2022 ರಲ್ಲಿ ಮನೆಗಳ ಮಾರಾಟ ಉತ್ತುಂಗಕ್ಕೆ; 3.65 ಲಕ್ಷ ಯುನಿಟ್ ಮಾರಾಟ- ವರದಿ

                    ನವದೆಹಲಿ:2022 ರಲ್ಲಿ ದೇಶದ 7 ಟಾಪ್ ನಗರದಲ್ಲಿ ಮನೆಗಳು ದಾಖಲೆಯ ಪ್ರಮಾಣದಲ್ಲಿ ಮಾರಾಟ ಆಗಿವೆ. 2014 ರ ನಂತರ ಇದೇ ಮೊದಲ ಬಾರಿಗೆ ದಾಖಲೆಯ ಪ್ರಮಾಣದಲ್ಲಿ ಈ ವರ್ಷ ಮನೆಗಳ ಮಾರಾಟ ನಡೆದಿದೆ ಎನ್ನುತ್ತಿದೆ ರಿಯಲ್ ಎಸ್ಟೇಟ್ ಕನ್ಸಲ್ಟೆನ್ಸಿ ಸಂಸ್ಥೆ ಅನಾರಾಕ್. 2022 ರಲ್ಲಿ ಆಸ್ತಿಗಳ ಬೆಲೆ ಹಾಗೂ ಗೃಹ ಸಾಲದ ಬಡ್ಡಿ ಏರಿಕೆಯಾದ ಹೊರತಾಗಿಯೂ ಮನೆಗಳ ಮಾರಾಟ ಏರಿಕೆ ಕಂಡಿದೆ.
 
                            2021 ರಲ್ಲಿ 7 ನಗರಗಳಲ್ಲಿ 2,36,500 ಮನೆಗಳು ಮಾರಾಟವಾಗಿದ್ದರೆ, 2022 ರಲ್ಲಿ 3,64,900 ಮನೆಗಳು ಮಾರಾಟವಾಗಿತ್ತು, ಕಳೆದ ವರ್ಷಕ್ಕೆ ಹೋಲಿಕೆ ಮಾಡಿದರೆ ಈ ವರ್ಷ ಶೇ.54 ರಷ್ಟು ಏರಿಕೆಯಾಗಿದೆ. 

                  2014 ರಲ್ಲಿ 3.43 ಲಕ್ಷ ಯುನಿಟ್ ಗಳು ಮಾರಾಟವಾಗಿತ್ತು ಎನ್ನುತ್ತಿದೆ ಅಂಕಿ- ಅಂಶ  ನಗರಗಳ ವಿಷಯಕ್ಕೆ ಬರುವುದಾದರೆ ಮುಂಬೈ ಮೆಟ್ರೋಪಾಲಿಟನ್ ಪ್ರದೇಶ (ಎಂಎಂಆರ್) ಅತಿ ಹೆಚ್ಚು ಮನೆಗಳ ಮಾರಾಟ ಕಂಡಿದೆ. 2022 ರಲ್ಲಿ ಈ ಪ್ರದೇಶದಲ್ಲಿ 1,09,700 ಮನೆಗಳು ಬಿಕರಿಯಾಗಿದೆ. ನಂತರದ ಸ್ಥಾನದಲ್ಲಿ ಎನ್ ಸಿಆರ್ ಇದ್ದು 63,700 ಯುನಿಟ್ ಗಳು ಮಾರಾಟವಾಗಿದೆ. 

                   ಹೊಸ ಮನೆಗಳ ನಿರ್ಮಾಣ ಶೇ.51 ರಷ್ಟು ಏರಿಕೆ ಕಂಡಿದೆ. ಎಂಎಂಆರ್ ಹಾಗೂ ಹೈದರಾಬಾದ್ ನಲ್ಲಿ ಹೊಸ ಯೋಜನೆಗಳನ್ನು ಪ್ರಾರಂಭಿಸಲಾಗಿದ್ದು, ಒಟ್ಟಾರೆ ಈ ವರ್ಷ ಪ್ರಾರಂಭವಾಗಿರುವುದರ ಪೈಕಿ ಶೇ.54 ರಷ್ಟು ಈ ಪ್ರದೇಶಗಳಲ್ಲಿಯೇ ಇವೆ. ಕಳೆದ ವರ್ಷಕ್ಕೆ ಹೋಲಿಕೆ ಮಾಡಿದರೆ ಬೆಂಗಳೂರಿನಲ್ಲಿ 2022 ರಲ್ಲಿ 49,500 ಯುನಿಟ್ ಗಳು ಮಾರಾಟವಾಗಿದ್ದು ಶೇ.50 ರಷ್ಟು ಏರಿಕೆ ದಾಖಲಾಗಿದೆ. ಹೈದರಾಬಾದ್ ನಲ್ಲಿ 2022 ರಲ್ಲಿ 47,500 ಯುನಿಟ್ ಮಾರಾಟವಾಗಿದ್ದು, ಶೇ.87 ರಷ್ಟು ಜಿಗಿತ ಕಂಡಿದೆ.