ತಾಪಮಾನ ಏರಿಕೆ, ಶಬ್ದಮಾಲಿನ್ಯ, ವಿದ್ಯುತ್ ಕಡಿತದ ಆತಂಕ: ಅಮೆಝಾನ್ ಡೇಟಾ ಸೆಂಟರ್‌ಗೆ ಥಾಣೆ ನಿವಾಸಿಗಳ ವಿರೋಧ

ಮುಂಬೈ: ಬಲ್ಕುಮ್ ನಲ್ಲಿ ಉದ್ದೇಶಿತ ಅಮೆಝಾನ್ ವೆಬ್ ಸರ್ವೀಸಸ್ ಡೇಟಾ ಸೆಂಟರ್ ನಿರ್ಮಾಣವನ್ನು ಥಾಣೆ ನಿವಾಸಿಗಳು ತೀವ್ರವಾಗಿ ವಿರೋಧಿಸುತ್ತಿದ್ದಾರೆ. ದಟ್ಟವಾದ ಜನವಸತಿ ಪ್ರದೇಶದಲ್ಲಿ ಇದು ನಿರ್ಮಾಣವಾಗುತ್ತಿರುವುದರಿಂದ ಸ್ಥಳೀಯ ಪರಿಸರ, ವಿದ್ಯುತ್ ಪೂರೈಕೆ ಮತ್ತು ಜೀವನಮಟ್ಟದ ಮೇಲೆ ಪರಿಣಾಮ ಬೀರಲಿದೆ ಎಂದು ಅವರು ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ. 

ವೇಕ್ ಅಪ್ ಥಾಣೇಕರ್ (WUT) ಎಂಬ ಅಭಿಯಾನದ ಅಡಿಯಲ್ಲಿ ಪ್ರಚಾರ ನಡೆಸುತ್ತಿರುವ ನಿವಾಸಿಗಳು, 53 ಎಕರೆ ಜಾಗದಲ್ಲಿ ನಿರ್ಮಾಣವಾಗುತ್ತಿರುವ ಈ ಸೌಲಭ್ಯವನ್ನು ವಿರೋಧಿಸುತ್ತಿದ್ದಾರೆ.

ಅಮೆಝಾನ್ ಡೇಟಾ ಸರ್ವೀಸಸ್ ಇಂಡಿಯಾ ಅಭಿವೃದ್ಧಿಪಡಿಸುತ್ತಿರುವ ಈ ಡೇಟಾ ಸೆಂಟರ್ ಮುಂಬೈ ಮೆಟ್ರೋಪಾಲಿಟನ್ ಪ್ರದೇಶದ ಅತಿದೊಡ್ಡ ಡೇಟಾ ಸೆಂಟರ್ ಗಳಲ್ಲಿ ಒಂದಾಗುವ ನಿರೀಕ್ಷೆಯಿದೆ. ಇದು ಅಂದಾಜು 47,000 ಕೋಟಿ ರೂ. ಹೂಡಿಕೆಯ ಯೋಜನೆ ಎಂದು ಹೇಳಲಾಗಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿದ ಸ್ಥಳೀಯ ನಿವಾಸಿ ಅನುರಾಧಾ ರೋಡೆ, ಡೇಟಾ ಸೆಂಟರ್ ನಿರ್ಮಾಣದ ಬಗ್ಗೆ ಯಾವುದೇ ಆಕ್ಷೇಪ ಇಲ್ಲ. ಆದರೆ ಅದನ್ನು ಎಲ್ಲಿ ನಿರ್ಮಿಸಲಾಗುತ್ತಿದೆ ಎಂಬುದೇ ನಮ್ಮ ಕಳವಳವಾಗಿದೆ ಎಂದು ತಮ್ಮ ಕಟ್ಟಡದ ಟೆರೇಸ್ನಿಂದ ಉದ್ದೇಶಿತ ಸ್ಥಳವನ್ನು ತೋರಿಸುತ್ತಾ ಹೇಳಿದರು.

"ನಾನು ಡೇಟಾ ಸೆಂಟರ್ ನಿರ್ಮಾಣದ ವಿರುದ್ಧವಿಲ್ಲ. ಆದರೆ ಊರಿನ ಮಧ್ಯದಲ್ಲಿ ಮತ್ತು ನಮ್ಮ ಸುತ್ತಮುತ್ತಲಿನ ಪ್ರದೇಶದಲ್ಲಿ ಅದನ್ನು ಸ್ಥಾಪಿಸುವುದನ್ನು ನಾನು ವಿರೋಧಿಸುತ್ತೇನೆ. ಈ ಕೇಂದ್ರದ ಸುತ್ತಲೂ ಬಹುಮಹಡಿ ಕಟ್ಟಡಗಳು ಮತ್ತು ಮೂರು ಹಳ್ಳಿಗಳಿವೆ. ಶಾಲೆಗಳು, ಆಸ್ಪತ್ರೆಗಳು ಮತ್ತು ಮೆಟ್ರೋದಂತಹ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಗಳಿವೆ. ಹಾಗಾಗಿ, ಈ ಸ್ಥಳವು ಡೇಟಾ ಸೆಂಟರ್ಗೆ ಸೂಕ್ತವಲ್ಲ ಮತ್ತು ಅಪಾಯಕಾರಿಯಾಗಿದೆ," ಎಂದು ಅವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಕಳವಳಗಳಿಗೆ ಉತ್ತರ ಸಿಕ್ಕಿಲ್ಲ :

WUT ಜುಲೈ 18ರಂದು ಮಾನವ-ಸರಪಳಿ ಪ್ರತಿಭಟನೆಯನ್ನು ಆಯೋಜಿಸಿತ್ತು. ಬಳಿಕ ತಮ್ಮ ಕಳವಳಗಳ ಬಗ್ಗೆ ಚರ್ಚಿಸಲು ಅಮೆಝಾನ್ ಅಧಿಕಾರಿಗಳೊಂದಿಗೆ ಸಭೆ ನಡೆಸಿತ್ತು. ಸಭೆಗೂ ಮುನ್ನ ತಾವು ತಜ್ಞರನ್ನು ಸಂಪರ್ಕಿಸಿದ್ದಾಗಿ ನಿವಾಸಿಗಳು ತಿಳಿಸಿದ್ದಾರೆ. ಆದರೆ ತಮ್ಮ ಹಲವು ತಾಂತ್ರಿಕ ಮತ್ತು ಪರಿಸರ ಸಂಬಂಧಿ ಕಳವಳಗಳಿಗೆ ಸಭೆಯಲ್ಲಿ ಉತ್ತರ ಸಿಕ್ಕಿಲ್ಲ ಎಂದು ಅವರು ಆರೋಪಿಸಿದ್ದಾರೆ.

"ನಾವು ಸಭೆಗೆ ಸಿದ್ಧರಾಗಿಯೇ ಹೋಗಿದ್ದೆವು ಮತ್ತು ಈ ಬಗ್ಗೆ ಅನೇಕ ತಜ್ಞರನ್ನು ಸಂಪರ್ಕಿಸಿದ್ದೆವು. ದಟ್ಟವಾದ ಜನವಸತಿ ಪ್ರದೇಶದ ಮಧ್ಯದಲ್ಲಿ ಇಷ್ಟೊಂದು ದೊಡ್ಡ ಡೇಟಾ ಸೆಂಟರ್ ಅನ್ನು ನಿರ್ಮಿಸುತ್ತಿರುವುದು ನಮ್ಮ ಪ್ರಾಥಮಿಕ ಕಳವಳವಾಗಿದೆ. ಆದರೆ ಈ ವಿಚಾರದಲ್ಲಿ ಅವರು ನಮಗೆ ಸಮರ್ಪಕ ಉತ್ತರ ನೀಡುವಲ್ಲಿ ವಿಫಲರಾಗಿದ್ದಾರೆ" ಎಂದು ನಿವಾಸಿ ಮೇಘಾ ಶೆಟ್ಟಿ ಹೇಳಿದರು.

ಡೇಟಾ ಸೆಂಟರ್ ನಿಂದ ಉತ್ಪತ್ತಿಯಾಗುವ ಶಾಖ, ಸುಮಾರು 190 ಡೀಸೆಲ್ ಜನರೇಟರ್ ಸೆಟ್ ಗಳಿಂದ ಬರುವ ಶಬ್ದ, ಹೊಗೆ ಹೊರಸೂಸುವಿಕೆ ಮತ್ತು ವಸತಿ ಪ್ರದೇಶದಲ್ಲಿ ಇಂತಹ ಬೃಹತ್ 'ಹೈಪರ್ಸ್ಕೇಲ್' ಡೇಟಾ ಸೆಂಟರ್ ಕಾರ್ಯನಿರ್ವಹಿಸುವುದರಿಂದ ಒಟ್ಟಾರೆ ಪರಿಸರದ ಮೇಲಾಗುವ ಪರಿಣಾಮಗಳ ಬಗ್ಗೆ ನಿವಾಸಿಗಳು ನಿರ್ದಿಷ್ಟವಾಗಿ ಕಳವಳ ವ್ಯಕ್ತಪಡಿಸಿದ್ದಾರೆ.

ಅಮೆಝಾನ್ ಪ್ರತಿಕ್ರಿಯೆ :

ಈ ನಡುವೆ, ನಿವಾಸಿಗಳು ಎತ್ತಿರುವ ಹಲವಾರು ಪ್ರಶ್ನೆಗಳಿಗೆ ಅಮೆಝಾನ್ ವಿವರವಾದ ಪ್ರತಿಕ್ರಿಯೆಯನ್ನು ಪ್ರಕಟಿಸಿದೆ.

ನೀರಿನ ಬಳಕೆಯ ಬಗ್ಗೆ ಸ್ಪಷ್ಟನೆ ನೀಡಿದ ಕಂಪನಿ, "ಥಾಣೆಯಲ್ಲಿನ ಅಮೆಝಾನ್ ಡೇಟಾ ಸೆಂಟರ್ ಕೂಲಿಂಗ್ಗಾಗಿ (ತಂಪುಗೊಳಿಸಲು) ಯಾವುದೇ ನೀರನ್ನು ಬಳಸುವುದಿಲ್ಲ. ವಾಸ್ತವವಾಗಿ, ನಾವು ಪ್ರಸ್ತುತ ಭಾರತದ ಯಾವುದೇ ಡೇಟಾ ಸೆಂಟರ್ಗಳಲ್ಲಿ ಕೂಲಿಂಗ್ಗಾಗಿ ನೀರನ್ನು ಬಳಸುತ್ತಿಲ್ಲ. ಅಲ್ಲದೆ, ಕೂಲಿಂಗ್ ಉದ್ದೇಶಗಳಿಗಾಗಿ ಸಮುದಾಯದ ಕುಡಿಯುವ ನೀರನ್ನು ನಾವು ಬಳಸಿಕೊಳ್ಳುವುದಿಲ್ಲ" ಎಂದು ಅದು ತಿಳಿಸಿದೆ.

ಈ ಘಟಕಕ್ಕೆ ದಿನಕ್ಕೆ 0.01 ಮಿಲಿಯನ್ ಲೀಟರ್ ನೀರು ಪೂರೈಕೆಗೆ ಅನುಮೋದನೆ ದೊರೆತಿದೆ ಮತ್ತು ಇದು ಕುಡಿಯುವ ನೀರು ಹಾಗೂ ಉದ್ಯೋಗಿಗಳ ಶೌಚಾಲಯಗಳಂತಹ ಕನಿಷ್ಠ ಮಾನವ ಅಗತ್ಯಗಳಿಗಾಗಿ ಮಾತ್ರ ಉದ್ದೇಶಿಸಲಾಗಿದೆ. ಜೊತೆಗೆ, 'ಏರ್-ಕೂಲ್ಡ್ ಚಿಲ್ಲರ್ಗಳು' ಮತ್ತು 'ಕ್ಲೋಸ್ಡ್-ಲೂಪ್ ಕೂಲಿಂಗ್' ತಂತ್ರಜ್ಞಾನವನ್ನು ಈ ಘಟಕ ಬಳಸಲಿದೆ ಎಂದು ಅಮೆಝಾನ್ ಹೇಳಿದೆ.

ತಾಪಮಾನವು ಏರಿಕೆಯ ಭಯ :

ಆದರೆ, ಈ ಕೇಂದ್ರದಿಂದ ಉತ್ಪತ್ತಿಯಾಗುವ ಶಾಖದ ಪ್ರಮಾಣದ ಬಗ್ಗೆ ನಿವಾಸಿಗಳು ಇನ್ನೂ ಆತಂಕದಲ್ಲಿದ್ದಾರೆ. "ಯಂತ್ರಗಳನ್ನು ತಂಪಾಗಿಸಲು ಅವರು ಡೇಟಾ ಸೆಂಟರ್ನಲ್ಲಿ ಸುಮಾರು 80,000 ಹವಾನಿಯಂತ್ರಕಗಳನ್ನು (AC ಗಳನ್ನು) ಬಳಸಲಿದ್ದಾರೆ. ಇದು ಬಲ್ಕುಮ್, ಧೋಕಲಿ ಮತ್ತು ಮಜೀವಾಡ ಪ್ರದೇಶಗಳಲ್ಲಿ ಭಾರಿ ತಾಪಮಾನವನ್ನು ಸೃಷ್ಟಿಸಲಿದೆ. ಪ್ರತಿ ವರ್ಷ ಬೇಸಿಗೆಯಲ್ಲಿ, ಇಲ್ಲಿನ ತಾಪಮಾನವು ಏರಿಕೆಯಾಗುತ್ತಲೇ ಇದೆ" ಎಂದು ನಿವಾಸಿ ಗುರಾಸಿಸ್ ಸಿಂಗ್ ಹೇಳಿದರು.

ಆದರೆ, ಡೇಟಾ ಸೆಂಟರ್ನಿಂದ ಬರುವ ಶಾಖವು ಸುತ್ತಮುತ್ತಲಿನ ಸಮುದಾಯಗಳಲ್ಲಿ ತಾಪಮಾನವನ್ನು ಹೆಚ್ಚಿಸುತ್ತದೆ ಎಂಬ ಕಳವಳವನ್ನು ಅಮೆಝಾನ್ ತಳ್ಳಿಹಾಕಿದೆ.

"ಕೇಂದ್ರದ ವಿನ್ಯಾಸದಲ್ಲಿಯೇ ಶಾಖ ನಿರ್ವಹಣಾ ವ್ಯವಸ್ಥೆಯನ್ನು ಅಳವಡಿಸಲಾಗಿದೆ. ಸರ್ವರ್ಗಳಿಂದ ಉತ್ಪತ್ತಿಯಾಗುವ ಶಾಖವನ್ನು ಕೂಲಿಂಗ್ ಸಿಸ್ಟಮ್ಗಳ ಮೂಲಕ ಬಿಡುಗಡೆ ಮಾಡಲಾಗುತ್ತದೆ ಮತ್ತು ಹತ್ತಿರದ ಪ್ರದೇಶಗಳ ಗಾಳಿಯ ತಾಪಮಾನದ ಮೇಲೆ ಪರಿಣಾಮ ಬೀರದಂತೆ ನೋಡಿಕೊಳ್ಳಲಾಗುತ್ತದೆ" ಎಂದು ಕಂಪನಿ ಸ್ಪಷ್ಟಪಡಿಸಿದೆ.

ವಿದ್ಯುತ್ ಬೇಡಿಕೆ ಮತ್ತು ಕಡಿತದ ಆತಂಕ :

ಯೋಜನೆಗೆ ನಿರೀಕ್ಷಿಸಲಾದ ವಿದ್ಯುತ್ ಬೇಡಿಕೆ ಬಗ್ಗೆ ಕಳವಳ ವ್ಯಕ್ತವಾಗಿದೆ. ಭಾರಿ ಮತ್ತು ನಿರಂತರ ವಿದ್ಯುತ್ ಪೂರೈಕೆಯ ಅಗತ್ಯವಿರುವ ಈ ಘಟಕದಿಂದ, ಆ ಪ್ರದೇಶದ ವಿದ್ಯುತ್ ಮೂಲಸೌಕರ್ಯದ ಮೇಲೆ ಹೆಚ್ಚುವರಿ ಒತ್ತಡ ಬೀಳಬಹುದು ಎಂದು ನಿವಾಸಿಗಳು ಭಯಪಡುತ್ತಿದ್ದಾರೆ.

"ಈ ಘಟಕವು ವಿದ್ಯುತ್ ಗ್ರಿಡ್ನ ಪಕ್ಕದಲ್ಲಿಯೇ ತಲೆ ಎತ್ತುತ್ತಿದೆ. ಹೈಪರ್ಸ್ಕೇಲ್ ಡೇಟಾ ಸೆಂಟರ್ಗೆ 420 MW ನಷ್ಟು ಭಾರಿ ಮತ್ತು ನಿರಂತರ ವಿದ್ಯುತ್ ಪೂರೈಕೆಯ ಅಗತ್ಯವಿದೆ. ಕಳೆದ ಕೆಲವು ತಿಂಗಳುಗಳಲ್ಲಿ ನಾವು ಈಗಾಗಲೇ ಇಲ್ಲಿ ವಿದ್ಯುತ್ ಕಡಿತವನ್ನು ಕಂಡಿದ್ದೇವೆ" ಎಂದು ನಿವಾಸಿ ಜತಿನ್ ಕೊಠಾರೆ ತಿಳಿಸಿದರು.

ಇದಕ್ಕೆ ಉತ್ತರಿಸಿರುವ ಅಮೆಝಾನ್, ಸ್ಥಳೀಯ ಗ್ರಾಹಕರ ವಿದ್ಯುತ್ ಪೂರೈಕೆಗೆ ಇದರಿಂದ ಯಾವುದೇ ತೊಂದರೆಯಾಗುವುದಿಲ್ಲ ಎಂದಿದೆ. ಕಾರ್ಯಸಾಧ್ಯತೆಯ ಮೌಲ್ಯಮಾಪನಗಳ ನಂತರ ಉಪಯುಕ್ತತೆಯ ಸಮನ್ವಯದೊಂದಿಗೆ ಯೋಜಿಸಲಾದ ತನ್ನದೇ ಆದ ಮೀಸಲಾದ 'ಎಕ್ಸ್ಟ್ರಾ-ಹೈ-ವೋಲ್ಟೇಜ್ ಸಬ್ಸ್ಟೇಷನ್' ಮೂಲಕ ಥಾಣೆ ಘಟಕವು ವಿದ್ಯುತ್ ಪಡೆಯಲಿದೆ.

"ಇದು ನಿವಾಸಿಗಳು ಮತ್ತು ವಾಣಿಜ್ಯ ಗ್ರಾಹಕರಿಗೆ ಸೇವೆ ಸಲ್ಲಿಸುವ ಸ್ಥಳೀಯ ವಿತರಣಾ ಗ್ರಿಡ್ನಿಂದ ವಿದ್ಯುತ್ ಪಡೆಯುವುದಿಲ್ಲ ಅಥವಾ ಬಳಸಿಕೊಳ್ಳುವುದಿಲ್ಲ" ಎಂದು ಕಂಪನಿ ಸ್ಪಷ್ಟಪಡಿಸಿದೆ.

ಇನ್ನು ಶಬ್ದ ಮಾಲಿನ್ಯದ ಬಗ್ಗೆ ಎದುರಾಗಿರುವ ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸಿರುವ ಅಮೆಝಾನ್, ಈ ಡೇಟಾ ಸೆಂಟರ್ 'ಶಬ್ದ ಮಾಲಿನ್ಯ (ನಿಯಂತ್ರಣ) ನಿಯಮಗಳು, 2000' ರ ಅಡಿಯಲ್ಲಿ ಕಾನೂನುಬದ್ಧ ಶಬ್ದ ಮಿತಿಗಳನ್ನು ಕಟ್ಟುನಿಟ್ಟಾಗಿ ಅನುಸರಿಸುತ್ತದೆ ಎಂದು ಹೇಳಿದೆ. ಶಬ್ದವನ್ನು ತಗ್ಗಿಸುವ ಕಟ್ಟಡ ಸಾಮಗ್ರಿಗಳು ಮತ್ತು ಆಯಕಟ್ಟಿನ ಸಲಕರಣೆಗಳ ನಿಯೋಜನೆ, ಅಕೌಸ್ಟಿಕ್ ಎನ್ಕ್ಲೋಸರ್ಗಳು ಮತ್ತು ಅಗತ್ಯವಿದ್ದೆಡೆ ಮಫ್ಲರ್ಗಳನ್ನು ಈ ಸೌಲಭ್ಯವು ಅಳವಡಿಸಿಕೊಳ್ಳಲಿದೆ ಎಂದು ಅದು ತಿಳಿಸಿದೆ.

ಯೋಜನೆಯ ಅನುಮತಿಗಳ ಬಗ್ಗೆ ನಿವಾಸಿಗಳ ಪ್ರಶ್ನೆ :

ಈ ಯೋಜನೆಗೆ ಅನುಮೋದನೆ ನೀಡಿರುವ ಸರ್ಕಾರಿ ನೀತಿಗಳು ಮತ್ತು ಚೌಕಟ್ಟನ್ನು ನಿವಾಸಿಗಳು ಪ್ರಶ್ನಿಸಿದ್ದಾರೆ. ಸುತ್ತಮುತ್ತಲಿನ ವಸತಿ ಪ್ರದೇಶಗಳ ಮೇಲಾಗುವ ಸಂಭಾವ್ಯ ಪರಿಣಾಮಗಳನ್ನು ಸೂಕ್ಷ್ಮವಾಗಿ ಮೌಲ್ಯಮಾಪನ ಮಾಡಬೇಕಿತ್ತು ಎಂದು ಅವರು ವಾದಿಸಿದ್ದಾರೆ.

"ನಾವು ಸರ್ಕಾರದ ವಿರುದ್ಧವಲ್ಲ, ಆದರೆ ಈ ಯೋಜನೆಗೆ ಅನುಮತಿ ನೀಡಿದವರು ಸಾವಿರಾರು ನಿವಾಸಿಗಳ ಮೇಲೆ ಈ ಕೇಂದ್ರ ಬೀರಬಹುದಾದ ಪರಿಣಾಮಗಳನ್ನು ನಿರ್ಣಯಿಸಲು ಸ್ಥಳಕ್ಕೆ ಭೇಟಿಯಾಗಿಲ್ಲ" ಎಂದು ಸ್ಥಳೀಯರು ಆರೋಪಿಸಿದ್ದಾರೆ.

ಈ ಯೋಜನೆಯ ವಿಚಾರದಲ್ಲಿ ಅಧಿಕಾರಿಗಳು ತಮ್ಮನ್ನು ಕೈಬಿಟ್ಟಿದ್ದಾರೆ ಎಂದು ನಿವಾಸಿಗಳಿಗೆ ಅನಿಸುತ್ತಿದೆ ಎಂದು ಕೊಠಾರೆ ಹೇಳಿದರು.

"ಸರ್ಕಾರ ನಮಗೆ ಒಳ್ಳೆಯದನ್ನು ಮಾಡುತ್ತದೆ ಎಂದು ನಾವು ನಂಬಿದ್ದೆವು. ಆದರೆ ಅವರು ವಿಫಲರಾಗಿದ್ದಾರೆ. ಡೆವಲಪರ್ ಒಬ್ಬರು ಅಮೆಝಾನ್ಗೆ ಈ ಭೂಮಿಯನ್ನು ಮಾರಾಟ ಮಾಡಿದ ರೀತಿ ಮತ್ತು ನಂತರದ ITES ನೀತಿಯು, ವಸತಿ ಪ್ರದೇಶಗಳಲ್ಲಿ ಇಂತಹ ಕೇಂದ್ರಗಳ ಸ್ಥಾಪನೆಯ ಬಗ್ಗೆ ಮೌನವಾಗಿರುವುದು ಇದಕ್ಕೆ ಸಾಕ್ಷಿಯಾಗಿದೆ" ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದರು.