ಪಶ್ಚಿಮ ಬಂಗಾಳ S I R | ಯಾವುದೇ ಕಾರಣ ನೀಡದೆ ಸ್ವಯಂಚಾಲಿತ ತಿರಸ್ಕಾರಗಳ ಮೂಲಕ 5.38 ಲಕ್ಷ ಮತದಾರರನ್ನು ಕೈಬಿಟ್ಟ ECI ಸಾಫ್ಟ್‌ವೇರ್

ನವದೆಹಲಿ:  ಯಾವುದೇ ವ್ಯಕ್ತಿಯು ಅರ್ಜಿ ಸಲ್ಲಿಸದಿದ್ದರೂ ಫಾರ್ಮ್ 7 ಆಕ್ಷೇಪಣೆಗಳ ಮೂಲಕ ಬರೋಬ್ಬರಿ 5,38,320 ಮತದಾರರ ಹೆಸರುಗಳನ್ನು ಪ.ಬಂಗಾಳದ ಅಂತಿಮ ಮತದಾರರ ಪಟ್ಟಿಯಿಂದ ಕೈಬಿಡಲಾಗಿರುವುದನ್ನು ದಾಖಲೆಗಳು ತೋರಿಸಿವೆ. ಚುನಾವಣಾ ಆಯೋಗದ (ಇಸಿಐ) ಸಾಫ್ಟ್‌ವೇರ್ ಮೂಲಕ ಸ್ವಯಂಚಾಲಿತವಾಗಿ ರದ್ದುಪಡಿಸಲಾದ ಹೆಸರುಗಳೂ ಈ ಅಳಿಸುವಿಕೆಗಳಲ್ಲಿ ಸೇರಿವೆ ಎನ್ನುವುದನ್ನು ಪ.ಬಂಗಾಳದ ಮುಖ್ಯ ಚುನಾವಣಾ ಅಧಿಕಾರಿಯವರೇ (ಸಿಇಒ) ನೀಡಿರುವ ಹೇಳಿಕೆಯು ದೃಢಪಡಿಸಿದೆ.

ಕುತೂಹಲಕಾರಿಯಾಗಿ ಈ ಪೈಕಿ ಒಂದರಲ್ಲೂ ಅಳಿಸುವಿಕೆಗೆ ಕಾರಣವನ್ನು ಉಲ್ಲೇಖಿಸಿಲ್ಲ.

ಮತದಾರರ ಪಟ್ಟಿಗಳ ವಿಶೇಷ ತೀವ್ರ ಪರಿಷ್ಕರಣೆಯ (ಎಸ್‌ಐಆರ್) ಭಾಗವಾಗಿ ಡಿ. 14,2025ರಂದು ಕರಡು ಪಟ್ಟಿಯ ಮತ್ತು ಫೆ.28,2026ರಂದು ಅಂತಿಮ ಪಟ್ಟಿಯ ಪ್ರಕಟಣೆಗಳ ನಡುವೆ ಈ ಅಳಿಸುವಿಕೆಗಳು ನಡೆದಿವೆ.

ಇಸಿಐನ ಎರಾನೆಟ್ ಸಾಫ್ಟ್‌ವೇರ್ ಮೂಲಕ ಈ ಸ್ವಯಂಚಾಲಿತ ತಿರಸ್ಕಾರಗಳು ನಡೆದಿವೆ ಎಂದು ಪಶ್ಚಿಮ ಬಂಗಾಳದ ಸಿಇಒ ಅಧಿಕೃತ ಹೇಳಿಕೆಯು ಖಚಿತಪಡಿಸಿದೆ.

ಪ್ರಮುಖ ಅಂಶಗಳು ಮತ್ತು ಸಾಂಸ್ಥಿಕ ಲೋಪಗಳು:

ಸ್ವಯಂಚಾಲಿತ ನಮೂನೆ 7 ಸೃಷ್ಟಿ: ವಿಚಾರಣೆಗಳ ಸಂದರ್ಭದಲ್ಲಿ ಅಧಿಕಾರಿಗಳು ಮತದಾರರನ್ನು ಅನರ್ಹಗೊಳಿಸಿದಾಗ, ಸಾಫ್ಟ್‌ವೇರ್ ತಾನಾಗಿಯೇ ಚುನಾವಣಾ ನೋಂದಣಿ ಅಧಿಕಾರಿಯ (ಇಆರ್‌ಒ) ಹೆಸರಿನಲ್ಲಿ ನಮೂನೆ 7ನ್ನು ಸೃಷ್ಟಿಸಿದೆ. ಪರಿಶೀಲಿಸಲಾದ 284 ಕ್ಷೇತ್ರಗಳಲ್ಲಿ ಶೇ.99.9ರಷ್ಟು ಪ್ರಕರಣಗಳಲ್ಲಿ ಆಕ್ಷೇಪಣೆ ಸಲ್ಲಿಸಿದವರು ಸ್ವತಃ ಚುನಾವಣಾ ಅಧಿಕಾರಿಯೇ ಆಗಿದ್ದಾರೆ. ವಾಸ್ತವವಾಗಿ, ಕೇವಲ 7,733 ಪ್ರಕರಣಗಳಲ್ಲಿ ಮಾತ್ರ ವ್ಯಕ್ತಿಗಳು ನೇರವಾಗಿ ನಮೂನೆ 7 ಅರ್ಜಿಗಳನ್ನು ಸಲ್ಲಿಸಿದ್ದರು.

ಖಾಲಿ ಉಳಿದ ಕಾರಣದ ಅಂಕಣ: ನಮೂನೆ 10ರ ರಿಜಿಸ್ಟರ್‌ಗಳಲ್ಲಿ ಹೆಸರುಗಳನ್ನು ತೆಗೆದುಹಾಕಲು ಕಾರಣವನ್ನು ಉಲ್ಲೇಖಿಸಬೇಕಾದ ಅಂಕಣವು ಸಂಪೂರ್ಣವಾಗಿ ಖಾಲಿಯಾಗಿದೆ. ಇದರಿಂದಾಗಿ ಮತದಾರರಿಗೆ ತಮ್ಮ ಹೆಸರು ಪಟ್ಟಿಯಿಂದ ಮಾಯವಾಗಲು ನಿಖರವಾದ ಕಾರಣವೇನು ಎನ್ನುವುದು ತಿಳಿಯದಂತಾಗಿದೆ. ಕಾನೂನಿನ ಪ್ರಕಾರ, ನಮೂನೆ 7ರಲ್ಲಿ ಆಕ್ಷೇಪಣೆಗೆ ಸ್ಪಷ್ಟ ಕಾರಣವಿರಬೇಕು, ಆದರೆ ಇಲ್ಲಿ ಯಾವುದೇ ಕಾರಣವಿಲ್ಲದೆ ತೆಗೆದುಹಾಕಲಾಗಿದೆ.

ಬಂಗಾಳದಲ್ಲೂ ಉತ್ತರ ಪ್ರದೇಶದ ಮಾದರಿ:

ಅ.2026ರಲ್ಲಿ ಉ.ಪ್ರದೇಶದಲ್ಲೂ ಇದೇ ರೀತಿಯ ವಿದ್ಯಮಾನ ವರದಿಯಾಗಿತ್ತು. ಆದರೆ ಬಂಗಾಳದ ಕರಡು ಪಟ್ಟಿಯು ಉ.ಪ್ರದೇಶದ ಅರ್ಧದಷ್ಟಿದ್ದರೂ, ಅಲ್ಲಿಗಿಂತ ಆರು ಪಟ್ಟು ಹೆಚ್ಚು 'ಯಾವುದೇ ಕಾರಣವಿಲ್ಲದ' ಅಳಿಸುವಿಕೆಗಳು ಇಲ್ಲಿ ನಡೆದಿವೆ.

ಪ್ರಭಾವಿತ ಪ್ರದೇಶಗಳು ಮತ್ತು ಕ್ಷೇತ್ರಗಳು: ಉತ್ತರ 24 ಪರಗಣ ಮತ್ತು ನಾದಿಯಾ ಜಿಲ್ಲೆಗಳು ಗರಿಷ್ಠ ಕಡಿತಗಳಿಗೆ ಸಾಕ್ಷಿಯಾಗಿವೆ (ಶೇ.39). ಅದರಲ್ಲೂ ಬಾಗ್ದಾ, ಬಂಗಾಂವ್ ಉತ್ತರ, ಬಂಗಾಂವ್ ದಕ್ಷಿಣ, ಗಾಯಘಾಟಾ, ಕಲ್ಯಾಣಿ, ಶಾಂತಿಪುರ ಮತ್ತು ರಾಣಾಘಾಟ್‌ನಂತಹ ಮಟುವಾಗಳು ಮತ್ತು ನಿರಾಶ್ರಿತರು ಬಹುಸಂಖ್ಯಾತರಾಗಿರುವ ಕ್ಷೇತ್ರಗಳಲ್ಲಿ ಅತಿಹೆಚ್ಚಿನ 'ಕಾರಣವಿಲ್ಲದ' ಅಳಿಸುವಿಕೆಗಳು ನಡೆದಿವೆ.

ಚುನಾವಣಾ ಫಲಿತಾಂಶಗಳ ಮೇಲಿನ ಪ್ರಭಾವ: 'ಕಾರಣವಿಲ್ಲದ' ಈ ಅಳಿಸುವಿಕೆಗಳು ಪ.ಬಂಗಾಳದಲ್ಲಿ ಎಸ್‌ಐಆರ್ ಬೀರುತ್ತಿರುವ ದೊಡ್ಡ ಮಟ್ಟದ ಹಾನಿಕಾರಕ ಪರಿಣಾಮದ ಒಂದು ಸಣ್ಣ ಭಾಗ ಮಾತ್ರವಾಗಿದೆ. ಒಟ್ಟಾರೆಯಾಗಿ ಮತದಾರರ ಪಟ್ಟಿಯಿಂದ ಕೈಬಿಟ್ಟಿರುವ ಹೆಸರುಗಳ ಸಂಖ್ಯೆಯು 150 ಕ್ಷೇತ್ರಗಳಲ್ಲಿ 2026ರ ಚುನಾವಣೆಯ ಗೆಲುವಿನ ಅಂತರಕ್ಕಿಂತ ದೊಡ್ಡದಾಗಿದೆ. ಅವರೆಲ್ಲರಿಗೂ ಮತ ಚಲಾಯಿಸಲು ಅವಕಾಶ ಸಿಕ್ಕಿದ್ದರೆ ವಿಧಾನಸಭಾ ಚುನಾವಣೆಯ ಫಲಿತಾಂಶಗಳು ಹೇಗಿರುತ್ತಿದ್ದವು ಎಂಬ ಅನುಮಾನ ಈಗ ಮೂಡಿದೆ.

ಒಟ್ಟಾರೆ ಮತದಾರರ ಅಳಿಸುವಿಕೆ ಪ್ರಕ್ರಿಯೆಯು ಪ್ರಜಾಸತ್ತಾತ್ಮಕ ಮೌಲ್ಯಗಳು, ಪಾರದರ್ಶಕತೆ ಮತ್ತು ಸಾಂಸ್ಥಿಕ ಹೊಣೆಗಾರಿಕೆಯ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಮತದಾರರು ತಮ್ಮ ಹೆಸರಿನ ಮರುಸೇರ್ಪಡೆಗಾಗಿ ಹೊಸ ಮತದಾರರಿಗಾಗಿರುವ ನಮೂನೆ 7ರಲ್ಲಿ ಅರ್ಜಿ ಸಲ್ಲಿಸಬೇಕಾದ ಅನಿವಾರ್ಯತೆ ಎದುರಾಗಿದೆ.