IT ಉದ್ಯೋಗಿಗಳ ಗೌಪ್ಯತೆಗೆ ಕನ್ನ; ಲ್ಯಾಪ್ಟಾಪ್ ಗಳಲ್ಲಿ ಟ್ರ್ಯಾಕ್ ಮಾಡುವ ಟೂಲ್ ಅಳವಡಿಸಿದ TCS

 ಕಂಪೆನಿಯ ಲ್ಯಾಪ್ಟಾಪ್ ಗಳಲ್ಲಿ ಆಗುತ್ತಿರುವ ಚಟುವಟಿಕೆಗಳ ಬಗ್ಗೆ ಹೆಚ್ಚಿನ ಗೋಚರತೆ ನೀಡುವ ಸಾಫ್ಟ್ವೇರ್ ಅನ್ನು TCS ಪರಿಚಯಿಸಿದೆ.

ಹೀಗಾಗಿ ಕಂಪೆನಿಯ ಡೇಟಾವನ್ನು ರಕ್ಷಿಸುವುದು ಮತ್ತು ಉದ್ಯೋಗಿಗಳನ್ನು ಮೇಲ್ವಿಚಾರಣೆ ಮಾಡುವ ನಡುವೆ ಇರುವ ಸಣ್ಣ ಅಂತರವನ್ನು ತೆಗೆದುಹಾಕುತ್ತಿರುವ ಬಗ್ಗೆ, ಉದ್ಯೋಗಿಗಳನ್ನು ಮೇಲ್ವಿಚಾರಣೆ ಮಾಡುತ್ತಿರುವುದು ಸರಿಯೇ ಎಂದು ಕಂಪೆನಿಯ ನಡವಳಿಕೆಯ ಮೇಲೆ ಪ್ರಶ್ನೆಗಳು ಎದ್ದಿವೆ.

ಡಿಜಿಟಲ್ ಯೂಸರ್ ಎಕ್ಸ್ಪೀರಿಯನ್ಸ್ ಮಾನಿಟರಿಂಗ್ ಟೂಲ್ (ಡಿಜಿಟಲ್ ಬಳಕೆದಾರ ಅನುಭವ ಮೇಲ್ವಿಚಾರಣಾ ಸಾಧನ) ಎಂದು ವಿವರಿಸಲಾಗಿರುವ ಸಾಫ್ಟ್ವೇರ್ ಅನ್ನು TCS ಉದ್ಯೋಗಿಗಳಿಗೆ ಒದಗಿಸಲಾದ ಲ್ಯಾಪ್ಟಾಪ್ ಗಳಲ್ಲಿ ಸ್ಥಾಪಿಸಲಾಗಿದೆ ಎಂದು ವರದಿಯಾಗಿದೆ. ಲ್ಯಾಪ್ಟಾಪ್ ನಲ್ಲಿ ಯಾವ ಅಪ್ಲಿಕೇಶನ್ ಗಳನ್ನು ಬಳಸಲಾಗುತ್ತಿದೆ ಮತ್ತು ಅವುಗಳಿಗೆ ಎಷ್ಟು ಸಮಯವನ್ನು ವ್ಯಯಿಸಲಾಗುತ್ತಿದೆ ಎನ್ನುವ ವಿವರವನ್ನು ಈ ಸಾಫ್ಟ್ವೇರ್ ನೀಡುತ್ತದೆ!

ಆದರೆ ಲ್ಯಾಪ್ಟಾಪ್ ಗಳಲ್ಲಿ ಉದ್ಯೋಗಿ ಚಟುವಟಿಕೆಯನ್ನು ಟ್ರ್ಯಾಕ್ ಮಾಡಲಾಗುತ್ತಿದೆ ಎನ್ನುವುದನ್ನು TCS ನಿರಾಕರಿಸಿದೆ. "ನೌಕರರ ಕಣ್ಗಾವಲಿಗೆ ಸಂಬಂಧಿಸಿದ ವರದಿಗಳು ಆಧಾರರಹಿತ ಮತ್ತು ನಿಖರವಾಗಿಲ್ಲ. TCS ಲ್ಯಾಪ್ಟಾಪ್ ಗಳಲ್ಲಿ ವೈಯಕ್ತಿಕ ಉದ್ಯೋಗಿ ಚಟುವಟಿಕೆಗಳನ್ನು ಟ್ರ್ಯಾಕ್ ಮಾಡಲಾಗುತ್ತಿಲ್ಲ. ಅವರ ಗೌಪ್ಯತೆಯ ಹಕ್ಕನ್ನು ಗೌರವಿಸಲಾಗುತ್ತದೆ. ನಮ್ಮ ಉದ್ಯೋಗಿಗಳ ಸುರಕ್ಷತೆ, ಲಭ್ಯತೆ ಮತ್ತು ಉದ್ಯೋಗಿಗಳಿಗೆ ಉತ್ತಮ ಬಳಕೆದಾರ ಅನುಭವ ಸಿಗುವಂತೆ ಮಾಡಲು ನಾವು ಮ್ಯಾಕ್ರೋ ಮಟ್ಟದ ನೆಟ್ವರ್ಕ್ ಕಾರ್ಯಕ್ಷಮತೆಯನ್ನು ಮೇಲ್ವಿಚಾರಣೆ ಮಾಡಲು ಕೆಲವು ಟೂಲ್ಗಳನ್ನು ಬಳಸುತ್ತಿದ್ದೇವೆ" ಎಂದು TCS ಸ್ಪಷ್ಟನೆ ನೀಡಿರುವುದಾಗಿ ವರದಿಯಾಗಿದೆ.

TCS ಇದೀಗ ಸ್ಪಷ್ಟನೆ ನೀಡಿದ್ದರೂ, ಮೇಲ್ವಿಚಾರಣೆಯ ನಿಖರವಾದ ಉದ್ದೇಶ ಮತ್ತು ವ್ಯಾಪ್ತಿ ಸ್ಪಷ್ಟವಾಗಿಲ್ಲ. ಕಂಪೆನಿಗಳು ಅಸಹಜವಾದ ಚಟುವಟಿಕೆಗಳನ್ನು ಗುರುತಿಸಿದಲ್ಲಿ, ಭದ್ರತಾ ಅಪಾಯ ಪತ್ತೆಯಾದಲ್ಲಿ ಮತ್ತು ರಹಸ್ಯ ಮಾಹಿತಿಗಳು ಕಾರ್ಪೊರೇಟ್ ಸಿಸ್ಟಂಗಳಿಂದ ಹೊರಹೋಗುವುದನ್ನು ತಡೆಯುವ ಸಂದರ್ಭಗಳಲ್ಲಿ ಅಂತಹ ಸಾಧನಗಳನ್ನು ಬಳಸಬಹುದಾಗಿದೆ. ಆದರೆ ಅದೇ ಸಮಯದಲ್ಲಿ ಉದ್ಯೋಗಿಗಳು ತಮ್ಮ ಸಾಧನಗಳನ್ನು ಹೇಗೆ ಬಳಸುತ್ತಿದ್ದಾರೆ ಎನ್ನುವ ಕುರಿತ ವಿವರವಾದ ಮಾಹಿತಿಗೆ ಪ್ರವೇಶ ಪಡೆಯುವುದು ಕಾರ್ಯಸ್ಥಳದಲ್ಲಿ ಕಣ್ಗಾವಲಿನ ಕಳವಳಗಳಿಗೂ ಕಾರಣವಾಗಲಿದೆ.

TCS ಈವರೆಗೆ ಸಾರ್ವಜನಿಕವಾಗಿ ಸಾಫ್ಟ್ವೇರ್ ನಿಯೋಜನೆ ಬಗ್ಗೆ ವಿವರಿಸಿಲ್ಲ. ಕಂಪೆನಿಯು ಸಾಫ್ಟ್ವೇರ್ ಪೂರೈಕೆದಾರರ ಗುರುತು, ಸಂಗ್ರಹಿಸಲಾಗುವ ಮಾಹಿತಿಯ ವರ್ಗಗಳು ಅಥವಾ ಸಂಗ್ರಹಿಸಿದ ಡೇಟಾವನ್ನು ಯಾವ ತಂಡಗಳು ಅಥವಾ ಅಧಿಕಾರಿಗಳು ವೀಕ್ಷಿಸಬಹುದು ಎಂಬುದನ್ನು ತಿಳಿಸಿಲ್ಲ. ಈ ನಿಟ್ಟಿನಲ್ಲಿ ಸ್ಪಷ್ಟತೆ ಮುಖ್ಯವಾಗುತ್ತದೆ.

ಏಕೆಂದರೆ ಉದ್ಯೋಗಿ-ಮೇಲ್ವಿಚಾರಣೆ ವ್ಯವಸ್ಥೆಗಳು ಮೂಲಭೂತ ಭದ್ರತಾ ಪರಿಶೀಲನೆಗಳನ್ನು ಮೀರಿದ ಸಾಮರ್ಥ್ಯ ಹೊಂದಿರಬಹುದು. ಮುಖ್ಯವಾಗಿ TCS ನಿಯೋಜಿಸಿರುವ ಸಾಫ್ಟ್ವೇರ್ ಅಪ್ಲಿಕೇಶನ್ ಮಟ್ಟದ ಮಾಹಿತಿಗೆ ಸೀಮಿತವಾಗಿದೆಯೇ ಅಥವಾ ಉದ್ಯೋಗಿ ಚಟುವಟಿಕೆಯ ಬಗ್ಗೆ ಉತ್ತಮ ಒಳನೋಟವನ್ನು ಒದಗಿಸುತ್ತದೆಯೇ ಎನ್ನುವುದು ತಿಳಿದಿಲ್ಲ.

ಉದ್ಯೋಗಿಗಳ ಮೇಲೆ ಕಣ್ಗಾವಲು ಇದೇ ಮೊದಲಲ್ಲ. IT ಮತ್ತು ಬ್ಯುಸಿನೆಸ್ ಪ್ರೊಸೆಸ್ ಮ್ಯಾನೇಜ್ಮೆಂಟ್ ಉದ್ಯಮಗಳಲ್ಲಿ ಮುಖ್ಯವಾಗಿ ಇಂತಹ ಕಣ್ಗಾವಲು ನಡೆಯುತ್ತಿರುವ ಬಗ್ಗೆ ಚರ್ಚೆಗಳು ಹುಟ್ಟಿವೆ. ಉದಾಹರಣೆಗೆ, ಮೆಟಾ ಇತ್ತೀಚೆಗೆ AI ಅಭಿವೃದ್ಧಿಗಾಗಿ ಡೇಟಾ ಸಂಗ್ರಹಿಸುವ ಯೋಜನೆಯ ಭಾಗವಾಗಿ ನೌಕರರ ಕೀಸ್ಟ್ರೋಕ್ಗಳು ಮತ್ತು ಮೌಸ್ ಚಟುವಟಿಕೆಯನ್ನು ಲಾಗ್ ಮಾಡಬಹುದಾದ ಸಾಧನವನ್ನು ಪರಿಚಯಿಸಿದ ನಂತರ ಟೀಕೆಗಳನ್ನು ಎದುರಿಸಿತ್ತು. ನಂತರ ಮೆಟಾ ಇದರ ಮೇಲೆ ನಿಯಂತ್ರಣಗಳನ್ನು ಪರಿಚಯಿಸಿತ್ತು. ಉದ್ಯೋಗಿಗಳು 30 ನಿಮಿಷಗಳ ಕಾಲ ಡೇಟಾ ಸಂಗ್ರಹಣೆಗೆ ವಿರಾಮ ಕೊಡಬಹುದು ಮತ್ತು ವಿನಾಯಿತಿ ಕೋರಬಹುದು. ಸೂಕ್ಷ್ಮ ಮಾಹಿತಿ ಸೋರಿಕೆಯಾಗದಂತೆ ರಕ್ಷಿಸಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಮೆಟಾ ಸ್ಪಷ್ಟನೆ ನೀಡಿತ್ತು.

AI ಪರಿಚಯಿಸಿದ ನಂತರ ಇಂತಹ ಕಣ್ಗಾವಲು ಮತ್ತು ಗೌಪ್ಯತೆಯ ಕಳವಳಗಳ ಚರ್ಚೆಯನ್ನು ವ್ಯಾಪಕವಾಗಿ ಹುಟ್ಟುಹಾಕಿದೆ. ಕಂಪೆನಿಗಳು ಈ ಹಿಂದೆ ದುಷ್ಕೃತ್ಯ ಅಥವಾ ಕೆಲಸ ಮಾಡದ ಚಟುವಟಿಕೆ ಗಮನಿಸಲು ಕಂಪ್ಯೂಟರ್ ಲಾಗಿಂಗ್ ಮತ್ತು ಸ್ಕ್ರೀನ್ಶಾಟ್ ಗಳನ್ನು ಬಳಸುತ್ತಿದ್ದವು. ಇದೀಗ ಕೀಸ್ಟ್ರೋಕ್ ಮಾನಿಟರಿಂಗ್ ಕಣ್ಗಾವಲನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ಯುತ್ತಿದೆ ಎಂದು ಕಾನೂನು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.