ಮುಜುಂಗಾವು ಶ್ರೀ ಪಾರ್ಥಸಾರಥಿ ಸನ್ನಿಧಿಯಲ್ಲಿ ಇಂದು ಕಾವೇರಿ ಸಂಕ್ರಮಣ ತೀರ್ಥಸ್ನಾನ: ಸಕಲ ಸಿದ್ಧತೆ

​ಕುಂಬಳೆ: ಕುಂಬಳೆ ಸೀಮೆಯ ಪುರಾಣ ಪ್ರಸಿದ್ಧ ಪುಣ್ಯಕ್ಷೇತ್ರವಾದ ಶ್ರೀ ಮುಜುಂಗಾವು ಪಾರ್ಥಸಾರಥಿ ದೇವಾಲಯದಲ್ಲಿ ಇಂದು (ಶನಿವಾರ) ಕಾವೇರಿ ಸಂಕ್ರಮಣದ ಪುಣ್ಯಕಾಲದ ಪ್ರಯುಕ್ತ ಮಹಾ ತೀರ್ಥಸ್ನಾನ ಶ್ರದ್ಧಾಭಕ್ತಿಗಳಿಂದ ನೆರವೇರಲಿದೆ.

​ತುಲಾ ಸಂಕ್ರಮಣದ ಈ ಪವಿತ್ರ ಮುಹೂರ್ತದಲ್ಲಿ ಕ್ಷೇತ್ರದ ಪುಷ್ಕರಣಿಯಲ್ಲಿ (ಕೆರೆಯಲ್ಲಿ) ಗಂಗೆಯ ಸಾನ್ನಿಧ್ಯವಿರುತ್ತದೆ ಎಂಬ ಬಲವಾದ ನಂಬಿಕೆಯಿದೆ. ಈ ಪುಣ್ಯಸ್ನಾನಕ್ಕಾಗಿ ಕುಂಬಳೆ, ಕಾಸರಗೋಡು ಹಾಗೂ ದಕ್ಷಿಣ ಕನ್ನಡ ಜಿಲ್ಲೆಗಳ ಸಾವಿರಾರು ಭಕ್ತರು ಆಗಮಿಸುವ ನಿರೀಕ್ಷೆಯಿದ್ದು, ಮುಂಜಾನೆಯಿಂದಲೇ ತೀರ್ಥಸ್ನಾನಕ್ಕೆ ಚಾಲನೆ ದೊರೆಯಲಿದೆ. ತೀರ್ಥಸ್ನಾನದ ಬಳಿಕ ಭಕ್ತರು ಶ್ರೀ ಪಾರ್ಥಸಾರಥಿ ಸ್ವಾಮಿಯ ದರ್ಶನ ಪಡೆಯಲಿದ್ದಾರೆ.

​ಸಂಕ್ರಮಣದ ಪ್ರಯುಕ್ತ ದೇವಾಲಯದಲ್ಲಿ ಮುಂಜಾನೆಯಿಂದಲೇ ಪುಣ್ಯಾಹವಾಚನ, ಕಲಶಾಭಿಷೇಕ, ವಿಶೇಷ ನೈವೇದ್ಯ ಹಾಗೂ ಮಹಾಪೂಜೆ ಸೇರಿದಂತೆ ವಿವಿಧ ಧಾರ್ಮಿಕ ವಿಧಿವಿಧಾನಗಳು ಜರುಗಲಿವೆ. ಮಧ್ಯಾಹ್ನ ಭಕ್ತರಿಗೆ ಅನ್ನಸಂತರ್ಪಣೆ ಮತ್ತು ಪ್ರಸಾದ ವಿತರಣೆಯ ವ್ಯವಸ್ಥೆ ಮಾಡಲಾಗಿದೆ.

​ದೂರದೂರುಗಳಿಂದ ಅಪಾರ ಸಂಖ್ಯೆಯಲ್ಲಿ ಭಕ್ತಾದಿಗಳು ಆಗಮಿಸುವುದರಿಂದ ಪುಷ್ಕರಣಿಯ ಬಳಿ ಸುರಕ್ಷತೆ, ಸರತಿ ಸಾಲಿನ ದರ್ಶನ ಹಾಗೂ ವಾಹನ ನಿಲುಗಡೆಗೆ ಆಡಳಿತ ಮಂಡಳಿ ಹಾಗೂ ಸೇವಾ ಸಮಿತಿ ವತಿಯಿಂದ ಸಕಲ ಪೂರ್ವಸಿದ್ಧತೆಗಳನ್ನು ಕೈಗೊಳ್ಳಲಾಗಿದೆ.