ಯುವಕರನ್ನು 'ಕಾಕ್ರೋಚ್'ಗಳನ್ನಾಗಿಸಿ ಮಾದಕ ವ್ಯಸನಿಗಳನ್ನಾಗಿಸಲು ವಿದೇಶಿ ಶಕ್ತಿಗಳ ಯತ್ನ: ಕೇರಳ ವಿವಿ ಕುಲಪತಿ ಮೋಹನನ್ ಕುನ್ನುಮ್ಮಲ್ ಆರೋಪ

ತಿರುವನಂತಪುರಂ: ವಿದೇಶಿ ಶಕ್ತಿಗಳು ಉದ್ದೇಶಪೂರ್ವಕವಾಗಿ ಯುವಕರನ್ನು ದುರ್ಬಲರನ್ನಾಗಿಸಿ, ಮಾದಕ ವ್ಯಸನಿಗಳನ್ನಾಗಿಸುವ ಮೂಲಕ ನಾಶಪಡಿಸಲು ಪ್ರಯತ್ನಿಸುತ್ತಿವೆ ಎಂದು ಕೇರಳ ವಿಶ್ವವಿದ್ಯಾಲಯದ ಉಪಕುಲಪತಿ ಮೋಹನನ್ ಕುನ್ನುಮ್ಮಲ್ ಆರೋಪಿಸಿದ್ದಾರೆ. ಯುವಕರನ್ನು ಇಂತಹ ರೀತಿಯಲ್ಲಿ ದುರ್ಬಲಗೊಳಿಸುವುದನ್ನು ಅವರು 'ಕಾಕ್ರೋಚ್‌ಗಳನ್ನಾಗಿ ಮಾಡುವುದು' ಎಂದು ಹೇಳಿದ್ದಾರೆ.

ಸ್ಪರ್ಧಾತ್ಮಕ ಪರೀಕ್ಷೆಗಳಲ್ಲಿ ಉತ್ತಮ ಸಾಧನೆ ಮಾಡಿದ ವಿದ್ಯಾರ್ಥಿಗಳನ್ನು ಗೌರವಿಸಲು ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ 'ವಿದ್ಯಾರ್ಥಿಗಳು ಕಾಕ್ರೋಚ್‌ ಗಳಲ್ಲ, ಬಲಿಷ್ಠ ಸಿಂಹಗಳು' ಎಂದು ಹೇಳಿದ್ದಕ್ಕೆ ಟೀಕೆ ವ್ಯಕ್ತವಾಗಿತ್ತು. ಇದಕ್ಕೆ ಶನಿವಾರ ಪ್ರತಿಕ್ರಿಯಿಸಿದ ಕುನ್ನುಮ್ಮಲ್, ವಿದ್ಯಾರ್ಥಿಗಳನ್ನು ಕಾಕ್ರೋಚ್ ಎಂದು ಕರೆಯುವುದು ತಮ್ಮ ಉದ್ದೇಶವಾಗಿರಲಿಲ್ಲ ಎಂದು ಸ್ಪಷ್ಟಪಡಿಸಿದರು.

'ನೀವು ಕಾಕ್ರೋಚ್‌ ಗಳಲ್ಲದಿದ್ದರೆ ಧ್ವನಿ ಎತ್ತಿ' ಎಂದು ಕಾರ್ಯಕ್ರಮದಲ್ಲಿ ವಿದ್ಯಾರ್ಥಿಗಳಿಗೆ ಹೇಳಿದ್ದೆ. ಆದರೆ ಒಬ್ಬರು ಅಥವಾ ಇಬ್ಬರು ಮಾತ್ರ ಪ್ರತಿಕ್ರಿಯಿಸಿದರು. ಕಾರ್ಯಕ್ರಮದಲ್ಲಿದ್ದ ಮಕ್ಕಳು ಚಿಕ್ಕವರಾಗಿದ್ದರಿಂದ ತಾವು ಕೇಳಿದ ಪ್ರಶ್ನೆಯ ಅರ್ಥ ಅವರಿಗೆ ತಿಳಿದಿರಲಿಲ್ಲ. ಹೀಗಾಗಿ ಅವರು ಮೌನವಾಗಿದ್ದರು. ಕೆಲವು ಮಕ್ಕಳು ನಂತರ ತಾವು ಹೇಳಿದ್ದನ್ನು ಕೇಳಿಸಿಕೊಂಡಿರಲಿಲ್ಲ ಎಂದು ತಿಳಿಸಿದರು. ಹಿರಿಯ ವಿದ್ಯಾರ್ಥಿಗಳು ಪ್ರತಿಕ್ರಿಯಿಸುತ್ತಿದ್ದರು ಎಂದು ಅವರು ವಿವರಿಸಿದರು.

'ಕೆಲವು ವಿದೇಶಿ ಶಕ್ತಿಗಳು ಉದ್ದೇಶಪೂರ್ವಕವಾಗಿ ಯುವಕರನ್ನು ಕಾಕ್ರೋಚ್‌ ಗಳನ್ನಾಗಿ ಮಾಡುತ್ತಿವೆ. ಅವರನ್ನು ಮಾದಕ ವ್ಯಸನಿಗಳನ್ನಾಗಿಸುವ ಮೂಲಕ ನಾಶಪಡಿಸಲು ಪ್ರಯತ್ನಿಸುತ್ತಿವೆ' ಎಂದು ಅವರು ಟಿವಿ ಚಾನೆಲ್‌ವೊಂದಕ್ಕೆ ತಿಳಿಸಿದ್ದರು.

ಇಂತಹ ಪ್ರಯತ್ನಗಳನ್ನು ವಿರೋಧಿಸುವುದು ಕುಲಪತಿಯಾಗಿ ತಮ್ಮ ಕರ್ತವ್ಯ ಎಂದು ಅವರು ಹೇಳಿದರು.

ವಿದೇಶದಿಂದ ಭಿನ್ನಾಭಿಪ್ರಾಯದ ಧ್ವನಿಗಳು ಕೇಳಿಬರುತ್ತಿರುವುದನ್ನು ಕೇವಲ ಕಾಕತಾಳೀಯ ಎಂದು ಪರಿಗಣಿಸಲು ಸಾಧ್ಯವಿಲ್ಲ ಎಂದೂ ಅವರು ಆರೋಪಿಸಿದರು. 'ಒಬ್ಬ ಯುವಕ ಅಮೆರಿಕದಿಂದ ಬಂದಿದ್ದಾನೆ. ಅನೇಕ ಜನರು ಆತನನ್ನು ಬೆಂಬಲಿಸುತ್ತಿದ್ದಾರೆ. ಇದೆಲ್ಲವೂ ಕಾಕತಾಳೀಯವಾಗಿರಬಹುದೇ? ವಿಶ್ವವಿದ್ಯಾಲಯದ ಕುಲಪತಿಯಾದವರು ಈ ಬಗ್ಗೆ ಯೋಚಿಸಬೇಕಲ್ಲವೇ?' ಎಂದು ಅವರು ಪ್ರಶ್ನಿಸಿದರು.

'ವಂದೇ ಮಾತರಂ' ಹೇಳಿಕೆ ವಿವಾದ

'ವಂದೇ ಮಾತರಂ' ಅನ್ನು ವಿರೋಧಿಸುವವರು 'ತಮ್ಮ ತಾಯಿಯನ್ನು ತಿಳಿದಿಲ್ಲ' ಎಂಬ ತಮ್ಮ ಹೇಳಿಕೆ ಕುರಿತ ಟೀಕೆಗಳಿಗೂ ಕುನ್ನುಮ್ಮಲ್ ಪ್ರತಿಕ್ರಿಯಿಸಿದರು. ತಮ್ಮ ಮಾತುಗಳನ್ನು ತಪ್ಪಾಗಿ ಅರ್ಥೈಸಲಾಗಿದೆ ಎಂದು ಅವರು ಹೇಳಿದರು.

ತಾವು ಹೇಳಿದ್ದು ಭೂಮಿಯನ್ನು ಗೌರವಿಸಬೇಕು ಎಂಬ ಅರ್ಥದಲ್ಲಿ. ಆದರೆ ಕೆಲವರು ತಮ್ಮ ಮಾತುಗಳನ್ನು ತಪ್ಪಾಗಿ ಅರ್ಥೈಸಿಕೊಂಡು, ತಮ್ಮನ್ನು 'ಸಂಘಿ' ಎಂದು ಬಿಂಬಿಸುತ್ತಿದ್ದಾರೆ ಎಂದು ಅವರು ಆರೋಪಿಸಿದರು. ದುರುದ್ದೇಶ ಹೊಂದಿರುವವರೇ ತಮ್ಮ ಹೇಳಿಕೆಗಳನ್ನು ತಿರುಚಿ ವಿವಾದ ಸೃಷ್ಟಿಸಿದ್ದಾರೆ ಎಂದರು.

RSS ಸಂಬಂಧದ ಆರೋಪ

RSS ಜೊತೆಗಿನ ತಮ್ಮ ಸಂಬಂಧದ ಆರೋಪದ ಕುರಿತು ಮಾತನಾಡಿದ ಅವರು, ದೇಶವನ್ನು RSS ಸಿದ್ಧಾಂತದಲ್ಲಿ ನಂಬಿಕೆ ಹೊಂದಿರುವ ಜನರು ಆಳುತ್ತಿದ್ದಾರೆ ಮತ್ತು ತಮಗೆ ಅವರ ಸಹಾಯದ ಅಗತ್ಯವಿಲ್ಲ ಎಂದು ಹೇಳಿದರು.

'ನಾನು ಕುಲಪತಿಯಾಗಿ ಮಾಡಬೇಕಾದ ಕೆಲಸವನ್ನು ಮಾತ್ರ ಮಾಡುತ್ತಿದ್ದೇನೆ' ಎಂದು ಅವರು ಪ್ರತಿಪಾದಿಸಿದರು.

SFI ವಿರುದ್ಧ ಆರೋಪ

ವಿವಿಧ ವಿಷಯಗಳಿಗೆ ಸಂಬಂಧಿಸಿದಂತೆ ತಮ್ಮ ವಿರುದ್ಧ ಪ್ರತಿಭಟನೆ ನಡೆಸುತ್ತಿರುವ ಸಿಪಿಐ(ಎಂ)ನ ವಿದ್ಯಾರ್ಥಿ ಘಟಕವಾದ ಭಾರತೀಯ ವಿದ್ಯಾರ್ಥಿ ಒಕ್ಕೂಟ (SFI)ವನ್ನೂ ಕುನ್ನುಮ್ಮಲ್ ಟೀಕಿಸಿದರು.

SFI ಕಾರ್ಯಕರ್ತರು ಇತ್ತೀಚೆಗೆ ತಮ್ಮನ್ನು ಪೌರಾಣಿಕ ರಾಕ್ಷಸ ರಾಜ ಮಹಾಬಲಿಯಂತೆ ಚಿತ್ರಿಸಿ, ವಿಶ್ವವಿದ್ಯಾಲಯದ ಮುಂದೆ ಪ್ರತಿಮೆಯನ್ನು ಹೂಳಿದ್ದಾರೆ ಎಂದು ಅವರು ಆರೋಪಿಸಿದರು.