GDP ಲೆಕ್ಕಾಚಾರ ಸರಿಯಾಗಿದೆ: ಕೇಂದ್ರದ ಸ್ಪಷ್ಟನೆ

ನವದೆಹಲಿ: ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದ ಉಆP ಬೆಳವಣಿಗೆ ದರವನ್ನು ಹೆಚ್ಚಾಗಿ ತೋರಿಸಲು ಹಿಂದಿನ ವರ್ಷದ ಜಿಡಿಪಿ ಅಂಕಿಯನ್ನು ಕಡಿಮೆ ಮಾಡಲಾಗಿದೆ ಎಂಬ ಆರೋಪವನ್ನು ಕೇಂದ್ರ ಸರ್ಕಾರ ಬುಧವಾರ ತಳ್ಳಿಹಾಕಿದೆ. 

ಜಿಡಿಪಿ ಲೆಕ್ಕಾಚಾರದಲ್ಲಿ ಯಾವುದೇ ಅಸಂಗತತೆ ಇಲ್ಲ.  ಹಿಂದಿನ ವರ್ಷದ ಜಿಡಿಪಿ ಅಂಕಿಯನ್ನು ಹಳೆಯ ವಿಧಾನದಲ್ಲಿ ಲೆಕ್ಕಹಾಕಲಾಗಿತ್ತು. ಈಗ ಹೊಸ ವಿಧಾನದಲ್ಲಿ ಅದನ್ನು ಮರುಲೆಕ್ಕಹಾಕಲಾಗಿದೆ. ಹೀಗಾಗಿ ಹಳೆಯ ಸರಣಿಯ ಅಂಕಿ ಮತ್ತು ಹೊಸ ಸರಣಿಯ ಅಂಕಿಯನ್ನು ಹೋಲಿಸಿ ಬೆಳವಣಿಗೆ ದರದ ಬಗ್ಗೆ ತೀರ್ಮಾನಿಸುವುದು ಸರಿಯಲ್ಲ ಎಂದು ಅಂಕಿಅಂಶ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ (MoSPI) ತಿಳಿಸಿದೆ.

2025-26ರ ಎಪ್ರಿಲ್-ಜೂನ್ ತ್ರೈಮಾಸಿಕದ ಜಿಡಿಪಿ ಹಳೆಯ ಸರಣಿಯಲ್ಲಿ 86.05 ಲಕ್ಷ ಕೋಟಿ ರೂ. ಆಗಿತ್ತು. ಹೊಸ GDP ಸರಣಿಯಲ್ಲಿ ಇದೇ ಅವಧಿಯ ಅಂಕಿಯನ್ನು ಮೊದಲು 80.32 ಲಕ್ಷ ಕೋಟಿ ರೂ. ಎಂದು ಅಂದಾಜಿಸಲಾಯಿತು. ಬಳಿಕ ಲಭ್ಯವಾದ ಹೊಸ ದತ್ತಾಂಶ ಹಾಗೂ ಸೂಚ್ಯಂಕಗಳ ಆಧಾರದ ಮೇಲೆ 80.44 ಲಕ್ಷ ಕೋಟಿ ರೂ.ಗೆ ಪರಿಷ್ಕರಿಸಲಾಯಿತು. ಹೊಸ ಐಐಪಿ ಮತ್ತು ಪಿಪಿಐ ಸರಣಿಗಳ ದತ್ತಾಂಶವನ್ನು ಜಿಡಿಪಿ ಲೆಕ್ಕಾಚಾರದಲ್ಲಿ ಸೇರಿಸಿದ ಬಳಿಕ ಅಂಕಿಯನ್ನು ಅಂತಿಮವಾಗಿ 80 ಲಕ್ಷ ಕೋಟಿ ರೂ.ಗೆ ಪರಿಷ್ಕರಿಸಲಾಗಿದೆ.

ಜಿಡಿಪಿ ಅಂದಾಜನ್ನು 86.05 ಲಕ್ಷ ಕೋಟಿ ರೂ.ನಿಂದ 80 ಲಕ್ಷ ಕೋಟಿ ರೂ.ಗೆ ಪರಿಷ್ಕರಿಸಿರುವುದಕ್ಕೂ ಪ್ರಸಕ್ತ ವರ್ಷದ ಬೆಳವಣಿಗೆ ದರವನ್ನು ಹೆಚ್ಚಾಗಿ ತೋರಿಸುವುದಕ್ಕೂ ಸಂಬಂಧವಿಲ್ಲ ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.

ಮಾಜಿ ಹಣಕಾಸು ಕಾರ್ಯದರ್ಶಿ ಸುಭಾಷ್ ಚಂದ್ರ ಗರ್ಗ್ ಅವರು ಈ ಬದಲಾವಣೆಯನ್ನು ಪ್ರಶ್ನಿಸಿದ್ದರು. ಕಳೆದ ವರ್ಷದ ಜಿಡಿಪಿಯನ್ನು 86.05 ಲಕ್ಷ ಕೋಟಿ ರೂ.ಗಳಿಂದ 80 ಲಕ್ಷ ಕೋಟಿ ರೂ.ಗಳಿಗೆ ಪರಿಷ್ಕರಿಸದಿದ್ದರೆ ನಾಮಮಾತ್ರ ಜಿಡಿಪಿ ಬೆಳವಣಿಗೆ ಸುಮಾರು ಶೇ 2.6ರಷ್ಟಿರುತ್ತಿತ್ತು. ನೈಜ ಜಿಡಿಪಿ ಬೆಳವಣಿಗೆ ಶೂನ್ಯಕ್ಕೆ ಸಮೀಪಿಸುತ್ತಿತ್ತು ಎಂದು ಅವರು ಹೇಳಿದ್ದರು.

ಆದರೆ, ಈ ವಾದವು ಹಳೆಯ ಮತ್ತು ಹೊಸ ಜಿಡಿಪಿ ಸರಣಿಯ ಅಂಕಿಗಳನ್ನು ಪರಸ್ಪರ ಹೋಲಿಸುವುದನ್ನು ಆಧರಿಸಿದೆ. ವಿವಿಧ ಸರಣಿಗಳ ಅಂಕಿಗಳನ್ನು ಬಳಸಿ ಬೆಳವಣಿಗೆ ದರ ಲೆಕ್ಕಹಾಕುವುದು ಸರಿಯಲ್ಲ ಎಂದು ಸಚಿವಾಲಯ ಹೇಳಿದೆ.

ಹೊಸ ಸರಣಿಯಲ್ಲಿ ಏನು ಬದಲಾವಣೆ?

ಜಿಡಿಪಿ ಲೆಕ್ಕಾಚಾರದ ಮೂಲ ವರ್ಷವನ್ನು 2011-12ರಿಂದ 2022-23ಕ್ಕೆ ಬದಲಿಸಲಾಗಿದೆ. ಇದರ ಜತೆಗೆ ಹೊಸ ಹಾಗೂ ಹೆಚ್ಚಿನ ದತ್ತಾಂಶವನ್ನು ಬಳಸಲಾಗುತ್ತಿದೆ.

ಉತ್ಪಾದಕರ ಬೆಲೆ ಸೂಚ್ಯಂಕ (ಪಿಪಿಐ) ಮತ್ತು ಕೈಗಾರಿಕಾ ಉತ್ಪಾದನಾ ಸೂಚ್ಯಂಕ (ಐಐಪಿ)ದ ಹೊಸ ಸರಣಿಗಳ ದತ್ತಾಂಶವನ್ನೂ ಜಿಡಿಪಿ ಲೆಕ್ಕಾಚಾರಕ್ಕೆ ಸೇರಿಸಲಾಗಿದೆ. ಇದರಿಂದ ಹಿಂದಿನ ಅಂದಾಜುಗಳಲ್ಲಿ ಬದಲಾವಣೆ ಬಂದಿದೆ ಎಂದು ಸಚಿವಾಲಯ ತಿಳಿಸಿದೆ.

ಹೊಸ ಸರಣಿಯಲ್ಲಿ 2025-26ರ ಎಪ್ರಿಲ್-ಜೂನ್ ತ್ರೈಮಾಸಿಕದ ಪ್ರಸ್ತುತ ಬೆಲೆಯ ಜಿಡಿಪಿಯನ್ನು ಮೊದಲು 80.32 ಲಕ್ಷ ಕೋಟಿ ರೂ. ಎಂದು ಅಂದಾಜಿಸಲಾಗಿತ್ತು. ಬಳಿಕ ಜೂನ್‌ ನಲ್ಲಿ 80.44 ಲಕ್ಷ ಕೋಟಿ ರೂ.ಗೆ ಪರಿಷ್ಕರಿಸಲಾಯಿತು. ಹೊಸ ಐಐಪಿ ಮತ್ತು ಪಿಪಿಐ ದತ್ತಾಂಶಗಳನ್ನು ಸೇರಿಸಿದ ನಂತರ ಅಂಕಿಯನ್ನು 80 ಲಕ್ಷ ಕೋಟಿ ರೂ.ಗೆ ಪರಿಷ್ಕರಿಸಲಾಯಿತು.

ಹೆಚ್ಚಿನ ಮಾಹಿತಿ ಬಂದಂತೆ ಅಂಕಿ ಬದಲಾಗುತ್ತದೆ

ಸರ್ಕಾರವು 2026-27ರ ಮೊದಲ ತ್ರೈಮಾಸಿಕದ ಜಿಡಿಪಿ ಬೆಳವಣಿಗೆ ಅಂಕಿಯನ್ನು ಸೋಮವಾರ ಬಿಡುಗಡೆ ಮಾಡಿತ್ತು. ಪ್ರಸಕ್ತ ವರ್ಷದ ಎಪ್ರಿಲ್-ಜೂನ್ ಅವಧಿಯಲ್ಲಿ ನೈಜ ಜಿಡಿಪಿ ಬೆಳವಣಿಗೆ ಶೇ 7.8 ದಾಖಲಾಗಿದೆ. ನಾಮಮಾತ್ರ ಜಿಡಿಪಿ ಬೆಳವಣಿಗೆ ಶೇ 10.3ರಷ್ಟಿದೆ.

ಇದರೊಂದಿಗೆ ಹಿಂದಿನ ತ್ರೈಮಾಸಿಕ ಹಾಗೂ ವಾರ್ಷಿಕ ಅಂಕಿಗಳಲ್ಲೂ ಪರಿಷ್ಕರಣೆ ಮಾಡಲಾಗಿದೆ.

2025-26ರ ಜನವರಿ-ಮಾರ್ಚ್ ತ್ರೈಮಾಸಿಕದ ಬೆಳವಣಿಗೆಯನ್ನು ತಾತ್ಕಾಲಿಕ ಅಂದಾಜಿನ ಶೇ 7.8ರಿಂದ ಶೇ 8.6ಕ್ಕೆ ಪರಿಷ್ಕರಿಸಲಾಗಿದೆ.

2023-24ರ ವಾರ್ಷಿಕ ಬೆಳವಣಿಗೆಯನ್ನು ಶೇ 7.2ರಿಂದ ಶೇ 7.3ಕ್ಕೆ, 2024-25ರ ಬೆಳವಣಿಗೆಯನ್ನು ಶೇ 7.1ರಿಂದ ಶೇ 7.2ಕ್ಕೆ ಹಾಗೂ 2025-26ರ ಬೆಳವಣಿಗೆಯನ್ನು ಶೇ 7.7ರಿಂದ ಶೇ 7.8ಕ್ಕೆ ಪರಿಷ್ಕರಿಸಲಾಗಿದೆ.

ಅಂಕಿಅಂಶ ಕಾರ್ಯದರ್ಶಿ ಸೌರಭ್ ಗರ್ಗ್ ಅವರು, ತ್ರೈಮಾಸಿಕ ಜಿಡಿಪಿ ಅಂದಾಜುಗಳನ್ನು ಆರಂಭದಲ್ಲಿ ಲಭ್ಯವಿರುವ ಸೂಚ್ಯಂಕಗಳ ಆಧಾರದ ಮೇಲೆ ಸಿದ್ಧಪಡಿಸಲಾಗುತ್ತದೆ ಎಂದು ಹೇಳಿದರು.

ನಂತರ ಕಂಪೆನಿಗಳ ಕಾರ್ಯಕ್ಷಮತೆ, ಸರ್ಕಾರದ ಚಟುವಟಿಕೆಗಳು ಮತ್ತು ವಾಸ್ತವಿಕ ಉತ್ಪಾದನೆ ಕುರಿತು ಹೆಚ್ಚಿನ ಮಾಹಿತಿ ಲಭ್ಯವಾದಂತೆ ಅಂಕಿಗಳನ್ನು ಪರಿಷ್ಕರಿಸಲಾಗುತ್ತದೆ. ವಾರ್ಷಿಕ ಅಂಕಿಗಳು ಸಾಮಾನ್ಯವಾಗಿ ಹೆಚ್ಚು ದೃಢವಾಗಿರುತ್ತವೆ ಎಂದು ಅವರು ಉಲ್ಲೇಖಿಸಿದರು.

ಹೊಸ ಸರಣಿಯಲ್ಲಿ ಜಿಡಿಪಿ ಅಂಕಿಗಳನ್ನು ನಿರಂತರವಾಗಿ ಹೆಚ್ಚಿಸುವ ಅಥವಾ ಕಡಿಮೆ ಮಾಡುವ ಯಾವುದೇ ಪ್ರವೃತ್ತಿ ಇಲ್ಲ. ಕೆಲವು ತ್ರೈಮಾಸಿಕಗಳ ಅಂಕಿಗಳನ್ನು ಹೆಚ್ಚಿಸಲಾಗಿದ್ದರೆ, ಇನ್ನು ಕೆಲವು ಅಂಕಿಗಳನ್ನು ಕಡಿಮೆ ಮಾಡಲಾಗಿದೆ ಎಂದು ಅವರು ಹೇಳಿದರು.

ಮುಂದಿನ ದಿನಗಳಲ್ಲಿ ಕೆಲವು ಮೂಲಾಂಶಗಳಷ್ಟು ಬದಲಾವಣೆ ಹೊರತುಪಡಿಸಿ ಜಿಡಿಪಿ ಅಂಕಿಗಳಲ್ಲಿ ಗಣನೀಯ ಪರಿಷ್ಕರಣೆ ನಿರೀಕ್ಷಿಸಲಾಗುವುದಿಲ್ಲ ಎಂದರು.

300ಕ್ಕೂ ಹೆಚ್ಚು ಡಿಫ್ಲೇಟರ್‌ ಗಳು

ಹಳೆಯ ಜಿಡಿಪಿ ಸರಣಿಯಲ್ಲಿ ಸುಮಾರು 180 ಡಿಫ್ಲೇಟರ್‌ ಗಳನ್ನು ಬಳಸಲಾಗುತ್ತಿತ್ತು. ಹೊಸ ಸರಣಿಯಲ್ಲಿ 300ಕ್ಕೂ ಹೆಚ್ಚು ಡಿಫ್ಲೇಟರ್‌ಗಳನ್ನು ಬಳಸಲಾಗುತ್ತಿದೆ ಎಂದು ಸೌರಭ್ ಗರ್ಗ್ ತಿಳಿಸಿದರು.

ಉತ್ಪಾದನಾ ವಲಯದ ಲೆಕ್ಕಾಚಾರವನ್ನು ಹೆಚ್ಚು ನಿಖರಗೊಳಿಸಲು 'ಡಬಲ್ ಡಿಫ್ಲೇಷನ್' ವಿಧಾನವನ್ನು ಹೊಸ ಸರಣಿಯಲ್ಲಿ ಹೆಚ್ಚು ಸಮಗ್ರವಾಗಿ ಬಳಸಲಾಗುತ್ತಿದೆ.

ಈ ವಿಧಾನದಲ್ಲಿ ಉತ್ಪಾದನೆಯ ಮೌಲ್ಯ ಮತ್ತು ಉತ್ಪಾದನೆಗೆ ಬಳಸುವ ಒಳಹರಿವುಗಳ ಮೌಲ್ಯವನ್ನು ಪ್ರತ್ಯೇಕವಾಗಿ ಬೆಲೆ ಬದಲಾವಣೆಗೆ ಹೊಂದಿಸಲಾಗುತ್ತದೆ. ಬಳಿಕ ನೈಜ ಮೌಲ್ಯವರ್ಧನೆಯನ್ನು ಲೆಕ್ಕಹಾಕಲಾಗುತ್ತದೆ.

ಹೀಗಾಗಿ ಹಿಂದಿನ ವರ್ಷದ ಜಿಡಿಪಿ 86.05 ಲಕ್ಷ ಕೋಟಿ ರೂ.ಗಳಿಂದ 80 ಲಕ್ಷ ಕೋಟಿ ರೂ.ಗೆ ಬದಲಾಗಿರುವುದು ಬೆಳವಣಿಗೆ ದರವನ್ನು ಕೃತಕವಾಗಿ ಹೆಚ್ಚಿಸುವ ಉದ್ದೇಶದಿಂದ ಮಾಡಿರುವ ಕ್ರಮವಲ್ಲ. ಮೂಲ ವರ್ಷ ಬದಲಾವಣೆ, ಹೊಸ ದತ್ತಾಂಶದ ಸೇರ್ಪಡೆ, ಹೊಸ ಸೂಚ್ಯಂಕಗಳ ಬಳಕೆ ಮತ್ತು ಸುಧಾರಿತ ಲೆಕ್ಕಾಚಾರ ವಿಧಾನದಿಂದಾಗಿ ಅಂಕಿ ಪರಿಷ್ಕರಿಸಲಾಗಿದೆ ಎಂದು ಕೇಂದ್ರ ಸರ್ಕಾರ ಸಮರ್ಥಿಸಿಕೊಂಡಿದೆ.