16ನೇ ವಯಸ್ಸಿನಲ್ಲೇ AI ಕಂಪೆನಿ ಕಟ್ಟಿದ ಕೇರಳಂನ ರೌಲ್ ಜಾನ್ ಅಜು; ತಂದೆಗೆ 2 ಲಕ್ಷ ರೂ. ಸಂಬಳ ನೀಡುತ್ತಿರುವ ಮಗ

ಕೊಚ್ಚಿ: 12ನೇ ತರಗತಿಯಲ್ಲಿ ಓದುತ್ತಿರುವಾಗಲೇ ಕೃತಕ ಬುದ್ಧಿಮತ್ತೆ (ಂI) ಕ್ಷೇತ್ರದಲ್ಲಿ ಕಂಪೆನಿ ಸ್ಥಾಪಿಸಿ, ವಿವಿಧ ಂI ಪರಿಕರಗಳನ್ನು ಅಭಿವೃದ್ಧಿಪಡಿಸುತ್ತಿರುವ ಕೇರಳಂನ 16 ವರ್ಷದ ರೌಲ್ ಜಾನ್ ಅಜು ಗಮನ ಸೆಳೆದಿದ್ದಾರೆ. ತಮ್ಮ ಕಂಪೆನಿಯಲ್ಲಿ ಕೆಲಸ ಮಾಡುತ್ತಿರುವ ತಂದೆಗೆ ತಿಂಗಳಿಗೆ 2 ಲಕ್ಷ ರೂ. ಸಂಬಳ ನೀಡುತ್ತಿದ್ದಾರೆ. 

'ಭಾರತದ AI ಬಾಲಕ' ಎಂದೇ ಗುರುತಿಸಿಕೊಂಡಿರುವ ರೌಲ್, ಸದ್ಯ 12ನೇ ತರಗತಿಯ ವಾಣಿಜ್ಯ ವಿಭಾಗದಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ. ಓದಿನ ಜತೆಗೆ AI ಪರಿಕರಗಳ ಅಭಿವೃದ್ಧಿ, ತಂತ್ರಜ್ಞಾನ ತರಬೇತಿ ಹಾಗೂ ತಮ್ಮ ಆಸಕ್ತಿಯನ್ನು ಉದ್ಯಮವಾಗಿ ರೂಪಿಸುವ ಕೆಲಸದಲ್ಲಿಯೂ ತೊಡಗಿಸಿಕೊಂಡಿದ್ದಾರೆ.

ರೌಲ್ ಅವರ ಕಂಪೆನಿಯಲ್ಲಿ ತಂದೆಯೂ ಕೆಲಸ ಮಾಡುತ್ತಿದ್ದಾರೆ. ಅವರಿಗೆ ರೌಲ್ ತಿಂಗಳಿಗೆ 2 ಲಕ್ಷ ರೂ. ಸಂಬಳ ನೀಡುತ್ತಿದ್ದಾರೆ. Amazon, ಅಡೋಬ್, ವಿಪ್ರೋ ಮತ್ತು IBMನಂತಹ ಕಂಪೆನಿಗಳಲ್ಲಿ ಕೆಲಸ ಮಾಡಿರುವ ತಂದೆಯ ವೃತ್ತಿಪರ ಅನುಭವವು ತಮ್ಮ ಉದ್ಯಮದಲ್ಲಿ ಮಾರ್ಗದರ್ಶನ ಪಡೆಯಲು ನೆರವಾಗುತ್ತಿದೆ ಎಂದು ರೌಲ್ ಹೇಳಿದ್ದಾರೆ.

ಇತ್ತೀಚೆಗೆ ಕೊಚ್ಚಿಯಲ್ಲಿ ನಡೆದ 'ಮನೋರಮಾ ನ್ಯೂಸ್ ಕಾನ್ಕ್ಲೇವ್ 2026'ರಲ್ಲಿ ರೌಲ್ ಭಾಗವಹಿಸಿದ್ದರು. ನಟಿ ಗೌರಿ ಜಿ. ಕಿಶನ್ ಮತ್ತು ಶಾಸಕಿ ಫಾತಿಮಾ ತಹ್ಲಿಯಾ ಅವರೊಂದಿಗೆ 'Gen Z' ಕುರಿತ ಕಾರ್ಯಕ್ರಮದಲ್ಲಿ ಅವರು ಪಾಲ್ಗೊಂಡಿದ್ದರು. ಇಂದಿನ ಯುವಜನರು ಹಿಂದೆಂದಿಗಿಂತಲೂ ಹೆಚ್ಚಿನ ಮಾಹಿತಿಯನ್ನು ಸುಲಭವಾಗಿ ಪಡೆಯುವ ಅವಕಾಶ ಹೊಂದಿದ್ದಾರೆ. ಹಿಂದಿನಿಂದ ನಡೆದುಕೊಂಡು ಬಂದ ಮಾನದಂಡಗಳನ್ನು ಸುಮ್ಮನೆ ಒಪ್ಪಿಕೊಳ್ಳದೆ, ತಮಗೆ ಒಪ್ಪಿಗೆಯಾಗದ ವಿಚಾರಗಳನ್ನು ಪ್ರಶ್ನಿಸಲು ಇಂದಿನ ಯುವಕರು ಹೆಚ್ಚು ಸಿದ್ಧರಾಗಿದ್ದಾರೆ ಎಂದು ಅವರು ಹೇಳಿದರು.

►9ನೇ ವಯಸ್ಸಿನಲ್ಲೇ ಆಸಕ್ತಿ

ತಂತ್ರಜ್ಞಾನದ ಮೇಲಿನ ರೌಲ್ ಅವರ ಆಸಕ್ತಿ 9ನೇ ವಯಸ್ಸಿನಲ್ಲೇ ಆರಂಭವಾಗಿತ್ತು. ಆರಂಭದಲ್ಲಿ ವೀಡಿಯೊ ಎಡಿಟಿಂಗ್ ಸೇರಿದಂತೆ ಹಲವು ಕ್ಷೇತ್ರಗಳನ್ನು ಅವರು ಅನ್ವೇಷಿಸಿದರು. ಬಳಿಕ AI ಕ್ಷೇತ್ರದತ್ತ ಹೆಚ್ಚು ಆಸಕ್ತಿ ಬೆಳೆಸಿಕೊಂಡರು.

ಶಾಲೆಯ ವಿಜ್ಞಾನ ಯೋಜನೆಯಾಗಿ 'MeBot' ಎಂಬ ರೋಬೋಟ್ ಅಭಿವೃದ್ಧಿಪಡಿಸಿದರು. ತಮ್ಮ ಧ್ವನಿಯಲ್ಲಿ ಸಂವಹನ ನಡೆಸುವ ಹಾಗೂ ಬಳಕೆದಾರರೊಂದಿಗೆ ಸಂವಹನ ಸಾಧಿಸುವ ಉದ್ದೇಶದಿಂದ ಈ ರೋಬೋಟ್ ರೂಪಿಸಲಾಗಿತ್ತು.

ರೌಲ್ ಉತ್ತರ ಎಡಪ್ಪಳ್ಳಿ GHSSನಲ್ಲಿ ಪ್ಲಸ್ ಟು ವಾಣಿಜ್ಯ ವಿಭಾಗದಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ. ಅವರ ಲಿಂಕ್ಡ್‌ಇನ್ ಪ್ರೊಫೈಲ್ನಲ್ಲಿ ಅವರನ್ನು 'AIRealm Technologies'ನ ಸಂಸ್ಥಾಪಕ ಮತ್ತು ಮುಖ್ಯ ತಂತ್ರಜ್ಞಾನ ಅಧಿಕಾರಿ (CTO) ಎಂದು ಪರಿಚಯಿಸಲಾಗಿದೆ. AI ಉತ್ಪನ್ನಗಳು, ಪ್ರಯೋಗಗಳು ಮತ್ತು ಪ್ರಾಯೋಗಿಕ ತಂತ್ರಜ್ಞಾನ ಪರಿಹಾರಗಳ ಅಭಿವೃದ್ಧಿಯಲ್ಲಿ ಅವರು ಕೆಲಸ ಮಾಡುತ್ತಿದ್ದಾರೆ.

►15 AI ಪರಿಕರಗಳ ಅಭಿವೃದ್ಧಿ

'AIRealm Technologies Private Limited' ಮೂಲಕ ರೌಲ್ ಹಲವು AI ಯೋಜನೆಗಳು ಮತ್ತು ಪರಿಕರಗಳನ್ನು ಅಭಿವೃದ್ಧಿಪಡಿಸಿದ್ದಾರೆ. ಅವರ ಕುರಿತಾದ ವಿವಿಧ ಪ್ರೊಫೈಲ್ ಗಳ ಪ್ರಕಾರ, ಅವರು ಸುಮಾರು 15 AI ಪರಿಕರಗಳನ್ನು ಅಭಿವೃದ್ಧಿಪಡಿಸಿದ್ದು, ಸುಮಾರು 5 ಲಕ್ಷ ಜನರಿಗೆ AI ಕುರಿತು ತರಬೇತಿ ನೀಡಿದ್ದಾರೆ.

ಅವರ ಪ್ರಮುಖ ಯೋಜನೆಗಳಲ್ಲಿ 'JustEase' ಕೂಡ ಸೇರಿದೆ. ತುರ್ತು ಸಂದರ್ಭಗಳಲ್ಲಿ ಜನರಿಗೆ ಅಗತ್ಯ ಮಾಹಿತಿಯನ್ನು ಪಡೆಯಲು ಮತ್ತು ನಿರ್ಧಾರ ಕೈಗೊಳ್ಳಲು ನೆರವಾಗುವ ಉದ್ದೇಶದಿಂದ ಕೇರಳ ಸರ್ಕಾರದ ಸಹಯೋಗದಲ್ಲಿ ಈ AI ಆಧಾರಿತ ಉಪಕ್ರಮವನ್ನು ಅಭಿವೃದ್ಧಿಪಡಿಸಲಾಗಿದೆ.

ತುರ್ತು ಮಾರ್ಗದರ್ಶನ, ಕಾನೂನುಗಳ ಕುರಿತು ಮಾಹಿತಿ ಹಾಗೂ ಕಾನೂನು ನೆರವು ಪಡೆಯಲು ಸಹಾಯ ಮಾಡುವ ಉದ್ದೇಶದ 'Rescue AI' ಯೋಜನೆಯಲ್ಲಿಯೂ ಅವರು ಕೆಲಸ ಮಾಡಿದ್ದಾರೆ.

►ಗುಟೆರಸ್ ಜತೆ ಸಂವಾದ

ರೌಲ್ ಅವರ ಕೆಲಸ ರಾಷ್ಟ್ರೀಯ ಹಾಗೂ ಅಂತರರಾಷ್ಟ್ರೀಯ ವೇದಿಕೆಗಳಿಗೂ ತಲುಪಿದೆ. 2026ರಲ್ಲಿ ಹೊಸದಿಲ್ಲಿಯಲ್ಲಿ ನಡೆದ 'ಭಾರತ AI ಇಂಪ್ಯಾಕ್ಟ್ ಶೃಂಗಸಭೆ'ಯಲ್ಲಿ ಅವರು ಭಾಗವಹಿಸಿದ್ದರು. ಈ ಸಂದರ್ಭದಲ್ಲಿ ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೊ ಗುಟೆರಸ್ ಅವರೊಂದಿಗೆ ಸಂವಾದ ನಡೆಸಿದರು. AI ಯುಗದಲ್ಲಿ ಯುವಜನರ ಪಾತ್ರದ ಬಗ್ಗೆಯೂ ಅವರು ಮಾತನಾಡಿದ್ದರು.