ಕಾರ್ಖಾನೆಯೊಂದು ಕಸದ ರಾಶಿಗೆ ಎಸೆದ ಅವಧಿ ಮೀರಿದ ಚಾಕೊಲೇಟ್ ಗೆ ಮುಗಿಬಿದ್ದ ಜನರು!

ಲಕ್ನೋ: ಕಾರ್ಖಾನೆಯೊಂದು ಎಸೆದಿದೆ ಎನ್ನಲಾದ ಅವಧಿ ಮೀರಿದ (ಎಕ್ಸ್ಪೈರ್ಡ್) ಚಾಕೊಲೇಟ್ ಮತ್ತು ಟಾಫಿಗಳನ್ನು ಸಂಗ್ರಹಿಸಲು ಭಾರೀ ಜನಸಮೂಹ ಮುಗಿಬಿದ್ದಿರುವುದು ಕಂಡುಬರುವ ವೈರಲ್‌ ವೀಡಿಯೋ ಕಾನ್ಪುರದ ಪಂಕಿ ಕೈಗಾರಿಕಾ ಪ್ರದೇಶದಿಂದ ಬೆಳಕಿಗೆ ಬಂದಿದೆ. ಈ ಘಟನೆಯು ಆಹಾರ ಸುರಕ್ಷತೆ ಮತ್ತು ಅವಧಿ ಮೀರಿದ ಆಹಾರ ಪದಾರ್ಥಗಳ ಅಸಮರ್ಪಕ ವಿಲೇವಾರಿಯ ಬಗ್ಗೆ ಆತಂಕ ಮೂಡಿಸಿದೆ.  

ಆದರೆ, ಅಧಿಕಾರಿಗಳು ಈ ವಿವರಗಳನ್ನು ಇನ್ನೂ ಸ್ವತಂತ್ರವಾಗಿ ದೃಢಪಡಿಸಿಲ್ಲ ಎಂದು ತಿಳಿದುಬಂದಿದೆ.

ಕಸದ ರಾಶಿಯಿಂದ ಜನರು ಅವಧಿ ಮೀರಿದ ಚಾಕೊಲೇಟ್ಗಳನ್ನು ಆಯ್ದುಕೊಳ್ಳುತ್ತಿರುವ ಕಾನ್ಪುರದ ವೈರಲ್ ವಿಡಿಯೋದಲ್ಲಿ ಜನರು ಬೆಲೆಬಾಳುವ ವಸ್ತುವಿಗಾಗಿ ಮುಗಿಬಿದ್ದಂತೆ ಕಂಡುಬರುತ್ತದೆ. ಆದರೆ ಅವಧಿ ಮೀರಿದ ಚಾಕೊಲೇಟ್ ಮತ್ತು ಟಾಫಿಗಳನ್ನು ಕಲೆಹಾಕಲು ಜನರು ಸೇರಿದ್ದಾರೆ ಎಂದು ಸಾಮಾಜಿಕ ಮಾಧ್ಯಮದಲ್ಲಿ ಜನರು ಬರೆದುಕೊಂಡಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ದೃಶ್ಯಾವಳಿಗಳಲ್ಲಿ, ಅಲ್ಲಿ ಯಾವುದೋ ಸಿಹಿ ಪದಾರ್ಥ ಬಿದ್ದಿದೆ ಎಂಬ ಸುದ್ದಿ ಹರಡುತ್ತಿದ್ದಂತೆ ಡಜನ್ಗಟ್ಟಲೆ ಜನರು ಆ ಸ್ಥಳಕ್ಕೆ ಧಾವಿಸುವುದು ಕಂಡುಬಂದಿದೆ. ಕೆಲವರು ನೆಲದ ಮೇಲಿಂದಲೇ ಕೈತುಂಬಾ ಸಿಹಿತಿಂಡಿಗಳನ್ನು ಆರಿಸಿಕೊಳ್ಳುತ್ತಿದ್ದರೆ, ಇನ್ನು ಕೆಲವರು ಚೀಲಗಳು, ಗೋಣಿಚೀಲಗಳು ಮತ್ತು ಖಾಲಿ ಪಾತ್ರೆಗಳನ್ನು ತಂದು ತಮಗೆ ಸಾಧ್ಯವಾದಷ್ಟು ಹೆಚ್ಚು ಚಾಕೊಲೇಟ್ಗಳನ್ನು ಮನೆಗೆ ಒಯ್ಯಲು ಮುಂದಾಗಿದ್ದಾರೆ.

ವಿಡಿಯೋದೊಂದಿಗೆ ಲಗತ್ತಿಸಲಾದ ಮಾಹಿತಿಯ ಪ್ರಕಾರ, ಚಾಕೊಲೇಟ್ ಮತ್ತು ಟಾಫಿಗಳ ಬ್ಯಾಚ್ನ ಅವಧಿ ಮುಗಿದ ಕಾರಣ ಅಥವಾ ಮಾರಾಟಕ್ಕೆ ಯೋಗ್ಯವಲ್ಲ ಎಂದು ಪರಿಗಣಿಸಿದ ನಂತರ ಕಾರ್ಖಾನೆಯ ಮಾಲೀಕರು ಅವುಗಳನ್ನು ಕಸಕ್ಕೆ ಎಸೆದಿದ್ದಾರೆ. ಆ ಸುದ್ದಿ ಸುತ್ತಮುತ್ತಲಿನ ಪ್ರದೇಶದಲ್ಲಿ ಹರಡುತ್ತಿದ್ದಂತೆ, ಜನರು ಸ್ಥಳಕ್ಕೆ ಧಾವಿಸಿ ಕಸದ ರಾಶಿಯಲ್ಲಿದ್ದ ಸಿಹಿ ಪದಾರ್ಥಗಳನ್ನೆಲ್ಲಾ ಆಯ್ದುಕೊಳ್ಳಲು ಪ್ರಾರಂಭಿಸಿದರು. 

ಅವಧಿ ಮೀರಿದ ಆಹಾರದ ವಿಲೇವಾರಿ ಹೇಗೆ ನಡೆಯುತ್ತದೆ?

ಈ ಘಟನೆಯು ಅವಧಿ ಮೀರಿದ ಅಥವಾ ಮಾರಾಟಕ್ಕೆ ಯೋಗ್ಯವಲ್ಲದ ಆಹಾರ ಉತ್ಪನ್ನಗಳ ವಿಲೇವಾರಿ ವಿಧಾನದ ಬಗ್ಗೆ ಚರ್ಚೆಯನ್ನು ಮತ್ತೆ ಮುನ್ನೆಲೆಗೆ ತಂದಿದೆ. ಇಂತಹ ವಸ್ತುಗಳು ಯಾರ ಕೈಗೂ ಸಿಗದಂತೆ ನಿಯಂತ್ರಿತ ಹಾಗೂ ಸೂಕ್ತ ಪ್ರಕ್ರಿಯೆಯ ಮೂಲಕ ನಾಶಪಡಿಸಬೇಕು ಎಂದು ಆಹಾರ ಸುರಕ್ಷತಾ ತಜ್ಞರು ಅಭಿಪ್ರಾಯಪಡುತ್ತಾರೆ.

ಸದ್ಯಕ್ಕೆ, ಆ ಚಾಕೊಲೇಟ್ಗಳು ಯಾವಾಗ ಅಥವಾ ಹೇಗೆ ಆ ಸ್ಥಳಕ್ಕೆ ಬಂದವು ಎಂಬುದರ ಕುರಿತು ಯಾವುದೇ ಸ್ವತಂತ್ರ ದೃಢೀಕರಣವಿಲ್ಲ. ಸ್ಥಳೀಯ ಅಧಿಕಾರಿಗಳಾಗಲಿ ಅಥವಾ ಆಹಾರ ಸುರಕ್ಷತಾ ಇಲಾಖೆಯಾಗಲಿ ಈ ವಿಷಯದ ಬಗ್ಗೆ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ.

Piyush Rai

@Benarasiyaa

·

Follow

Visuals from UP's Kanpur where commuters scramble to collect expired toffees and chocolates dumbed in garbage heap.