ಜನಶತಾಬ್ದಿ ಎಕ್ಸ್‌ಪ್ರೆಸ್‌ಗೆ ‘ಸೂಪರ್‌ಫಾಸ್ಟ್’ ಸ್ಥಾನಮಾನ ಕಡಿತ: ವಿಳಂಬ ಭೀತಿಯಲ್ಲಿ ಪ್ರಯಾಣಿಕರು, ಕೇರಳದಲ್ಲಿ ಹೆಚ್ಚಿದ ಆಕ್ರೋಶ

ತಿರುವನಂತಪುರಂ: ವಂದೇ ಭಾರತ್ ಎಕ್ಸ್‌ಪ್ರೆಸ್ ಬಿಟ್ಟರೆ ಕೇರಳದಲ್ಲಿ ಅತ್ಯಂತ ಜನಪ್ರಿಯ ಹಾಗೂ ಪ್ರಯಾಣಿಕರಿಂದ ಕಿಕ್ಕಿರಿದು ತುಂಬಿ ಹರಿಯುವ ‘ಜನಶತಾಬ್ದಿ’ ಎಕ್ಸ್‌ಪ್ರೆಸ್ ರೈಲುಗಳ ವೇಗಕ್ಕೆ ರೈಲ್ವೆ ಇಲಾಖೆ ಬ್ರೇಕ್ ಹಾಕಿದೆ. ರಾಜ್ಯದಲ್ಲಿ ಸಂಚರಿಸುವ ಎರಡೂ ಜನಶತಾಬ್ದಿ ರೈಲುಗಳ 'ಸೂಪರ್‌ಫಾಸ್ಟ್' ಸ್ಥಾನಮಾನವನ್ನು ರದ್ದುಗೊಳಿಸಿ, ಸಾಮಾನ್ಯ ಮೇಲ್/ಎಕ್ಸ್‌ಪ್ರೆಸ್ ವಿಭಾಗಕ್ಕೆ ಹಿಂಬಡ್ತಿ ನೀಡಲಾಗುತ್ತಿದ್ದು, ಇದು ಸಾವಿರಾರು ನಿತ್ಯ ಪ್ರಯಾಣಿಕರ ಪಾಲಿಗೆ ತೀವ್ರ ಸಂಕಷ್ಟ ತಂದೊಡ್ಡಲಿದೆ. 

ಸೂಪರ್‌ಫಾಸ್ಟ್ ಸ್ಥಾನಮಾನ ಕಳೆದುಕೊಳ್ಳುವುದರಿಂದ ಈ ರೈಲುಗಳಿಗೆ ಮಾರ್ಗಮಧ್ಯೆ ಸಿಗುತ್ತಿದ್ದ ಆದ್ಯತೆಯೂ ನಷ್ಟವಾಗಲಿದೆ. ಪರಿಣಾಮವಾಗಿ, ಸೂಪರ್‌ಫಾಸ್ಟ್ ಹಾಗೂ ವಂದೇ ಭಾರತ್ ರೈಲುಗಳ ಸಂಚಾರಕ್ಕಾಗಿ ಜನಶತಾಬ್ದಿ ರೈಲುಗಳನ್ನು ಮಾರ್ಗಮಧ್ಯೆ ಗಂಟೆಗಟ್ಟಲೆ ನಿಲ್ಲಿಸುವ (ಲೂಪ್ ಲೈನ್‌ಗೆ ತಳ್ಳುವ) ಸಾಧ್ಯತೆ ಹೆಚ್ಚಾಗಿದೆ. ಈಗಾಗಲೇ ವಂದೇ ಭಾರತ್ ಓಡಾಟದ ಕಾರಣದಿಂದಾಗಿ ನಿಗದಿತ ಸಮಯ ಪಾಲಿಸಲು ಪರದಾಡುತ್ತಿದ್ದ ಜನಶತಾಬ್ದಿ ರೈಲುಗಳು, ಇನ್ನು ಮುಂದೆ ಇನ್ನಷ್ಟು ಗಂಟೆಗಳ ಕಾಲ ವಿಳಂಬವಾಗಿ ಸಂಚರಿಸುವ ಆತಂಕ ಎದುರಾಗಿದೆ.

ಯಾವೆಲ್ಲ ರೈಲುಗಳು? ನಂಬರ್ ಬದಲು

ಕೋಝಿಕ್ಕೋಡ್–ತಿರುವನಂತಪುರಂ ಜನಶತಾಬ್ದಿ (12075/12076) ಮತ್ತು ಕಣ್ಣೂರು–ತಿರುವನಂತಪುರಂ ಜನಶತಾಬ್ದಿ (12081/12082) ರೈಲುಗಳನ್ನು ಸೂಪರ್‌ಫಾಸ್ಟ್ ಪಟ್ಟಿಯಿಂದ ಕೈಬಿಡಲಾಗಿದೆ. ಜನವರಿ 1ರಿಂದ ಅನ್ವಯವಾಗುವಂತೆ ಈ ರೈಲುಗಳ ಸಂಖ್ಯೆಯಲ್ಲೂ ಬದಲಾವಣೆ ಬರಲಿದೆ. ಸೂಪರ್‌ಫಾಸ್ಟ್ ಶುಲ್ಕ ರದ್ದಾಗುವುದರಿಂದ ಟಿಕೆಟ್ ದರ ತುಸು ಕಡಿಮೆಯಾಗಲಿದೆ ಎಂದು ರೈಲ್ವೆ ಇಲಾಖೆ ಸಮರ್ಥಿಸಿಕೊಳ್ಳುತ್ತಿದ್ದರೂ, ಪ್ರಸ್ತುತ ಇರುವ ವೇಗ ಮತ್ತು ಸಮಯ ಪಾಲನೆ ಮುಂದುವರಿಯಲಿದೆಯೇ ಎಂಬ ಪ್ರಯಾಣಿಕರ ಆತಂಕಕ್ಕೆ ಇಲಾಖೆ ಸ್ಪಷ್ಟ ಉತ್ತರ ನೀಡಿಲ್ಲ.

ಪ್ರಸ್ತುತ ಸಮಯ ಹಾಗೂ ಮಾರ್ಗ:

• ಕೋಝಿಕ್ಕೋಡ್–ತಿರುವನಂತಪುರಂ (12075): ಮಧ್ಯಾಹ್ನ 1.45ಕ್ಕೆ ಕೋಝಿಕ್ಕೋಡ್‌ನಿಂದ ಹೊರಟು ರಾತ್ರಿ 9.25ಕ್ಕೆ ತಿರುವನಂತಪುರಂ ತಲುಪುತ್ತದೆ. 399 ಕಿ.ಮೀ. ದೂರವನ್ನು 7 ಗಂಟೆ 40 ನಿಮಿಷಗಳಲ್ಲಿ ಕ್ರಮಿಸುತ್ತದೆ. ತಿರೂರು, ಶೊರ್ಣೂರು, ತ್ರಿಶ್ಶೂರ್, ಆಲುವಾ, ಎರ್ನಾಕುಲಂ, ಚೇರ್ತಲಾ, ಆಲಪ್ಪುಳ, ಕಾಯಂಕುಳಂ, ಕೊಲ್ಲಂ ಮತ್ತು ವರ್ಕಲಾದಲ್ಲಿ ನಿಲುಗಡೆ ಹೊಂದಿದೆ. ಮರುಪ್ರಯಾಣದ ರೈಲು (12076) ಬೆಳಿಗ್ಗೆ 5.55ಕ್ಕೆ ತಿರುವನಂತಪುರಂನಿಂದ ಹೊರಟು ಮಧ್ಯಾಹ್ನಕ್ಕೆ ಕೋಝಿಕ್ಕೋಡ್ ತಲುಪುತ್ತದೆ.

• ಕಣ್ಣೂರು–ತಿರುವನಂತಪುರಂ (12081): ಮುಂಜಾನೆ 4.50ಕ್ಕೆ ಕಣ್ಣೂರಿನಿಂದ ಹೊರಟು ಮಧ್ಯಾಹ್ನ 2.10ಕ್ಕೆ ತಿರುವನಂತಪುರಂ ತಲುಪುತ್ತದೆ. 502 ಕಿ.ಮೀ. ದೂರ ಕ್ರಮಿಸುವ ಈ ರೈಲು ತಲಶ್ಶೇರಿ, ವಡಕರ, ಕೋಝಿಕ್ಕೋಡ್, ತಿರೂರು, ಶೊರ್ಣೂರು, ತ್ರಿಶ್ಶೂರ್, ಆಲುವಾ, ಎರ್ನಾಕುಲಂ ಟೌನ್, ಕೊಟ್ಟಾಯಂ, ಚಂಗನಾಶ್ಶೇರಿ, ತಿರುವಲ್ಲಾ, ಚೆಂಗನ್ನೂರು, ಮಾವೇಲಿಕ್ಕರ, ಕಾಯಂಕುಳಂ ಹಾಗೂ ಕೊಲ್ಲಂಗಳಲ್ಲಿ ಪ್ರಮುಖ ನಿಲುಗಡೆ ಹೊಂದಿದೆ. ಮರುಪ್ರಯಾಣದ ರೈಲು (12082) ಮಧ್ಯಾಹ್ನ 2.50ಕ್ಕೆ ಹೊರಟು ಮಧ್ಯರಾತ್ರಿ 12.50ಕ್ಕೆ ಕಣ್ಣೂರು ತಲುಪುತ್ತದೆ.

ಉತ್ತರ ಕೇರಳದ ಪ್ರಯಾಣಿಕರಿಗೆ ಭಾರೀ ಹೊಡೆತ

ಉತ್ತರ ಕೇರಳ ಭಾಗದಿಂದ ರಾಜಧಾನಿ ತಿರುವನಂತಪುರಂಗೆ ವೇಗವಾಗಿ ಹಾಗೂ ಕೈಗೆಟುಕುವ ದರದಲ್ಲಿ ತಲುಪಲು ಜನಶತಾಬ್ದಿ ರೈಲುಗಳೇ ಮುಖ್ಯ ಆಸರೆಯಾಗಿದ್ದವು. ರೈಲ್ವೆಯ ಈ ನಿರ್ಧಾರದಿಂದ ಕಣ್ಣೂರು, ಕಾಸರಗೋಡು, ಕೋಝಿಕ್ಕೋಡ್ ಭಾಗದ ಸಾವಿರಾರು ಉದ್ಯೋಗಿಗಳು, ವಿದ್ಯಾರ್ಥಿಗಳು ಮತ್ತು ರೋಗಿಗಳಿಗೆ ನೇರ ಹೊಡೆತ ಬೀಳಲಿದೆ.

ಅಲ್ಲದೆ, ಕೋಝಿಕ್ಕೋಡ್ ಮಲೆನಾಡು ಭಾಗಗಳಿಗೆ ಜನಶತಾಬ್ದಿ ರೈಲಿನ ಸಮಯಕ್ಕೆ ಸರಿಯಾಗಿ ಕೆಎಸ್‌ಆರ್‌ಟಿಸಿ ಸಂಪರ್ಕ ಬಸ್‌ಗಳ ವ್ಯವಸ್ಥೆ ಇತ್ತು. ರೈಲು ವಿಳಂಬವಾದರೆ ಪ್ರಯಾಣಿಕರಿಗೆ ಈ ಸಂಪರ್ಕ ಬಸ್‌ಗಳು ಕೈತಪ್ಪಿ ಹೋಗಲಿದ್ದು, ರಾತ್ರಿ ವೇಳೆ ಊರು ತಲುಪಲು ಪ್ರಯಾಣಿಕರು ಪರದಾಡುವಂತಾಗುತ್ತದೆ.