ಅಂತಾರಾಷ್ಟ್ರೀಯ ಪ್ರವಾಸೋದ್ಯಮ ನಕ್ಷೆಯಲ್ಲಿದ್ದರೂ ನಿರ್ಲಕ್ಷ್ಯ; ಅಭಿವೃದ್ಧಿಯಿಲ್ಲದೆ ಸಂಕಷ್ಟದಲ್ಲಿ ಬೇಕಲ ಕೋಟೆ ರೈಲು ನಿಲ್ದಾಣ

ಕಾಸರಗೋಡು: ಅಂತರರಾಷ್ಟ್ರೀಯ ಪ್ರವಾಸೋದ್ಯಮ ನಕ್ಷೆಯಲ್ಲಿ ಗುರುತಿಸಿರುವ ಪ್ರದೇಶದಲ್ಲಿನ ರೈಲು ನಿಲ್ದಾಣವನ್ನು ತೀವ್ರವಾಗಿ ನಿರ್ಲಕ್ಷಿಸಲಾಗಿದೆ. ಪ್ರತಿದಿನ 500ಕ್ಕೂ ಮಿಕ್ಕಿದ ಜನರು ಭೇಟಿ ನೀಡುವ ಬೇಕಲ ಕೋಟೆ ರೈಲು ನಿಲ್ದಾಣದಲ್ಲಿ ಅಭಿವೃದ್ಧಿ ಕುಂಠಿತಗೊಳ್ಳುತ್ತಲೇ ಇದೆ. ಮಂಗಳೂರು ಮತ್ತು ದಕ್ಷಿಣಕ್ಕೆ ಹೋಗುವ ಮತ್ತು ಹೊರಡುವ 10 ರೈಲುಗಳು ಮಾತ್ರ ಪ್ರಸ್ತುತ ಇಲ್ಲಿ ನಿಲುಗಡೆ ಹೊಂದಿವೆ. 

ಬೆಳಿಗ್ಗೆ ಮತ್ತು ಸಂಜೆ ಮಲಬಾರ್ ಎಕ್ಸ್‍ಪ್ರೆಸ್, ಮಂಗಳೂರು ಎಕ್ಸ್‍ಪ್ರೆಸ್, ಚೆನ್ನೈ ಎಗ್ಮೋರ್ - ಮಂಗಳೂರು ಎಕ್ಸ್‍ಪ್ರೆಸ್, ಮಂಗಳೂರು ಸೆಂಟ್ರಲ್-ಕೋಝಿಕ್ಕೋಡ್-ಪಾಲಕ್ಕಾಡ್ ಎಕ್ಸ್‍ಪ್ರೆಸ್, ಚೆರ್ವತ್ತೂರು-ಮಂಗಳೂರು ಸೆಂಟ್ರಲ್ ಪ್ಯಾಸೆಂಜರ್, ಕಣ್ಣೂರು - ಮಂಗಳೂರು ಪ್ಯಾಸೆಂಜರ್ ರೈಲುಗಳು ಇಲ್ಲಿ ನಿಲುಗಡೆ ಹೊಂದಿದೆ.

ದೂರ ಪ್ರಯಾಣದ ರೈಲುಗಳಿಗೆ ಇಲ್ಲ ನಿಲುಗಡೆ: 

ಅಂತರರಾಷ್ಟ್ರೀಯ ಪ್ರವಾಸೋದ್ಯಮ ನಕ್ಷೆಯಲ್ಲಿ ತನ್ನ ಛಾಪು ಮೂಡಿಸಿರುವ ಸ್ಥಳವಾಗಿ, ಬೇಕಲ ಕೋಟೆ ರೈಲು ನಿಲ್ದಾಣದಲ್ಲಿ ಹೆಚ್ಚಿನ ದೂರದ ಪ್ರಯಾಣದ ರೈಲುಗಳ ನಿಲುಗಡೆಗೆ ಅವಕಾಶ ನೀಡಬೇಕೆಂಬ ಸ್ಥಳೀಯರು ಮತ್ತು ರಾಜಕೀಯ ನಾಯಕರ ನಿರಂತರ ಬೇಡಿಕೆಗೆ ರೈಲ್ವೆ ಸಚಿವಾಲಯ ಇನ್ನೂ ಮೌನವಾಗಿದೆ.

ಬೇಕಲ ಅಂತರರಾಷ್ಟ್ರೀಯ ಬೀಚ್ ಉತ್ಸವದಂತಹ ಕಾರ್ಯಕ್ರಮಗಳ ಸಮಯದಲ್ಲಿ ಕೆಲವು ರೈಲುಗಳಿಗೆ ನಿಲುಗಡೆಗೆ ಅವಕಾಶ ನೀಡಲಾಗುತ್ತದೆ. ಇದನ್ನು ಶಾಶ್ವತಗೊಳಿಸುವುದರಿಂದ ಪ್ರವಾಸೋದ್ಯಮ ಅಭಿವೃದ್ಧಿಗೆ ಅನುಕೂಲವಾಗುತ್ತದೆ ಎಂದು ಸ್ಥಳೀಯರು ಹೇಳುತ್ತಾರೆ.

ಎರಡು ಪ್ಲಾಟ್‍ಫಾರ್ಮ್‍ಗಳನ್ನು ಹೊಂದಿರುವ ಬೇಕಲ ಕೋಟೆ ರೈಲು ನಿಲ್ದಾಣವು ಸುಮಾರು 13 ಎಕರೆ ಪ್ರದೇಶದಲ್ಲಿದೆ. ಮೊದಲು ಇದನ್ನು 'ಪಳ್ಳಿಕ್ಕೆರೆ ರೈಲು ನಿಲ್ದಾಣ' ಎಂದು ಕರೆಯಲಾಗುತ್ತಿತ್ತು. ಬೇಕಲ ರಾಷ್ಟ್ರೀಯ ಪ್ರವಾಸಿ ತಾಣವಾದ ನಂತರ ಇದನ್ನು 'ಬೇಕಲ್ ಕೋಟೆ' ರೈಲು ನಿಲ್ದಾಣ ಎಂದು ಮರುನಾಮಕರಣ ಮಾಡಲಾಯಿತು.

ಆದಾಗ್ಯೂ, ಮೂಲಸೌಕರ್ಯಗಳ ಮಿತಿಯು ಅಭಿವೃದ್ಧಿಗೆ ಅಡ್ಡಿಯಾಗಿದೆ ಎಂದು ರೈಲ್ವೆ ಅಧಿಕಾರಿಗಳು ಹೇಳಿಕೊಳ್ಳುತ್ತಾರೆ. ಏತನ್ಮಧ್ಯೆ, ಭೂ ವಿವಾದಗಳು ಮತ್ತು ನ್ಯಾಯಾಲಯದ ಸ್ಟೇಗಳು ಕೂಡಾ ಅಭಿವೃದ್ಧಿ ಚಟುವಟಿಕೆಗಳಿಗೆ ಅಡೆತಡೆಗಳನ್ನು ಸೃಷ್ಟಿಸುತ್ತಿವೆ ಎಂದು ಹೇಳಲಾಗುತ್ತಿದೆ.

ಪ್ರವಾಸಿಗರಿಗೆ ಸಂಕಷ್ಟ: 

ವಿದೇಶಗಳು ಮತ್ತು ಭಾರತದ ವಿವಿಧ ಭಾಗಗಳಿಂದ ಪ್ರವಾಸಿಗರು ದಿನನಿತ್ಯ ಬೇಕಲ ಕೋಟೆಯನ್ನು ವೀಕ್ಷಿಸಲು ದೌಡಾಯಿಸುತ್ತಾರೆ. ಜೊತೆಗೆ, ಚಲನಚಿತ್ರೋದ್ಯಮದ ಪ್ರಮುಖ ಬರಹಗಾರರು, ನಿರ್ದೇಶಕರು, ಮತ್ತು ನಟ-ನಟಿಯರು ಭೇಟಿ ನೀಡಲು ಆಗಮಿಸುತ್ತಾರೆ. ಅವರು ರೈಲಿನಲ್ಲಿ ಬಂದು 15 ಕಿ.ಮೀ ದೂರದಲ್ಲಿರುವ ಕಾಸರಗೋಡು ರೈಲು ನಿಲ್ದಾಣ ಅಥವಾ ಎಂಟು ಕಿ.ಮೀ ದೂರದಲ್ಲಿರುವ ಕಾಞಂಗಾಡು ರೈಲು ನಿಲ್ದಾಣವನ್ನು ಅವಲಂಬಿಸಬೇಕಾಗುತ್ತದೆ.

ಪ್ರವಾಸಿಗರು ಸ್ವತಃ ಈ ನಿರ್ಲಕ್ಷ್ಯ ಮತ್ತು ತೊಂದರೆಯನ್ನು ಪ್ರಶ್ನಿಸುತ್ತಿದ್ದಾರೆ. ಅಂತರರಾಷ್ಟ್ರೀಯ ಪ್ರವಾಸೋದ್ಯಮ ತಾಣವಾಗಿ ಬೇಕಲಕೋಟೆ ರೈಲು ನಿಲ್ದಾಣದ ಹಿಂದುಳಿದ ಅಭಿವೃದ್ಧಿಗೆ ತಕ್ಷಣದ ಪರಿಹಾರವನ್ನು ಕಂಡುಕೊಳ್ಳಬೇಕು ಎಂದು ಸ್ಥಳೀಯರು ಮತ್ತು ಪ್ರಯಾಣಿಕರ ಸಂಘ ಪ್ರಮುಖವಾಗಿ ಒತ್ತಾಯಿಸುತ್ತಿದೆ.

ಹೈಲೈಟ್ಸ್:

- ವಿದೇಶಿಗರು ಸೇರಿದಂತೆ ಪ್ರವಾಸಿಗರು ಕಾಸರಗೋಡು ನಿಲ್ದಾಣ ಅಥವಾ ಕಾಞಂಗಾಡು ನಿಲ್ದಾಣವನ್ನು ಅವಲಂಬಿಸಬೇಕಾದ ಸಂದಿಗ್ಧ ಸ್ಥಿತಿಯಲ್ಲಿದ್ದಾರೆ

- ಹಿಂದೆ 'ಪಳ್ಳಿಕ್ಕೆರೆ ರೈಲು ನಿಲ್ದಾಣ' ಎಂದು ಕರೆಯಲ್ಪಡುತ್ತಿದ್ದ ಈ ನಿಲ್ದಾಣವು ಸುಮಾರು 13 ಎಕರೆ ಭೂಮಿಯಲ್ಲಿದೆ

- ಸೀಮಿತ ಮೂಲಸೌಕರ್ಯ ಮತ್ತು ಭೂ ವಿವಾದಗಳು ಅಭಿವೃದ್ಧಿಗೆ ಅಡ್ಡಿಯಾಗುತ್ತಿವೆ ಎಂದು ಅಧಿಕಾರಿಗಳು ಹೇಳಿಕೊಳ್ಳುತ್ತಾರೆ

- ಬೇಕಲ ಅಂತರರಾಷ್ಟ್ರೀಯ ಬೀಚ್ ಉತ್ಸವದ ಸಮಯದಲ್ಲಿ ಅನುಮತಿಸಲಾದ ನಿಲ್ದಾಣಗಳನ್ನು ಶಾಶ್ವತಗೊಳಿಸಬೇಕೆಂಬ ಬೇಡಿಕೆ

ಕೋಟ್ಸ್:

-ಉತ್ತರ ಕೇರಳದ ಪ್ರಮುಖ ಪ್ರವಾಸಿ ಕೇಂದ್ರವೂ ಕಾಸರಗೋಡಿನ ಹಿರಿಮೆಯ ಸಂಕೇತವೂ ಆಗಿರುವ ಬೇಕಲ ಕೋಟೆಯ ವೀಕ್ಷಣೆ ಸಹಿತ ಸೌಂದರ್ಯ-ಮನೋಲ್ಲಾಸಕ್ಕಾಗಿ ಆಗಮಿಸುವ ಜನರಿಗೆ ಇಲ್ಲಿಯ ರೈಲು ನಿಲ್ದಾಣ ಸೌಕರ್ಯ ರಹಿತವಾಗಿ ಸವಾಲಾಗಿದೆ. ಈ ಬಗ್ಗೆ ರೈಲ್ವೆ ಅಧಿಕೃತರಿಗೆ ಮನವಿ ಮಾಡಲಾಗಿದ್ದರೂ ಹೆಚ್ಚಿನ ರೈಲುಗಾಡಿಗಳಿಗೆ ಇನ್ನೂ ಅವಕಾಶ ಒದಗಿಸಿಲ್ಲ. ಈ ಬಗ್ಗೆ ಸಂಸದರ ಗಮನಕ್ಕೂ ಮಾಹಿತಿ ನೀಡಲಾಗಿದೆ. ಇನ್ನಾದರೂ ಸಂಬಂಧಪಟ್ಟವರು ಸೂಕ್ತ ಕ್ರಮ ಕೈಗೊಳ್ಳಬೇಕು.

-ಸಿ.ಕೆ.ನಾಝರ್ ಒಡೆಯಂಚ್ಚಾಲ್.

ಕಾರ್ಯದರ್ಶಿ ರೈಲ್ವೆ ಪ್ರೊಟೆಕ್ಷನ್ ಪೋರಂ ಕೇರಳ.