ಸಂಸದರ ರೈಲ್ವೆ ಪ್ರಯಾಣದ ಬಿಲ್, ರೂ. 62 ಕೋಟಿ

         ನವದೆಹಲಿ: ಕಳೆದ ಐದು ವರ್ಷಗಳಲ್ಲಿ ಹಾಲಿ ಮತ್ತು ಮಾಜಿ ಲೋಕಸಭಾ ಸದಸ್ಯರ ಉಚಿತ ರೈಲು ಪ್ರಯಾಣದಿಂದ ಬೊಕ್ಕಸಕ್ಕೆ 62 ಕೋಟಿ ರೂ. ಹೊರೆ ಬಿದ್ದಿದೆ. ಇದರಲ್ಲಿ ಕರೊನಾ ಸಂಕ್ರಾಮಿಕ ಅವಧಿಯಲ್ಲಿ ಪ್ರಯಾಣಿಸಿದ ಬಿಲ್ 2.5 ಕೋಟಿ ರೂ. ಸೇರಿದೆ ಎಂದು ಆರ್​ಟಿಐ ಕಾಯ್ದೆಯಡಿ ಬಹಿರಂಗಪಡಿಸಲಾದ ಮಾಹಿತಿ ತಿಳಿಸಿದೆ.

          ಹಾಲಿ ಸಂಸದರು ರೈಲ್ವೆಯ ಪ್ರಥಮ ದರ್ಜೆ ಹವಾನಿಯಂತ್ರಿತ ಅಥವಾ ಎಕ್ಸಿಕ್ಯುಟಿವ್ ಕ್ಲಾಸ್​ನಲ್ಲಿ ಉಚಿತವಾಗಿ ಪ್ರಯಾಣಿಸಲು ಅರ್ಹರಾಗಿರುತ್ತಾರೆ. ಅವರ ಸಂಗಾತಿಗಳು ಸಹ ಕೆಲವು ಷರತ್ತುಗಳ ಅಡಿಯಲ್ಲಿ ರೈಲುಗಳಲ್ಲಿ ಉಚಿತ ಪ್ರಯಾಣ ಮಾಡಬಹುದಾಗಿದೆ. ಮಾಜಿ ಸಂಸದರು ಸಹ ಎಸಿ-2 ಟಯರ್​ನ ಯಾವುದೇ ರೈಲಿನಲ್ಲಿ ತಮ್ಮ ಸಂಗಾತಿಯೊಂದಿಗೆ ಅಥವಾ ಎಸಿ-1ನಲ್ಲಿ ಒಬ್ಬಂಟಿಯಾಗಿ ಪ್ರಯಾಣಿಸಲು ಅರ್ಹರಾಗಿರುತ್ತಾರೆ.

             ಮಧ್ಯಪ್ರದೇಶ ಮೂಲದ ಚಂದ್ರಶೇಖರ್ ಗೌರ್ ಎಂಬುವರು ಸಲ್ಲಿಸಿದ ಮಾಹಿತಿ ಹಕ್ಕು ಪ್ರಶ್ನೆಗೆ ಉತ್ತರಿಸಿರುವ ಲೋಕಸಭೆಯ ಸಚಿವಾಲಯವು, 2017-2018ರಿಂದ 2021-22ರವರೆಗೆ ಹಾಲಿ ಸಂಸದರ ಪ್ರಯಾಣಕ್ಕಾಗಿ 35.21 ಕೋಟಿ ರೂಪಾಯಿ ಮತ್ತು ಮಾಜಿ ಸಂಸದರ ಪ್ರಯಾಣಕ್ಕೆ 26.82 ಕೋಟಿ ರೂ. ಬಿಲ್ ಅನ್ನು ರೈಲ್ವೆಯಿಂದ ಸ್ವೀಕರಿಸಲಾಗಿದೆ ಎಂದು ಹೇಳಿದೆ. 2020-21ರ ಕರೊನಾ ಸಾಂಕ್ರಾಮಿಕ ಅವಧಿಯಲ್ಲಿ ಹಾಲಿ ಮತ್ತು ಮಾಜಿ ಸಂಸದರು ರೈಲ್ವೆ ಪಾಸ್ ಗಳನ್ನು ಬಳಸಿದ್ದು, ಅದರ ಬಿಲ್ ಕ್ರಮವಾಗಿ 1.29 ಕೋಟಿ ಹಾಗೂ 1.18 ಕೋಟಿ ರೂ. ಆಗಿದೆ ಎಂದು ಸಚಿವಾಲಯ ತಿಳಿಸಿದೆ.