ಮತ್ತೆ ಭುಗಿಲೆದ್ದಿತಾ ಭಾರತ ಸರ್ಕಾರ-ಟ್ವಿಟರ್​ ಸಂಘರ್ಷ?; ಇತ್ತೀಚೆಗಷ್ಟೇ ನೇಮಕವಾಗಿದ್ದ ಅಧಿಕಾರಿ ರಾಜೀನಾಮೆ

           ನವದೆಹಲಿ: ಕಳೆದ ಕೆಲವು ತಿಂಗಳುಗಳಿಂದ ಭಾರತ ಸರ್ಕಾರ ಹಾಗೂ ಟ್ವಿಟರ್​ ನಡುವೆ ನಡೆಯುತ್ತಿರುವ ಸಂಘರ್ಷ ಈಗ ಮತ್ತೊಮ್ಮೆ ಭುಗಿಲೆದ್ದಂತಿದೆ. ಏಕೆಂದರೆ ಇತ್ತೀಚೆಗಷ್ಟೇ ನೇಮಕವಾಗಿದ್ದ ರೆಸಿಡೆಂಟ್​ ಗ್ರೀವಿಯನ್ಸ್ ಆಫೀಸರ್​ ಧರ್ಮೇಂದ್ರ ಚತುರ್​ ಆ ಸ್ಥಾನಕ್ಕೆ ರಾಜೀನಾಮೆ ಕೊಟ್ಟಿದ್ದಾರೆ ಎನ್ನಲಾಗಿದೆ.

          ಭಾರತದ ಹೊಸ ಐಟಿ ಕಾಯ್ದೆ ಪ್ರಕಾರ ಸೋಷಿಯಲ್ ಮೀಡಿಯಾ ಸಂಸ್ಥೆಗಳು ರೆಸಿಡೆಂಟ್​ ಗ್ರೀವಿಯನ್ಸ್​ ಆಫೀಸರ್ ಅವರನ್ನು ನೇಮಿಸುವುದು ಕಡ್ಡಾಯ. ಅದರಂತೆ ಈ ಅಧಿಕಾರಿಯನ್ನು ನೇಮಿಸಲು ಟ್ವಿಟರ್ ಹಿಂದೇಟು ಹಾಕುತ್ತಲೇ ಬಂದಿದ್ದು, ಕೊನೆಗೂ ಇತ್ತೀಚೆಗೆ ಧರ್ಮೇಂದ್ರ ಚತುರ್ ಅವರನ್ನು ರೆಸಿಡೆಂಟ್​ ಗ್ರೀವಿಯನ್ಸ್ ಆಫೀಸರ್ ಆಗಿ ನೇಮಕ ಮಾಡಿತ್ತು.

               ಇದೀಗ ಅವರು ಕೇಂದ್ರ ಸರ್ಕಾರದೊಂದಿಗಿನ ಸಂಘರ್ಷದ ಹಿನ್ನೆಲೆಯಲ್ಲಿ ಆ ಸ್ಥಾನದಿಂದ ಕೆಳಗಿಳಿದಿದ್ದಾರೆ ಎನ್ನಲಾಗಿದ್ದು, ಟ್ವಿಟರ್​ನಲ್ಲಿ ಮತ್ತೆ ಆ ಸ್ಥಾನ ತೆರವುಗೊಂಡಿದೆ. ಇದರಿಂದಾಗಿ ಸದ್ಯ ಟ್ವಿಟರ್​ ಮತ್ತೆ ಭಾರತದ ಕಾನೂನನ್ನು ಪಾಲಿಸದಂತಾಗಿದೆ. ಈ ಬಗ್ಗೆ ಟ್ವಿಟರ್​ನಿಂದ ಇನ್ನೂ ಅಧಿಕೃತ ಪ್ರಕಟಣೆ ಹೊರಬೀಳಬೇಕಾಗಿದೆ. ಮೊನ್ನೆಯಷ್ಟೇ ಕೇಂದ್ರ ಐಟಿ ಸಚಿವರ ಟ್ವಿಟರ್ ಹ್ಯಾಂಡಲನ್ನು ಸಂಸ್ಥೆ ಕೆಲಕಾಲದ ಮಟ್ಟಿಗೆ ಬ್ಲಾಕ್ ಮಾಡಿತ್ತು. ಇದೀಗ ಮುಂದಿನ ಬೆಳವಣಿಗೆ ಕುತೂಹಲ ಮೂಡಿಸಿದೆ.