ಲತಾ ಮಂಗೇಶ್ಕರ್ ಪ್ರಶಸ್ತಿ: ಗಾನಕೋಗಿಲೆಯನ್ನು ನೆನೆದ ಆಶಾ ಭೋಸ್ಲೆ, ವಿದ್ಯಾಬಾಲನ್‌

                ಮುಂಬೈ: 'ಅಭಿಮಾನಿಗಳು ಉಡುಗೊರೆ ಕೊಟ್ಟಂಥ ಸಾರಿ ಧರಿಸಿ ಅಕ್ಕ(ಲತಾ ಮಂಗೇಶ್ಕರ್) ಪ್ರೇಕ್ಷಕರ ನಡುವಿನಲ್ಲಿದ್ದಾರೆ' ಎಂದು ಖ್ಯಾತ ಹಿನ್ನೆಲೆ ಗಾಯಕಿ ಆಶಾಭೋಸ್ಲೆ ಅವರು ಲತಾ ಮಂಗೇಶ್ಕರ್ ಅವರನ್ನು ನೆನಪಿಸಿಕೊಂಡರು.

                 ಸೋಮವಾರ ರಾತ್ರಿ ಇಲ್ಲಿ ನಡೆದ ಮಂಗೇಶ್ಕರ್ ಫ್ಯಾಮಿಲಿ ಅವಾರ್ಡ್‌ ಕಾರ್ಯಕ್ರಮವು ಅಮೂಲ್ಯ ಕ್ಷಣಗಳಿಗೆ ಸಾಕ್ಷಿಯಾಗಿತ್ತು.

             ಬಾಲಿವುಡ್‌ನ ದಂತಕತೆ ಲತಾ ಮಂಗೇಶ್ಕರ್ ಅವರು ಫೆಬ್ರುವರಿ 2022ರಲ್ಲಿ ನಿಧನ ಹೊಂದಿದ್ದು, ಅವರ ಹೆಸರಿನಲ್ಲಿ ಕೊಡುವ 'ಲತಾ ದೀನಾನಾಥ್ ಮಂಗೇಶ್ಕರ್‌' ಪ್ರಶಸ್ತಿಯನ್ನು ಗುರುತರವಾಗಿ ದೇಶ, ಸಮಾಜ ಹಾಗೂ ಜನ ಸೇವೆ ಮಾಡಿದವರಿಗೆ ನೀಡಲಾಗುತ್ತಿದೆ. 2023ನೇ ಸಾಲಿನ ಪ್ರಶಸ್ತಿಯನ್ನು ಜನಪ್ರಿಯ ಹಿನ್ನೆಲೆ ಗಾಯಕಿ ಆಶಾ ಭೋಸ್ಲೆ (ಲತಾ ಮಂಗೇಶ್ಕರ್ ತಂಗಿ) ಅವರಿಗೆ ಪ್ರದಾನ ಮಾಡಲಾಯಿತು. ಈ ಸಂದರ್ಭ ಆಶಾ ಅವರು ಅಕ್ಕನನ್ನು ಸ್ಮರಿಸಿಕೊಂಡರು.

                'ಈ ಪ್ರಶಸ್ತಿ ಅಮೂಲ್ಯವಾದುದು. ಲತಾಕ್ಕ ಇಲ್ಲಿ ಸೇರಿದ ಜನರ ನಡುವಿನಲ್ಲಿದ್ದಾರೆ' ಎಂದು 89 ವರ್ಷದ ಆಶಾ ಕೃತಜ್ಞತೆ ಸಲ್ಲಿಸಿದರು.

             ಸಮಾರಂಭದಲ್ಲಿ ದೀನಾನಾಥರ ಐವರು ಮಕ್ಕಳಲ್ಲಿ ಮೂರನೆಯವರಾದ ಆಶಾ ಅವರು, ಸಹೋದರ ಹೃದಯನಾಥ್ ಮಂಗೇಶ್ಕರ್ ಅವರು ಸಂಗೀತ ಸಂಯೋಜಿಸಿದ್ದ ಲತಾ ಅವರ ಹಿನ್ನೆಲೆ ಗಾಯನವಿದ್ದ 'ಮೊಗರಾ ಫುಲಾಲ' ಎಂಬ ಮರಾಠಿ ಹಾಡನ್ನು ಹಾಡಿದರು.

                  ಬಾಲಿವುಡ್‌ ನಟಿ ವಿದ್ಯಾಬಾಲನ್ ಅವರ ನಟನೆಯನ್ನು ಪರಿಗಣಿಸಿ ವಿಶೇಷ ಪುರಸ್ಕಾರವನ್ನು ಈ ಕಾರ್ಯಕ್ರಮದಲ್ಲಿ ನೀಡಲಾಯಿತು. 'ಲತಾ ಮಂಗೇಶ್ಕರ್ ಅವರ ದನಿ ದೈವಿಕವಾದುದು. ನಟನೆಗೆ ಹೊಸದಾಗಿ ಬಂದ ಆರಂಭದಲ್ಲಿ ನಾನು ಲತಾರ ಸಂಗೀತ ಕಾರ್ಯಕ್ರಮಗಳಿಗನ್ನು ನೋಡುತ್ತಿದ್ದೆ. ಅವರು ನನಗಾಗಿ ಸಾರಿ ಕೊಟ್ಟು ಕಳಿಸಿದ್ದರು. ಅದು ನನ್ನ ಸೌಭಾಗ್ಯ' ಎಂದು ವಿದ್ಯಾಬಾಲನ್‌ ಅವರು ಲತಾ ಮಂಗೇಶ್ಕರ್ ಅವರನ್ನು ಸ್ಮರಿಸಿಕೊಂಡರು.