ಸಾಮಾನ್ಯ ಟಿಕೆಟ್‍ನೊಂದಿಗೆ ರಿಸರ್ವೇಶನ್ ಕೋಚ್‍ನಲ್ಲಿ ಪ್ರಯಾಣ: ಪ್ರಶ್ನಿಸಿದ ಟಿಟಿಇಗೆ ಥಳಿಸಿದ ಮಹಿಳೆ: ಆರೋಪ

ಕೋಝಿಕೋಡ್: ಸಾಮಾನ್ಯ ಟಿಕೆಟ್ ತೆಗೆದುಕೊಂಡು ರಿಸರ್ವೇಶನ್ ಕೋಚ್‍ನಲ್ಲಿ ಪ್ರಯಾಣಿಸಿದ್ದನ್ನು ಪ್ರಶ್ನಿಸಿದ ಟಿಟಿಇ ಒಬ್ಬರನ್ನು ಮಹಿಳೆಯೊಬ್ಬರು ಥಳಿಸಿದ್ದಾರೆ ಎಂದು ದೂರು ದಾಖಲಾಗಿದೆ. 

ಪಾಲಕ್ಕಾಡ್ ವಿಭಾಗದ ಟಿಟಿಇ ಸುಜಿತ್ ಅವರನ್ನು ಥಳಿಸಲಾಗಿದೆ. ಶೋರ್ನೂರ್ ರೈಲ್ವೆ ಪೋಲೀಸರು ಘಟನೆಯಲ್ಲಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.

ನಿನ್ನೆ ರಾತ್ರಿ 7:30 ರ ಸುಮಾರಿಗೆ ಈ ಘಟನೆ ನಡೆದಿದೆ. ಫರೋಖ್ ರೈಲು ನಿಲ್ದಾಣದಿಂದ ಕುಟ್ಟಿಪುರಂಗೆ ಪ್ರಯಾಣಿಸಲು ಸಾಮಾನ್ಯ ಟಿಕೆಟ್ ತೆಗೆದುಕೊಂಡಿದ್ದ ಮಹಿಳೆ ರೈಲಿನ ಎಸ್ 5 ಮೀಸಲು ಕೋಚ್ ಹತ್ತಿದರು.

ಟಿಕೆಟ್ ತಪಾಸಣೆಯ ಸಮಯದಲ್ಲಿ ಟಿಟಿಇ ಸಾಮಾನ್ಯ ಕೋಚ್‍ಗೆ ತೆರಳಲು ಹೇಳಿದ್ದು, ಈ ವೇಳೆ  ವಾಗ್ವಾದ ನಡೆದಿದ್ದು, ಮಹಿಳೆ ಟಿಟಿಇಯನ್ನು ಥಳಿಸಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಹಲ್ಲೆಯಲ್ಲಿ ಗಾಯಗೊಂಡ ಟಿಟಿಇ ಸುಜಿತ್ ಒಟ್ಟಪಾಲಂ ತಾಲೂಕು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದರು. ಟಿಟಿಇ ತನ್ನೊಂದಿಗೆ ಅನುಚಿತವಾಗಿ ವರ್ತಿಸಿದ್ದರಿಂದ ವಾಗ್ವಾದ ನಡೆದಿದೆ ಎಂದು ಆರೋಪಿಸಿ ಮಹಿಳೆ ಪೋಲೀಸ್ ದೂರು ದಾಖಲಿಸಿದ್ದಾರೆ. ಎರಡೂ ದೂರುಗಳ ಬಗ್ಗೆ ಶೋರ್ನೂರ್ ರೈಲ್ವೆ ಪೋಲೀಸರು ವಿವರವಾದ ತನಿಖೆ ನಡೆಸುತ್ತಿದ್ದಾರೆ.