್ಮಿಕ ಯೋಜನೆಯಲ್ಲ. ಇದು ಬಿಜೆಪಿ ಮತ್ತು ಒಟ್ಟಾರೆ ಸಂಘ ಪರಿವಾರದ ರಾಜಕೀಯ ಯಶಸ್ಸಿನ ಮುಕುಟಪ್ರಾಯವಾಗಿದೆ. ರಾಮ ಜನ್ಮಭೂಮಿ ಚಳವಳಿಯ ಬಲದ ಮೇಲೆಯೇ ಬಿಜೆಪಿ ರಾಷ್ಟ್ರ ರಾಜಕಾರಣದಲ್ಲಿ ಮುಂಚೂಣಿಗೆ ಬಂದಿದ್ದು, ಮಂದಿರದ ಪ್ರಾಣ ಪ್ರತಿಷ್ಠಾಪನಾ ಕಾರ್ಯಕ್ರಮದಲ್ಲಿ ಪ್ರಧಾನಿ ಮೋದಿ ಅವರೇ ಕೇಂದ್ರ ಬಿಂದುವಾಗಿದ್ದರು. 1992ರಲ್ಲಿ ಹಿಂದುತ್ವ ಕಾರ್ಯಕರ್ತರಿಂದ ಧ್ವಂಸಗೊಂಡ ಮಸೀದಿಯ ಜಾಗದಲ್ಲಿ ಬಹುಸಂಖ್ಯಾತ ಸಮುದಾಯಕ್ಕೆ ನೀಡಿದ್ದ ಶತಮಾನಗಳ ಹಳೆಯ ಭರವಸೆಯನ್ನು ಈಡೇರಿಸಲಾಗಿದೆ ಎಂದು ಬಿಂಬಿಸಿ, ಮಂದಿರ ನಿರ್ಮಾಣದ ಸಂಪೂರ್ಣ ಯಶಸ್ಸಿನ ಕ್ರೆಡಿಟ್ ಅನ್ನು ಮೋದಿ ಅವರೇ ಪದೇ ಪದೇ ಪಡೆದುಕೊಂಡಿದ್ದರು. ಹಾಗಾಗಿ, ಮಂದಿರದ ಆವರಣದೊಳಗೆ ನಡೆಯುವ ಯಾವುದೇ ಹಗರಣವು ಚುನಾವಣಾ ಲಾಭಕ್ಕಾಗಿ ಬಿಜೆಪಿ ಬಳಸಿಕೊಂಡ ಧಾರ್ಮಿಕ ಸಂಕೇತದ ಉಸ್ತುವಾರಿಯ ಮೇಲೆಯೇ ನೇರ ಪ್ರಶ್ನೆಗಳನ್ನು ಎತ್ತುತ್ತದೆ.

2. ಮಂದಿರ ಟ್ರಸ್ಟ್‌ಗೆ ಮೋದಿಯವರಿಂದಲೇ ನೇರ ನೇಮಕಾತಿ

ಇದು ಸ್ಥಳೀಯ ಅಥವಾ ಸ್ವತಂತ್ರ ಆಡಳಿತದ ವೈಫಲ್ಯ ಎಂದು ಹೇಳಿ ಮೋದಿ ಈ ವಿವಾದದಿಂದ ನುಣುಚಿಕೊಳ್ಳಲು ಸಾಧ್ಯವಿಲ್ಲ. ಮಂದಿರ ಮತ್ತು ಅದರ ಆರ್ಥಿಕ ವ್ಯವಹಾರಗಳ ಮೇಲ್ವಿಚಾರಣೆ ನಡೆಸುವ 'ಶ್ರೀ ರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್' ಅನ್ನು ಅಧಿಕೃತವಾಗಿ ಕೇಂದ್ರ ಸರ್ಕಾರವೇ ರಚಿಸಿದ್ದು, ಅದರ 15 ಸದಸ್ಯರಲ್ಲಿ 12 ಜನರನ್ನು ಕೇಂದ್ರವೇ ನೇರವಾಗಿ ನಾಮನಿರ್ದೇಶನ ಮಾಡಿದೆ. ಫೆಬ್ರವರಿ 2020ರಲ್ಲಿ ಲೋಕಸಭೆಯಲ್ಲಿ ಈ ಟ್ರಸ್ಟ್ ರಚನೆಯನ್ನು ಸ್ವತಃ ಮೋದಿ ಅವರೇ ಘೋಷಿಸಿದ್ದರು ಮತ್ತು ಅದಕ್ಕೆ ಬೇಕಾದ ಜನರನ್ನು ಅವರೇ ಆರಿಸಿದ್ದರು ಎಂದು ಹೇಳಲಾಗಿದೆ. ಇದರ ಪರಿಣಾಮವಾಗಿ, ಟ್ರಸ್ಟ್ ಸದಸ್ಯರ ಜವಾಬ್ದಾರಿಯನ್ನು ಸಾರ್ವಜನಿಕರು ನೇರವಾಗಿ ಅವರನ್ನು ನೇಮಿಸಿದ ಪ್ರಧಾನಿಯವರಿಗೇ ಲಿಂಕ್ ಮಾಡುತ್ತಿದ್ದಾರೆ.

3. ಚಂಪತ್ ರಾಯ್ ಮತ್ತು ಮೋದಿ ನಡುವಿನ ನಿಕಟ ಸಂಬಂಧ

ಈ ಹಗರಣವು ಬಿಜೆಪಿ ಮತ್ತು ಆರ್‌ಎಸ್‌ಎಸ್ ವ್ಯವಸ್ಥೆಯೊಂದಿಗೆ ಆಳವಾದ ಸಂಬಂಧ ಹೊಂದಿರುವ ವ್ಯಕ್ತಿಗಳನ್ನು ನೇರವಾಗಿ ಮುಟ್ಟಿದೆ. ನೈತಿಕ ಹೊಣೆ ಹೊತ್ತು ಇತ್ತೀಚೆಗೆ ರಾಜೀನಾಮೆ ನೀಡಿರುವ ಟ್ರಸ್ಟ್‌ನ ಪ್ರಧಾನ ಕಾರ್ಯದರ್ಶಿ ಚಂಪತ್ ರಾಯ್ ಅವರು ಪ್ರಮುಖ ಆರ್‌ಎಸ್‌ಎಸ್ ಮುಖಂಡ ಹಾಗೂ ವಿಶ್ವ ಹಿಂದೂ ಪರಿಷತ್‌ನ ಉಪಾಧ್ಯಕ್ಷರಾಗಿದ್ದಾರೆ. ಇವರನ್ನು ಮೋದಿಯವರಿಗೆ ಆಪ್ತರು ಎಂದು ಪರಿಗಣಿಸಲಾಗಿದೆ. ಅಷ್ಟೇ ಅಲ್ಲದೆ, ರಾಯ್ ಅವರ ಕಾರು ಚಾಲಕನ ಬಂಧನ ಮತ್ತು ಇತರ ಆಡಳಿತಾಧಿಕಾರಿಗಳ ಮೇಲಿನ ಆರೋಪಗಳಿಂದಾಗಿ, ಆರೋಪಿಗಳಿಗೂ ತಮಗೂ ಯಾವುದೇ ಸಂಬಂಧವಿಲ್ಲ ಎಂದು ಹೇಳಲು ಪಕ್ಷಕ್ಕೆ ಸಾಧ್ಯವಿಲ್ಲದಂತಾಗಿದೆ. ಬಜರಂಗದಳದ ಸಂಸ್ಥಾಪಕ ಹಾಗೂ ಬಿಜೆಪಿ ನಾಯಕ ವಿನಯ್ ಕಟಿಯಾರ್ ಅವರಂತಹ ಪಕ್ಷದ ಆಂತರಿಕ ನಾಯಕರೇ ಟ್ರಸ್ಟ್‌ನ ಉನ್ನತ ಅಧಿಕಾರಿಗಳ ವಿರುದ್ಧ ಬಹಿರಂಗವಾಗಿ ಬೆರಳು ತೋರಿಸಿದ್ದಾರೆ.

4. ಮೋದಿಯವರ ಪ್ರಮುಖ ಆಸ್ತ್ರಗಳಾದ ಪ್ರಾಮಾಣಿಕತೆ, ರಾಷ್ಟ್ರೀಯತೆ ಮತ್ತು ಧರ್ಮದ ನಂಬಿಕೆಗೆ ಧಕ್ಕೆ

ಮೋದಿಯವರ ಚುನಾವಣಾ ವರ್ಚಸ್ಸು ಮುಖ್ಯವಾಗಿ ಮೂರು ಆಧಾರಸ್ತಂಭಗಳ ಮೇಲೆ ನಿಂತಿದೆ.

1. ಹಿಂದುತ್ವದ ವಿಶ್ವಾಸಾರ್ಹತೆ: ಹಿಂದೂ ಹಿತಾಸಕ್ತಿಗಳು ಮತ್ತು ಪವಿತ್ರ ಧಾರ್ಮಿಕ ಕ್ಷೇತ್ರಗಳ ರಕ್ಷಕ ಎಂಬ ಹೆಗ್ಗಳಿಕೆ.

2. ಭ್ರಷ್ಟಾಚಾರಮುಕ್ತ ಆಡಳಿತ: ಭ್ರಷ್ಟ ವಂಶಾಡಳಿತ ಪಕ್ಷಗಳಿಗೆ ತಾವು ಸಂಪೂರ್ಣ ವಿರುದ್ಧ ಎಂದು ಬಿಂಬಿಸಿಕೊಳ್ಳುವುದು.

3. ರಾಷ್ಟ್ರೀಯತೆಯ ದಕ್ಷತೆ: ಅತ್ಯುತ್ತಮ ಆಡಳಿತ ಮತ್ತು ಜನರಿಗೆ ಯೋಜನೆಗಳನ್ನು ತಲುಪಿಸುವುದೇ ರಾಷ್ಟ್ರೀಯತೆ ಎಂದು ಪ್ರತಿಪಾದಿಸುವುದು.

ರಾಮ ಮಂದಿರದ ಕಾಣಿಕೆ ಕಳ್ಳತನದ ಹಗರಣವು ಈ ಮೂರೂ ಅಂಶಗಳಿಗೆ ಏಕಕಾಲದಲ್ಲಿ ಧಕ್ಕೆ ತಂದಿದೆ. ಕೋಟ್ಯಂತರ ಜನರು ಪೂಜಿಸುವ ಹಿಂದೂ ಪವಿತ್ರ ಕ್ಷೇತ್ರದಲ್ಲಿನ ಆಡಳಿತ ವೈಫಲ್ಯವನ್ನು ಇದು ಎತ್ತಿ ತೋರಿಸುತ್ತದೆ. ದೇಶದ ಅತ್ಯಂತ ಪ್ರತಿಷ್ಠಿತ ಯೋಜನೆಯಲ್ಲಿ ದೀರ್ಘಕಾಲದಿಂದ ವ್ಯವಸ್ಥಿತ ಭ್ರಷ್ಟಾಚಾರ ನಡೆದಿದೆ ಎಂಬ ಸಂಶಯವನ್ನು ಮೂಡಿಸುತ್ತದೆ ಹಾಗೂ 'ಸ್ವಚ್ಛ ಮತ್ತು ದಕ್ಷ ಆಡಳಿತ'ದ ಹೆಮ್ಮೆಯ ವಾದವನ್ನು ದುರ್ಬಲಗೊಳಿಸುತ್ತದೆ. ಈ ಕಾರಣದಿಂದಾಗಿಯೇ ಮೋದಿ ಇದನ್ನು ಕೇವಲ ಒಂದು ಸಣ್ಣ ಆಡಳಿತಾತ್ಮಕ ಲೋಪ ಎಂದು ತಳ್ಳಿಹಾಕಲು ಸಾಧ್ಯವಾಗುತ್ತಿಲ್ಲ.

5. ಭಕ್ತರ ಹಣದ ಮೇಲಿನ ಹಗರಣವು ಆಡಳಿತ ಪಕ್ಷಕ್ಕೆ ನೇರ ನೈತಿಕ ಹೊಣೆಗಾರಿಕೆ

ಇದು ಕೇವಲ ಕಾಣಿಕೆ ಡಬ್ಬಿಗಳಿಂದ ನಡೆದ ಸಣ್ಣಪುಟ್ಟ ಕಳ್ಳತನವಲ್ಲ. ತನಿಖಾ ವರದಿಗಳ ಪ್ರಕಾರ, ಸುಮಾರು 200ಕ್ಕೂ ಹೆಚ್ಚು ದಲ್ಲಾಳಿಗಳು ಸೇರಿ ಅತ್ಯಂತ ವ್ಯವಸ್ಥಿತ ಜಾಲವನ್ನು ರೂಪಿಸಿಕೊಂಡಿದ್ದರು. ಇವರು ಸ್ಥಳೀಯ ಚಿನ್ನದ ವ್ಯಾಪಾರಿಗಳನ್ನು ಸಂಪೂರ್ಣವಾಗಿ ಬದಿಗೊತ್ತಿ, ಮಂದಿರದಲ್ಲಿದ್ದ ಭಾರೀ ಪ್ರಮಾಣದ ಅಮೂಲ್ಯ ಲೋಹಗಳನ್ನು ಕರಗಿಸುವ ಉದ್ದೇಶದಿಂದ ರೈಲುಗಳ ಮೂಲಕ ಕರ್ನಾಟಕಕ್ಕೆ ಸಾಗಿಸುತ್ತಿದ್ದರು ಎಂದು ಆರೋಪಿಸಲಾಗಿದೆ. ಅಷ್ಟೇ ಅಲ್ಲದೆ, ಮಂದಿರದ ಬಡ ಸಿಬ್ಬಂದಿಗಾಗಿ ತರಿಸಲಾಗಿದ್ದ ಚಳಿಗಾಲದ ಜಾಕೆಟ್‌ಗಳಿದ್ದ ಲಾರಿಗಳನ್ನೇ ಈ ಜಾಲವು ದಾರಿ ತಪ್ಪಿಸಿದೆ ಎಂಬ ಗಂಭೀರ ಆರೋಪಗಳೂ ಇವೆ. ಇಷ್ಟು ದೊಡ್ಡ ಮಟ್ಟದಲ್ಲಿ ನಡೆದಿರುವ ಈ ವ್ಯವಸ್ಥಿತ ಕಾರ್ಯಾಚರಣೆಯನ್ನು ಆಡಳಿತ ಪಕ್ಷವು ಕೇವಲ ಒಂದು ಸಣ್ಣ ನಿರ್ಲಕ್ಷ್ಯ ಎಂದು ಹೇಳಿ ಹಗುರವಾಗಿ ಪರಿಗಣಿಸಲು ಸಾಧ್ಯವಿಲ್ಲ.

ಈ ಕಳ್ಳತನವು ಸರ್ಕಾರಿ ಹಣ ಅಥವಾ ಕಾರ್ಪೊರೇಟ್ ಒಪ್ಪಂದಗಳಿಗೆ ಸಂಬಂಧಿಸಿದ್ದಲ್ಲ; ಬದಲಿಗೆ, ಸಾಮಾನ್ಯ ಭಕ್ತರು ನೀಡಿದ ಕಾಣಿಕೆ ಮತ್ತು ದೇವರಿಗೆ ಒಪ್ಪಿಸಿದ ವಸ್ತುಗಳಿಗೆ ಸಂಬಂಧಿಸಿದ್ದಾಗಿದೆ. ತಮ್ಮನ್ನು ಹಿಂದೂ ಧರ್ಮ ಮತ್ತು ನಂಬಿಕೆಯ ರಕ್ಷಕರು ಎಂದು ಬಿಂಬಿಸಿಕೊಳ್ಳುವ ಪಕ್ಷಕ್ಕೆ, ಅತ್ಯಂತ ಪವಿತ್ರವಾದ ಹೊಸ ಮಂದಿರದೊಳಗೆ ಭಕ್ತರ ಹಣವೇ ದುರುಪಯೋಗವಾಗಿದೆ ಎಂಬ ವಿಷಯವು ಅದರ ಅಸ್ತಿತ್ವಕ್ಕೆ ಧಕ್ಕೆ ತರುವಂತಹ ದೊಡ್ಡ ಆಘಾತವಾಗಿದೆ.

6. ಮೋದಿಯವರ ಮೌನವು ಅಪರಾಧಕ್ಕೆ ಸಾಥ್ ನೀಡಿದಂತೆ ಬಿಂಬಿತವಾಗುತ್ತಿದೆ

ಈ ವಿಷಯದ ಬಗ್ಗೆ ಪ್ರಧಾನಿ ಮೋದಿಯವರು ಸಾರ್ವಜನಿಕವಾಗಿ ಮೌನ ವಹಿಸಿರುವುದನ್ನು ಕಾಂಗ್ರೆಸ್ ಮತ್ತು ಸಮಾಜವಾದಿ ಪಕ್ಷ ಸೇರಿದಂತೆ ಒಗ್ಗಟ್ಟಾಗಿರುವ ವಿರೋಧ ಪಕ್ಷಗಳು ಪ್ರತಿದಿನ ಅಸ್ತ್ರವಾಗಿ ಬಳಸಿಕೊಳ್ಳುತ್ತಿವೆ. ಬಿಜೆಪಿ ಭ್ರಷ್ಟಾಚಾರವನ್ನು ಮುಚ್ಚಿಡುತ್ತಾ, ರಾಜಕೀಯ ಲಾಭಕ್ಕಾಗಿ ಧರ್ಮವನ್ನು ಬಳಸಿಕೊಳ್ಳುತ್ತಿದೆ ಎಂದು ಅವು ಆರೋಪಿಸುತ್ತಿವೆ. ಒಂದು ವೇಳೆ ಈ ಬಗ್ಗೆ ಮೋದಿ ಅಥವಾ ಬಿಜೆಪಿ ವಿವರವಾದ ಹೇಳಿಕೆ ನೀಡಲು ಮುಂದಾದರೆ, ಅದು ಟ್ರಸ್ಟ್‌ನ ಹಣಕಾಸು ನಿರ್ವಹಣೆ, ಕಣ್ಗಾವಲು ವ್ಯವಸ್ಥೆ ಮತ್ತು ಪಕ್ಷದ ಸಂಪೂರ್ಣ ನಿಯಂತ್ರಣದಲ್ಲಿಲ್ಲದ ಆಂತರಿಕ ತನಿಖೆಗಳ ಬಗ್ಗೆ ಮತ್ತಷ್ಟು ಪ್ರಶ್ನೆಗಳನ್ನು ಎದುರಿಸುವಂತೆ ಮಾಡುತ್ತದೆ. ಇದರಿಂದಾಗಿ ಸದ್ಯ ಆಡಳಿತ ಪಕ್ಷಕ್ಕೆ ದೊಡ್ಡ ಇಕ್ಕಟ್ಟು ಸೃಷ್ಟಿಯಾಗಿದೆ. ಮೌನ ವಹಿಸಿದರೆ ತಪ್ಪನ್ನು ಮುಚ್ಚಿಟ್ಟಂತೆ ಕಾಣುತ್ತದೆ; ಮಾತನಾಡಿದರೆ ಮೋದಿಯವರ ನೇರ ಉಸ್ತುವಾರಿಯಲ್ಲೇ ಇಡೀ ವ್ಯವಸ್ಥೆ ವಿಫಲವಾಗಿದೆ ಎಂದು ಒಪ್ಪಿಕೊಂಡಂತೆ ಭಾಸವಾಗುತ್ತದೆ.

ಮೋದಿ ಮತ್ತು ಬಿಜೆಪಿಗೆ ರಾಮ ಮಂದಿರದ ಕಾಣಿಕೆ ಕಳ್ಳತನವು ಕೇವಲ ಕೆಲವರ ಬಂಧನದಿಂದ ಮುಗಿದುಹೋಗುವ ಕಥೆಯಲ್ಲ. ಇದು ಅವರದೇ ಆದ ರಾಜಕೀಯ ಆಯ್ಕೆಗಳಿಂದ ಸೃಷ್ಟಿಯಾಗಿರುವ ದೊಡ್ಡ ದುರ್ಬಲತೆಯಾಗಿದ್ದು, ಇದನ್ನು ಕೇವಲ ಮೌನದ ಮೂಲಕ ಮುಚ್ಚಿಡಲು ಸಾಧ್ಯವಿಲ್ಲ.