ಮಕರ ಬೆಳಕು ಮಹೋತ್ಸವ: ಶರಣ ಮಂತ್ರ ಮುಕರಿತ ಶಬರಿಮಲೆ: ಶಬರಿಗಿರಿಯಲ್ಲಿ ತಂಗತೊಡಗಿದ ಯಾತ್ರಾರ್ಥಿಗಳು

              ಶಬರಿಮಲೆ: ಶಬರಿಮಲೆ ಮಕರ ಬೆಳಕು ಉತ್ಸವಕ್ಕೆ ಇನ್ನೇನು ಕೆಲವೇ ದಿನಗಳು ಬಾಕಿ ಉಳಿದಿದ್ದು, ಲಕ್ಷಾಂತರ ಭಕ್ತರು ಶಬರೀಶನ ದರ್ಶನದ ಪುಣ್ಯಕ್ಕೆ ಕಾದು ಕುಳಿತಿದ್ದಾರೆ.
             ಮಕರಜ್ಯೋತಿ ದರ್ಶನ ಸಾಧ್ಯವಿರುವ ಶಬರಿಮಲೆಯ ಎಲ್ಲ ಪ್ರಮುಖ ಸ್ಥಳಗಳಲ್ಲಿ ವಿವಿಧ ಇಲಾಖೆಗಳ ನೇತೃತ್ವದಲ್ಲಿ ಸಿದ್ಧತೆಗಳು ಭರದಿಂದ ಸಾಗಿವೆ. ಯಾತ್ರಾರ್ಥಿಗಳು ಜ್ಯೋತಿ ದರ್ಶನಕ್ಕಾಗಿ ಸನ್ನಿಧಿಯ ವಿವಿಧ ಭಾಗಗಳಲ್ಲಿ ಬಿಡಾರ ಹೂಡಲು ಆರಂಭಿಸಿದ್ದಾರೆ.
             ಯಾತ್ರಾರ್ಥಿಗಳಿಗಾಗಿ ಎಲ್ಲಾ ಕೊಠಡಿಗಳನ್ನು ಮುಂಚಿತವಾಗಿ ಕಾಯ್ದಿರಿಸಲಾಗಿದೆ. ಐದಾರು ದಿನಗಳ ಕಾಲ ನಿರಂತರವಾಗಿ ಕೊಠಡಿ ಕಾಯ್ದಿರಿಸಿದ ಯಾತ್ರಾರ್ಥಿಗಳು ಸಾಕಷ್ಟು ಸಂಖ್ಯೆಯಲ್ಲಿದ್ದಾರೆ. ಸನ್ನಿಧಿಯ ಕೊಠಡಿಗಳಲ್ಲಿಯೇ 17,000 ಯಾತ್ರಿಕರು ತಂಗಬಹುದು. ಮಕರ ಬೆಳಕು ಮಹೋತ್ಸವಕ್ಕಾಗಿ ದೇಗುಲದ ಗರ್ಭಗೃಹ ಬಾಗಿಲು ತೆರೆದ ಬಳಿಕ ಪ್ರತಿ ದಿನವೂ ಸನ್ನಿಧಿಗೆ ಬೃಹತ್ ಸಂಖ್ಯೆಯ ಯಾತ್ರಾರ್ಥಿಗಳು ಹರಿದು ಬರುತ್ತಿದ್ದಾರೆ. ಪವಿತ್ರ ಮಕರ ಬೆಳಕಿನ ವೀಕ್ಷಣೆಗಾಗಿ ಪರ್ವತ ಚಾರಣ ಮಾಡಿದ ಸುಮಾರು 25 ಪ್ರತಿಶತದಷ್ಟು ರಾಜ್ಯೇತರ ಯಾತ್ರಾರ್ಥಿಗಳು ನಿನ್ನೆಯಿಂದ ಯಾತ್ರಾ ಕೇಂದ್ರಗಳು ಮತ್ತು ಇತರ ಸ್ಥಳಗಳಲ್ಲಿ ಕ್ಯಾಂಪ್ ಮಾಡಲು ಪ್ರಾರಂಭಿಸಿದರು.
          ಸನ್ನಿಧಿ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಬಿಡಾರ ಹೂಡಿರುವ ಯಾತ್ರಾರ್ಥಿಗಳ ಜತೆಗೆ ಲಕ್ಷಗಟ್ಟಲೆ ಯಾತ್ರಾರ್ಥಿಗಳು ಬೆಟ್ಟ ಏರಿ ಬರುತ್ತಿದ್ದು ಜನಸಂದಣಿಯನ್ನು ನಿಯಂತ್ರಿಸುವುದೇ ಪೋಲೀಸರ ಮುಂದಿರುವ ಪ್ರಮುಖ ಸವಾಲು. ಮಕರ ಬೆಳಕು ದಿನಕ್ಕಾಗಿ ಶಬರಿಮಲೆಯಲ್ಲಿ ತಂಗುವ ಸಾವಿರಾರು ಯಾತ್ರಾರ್ಥಿಗಳಿಗೆ ಶುದ್ಧ ನೀರು ಸೇರಿದಂತೆ ಮೂಲ ಸೌಕರ್ಯ ಕಲ್ಪಿಸುವಂತೆ ದೇವಸ್ವಂ ಮಂಡಳಿಯೂ ಒತ್ತಡದಲ್ಲಿದೆ.
          ಮಕರ ಬೆಳಕು ಗೋಚರ ದಿನವಾದ 14 ರಂದು ಮೂರು ಲಕ್ಷಕ್ಕೂ ಹೆಚ್ಚು ಯಾತ್ರಾರ್ಥಿಗಳು ತಿರುವಾಭರಣ ಅಲಂಕೃತ ಅಯ್ಯಪ್ಪ ದರ್ಶನಕ್ಕೆ ಸನ್ನಿಧಾನಂ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಸೇರುತ್ತಾರೆ ಎಂದು ದೇವಸ್ವಂ ಮಂಡಳಿ ಮತ್ತು ಪೋಲೀಸರು ಅಂದಾಜಿಸಿದ್ದಾರೆ. ಹೀಗಾಗಿ ಮಕರ ಬೆಳಕು ವೀಕ್ಷಿಸಿ ಬೆಟ್ಟದಿಂದ ಇಳಿಯುವ ಯಾತ್ರಾರ್ಥಿಗಳ ನೂಕುನುಗ್ಗಲು ನಿಯಂತ್ರಣ ತಪ್ಪುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಯಾತ್ರಾರ್ಥಿಗಳ ವಾಪಸಾತಿಗೆ ಕೆಎಸ್‍ಆರ್‍ಟಿಸಿ ಹೆಚ್ಚುವರಿ ಸಾವಿರ ಬಸ್‍ಗಳನ್ನು ಸಿದ್ಧಪಡಿಸಿದೆ.
           ಮಂಡಲ ಅವಧಿಯ ಅಂತ್ಯದಲ್ಲಿ ದೇವಸ್ವಂ ಮಂಡಳಿಗೆ ಶಬರಿಮಲೆಯಿಂದ ವಿವಿಧ ವಸ್ತುಗಳಲ್ಲಿ ಸುಮಾರು 230 ಕೋಟಿ ರೂಪಾಯಿ ಆದಾಯ ಬಂದಿದೆ. ಮಕರ ಬೆಳಕು  ಯಾತ್ರೆ ಅಂತಿಮ ಹಂತ ತಲುಪುವ ವೇಳೆಗೆ 400 ಕೋಟಿ ದಾಟುವ ಸೂಚನೆ ಇದೆ. ಈ ಬಾರಿ ಶಬರಿಮಲೆಯಲ್ಲಿ ದಾಖಲೆ ಆದಾಯದ ನಿರೀಕ್ಷೆಯಲ್ಲಿ ದೇವಸ್ವಂ ಮಂಡಳಿ ಇದೆ.