ನದಿ ದಂಡೆಯಲ್ಲಿ ತ್ಯಾಜ್ಯ ಎಸೆತ: ಕುಂಬಳೆ ಪಂಚಾಯತಿ ಮತ್ತು ಆರೋಗ್ಯ ಇಲಾಖೆಯಿಂದ ಕ್ರಮ

ಕುಂಬಳೆ: ಮೊಗ್ರಾಲ್ ನದಿ ದಂಡೆಯಲ್ಲಿರುವ ಮ್ಯಾಂಗ್ರೋವ್ ಕಾಡುಗಳು ಮತ್ತು ಜಲಮೂಲಗಳಲ್ಲಿ ರಾತ್ರಿಯ ಮರೆಯಲ್ಲಿ ತ್ಯಾಜ್ಯವನ್ನು ವ್ಯಾಪಕವಾಗಿ ಸುರಿಯಲಾಗುತ್ತಿದೆ ಮತ್ತು ಮೊಗ್ರಾಲ್ ನದಿ ದಂಡೆಯಲ್ಲಿ ತ್ಯಾಜ್ಯವನ್ನು ಸುರಿದು ಸುಡಲಾಗುತ್ತಿದೆ ಎಂದು ಆರೋಪಿಸಿ ಕೊಪ್ಪಳ ಫ್ರೆಂಡ್ಸ್ ಕ್ಲಬ್ ಸಲ್ಲಿಸಿದ ದೂರಿನ ಮೇರೆಗೆ, ಜಿಲ್ಲಾಧಿಕಾರಿ ಅರ್ಜುನ್ ಪಾಂಡಿಯನ್ ಅವರು ಕುಂಬಳೆ ಪಂಚಾಯತಿ ಮತ್ತು ಆರೋಗ್ಯ ಇಲಾಖೆ ಅಧಿಕಾರಿಗಳಿಗೆ ಪರಿಶೀಲನೆ ನಡೆಸಿ ಕ್ರಮ ಕೈಗೊಳ್ಳುವಂತೆ ಸೂಚಿಸಿದ್ದರು.

ತಪಾಸಣೆ ಮತ್ತು ಕಠಿಣ ದಂಡ ಎಚ್ಚರಿಕೆ:

ಇದರ ಆಧಾರದ ಮೇಲೆ, ಕುಂಬಳೆ ಗ್ರಾಮ ಪಂಚಾಯತಿ-ಆರೋಗ್ಯ ಇಲಾಖೆ ವಿಭಾಗವು ಎಚ್.ಐ.(ಹೆಲ್ತ್ ಇನ್ಸೆಪ್ಟರ್-ಆರೋಗ್ಯ ಪರಿವೀಕ್ಷಕಿ) ಸೌಮ್ಯ ಅವರ ನೇತೃತ್ವದಲ್ಲಿ ಸ್ಥಳಕ್ಕೆ ಭೇಟಿ ನೀಡಿತು. ನದಿ ದಂಡೆಯಲ್ಲಿ ಪ್ಲಾಸ್ಟಿಕ್ ಕವರ್‍ಗಳಲ್ಲಿ ಸುರಿಯಲಾಗಿದ್ದ ತ್ಯಾಜ್ಯವನ್ನು ಹಸಿರು ಕ್ರಿಯಾಸೇನೆಯ ಸದಸ್ಯರು ಪರಿಶೀಲಿಸಿದರು.

ಕ್ಲಬ್ ಪ್ರತಿನಿಧಿ ಜಲೀಲ್ ಕೊಪ್ಪಳ ಅವರೊಂದಿಗೆ ಇದ್ದರು. ಜಿಲ್ಲಾಧಿಕಾರಿಗಳಿಗೆ ವಿವರವಾದ ವರದಿಯನ್ನು ಸಲ್ಲಿಸಲಾಗುವುದು ಮತ್ತು ತ್ಯಾಜ್ಯ ಎಸೆಯುವವರ ವಿರುದ್ಧ 25,000 ರೂ.ಗಿಂತ ಕಡಿಮೆಯಿಲ್ಲದ ದಂಡ ಸೇರಿದಂತೆ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್.ಐ. ಸೌಮ್ಯ ಹೇಳಿದರು. ಕೇರಳ ಪಂಚಾಯತಿ ರಾಜ್ ಕಾಯ್ದೆಯ ಪ್ರಕಾರ ಸಾರ್ವಜನಿಕ ಸ್ಥಳಗಳಲ್ಲಿ ತ್ಯಾಜ್ಯ ಎಸೆಯುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲು ಆಡಳಿತ ನಿರ್ಧರಿಸಿದೆ.

ಆರೋಗ್ಯ ಬೆದರಿಕೆ ಮತ್ತು ರೋಗ ಅಪಾಯ:

ಜಲಮೂಲಗಳಿಗೆ ತ್ಯಾಜ್ಯವನ್ನು ಎಸೆಯುವುದು ಮತ್ತು ಉರಿಸುವುದು ಗಂಭೀರ ಅಪರಾಧ. ಇದು ನದಿಗೆ ಸಂಬಂಧಿಸಿದಂತೆ ಕೆಲಸ ಮಾಡುವವರು ಸೇರಿದಂತೆ ಚರ್ಮ ರೋಗಗಳಿಗೆ ಕಾರಣವಾಗಬಹುದು. ಡೈಪರ್‍ಗಳನ್ನು ಹೊಂದಿರುವ ತ್ಯಾಜ್ಯವನ್ನು ಜಲಮೂಲಗಳಿಗೆ ಎಸೆಯುವುದರಿಂದ ಕಾಮಾಲೆಯಂತಹ ಗಂಭೀರ ಆರೋಗ್ಯ ಸಮಸ್ಯೆಗಳು ಉಂಟಾಗಬಹುದು ಎಂದು ಆರೋಗ್ಯ ಇಲಾಖೆ ಅಧಿಕಾರಿಗಳು ಹೇಳುತ್ತಾರೆ.

ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಲು ಬೇಡಿಕೆ: 

ಈ ಹಿಂದೆ, ಕೊಪ್ಪಳ ಪ್ರೆಂಡ್ಸ್ ಕ್ಲಬ್ ಕುಂಬಳೆ ಗ್ರಾಮ ಪಂಚಾಯತಿ ಅಧಿಕೃತರನ್ನು ಕಸ ಎಸೆಯುವ ವಿರುದ್ಧ ಕ್ರಮದ ಭಾಗವಾಗಿ ನದಿ ದಂಡೆಯಲ್ಲಿ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸುವಂತೆ ವಿನಂತಿಸಿತ್ತು. ಸಾರ್ವಜನಿಕ ಸ್ಥಳಗಳಲ್ಲಿ ಕಸ ಎಸೆಯುವವರನ್ನು ಹಿಡಿಯಲು ಕೆಲವು ದಿನಗಳ ಹಿಂದೆ ಬದಿಯಡ್ಕದಲ್ಲಿ ಕ್ಯಾಮೆರಾಗಳನ್ನು ಅಳವಡಿಸಲಾಗಿತ್ತು. ಈ ಮಾದರಿಯಲ್ಲೇ ಹಲವೆಡೆ ಕ್ಯಾಮರಾ ಅಳವಡಿಸಲು ಬೇಡಿಕೆ ಹೆಚ್ಚುತ್ತಿದೆ.