ಪೋಲೀಸ್ ಕಸ್ಟಡಿಗೆ ಬಂದ ಎಸ್‍ಎಫ್‍ಐ ಮುಖಂಡನಿಗೆ ಹಾರ ತುರಾಯಿಗಳ ಸ್ವಾಗತ: ಎಬಿವಿಪಿಯಿಂದ ಡಿಜಿಪಿಗೆ ದೂರು

                  ತಿರುವನಂತಪುರ: ಕೊಲೆ ಯತ್ನ ಸೇರಿದಂತೆ ಹಲವು ಪ್ರಕರಣಗಳಲ್ಲಿ ಆರೋಪಿಯಾಗಿರುವ ಎಸ್‍ಎಫ್‍ಐ ಮುಖಂಡ ಪೋಲೀಸ್ ಕಸ್ಟಡಿಯಲ್ಲಿರುವಾಗಲೇ ನೀಡಿದ ಸ್ವಾಗತದ ವಿರುದ್ಧ ಎಬಿವಿಪಿ ರಾಜ್ಯ ಪೋಲೀಸ್ ಮುಖ್ಯಸ್ಥರಿಗೆ ದೂರು ನೀಡಿದೆ. ಹೈಕೋರ್ಟ್‍ನಿಂದ 14 ದಿನಗಳ ಬಂಧನಕ್ಕೆ ಒಳಗಾಗಿದ್ದ ಎಸ್‍ಎಫ್‍ಐ ರಾಜ್ಯ ಕಾರ್ಯದರ್ಶಿ ಪಿ.ಎಂ.ಅರ್ಶೋಕ್ ಅವರನ್ನು ಪೋಲೀಸ್ ಕಸ್ಟಡಿಗೆ ಒಪ್ಪಿಸಲಾಗಿದೆ. ಕಾನೂನು ಸುವ್ಯವಸ್ಥೆಗೆ ಸವಾಲು ಹಾಕಿ ಕ್ರಿಮಿನಲ್ ಪ್ರಕರಣದ ಆರೋಪಿಗಳಿಗೆ ಇಂತಹ ಆರತಕ್ಷತೆ ಏರ್ಪಡಿಸಲಾಗಿದೆ ಎಂದು ಡಿಜಿಪಿ ಅನಿಲ್ ಕಾಂತ್ ಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.

                ಎಐಎಸ್‍ಎಫ್ ಮಹಿಳಾ ಮುಖಂಡರೊಬ್ಬರ ಮೇಲೆ ಜಾತಿ ಹೆಸರಿನಲ್ಲಿ ಹಲ್ಲೆ ನಡೆಸಿದ ಆರೋಪ ಮತ್ತು ಇತರ ಹಲವು ಕ್ರಿಮಿನಲ್ ಪ್ರಕರಣಗಳ ಆರೋಪ ಹೊತ್ತಿರುವ ಅರ್ಶೋ ಅವರ ಜಾಮೀನನ್ನು ಈ ವರ್ಷ ಫೆಬ್ರವರಿ 28ರಂದು ಹೈಕೋರ್ಟ್ ರದ್ದುಗೊಳಿಸಿತ್ತು. ಪೋಲೀಸ್ ಕಸ್ಟಡಿಯಲ್ಲಿರುವ ಆರೋಪಿಗಳಿಗೆ ಕಾನೂನು ಉಲ್ಲಂಘಿಸಿ ಸ್ವಾಗತ ನೀಡಿದವರು ಮತ್ತು ಅಧಿಕೃತ ಕರ್ತವ್ಯವನ್ನು ದುರುಪಯೋಗಪಡಿಸಿಕೊಂಡವರ ವಿರುದ್ಧವೂ ಕ್ರಮ ಕೈಗೊಳ್ಳುವಂತೆ ದೂರಿನಲ್ಲಿ ಕೋರಲಾಗಿದೆ.