ಸೈಬರ್ ಸ್ಪೇಸ್ ನಲ್ಲಿ ಮಕ್ಕಳ ಲೈಂಗಿಕ ಶೋಷಣೆ ನಿಭಾಯಿಸಲು 16 ರಾಜ್ಯಗಳ ಹಿರಿಯ ಪೋಲೀಸ್ ಮುಖ್ಯಸ್ಥರನ್ನು ಒಟ್ಟುಗೂಡಿಸಿದ ಕೇರಳ ಪೋಲೀಸರು

ತಿರುವನಂತಪುರಂ: ಕೇರಳ ಪೋಲೀಸರ ಸೈಬರ್ ಆಪರೇಷನ್ಸ್ ವಿಂಗ್, ಎಡಿನ್‍ಬರ್ಗ್ ವಿಶ್ವವಿದ್ಯಾಲಯದ ಚೈಲ್ಡ್‍ಲೈಟ್ - ಗ್ಲೋಬಲ್ ಚೈಲ್ಡ್ ಸೇಫ್ಟಿ ಇನ್‍ಸ್ಟಿಟ್ಯೂಟ್ ಮತ್ತು ತನಿಖಾ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುವ ನ್ಯೂಜಿಲೆಂಡ್ ಮೂಲದ ಕಿಂಡ್ರೆಡ್ ಟೆಕ್ ಸಹಯೋಗದೊಂದಿಗೆ 'ಪ್ರಾಜೆಕ್ಟ್ ಲೈಟ್‍ಹೌಸ್' ಶೃಂಗಸಭೆಯನ್ನು ಆಯೋಜಿಸಲಾಗಿದೆ. 

ಆನ್‍ಲೈನ್ ನಲ್ಲಿ ಮಕ್ಕಳ ಲೈಂಗಿಕ ಶೋಷಣೆ ಘಟನೆಗಳು ಜಿಲ್ಲೆ, ರಾಜ್ಯ ಮತ್ತು ಅಂತರರಾಷ್ಟ್ರೀಯ ಗಡಿಗಳನ್ನು ಸೆಕೆಂಡುಗಳಲ್ಲಿ ದಾಟುವುದರಿಂದ, ಅದರ ವಿರುದ್ಧದ ಹೋರಾಟವನ್ನು ಉನ್ನತ ಮಟ್ಟದಿಂದ ಮುನ್ನಡೆಸಬೇಕು ಮತ್ತು ರಾಜ್ಯಗಳ ನಡುವಿನ ಸಹಕಾರದ ಮೂಲಕ ನಿರ್ಮಿಸಬೇಕು ಎಂಬುದು ಶೃಂಗಸಭೆಯ ಮುಖ್ಯ ಸಂದೇಶವಾಗಿದೆ.

ರಾಷ್ಟ್ರೀಯ ಅಪರಾಧ ದಾಖಲೆಗಳ ಬ್ಯೂರೋದ ಪ್ರಕಾರ, 2024 ರಲ್ಲಿ ಭಾರತದಲ್ಲಿ ಮಕ್ಕಳ ವಿರುದ್ಧ 1,87,702 ಅಪರಾಧಗಳು ದಾಖಲಾಗಿವೆ (ಹಿಂದಿನ ವರ್ಷಕ್ಕಿಂತ ಶೇ. 5.9 ರಷ್ಟು ಹೆಚ್ಚಳ).

ಇದರಲ್ಲಿ ಪೋಕ್ಸೊ ಕಾಯ್ದೆಯಡಿ 69,191 ಪ್ರಕರಣಗಳು ಮತ್ತು ಮಕ್ಕಳ ವಿರುದ್ಧ 1,753 ಸೈಬರ್ ಅಪರಾಧಗಳು ಸೇರಿವೆ. ಜಾಗತಿಕವಾಗಿ, ಚೈಲ್ಡ್‍ಲೈಟ್ ಅಂದಾಜಿನ ಪ್ರಕಾರ, ಪ್ರತಿ ವರ್ಷ ಸುಮಾರು 300 ಮಿಲಿಯನ್ ಮಕ್ಕಳು ಆನ್‍ಲೈನ್ ಲೈಂಗಿಕ ಶೋಷಣೆ ಮತ್ತು ದೌರ್ಜನ್ಯಕ್ಕೆ ಬಲಿಯಾಗುತ್ತಿದ್ದಾರೆ, ದಕ್ಷಿಣ ಏಷ್ಯಾದಲ್ಲಿ ಎಂಟು ಮಕ್ಕಳಲ್ಲಿ ಒಬ್ಬರು 18 ವರ್ಷಕ್ಕಿಂತ ಮೊದಲು ಲೈಂಗಿಕ ದೌರ್ಜನ್ಯವನ್ನು ಅನುಭವಿಸುತ್ತಿದ್ದಾರೆ.

2024 ರಲ್ಲಿ ಮಾತ್ರ, ಯುಎಸ್ ಮೂಲದ ಕಾಣೆಯಾದ ಮತ್ತು ಶೋಷಿತ ಮಕ್ಕಳ ರಾಷ್ಟ್ರೀಯ ಕೇಂದ್ರವು ಪ್ರಪಂಚದಾದ್ಯಂತದ ಶಂಕಿತ ಮಕ್ಕಳ ಲೈಂಗಿಕ ದೌರ್ಜನ್ಯದ ಬಗ್ಗೆ 20.5 ಮಿಲಿಯನ್ ದೂರುಗಳನ್ನು ಸ್ವೀಕರಿಸಿದೆ. ವರದಿಯಾದ ಪ್ರಕರಣಗಳು ನಿಜವಾದ ಡೇಟಾದ ಒಂದು ಸಣ್ಣ ಭಾಗ ಮಾತ್ರ.

ಜಾಗತಿಕ ಅಪರಾಧ ಪ್ರವೃತ್ತಿಗಳನ್ನು ಶೃಂಗಸಭೆಯಲ್ಲಿ ಚರ್ಚಿಸಲಾಯಿತು. ಅಪರಾಧಿಗಳ ನಡವಳಿಕೆ ಮತ್ತು ಜಾಗತಿಕ ಪ್ರತಿಕ್ರಿಯೆ ಕಾರ್ಯವಿಧಾನಗಳನ್ನು ಅರ್ಥಮಾಡಿಕೊಳ್ಳುವ ಕುರಿತು ಚರ್ಚೆಗಳು ನಡೆದವು.

'ಮಕ್ಕಳ ಲೈಂಗಿಕ ಶೋಷಣೆ ನಿಗ್ರಹ ಕೇಂದ್ರ' ಮತ್ತು 'ಸೈಬರ್‍ಡೋಮ್' ಅನ್ನು ನಿರ್ಮಿಸುವಲ್ಲಿ ಕೇರಳ ತೆಗೆದುಕೊಂಡ ಪ್ರಯಾಣ, ಅದರ ಹಿಂದಿನ ನಿರ್ಧಾರಗಳು ಮತ್ತು ಅದು ವಹಿಸಿದ ನಾಯಕತ್ವದ ಪಾತ್ರವನ್ನು ಸೈಬರ್ ಕಾರ್ಯಾಚರಣೆಗಳ ಐಜಿ ಪಿ. ಪ್ರಕಾಶ್ ವಿವರಿಸಿದರು.

ಬಲಿಪಶುಗಳನ್ನು ಪತ್ತೆಹಚ್ಚಲು ರಾಷ್ಟ್ರೀಯ ಸಾಮಥ್ರ್ಯವನ್ನು ಹೆಚ್ಚಿಸುವ ಕುರಿತು ಅಂತರರಾಷ್ಟ್ರೀಯ ಪ್ರಕರಣ ಅಧ್ಯಯನದಲ್ಲಿ ಅಧಿಕಾರಿಗಳು ಭಾಗವಹಿಸಿದರು.

ಕೇರಳ ಪೋಲೀಸ್, ಚೈಲ್ಡ್‍ಲೈಟ್ ಮತ್ತು ಕಿಂಡ್ರೆಡ್ ಟೆಕ್ ಜಂಟಿಯಾಗಿ ಆಯೋಜಿಸಿದ್ದ ಅಧಿವೇಶನದಲ್ಲಿ ರಾಜ್ಯ ಮಟ್ಟದ ಪ್ರತಿಕ್ರಿಯೆಯನ್ನು ಹೆಚ್ಚಿಸುವ ಕಾರ್ಯತಂತ್ರದ ಪರಿಣಾಮಗಳನ್ನು - ಅಂದರೆ ಹೆಚ್ಚುತ್ತಿರುವ ಪ್ರಕರಣಗಳ ಸಂಖ್ಯೆ, ಹೆಚ್ಚಿನ ತನಿಖಾಧಿಕಾರಿಗಳು ಮತ್ತು ವಿಧಿವಿಜ್ಞಾನ ಸಾಮಥ್ರ್ಯದ ಅಗತ್ಯತೆ ಮತ್ತು ಪ್ರಾಸಿಕ್ಯೂಟರ್ ಗಳು ಮತ್ತು ನ್ಯಾಯಾಲಯಗಳ ಮೇಲಿನ ಒತ್ತಡಗಳನ್ನು ಚರ್ಚಿಸಲಾಯಿತು.