ವಿದೇಶಿ ವಿನಿಮಯ ಕಾನೂನು ಉಲ್ಲಂಘನೆ ಆರೋಪ: ಜಾರಿ ನಿರ್ದೇಶಾನಲಯದಿಂದ ಷಿಯೋಮಿ ಉಪಾಧ್ಯಕ್ಷನಿಗೆ ಸಮನ್ಸ್

            ನವದೆಹಲಿ: ವಿದೇಶಿ ವಿನಿಮಯ ಕಾನೂನು ಉಲ್ಲಂಘನೆ ಆರೋಪದಡಿ ಜಾರಿ ನಿರ್ದೇಶನಾಲಯ, ಷಿಯೋಮಿ ಉಪಾಧ್ಯಕ್ಷ ಮನು ಕುಮಾರ್ ಜೈನ್ ಅವರಿಗೆ ಸಮನ್ಸ್ ಜಾರಿಗೊಳಿಸಿದೆ. 

                ಕಳೆದ ಕೆಲವು ವರ್ಷಗಳಿಂದ ಸಂಸ್ಥೆ ವಿದೇಶಕ್ಕೆ ಕೋಟ್ಯಂತರ ರೂಪಾಯಿ ಮೊತ್ತದ ಹಣ ಕಳಿಸಿರುವುದಕ್ಕೆ ಸಂಬಂಧಿಸಿದಂತೆ ಫೇಮಾ ಕಾಯ್ದೆಯಡಿ ಜಾರಿ ನಿರ್ದೇಶನಾಲಯ, ಸಂಸ್ಥೆ ಹಾಗೂ ಅದರ ಅಧಿಕಾರಿಗಳನ್ನು ವಿಚಾರಾಣೆಗೆ ಒಳಪಡಿಸಿದೆ. 

                  ಷಿಯೋಮಿಯ ಭಾರತದ ಮಾಜಿ ಮುಖ್ಯಸ್ಥರಾಗಿದ್ದ ಮನು ಕುಮಾರ್ ಜೈನ್ ಅವರಿಗೆ ಕಂಪನಿಗೆ ಸಂಬಂಧಿಸಿದ ಆರ್ಥಿಕ ದಾಖಲೆಗಳನ್ನು ಖುದ್ದಾಗಿ ಬಂದು ಅಥವಾ ಅಧಿಕೃತ ಪ್ರತಿನಿಧಿಯ ಮೂಲಕ ಸಲ್ಲಿಸುವಂತೆ ಜಾರಿ ನಿರ್ದೇಶನಾಲಯ ಸೂಚಿಸಿದೆ. 

               ಷಿಯೋಮಿಯ ಷೇರು, ಹೂಡಿಕೆಯ ಮೂಲ, ವೆಂಡರ್ ಕಾಂಟ್ರಾಕ್ಟ್ ಗಳು ಹಾಗೂ ಭಾರತದ ಮ್ಯಾನೇಜ್ಮೆಂಟ್ ಗೆ ಪಾವತಿಸಿರುವ ಹಣ ಹಾಗೂ ವಿದೇಶಕ್ಕೆ ಕಳಿಸಿರುವ ಹಣದ ಮಾಹಿತಿಗಳನ್ನು ಜಾರಿ ನಿರ್ದೇಶನಾಲಯ ಪ್ರಶ್ನಿಸಿದೆ.

              ಈ ಬಗ್ಗೆ ಷಿಯೋಮಿ ವಕ್ತಾರರು ಹೇಳಿಕೆ ನೀಡಿದ್ದು, ನಾವು ಕಾನೂನನ್ನು ಗೌರವಿಸುವ ಹಾಗೂ ಜವಾಬ್ದಾರಿಯುತ ಸಂಸ್ಥೆ ಎಂದು ಹೇಳಿದ್ದಾರೆ.