ಫೋನ್ ಕಳೆದುಹೋಯಿತೇ? ವಾಟ್ಸಾಪ್ ಖಾತೆಯನ್ನು ಸುರಕ್ಷಿತವಾಗಿರಿಸಲು ಮತ್ತು ಚಾಟ್‌ಗಳನ್ನು ಮರಳಿ ಪಡೆಯಲು ಮಾಡಬೇಕಾದ ಕಾರ್ಯಗಳು!

ಸ್ಮಾರ್ಟ್‌ಫೋನ್ ಕಳೆದುಹೋದರೆ ಅಥವಾ ಕಳ್ಳತನವಾದರೆ ವೈಯಕ್ತಿಕ ಮಾಹಿತಿ ಹಾಗೂ ವಾಟ್ಸಾಪ್ ಖಾತೆ ದುರುಪಯೋಗವಾಗುವ ಸಾಧ್ಯತೆ ತುಂಬಾನೇ ಇರುತ್ತದೆ. ಆದರೆ ಸರಿಯಾದ ಹಂತಗಳನ್ನು ಅನುಸರಿಸುವ ಮೂಲಕ ವಾಟ್ಸಾಪ್ ಖಾತೆಯನ್ನು ಸುರಕ್ಷಿತವಾಗಿರಿಸಲು ಮತ್ತು ಚಾಟ್‌ಗಳನ್ನು ಮರಳಿ ಪಡೆಯಲು ಸಾಧ್ಯವಿದೆ.

ಫೋನ್ ಕಳೆದುಹೋದರೆ ಮೊದಲು ಮಾಡಬೇಕಾದ ಕೆಲಸವೆಂದರೆ ನಿಮ್ಮ ಟೆಲಿಕಾಂ ಸೇವಾದಾರರನ್ನು (Telecom Service Provider) ಸಂಪರ್ಕಿಸಿ ಸಿಮ್ ಕಾರ್ಡ್ ಬ್ಲಾಕ್ ಮಾಡಿಸುವುದು. ಇದರಿಂದಾಗಿ ನಿಮ್ಮ ಮೊಬೈಲ್ ಸಂಖ್ಯೆಗೆ ಬರುವ ಒಟಿಪಿ (OTP) ಬಳಸಿ ಬೇರೆ ಯಾರೂ ನಿಮ್ಮ ವಾಟ್ಸಾಪ್ ಲಾಗಿನ್ ಮಾಡಲು ಸಾಧ್ಯವಾಗುವುದಿಲ್ಲ. ನಂತರ ಗುರುತಿನ ದಾಖಲೆಗಳನ್ನು ನೀಡಿ ಅದೇ ನಂಬರ್‌ನಲ್ಲಿ ಹೊಸ ಡುಪ್ಲಿಕೇಟ್ ಸಿಮ್ ಕಾರ್ಡ್ ಪಡೆದು, ಹೊಸ ಫೋನ್‌ನಲ್ಲಿ ಹಾಕಿ ನೆಟ್‌ವರ್ಕ್ ಸಕ್ರಿಯವಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಿ.

ನಂತರ ಹೊಸ ಫೋನ್‌ನಲ್ಲಿ ವಾಟ್ಸಾಪ್ ಇನ್‌ಸ್ಟಾಲ್ ಮಾಡಿ, ನಿಮ್ಮ ಫೋನ್ ನಂಬರ್ ನಮೂದಿಸಿ, ಎಸ್‌ಎಂಎಸ್ ಮೂಲಕ ಬರುವ 6 ಅಂಕಿಯ ವೆರಿಫಿಕೇಶನ್ ಕೋಡ್ ನೀಡಿ ಲಾಗಿನ್ ಆಗಿ. ಒಂದು ಫೋನ್ ನಂಬರ್‌ನಲ್ಲಿ ಒಂದೇ ಸಮಯದಲ್ಲಿ ಕೇವಲ ಒಂದು ಫೋನ್‌ನಲ್ಲಿ ಮಾತ್ರ ವಾಟ್ಸಾಪ್ ಕಾರ್ಯನಿರ್ವಹಿಸುವುದರಿಂದ, ಹೊಸ ಫೋನ್‌ನಲ್ಲಿ ಲಾಗಿನ್ ಆದ ತಕ್ಷಣವೇ ಹಳೆಯ ಫೋನ್‌ನಿಂದ ಖಾತೆಯು ತಾನಾಗಿಯೇ ಲಾಗೌಟ್ ಆಗುತ್ತದೆ. ಲಾಗಿನ್ ಆಗುವ ಸಂದರ್ಭದಲ್ಲಿ ಕ್ಲೌಡ್ ಬ್ಯಾಕಪ್ (Android ಆದರೆ Google Drive, iPhone ಆದರೆ iCloud) ಲಭ್ಯವಿದ್ದರೆ 'Restore' ನೀಡುವ ಮೂಲಕ ಹಳೆಯ ಸಂದೇಶಗಳು ಮತ್ತು ಮೀಡಿಯಾಗಳನ್ನು ಮರಳಿ ಪಡೆಯಬಹುದು.

ಹೊಸ ಸಿಮ್ ಕಾರ್ಡ್ ತಕ್ಷಣ ಪಡೆಯಲು ತಡವಾದರೆ, ಖಾತೆಯು ದುರುಪಯೋಗವಾಗದಂತೆ ತಡೆಯಲು ವಾಟ್ಸಾಪ್ ಸಪೋರ್ಟ್‌ಗೆ (support@whatsapp.com) ಇಮೇಲ್ ಕಳುಹಿಸಿ ತಾತ್ಕಾಲಿಕವಾಗಿ ಖಾತೆಯನ್ನು ಡಿಆಕ್ಟಿವೇಟ್ (Deactivate) ಮಾಡಿಸಬಹುದು. ಮೇಲ್‌ನ ವಿಷಯದಲ್ಲಿ (Subject) 'Lost/Stolen: Please deactivate my account' ಎಂದು ನಮೂದಿಸಿ, ಜೊತೆಗೆ ಅಂತರರಾಷ್ಟ್ರೀಯ ಫಾರ್ಮ್ಯಾಟ್‌ನಲ್ಲಿ ನಿಮ್ಮ ಫೋನ್ ನಂಬರ್ (ಉದಾಹರಣೆಗೆ: +91 98XXXXXXXX) ಮತ್ತು ವಿವರಗಳನ್ನು ಸ್ಪಷ್ಟವಾಗಿ ಬರೆಯಬೇಕು. ಖಾತೆ ಡಿಆಕ್ಟಿವೇಟ್ ಮಾಡಿದರೂ 30 ದಿನಗಳೊಳಗೆ ಹೊಸ ಸಿಮ್ ಬಳಸಿ ಖಾತೆಯನ್ನು ಮತ್ತೆ ಆಕ್ಟಿವೇಟ್ ಮಾಡದಿದ್ದರೆ, ಅದರಲ್ಲಿರುವ ಮಾಹಿತಿಗಳು ಸಂಪೂರ್ಣವಾಗಿ ಡಿಲೀಟ್ ಆಗಿಹೋಗುತ್ತವೆ ಎಂಬುದನ್ನು ನೆನಪಿನಲ್ಲಿಡಿ.

ಖಾತೆಯನ್ನು ಯಶಸ್ವಿಯಾಗಿ ಮರಳಿ ಪಡೆದ ನಂತರ ಭವಿಷ್ಯದ ಸುರಕ್ಷತೆಗಾಗಿ ಕೆಲವು ಮುನ್ನೆಚ್ಚರಿಕೆಗಳನ್ನು ವಹಿಸಬೇಕು. ವಾಟ್ಸಾಪ್ ಸೆಟ್ಟಿಂಗ್ಸ್ ಮೂಲಕ 'Two-Step Verification' ಆನ್ ಮಾಡಿ 6 ಅಂಕಿಯ ಪಿನ್ (PIN) ಸೆಟ್ ಮಾಡಿಕೊಳ್ಳಿ. ಹಾಗೆಯೇ 'Linked Devices' ಪರಿಶೀಲಿಸಿ, ಅಲ್ಲಿ ಯಾವುದಾದರೂ ಅಪರಿಚಿತ ಕಂಪ್ಯೂಟರ್‌ಗಳು ಅಥವಾ ಬ್ರೌಸರ್‌ಗಳು ಕಂಡುಬಂದರೆ ತಕ್ಷಣವೇ 'Log Out' ಮಾಡಿ.